Luc 20
20
Nyevege Sesu dinyange diguvage mambu mane
1Wisi mosi, ve Sesu nenzilange bumongu musamu boti gu gari ndagu Nyambi, bivunde bi bevegitsi be pagu ne bivunde bi migage mi Moyise ne bivunde bi dibundu beruge ve mbeke Sesu, 2bemwivule re «Dwambili: Nye sekuvege dinyange diguvage mambu mane?» 3Sesu negubagule re «Menu gwami nyanwivuli ngoku yiyi, 4nyambili anu, nye sevege San dinyange di gubatise batu gu mambe, Nyambi vo batu?» 5Bambilange yawu ne yawu re «Pasi re dwagwagule re “Nyambi semurume”, agudwambile re “Agye nusasingile me San senwambile?” 6Pasi re dwagwagule gwandi re “Batu besemurume”, batu babe begudutinde mebume nonge dukufu. Mbare bayabi re San ayibange mubigitsi.» 7Bagule re «Dusayabi gere Nyambi vo mutu wuvege San dinyange.» 8Sesu negubambile re «Menu gwami nzagunwambile mutu wusepege dinyange.»
Kugu yi bedyanzitsi babi
9Sesu negukunde verile bumongu kugu yiyi: «Mutu avare gyambe gi mfuge yaburi milunde myanengure vini, negugisise ne bedyanzitsi, ayende gu muvevilu gitsingu. 10Gigumbi gi gudoke milunde neguruge, arume mudyanzitsi andi gu bedyanzitsi be gyambe nonge bekumutindile di andi dikabu di milunde. Tumbe bedyanzitsi be gyambe bemudimbe, bemugabuse mekake ne mekake. 11Fumu gyambe akunderume mudyanzitsi wumosi. Bedyanzitsi be gyambe bemugange gwandi, bemudimbe, bemusyenge, bemugabuse mekake ne mekake. 12Akunderume mudyanzitsi wu mureru. Bedyanzitsi be gyambe bemutsungule, bemusanze. 13Fumu gyambe negukwekwambile re “A niva tsye? Nigurume mwane ami murime. Mandi begumugobise.” 14Tumbe bedyanzitsi be gyambe negumwene, bambile yawu ne yawu re “Wuwu re givinge gi fumu gyambe. Dumuboki anu, nonge gyambe gikube gi etu.” 15Bedyanzitsi be gyambe bemubege tage ne gyambe, bemuboke.
Fumu gyambe aguvage tsye ve agurugile? 16Aguseboke bedyanzitsi be gyambe, aguse vege gyambe gine bedyanzitsi benzusu.» Batu negulu nane, bambile re «Disagube nane.» 17Tumbe Sesu negubegengise, negubambile re «Nyambili anu disumu di musamu wuberende mu musamu Nyambi, wagwambili re
“Dimani dibume batu barungi,
dyakaluge dimani dyadyotsi ndagu.#20.17 Gisangumu gi nimbu (Psaume) 118.22”
18Mutu wotsu wuguberuge ve yulu dimani dine, agutsunguge. Wotsu wugubiku ne dimani dine, aguniguge.»
Lepu yivegu kanangu Sesare
19Bivunde bi bevegitsi be pagu ne bivunde bi migage mi Moyise bekebange gugange Sesu gigumbi gine. Mbare beyabange ayambile mambu mane dibandu yawu. Tumbe bekubange ne wome bumongu. 20Bivunde bi migage mi Moyise begengilange Sesu dikengi, re dibandu berumine bivyangi gwegulu me yandi gwambile, nonge gere asegwambile mambu mabi, bekemubege gwemusake gu bivunde bi migage negu ngowu. 21Batu bane bemwivule ngoku yiyi: «Mulonzi, dwayabi re motsu me wagwambili negunenze me sungeme. Wusagengisi ginengu gi mutu. Tumbe wanenzi mambu me Nyambi garondi re batu bevagi.» 22Dwambili: «Mugage etu waduvegi dinyange diguvege lepu gu Sesare?» 23Tumbe Sesu neguyabe dyele di awu, abagule re 24«Tigitsi anu fure mwange. Ginengu gi mu fure yiyi ne dine bi nye?» Bagule: «Bi Sesare.» 25Vane abambile: «Gabusilanu Sesare bivave bi Sesare. Bi Nyambi, veganu Nyambi.» 26Mu gyambitsi gi Sesu ve wusu bumongu, beseyulu dyambu dibi dibe benze mufurigile. Tumbe bekumame gyambitsi gi andi, bekutsibige minu.
Ngoku yi gurambuge gu dufu
27Batu be dibundu di Saduseyi besesingange re batu begafu bakundi rambuge bekwivule Sesu ngoku re 28«Mulonzi, Moyise aduvege mugage wagwambili re “Pasi re mutu wonge, amafu asabure bane ne mugatsi andi, mwane taye andi agonge mukwili nonge akumuvege givinge.” 29Tumbe, gube gifumbe gi bane be taye bane gubereru. Wurege wonge mugetu, afu asesise mwane. 30Wumubeyi ayonge mukwili. Yandi gwandi afu asebure bane ne mugetu wune. 31Wumureru gwandi ayonge mukwili asebure bane nandi. Yawu botsu bane gubereru bonge mugetu wune, bafu besebure bane nandi. 32Vane mugetu gwandi ne gufu. 33Wisi wu batu bafu begurambugile gu dufu, a mugetu wune wugube wu nye? Mbare bane be taye botsu ba bane gubereru bemwonge.» 34Sesu negubagule re «Batu be bulongu bubu bagongeni. 35Tumbe, bebagele ne begetu be sungeme, be Nyambi gurambuse gu dufu begube ne monyu yi peke peke besakunde gongene. 36Besakunde gufu, mbare begube munongumosi ne yanze tsi Nyambi. Beke bane be Nyambi, mbare besegandi gu dufu beke gu monyu yi peke peke. 37Moyise gagwambili re batu bafu begurambuge. Gu musamu wagwambili dyambu di ningi yaluli yisasyelegeni, Moyise ganengi Fumu: “Nyambi yi Aberam. Nyambi yi Isake. Nyambi yi Sakob.#20.37 Tangune Divudugilu (Exode) 3.2,6”» 38Sesu negukunde re «Nyambi ayi Nyambi yi batu be monyu. Sa Nyambi yi batu bafu. Mbare batu botsu bandi bemonyu.» 39Bivunde bi migage mi Moyise bemosi bambile re «Wusegwambile dikengi, Mulonzi.» 40Mbare besekunde rungule mwivule ngoku tsi nzusu.
Davide ne Sesu
41Sesu negwambile yawu botsu re «A gye bagwambili re, Mutu Nyambi arume Kirisete Mugobutsi ayi ve gitsapele gi kanangu Davide?» 42Mbare Davide yandi beni gagwambili mu gisangumu gi nimbu re
«Fumu Nyambi yambile Fumu ami Kirisete re
Ruge gusetsagene ve mebagele mami,
43Nigusunze batu bakuvini
gutsye byeru bi agu#20.43 Gisangumu gi nimbu (Psaume) 110.1.»
44«Gere Davide gamunengili re Fumu. Mutu Nyambi rume, Kirisete benze kugubile gitsapele gi Davide tsye?»
Nuyabe ne Bivunde bi migage
45Ve bumongu bwotsu bemulilungu, Sesu kwambile bebingitsi bandi re 46«Bandekenanu bivunde bi migage, bene mugangu guvevilange ne bilinge biboti binege, bi mindumbe, barondi vegungu mbulu tsi bundumbe ve piti batu, basali gutsagene ke mubipu birege bi bundumbe gu gari ndagu ndembu, ne mbure tsi bundumbe ve gilambu. 47Badumbi bekwili bivave byotsu bi nawu, vane bavagi ndembu tsi nege nonge bekulabene. Batu beboti, begukengisu veveni.»
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES