Luka 9
9
Yeso ka tong atoma kai ka angmǝ a lebo
1Yeso ka rare atoma kai betuuru ka leere ara yende, naka nya ne o bare ba za obere oburu, aa ne womza makono kanza. 2A ka kang tonga ne ka ne zoole aza togomo te Ashili aa ne womza ana o dera o kona cammo. 3Aka bekaa ne na, “Kane jeke eyapa a teweno te ying ne, na lebenda, ojeketa, epaolya, ka emate ne, kanza kana e jeke odibi kawa kala oyende ne. 4Pate akwilǝ aka a emba ying, cikǝ na arame kazo lengme lo baya apengme. 5A pate ara amea nyana emba o ying, e era o baya apeng ame, e zazame ma sorma ma tobona toying ka wa itǝ bena ne tera tokpwe to ne.”#9:5 Nyimia maYahuda ne ezeze kawa wore o bena Ashili a yo core angmǝ aza one nangka ne nyana aromo ai. 6Nane ere aa ne tare topepeng, aa ne zoole, aza oroka o lebo. Aane womza ana okono a kuruwǝ.
Ogomo Hiridus wa kerke ka o kona orooka aza Yeso
7Na Ogomo Hiridus o makeke ma Galili wa kone pate epa eka eya ale, na wa kone oburǝ bote, aza o bekaana ana ondo ya beyana Yohana ko batisma ka era nyimi ocau. 8Ana ondo na ondo o beya angmǝ ka mawo ma Ashili Ileya wa era, ana ondo kanza a beyana ondo a nyimi ana o beya angmǝ ka mawo ma Ashili aka ne gbwǝ ko rabo wa era. 9Na Ogomo Hiridus bekaana, “Ma ote na core okpwe o Yohana. Mana eyang konaza epa ena azaa wai? Nawa gera o laka Yeso.”
O barea o Yeso o lya ka andaleme magu esu
10Nangka atoma Yeso ne kuri, nane baale kai epa eka ne eze. Naka kuri kane e daki aka apeng ka yende ka a beya kai na Betsaida. 11Nangka aromo me ne kone obena kaye saname, nane tare kai. Naka embe ne aka bekaa ne angmǝ aza togomo te Ashili, kanza aka womza andaaka neya yeme lewoma.
12O ongme ya amara a wa taru, na atoma betuuru ka leere name ne deya ara kai ane bekaana, “Baya aromo na ane ale a nyimi apeng ka topepeng to ma'amo ka ne gere epaolya ka ara omora. Obena ara ana a te rene aromo ta rene ne a ai ne.”
13Na Yeso bekaa ne na, “Nyana ne eyapa ka ne lye.”
Na ne kabare na, “Pate epa eka teye ka e, eta kala maborode esu ka ekwala e leere ne. Na Ateokora oya yeme ate wiinia kate lye ka aromo na?” 14Andaleme me belle ne dukǝ magu esu.
Na Yeso bekaa atoma kai na, “Bekaana aromo me na ne cikǝ e tuuru sussu.”
15Na atoma kai, ne tare o bekaa kai, na pate one cikǝ. 16Na Yeso jeke maborode esu ka ekwala leere name, aka ara okpwe zaa shili, aka bose Ashili aka posea pate. Malo nyimi aka nya atoma kai ka ne areseze aromo me. 17Pate one ne lye na ne ti, a atoma kai ne shende madangare mame, na ma pene makende betuuru ka ma leere.
Biturusu wa wore o rose Yeso
18Ngmende a Yeso ya bosaza Ashili kai a yende, na atoma kai neya sara yende ka kai. Naka pirkǝ ne na, “Aromo beya mi na manamea?”
19Na atoma kai bekaana, “Ana ondo beyana boa Yohana ka o batisma, ana ondo kang beyana ondo o beya angmǝ ka mawo ma Ashili Ileya, kanza ana ondo beyana ondo a nyimi ana o beya angmǝ ka mawo ma Ashilia wa era.” 20Na Yeso bekaa ne na, “Ying e beya mi na manamea?” Na Biturusu kabare na, “Boa Ondooka Ashili a zake na tong#9:20 Ondo oka Ashili a zake waya bezena Ondooka Ashili a zake .”
Yeso ka baale nangka a yo itǝ ana o tare o kai
21Na Yeso windi ana o tare o kai teto na, kana ne bele ondo angmǝ aa na ne#9:21 Yeso ka beke nyimi aza o bena a were ame ta aya suri ne.. 22Aka kang bekaa ne na, “Kena ka oromo ka yo zitǝ ba cake, a taara te anateandaasau maYahuda, ana magame ma Ashili ma moole, ka ana o baala angmǝ aka Ashili a nya Mosa ne yo nyana kai. Ane wong kai, a lengme lo taaro aka ere.”
23Naka beka pate one na, “Pate ondo ome waya yeme a wa tareng, a wa nyane okpwe wai, a wa jeke uti o gbwǝ#9:23 Ona uti o gbwǝ waya o kabare ka o zitǝ aza leze le Yeso a wa tareng. 24Kazo ondooka waya yeme ebeene wai nannamena a lerambo le Ashili leena, wayo dera e ba pate, a kazo ondooka wa nyana ebeene wai nannamena a lerambo le Ashili leena aza o bena ba kabare ka mi, wayo cǝ e ba pate. 25Epa e rere na, oromo wa cǝ ma gogoro ma lerambo le Ashili a wa dere e beene wai? 26Nyimia a pate ondooka wa kona ezǝng eng ka ezǝng angmǝ ang, Kena ka Oromo kayo kona ezǝng wai a were aka ka deya a nyimi togomo te kai, ka togomo te Ate akai kanza ka te atoma Ashili o zaa shili. 27Kanza eyang bele o ying, ana ondo ara kaana, neto gbwǝ ne seeka ne laka togomo te Ashili.”
Atoma Yeso ne rose na kai Kena ka Ashili kai
28Malo tomore o riiru ko bekaa angmǝ ana, na Yeso jeke ana Biturusu, ka Yohana, a Yakubu nane zale oyara ka kai, ka ne bose Ashili. 29Nangka kaya za o bosaza Ashili na mainu ma kai sara, a madibi ma kai o wonze a yizi. 30A saseya na ana o beya angmǝ ka mawo ma Ashili a leere ana Mosa ka Ileya suri a neya beya angmǝ ka Yeso. 31Na ne suri ka madibi maapeng na ma Yeso, a neya beya angmǝ ka kai aza o gbwǝ kai apeng Urushalima omea wayo panza o beka Ashili. 32Biturusu ka aja kai neya nyimi malau ma lebo, nangka ne ere na ne laka masanto ma Yeso ka ana o beya angmǝ ka mawo ma Ashili a leere ane itǝ ka kai. 33Nangka aromo name neya arnang ka Yeso, na Biturusu bekaa kai na, “Ondoogong, wa gwara ka teya arakana. Baya a te sowo mapuki ma taaro, oyende a'o oyende o Mosa, oyende kanza o Ileya.” Awata rose epa eka waya beyame ne.
34Waya za o beya angmǝ naname, na mawere japi na ma pate ne, nangka mawere mame ma pate ne nane kone boome. 35Na lengmelo suri a nyimi mawere mame na, “Kanna kena kangnga kai, kamea ma zaka, kona na kai.” 36Malo lengmelo le name, nane laka Yeso kai ayende. Na atoma kai a taaro ne eke epame anyong ane, ane ta bele ondo a were name epa eka ne laka ne.
Yeso ka womza o yana ka waye ka o bere o buru
37Ko sana ara ane japi aza oyarame, na aromo a cake mana Yeso. 38Na ondo a nyimi aromo a cake me rare kai a jǝng na, “Ondobaala#9:38 Ondobaala arakana waya wa baleze angmǝ Ashili. Leze legoone leya maYahuda ne rare kane wore o tare ana o baala angmǝ Ashili a werea Mosa , eyang bosa o na o kone egonegone o kena kang, kaya o ngmenga ong belle. 39Obere o buru gareze kai, ka ka eze bekoko buuwu. Wa ezeze kai na ebeene ya surǝ ka mapunǝ susi akai ongmǝ. Wata baya kai aka pere ne, waya za o cara kai a cake. 40Ma bosa atoma au nane sǝǝrǝ o bere o buru ome, nane ta ama ne.”
41Na Yeso kabare na, “Ying aromo tomore teena eta kabare ka Ashili ne e kang eza epa e buru. Eyang cikǝ ka ying tomore to wonda ang kang noke lenyong ka ying? Deya ka oyana me o arakaana.”
42O yana me ya zo deya naname, na o bere o buru me tabe wai ba deze a wa beye e gwǝgwǝgbwǝ. Na Yeso zurki o bere o buru me aka womza kena kame aka niyi wai ara ate a wai.
43Pate aromo kane ya arame nane monte tongmǝ tone aza ogole o gong ka Ashili a eza. A komana ya nyimi madoola me epa eka Yeso ka eza, naka beka atoma kai na, 44“Kona na epa eka eyang beka ying. A yo nya Kena ka Oromo a taara te ana o nyana kai.” 45Na atoma kai ta rosa angmǝ aka ka bekaa ne. A baasa aa ne na kana ne rose ne, ne kanza neya kona boome bo pirkǝ o kai aza angmǝ me.
Ondo jepǝrǝ okpwe waya kala o gongnga a togomo te Ashili
46Na masanggo ere a tera one aza o bekaana, mana wayo itǝ ondo o gong ba nyimi one. 47Yeso ko rosa madoola mane, naka jeke kena ka baate aka ote kai naka itǝ ating kai. 48Aka bekaa ne na, “Pate ondooka wa emba kena ka baate kaana aza o bena wa kabare kame, wa embangnga. Kanza pate ondooka wa embang, a wa emba ondooka wa tongang. Pate ondooka wa jǝpǝrǝ okpwe o wai na kena ka teng kaana nyimi oying a pate, waya yo kala o gongnga a pate.”
49Na Yohana bekaana, “Ondoogong, te laka ondo a wa ya sǝrsǝzǝ obere o buru a nyimi leze lo na te nara wai aza o bekaana wato nyimi orone.”
50Na Yeso kabare na, “Tane nare wai ne, pate ondooka wata nyana ying ne oyinga wai.”
Aromo kapeng ka yende a Samariya ne nyana Yeso
51Nangka tomore to kurǝ Yeso aza shili te amara, naka tere o ale apeng Urushalima a lenyong. 52Naka tong ana o tare o kai yende ka ne lya izi, na ne ale a kapeng ka yende a makeke ma Samariya ka ne babare keeya zongka ka ale. 53Na aromo apengme ne nyane o emba kai, aza o rosa o bekaana, kaya orona o ale ba Urushalima. 54Nangka atoma okai Yakubu ka Yohana ne laka nyimi, na ne bekaana, “Ateokora, oya yeme a te ote ola kawa japi zaa shili kawa ese ne a pate na?” 55Na Yeso ringǝrnu aaka zurki ane, 56ane ale a kapeng ka yende.
O tare o Yeso o zaka kawa pobe
57Nangka neya za orona, na oromo yende wa bekaa Yeso na, “Eyang tare o a pate ara ame oya ale ne.”
58Na Yeso kabare wai na, “Egoro neye ka she'o, engmeng kanza neye ka todo tene, mi kena ka o oromo anta ka ara o mora ne#9:58 Yeso ka beke nyimi adorana oromo me wa rose o bena o tare o kai pobe.”
59Aka kang bekaa oromo yende na, “Tareng kang baalo.”
Na oromo me wa bekaa kai na, “Ateokora, baya ang ale ka ang taase ate ang suri.”
60Na Yeso bekaa wai na, “Baya andaaka neta tareng ne, ane taase aromo ane, a bo o ale ka o baale togomo te Ashili.”
61Na ondo kang bekaana, “Eyang tare o Ateokora, baya ang ale kang bekaa akwilǝ ang na ma ale.”
62Na Yeso kabare na, “Ondo ta zene kawa bora ogole ka le'abo a wa soole a dimǝ a wa itǝ ondo ogole edang ne, nyimia ondo ta zene oka waya tare ong a wa soole a dimǝ, a wa gwara ka ogole o togomo te Ashili ne.”
©️2022 Luke Initiative for Scripture Translation