Luc 16
16
Nongu jimusalitsi agumasoga diela
1Jesus amatsingula badukitsi bandi rie: Vamaba yisina na batu bamamutsingula rie: Musalitsi agu amanyambasana busina buagu. 2Yisina amamunengila na amamuwivula rie: Diambu yi nyigulu divu nagu? Ndasi nana guisalili yisalu yiagu mu mbari gugaa uwelimina ukelisa biami. 3Musalitsi amatasa rie: Fumu ami ekusuli yisalu, yi ngavaga? Usala mutsaku? Ngorungula! Uvonda? Yika yisonyi! 4Nyijabi adi nyuvaga yiri ava nyugusululu yisalu nyudilu na batu o mandagu mogu. 5Amanengila mutu mutu agumaba na muganu na fumu andi. Amawivula agutega rie: Kwe guisombi ombu fumu ami? 6Amawaka rie: Kama mirega mimatsi. Amamulonsa rie: Laba muganda agu, ka tsana, sona magumaranu. 7Amamuewivula ususu rie: Ndeʼ kwe guisombi? Amawaka rie: Kama yiranu tsisaku tsiuresi. Amamulonsa rie: Laba muganda agu; sona kama jina. 8Fumu anolaba nana amasoyila diela amamudodisa. Bisi tsi bana malubu uviolila abamagobulu.
9Jesus amabuesa rie: Kabogu nyidutsinguli rie: Salisanu busina buenu udila bambatsi yiri ava busukila dudilu na nsangu o julu. 10Jandi ojivu asigama na mambu mageyi osigama na mambu maneni wandi; jandi oyidiongi mua pesu odionga puela wandi. 11Kabogu pa dusamaba basigama na mambu mambongu anyi oduvega tindi busina? 12Pa dusamaba basigama na bima bingana anyi oduvega abienu?
13Vagaa musalitsi ne umosi agurungula usalila fumu beji, diwendi rie: ovina fumu mosi noronda jisusu; oyitsa fumu mosi nolensa jisusu. Dugorungula usalila Nsambi na mbongu.
Malongi masusu maJesus
(Matt 11.12-13; 5.31-32; Marc 10.11-12)
14Ava baJuif abamaba baPharisie bamagululu mambu meni motsu bamakema Jesus mu mbari bamaronda mbongu. 15Jesus amavosa nogu rie: Duikelasa va misu mabatu yiri duji batu baboti tumba Nsambi ejabi mirima mienu. Adidodusu na batu digaa na tsongu va gusu Nsambi.
16Va dibandu dumadila migaga miMoise na miganda mibabiyitsi mbana Jean amalabana. Ubongila va temu eni Musamu Uboti uDurumu duNsambi umasamunu na mutu mutu egalini udujaba. 17Tumba ne pa julu na butamba biutsiemuga migaga miotsu miuba nana mivu.
18Uotsu aguigusuli mugatsi andi nowela ususu evayi bumbembu na uotsu aguiweli mugetu agumagusulu na mulumi andi evayi bumbembu.
Yisina na Lazare
19Vamaba yisina ayimaduaranga tsanda tsibenga na tsidumbulu na amalabanga nsangu bilumbu biandi biotsu. 20Vamaba yijaga wandi diina diandi Lazare. Bamamusunsanga va gusu kana yisina yiri tanguji obolanga bikukuku abibonduyi va tavula andi. 21Ne bamondi bamamuvendanga mapura. 22Yijaga anofu amabegu o julu na biansa uyetsana va tulu Abraham. Yisina amafu wandi na bamamutsiga. 23Yisina amalabanga maguga o mbura aji abafu bavu; anobuaga misu amalabilila Abraham o vala na Lazare va tulu andi. 24Amagamuga rie: Tata Abraham, ndasi yingeba! Sindiga Lazare ombu gami! Musingisi yiri oputiga kodu mulembu andi mu mamba nopotsa dulimi. Ngorungula uwarila maguga mamuji egugu. 25Abraham amamugabusila rie: Muana ami, vengu gurangimina yiri ava gumabila o tsi gumalabanga yika ubueji nobueji na Lazare amalabanga yika maguga na maguga. Tumba namunyi ubueji umavinga ombu gandi na ndeʼ guilabi maguga. 26Va julu vana va gari jetu nenu va mbengi jineni na jogu aberondi uvioga bagorungula. 27Yisina amavosa rie: Kabogu tata Abraham sindiga Lazare o ndagu taji ami 28mu mbari nyikivu na baana banguji baranu. Awendi uyebalubusa yiri jogu wogu bakeruga o mbura ejiji jimaguga. 29Abraham amamugabusila rie: Jogu bana mambu maMoise na mababiyitsi amebalubusi; bamagulu. 30Yisina amavosa rie: Nesi, tata Abraham, tsiʼ nana! Mutu agumalefu awendi ombu gogu mbana bokalula diela. 31Abraham amamutsingula rie: Pa jogu bagegulu mambu maMoise na mababiyitsi bagogaru ugulu ne mutu agumarambuga o tsi dufu.
La sainte Bible en langue Yipunu © Alliance Biblique du Cameroun, 1992.