Lukas 12
12
Yesu e kətec ndah masasəraka jene tata
(Mat 10.26-27)
1Dapa masa Yesu a tə yaw ava Farisa hay va ndah mesesərekecen ma majawa kad ndana hay sə, ndana hay mabay ec ke ɓəcek vaw aca ŋgə bakatar gaa, slam a husa ke zlec bay. Yesu ke gweɗec ndah masasəraka jene tata ɗagay, gege: «Mep leŋgesl fe is ta Farisa hay. A wal megweɗey, mep leŋgesl fa Farisa hay, ndah masa neneŋ dapa ma tec ecew ecew. 2Jene fakwanay masa ndana hay ta raɓda sə, a ta ŋguzdakata a vəda. Jene masa ndana hay aca səniya bay sə, a ta sənata. 3Mafay ana, jene hay fakwan masa akwar ta gwaɗiya ta vaɗ dapa ləvaŋ sə, ndana hay ac ta cəna avəda ta yaŋ pas. Ma hay fakwan masa akwa sasəkiya meesesəkey pa zləmay ta ndana deveŋ sə, ac ta təhakata ava gədaŋ dapa slam ta matal ma.»
4Yesu ke gweɗec saya, gege: «Ya gwaɗakwar guula aɗaw hay, akwar te lel fa ndah makəɗa slaw ta vaw takwar bay, afa ac te kəɗek sə, slaw ta vaw babəla. Ava dəɓa ana, ac ta zlafa maŋgakwar jene mekele ɓasabay. 5Təlam nesey, ya ta ŋguzdakwaɗ nda masa akwar de lel fətiya. Melel sə, fa Zlavay, afa daha ka kəɗakwar avəda dapa slaw ta vaw sə, ava dəɓa ana, aŋga ava gədaŋ ta makazlaɗakwar pa slam ta marga dapa ləhwaɓ ta kwakwaw masa e te ndəv aabay. Eve metehwe ana ya gwaɗakwar, melel sə, a fətiya.»
6«Ɗiyak hay mekweskwes ana zlam sə, ece husemdec fa dala ecew aabay geyey? Amaa Zlav e pefec ndey fa ɗiyak ana hay amta amta fakwanay. 7Ara aŋga ana, kwa ŋgwec ta yaŋ takwar hay fakwanay ac maŋgəfa amta amta. Akwar te lel bay. Akwar sə, Zlav a walakwar ka fəna ɗiyak mekweskwes ana hay.»
8Yesu ke gweɗec saya, gege: «Aha, ya gwaɗakwar, kwa waawa masa e gweɗ fəma ta ndana hay, aŋga nda aaɗaw, ŋgesey, Wut ta nda, e te gweɗ fəma ta maskəla hay ta Zlavay pas ta mambaɗ ma sə, aŋga nda aaɗaw may. 9Amaa, nda masa e gweɗ fəma ta ndana hay, a səniyey bay sə, Wut ta nda e te gweɗ fəma ta maskəla hay ta Zlavay a səniya bay may.»
10Kwa waawa magwaɗa ma masa e teh bay da yaŋ Wut ta nda sə, a ta ŋgat mapəl mebər tata. Amaa, nda malafa Mesfen Mavəna sə, a ta ŋgat mapəl mebər tata aabay.
11«Daha ac ta təhazakwar, ac ta hwadaɗakwar pə Way ta macə mbahw hay te Zuwef hay ka ta təɗakwar ma yaŋ, daha aabay, fəma ta ndah mazlakava va bay hay sə, a ta həzlakwaɗ yaŋ da yaŋ ma hay masa akwar te vehecen ka ta mbəl yaŋ takwar bay. 12Ma masa akwar te veheceney sə, Mesfen Mavəna a ta ŋguzdakwaɗ pəsaŋga ana ŋgesey.»
Zleley hay ta vavara
13Nda amta deveŋ ndah da cak te Yesu sə, ka gwaɗa, gege: «Nda masasəraka nda, gwaɗa malama mazlakava da vənandan zleley taciya masa anda ta camiya!» 14Yesu ka vahan, gege: «Guula aɗaw, mepeɗiyey ka nda mavəna ma hay dapa taɓa takwar, ta mavənakwaɗ zleley takwar hay sə, wa?» 15Ava dəɓa ana, ke gweɗec ndana hay fakwanay, gege: «Mep leŋgesl! Akwar ta və yaŋ takwar ta mawal zleley eleh bay, afa mesfen ta ndana a da njah gaa sə, mafay ta masa aŋga eve zleley gaa bay.»
16Ke gweɗec ava ma maɗəva saya, gege: «Ndana ɓa aŋga eve zleley mabay, ka ŋgat jene hay de ley tata mabay mambəla ana hay. 17Ka wulakaw, gege: “Slam ka pə jeŋ aɗaw ana hay pahata! Təlam nesey sə, ye de ŋgə gwagumaw? 18Yaw, təlam nesey sə, ya ka səna jə masa ya ta ŋgiya sə, avəda. Da lada sə, ya həzla wuda aɗaw hay avəda fakwanay, ye de lemec mekele mazlakava ana hay, ya ɓəcaɗ bəley va zleley aɗaw hay fakwan pa”. 19Ava dəɓa ana, ye te gweɗ kad yaŋ aɗaw: “Zleley aɗaw hay ec te ndəv aabay, ec te ŋgə mavay gaa. Ya ta ŋgat masasak vaw, ya ta ndə jene, ya ta sə jene va manjah dapa mewesley.”»
20«Amaa Zlav ka gwaɗa nda ana, gege: “Marəzla! Ta vaɗ nesey, ya ta kəsakaɗ mesfen takaa avəda. Zleley hay masa ke te ɓəcec fakwan ŋgesey sə, kad wa?”»
21Mafay ana, Yesu ke ŋguzdecen ma ana kad ndah da cak tata sə, gege: «Ara aŋga ana, nda maɓəca zleley dapa vavara na fakwan kad aŋga, amaa fa yam te ndey ta Zlavay sə, anjəkar aŋga maslamarga.»
Manjah ava mambəla ana ta Zlavay
(Mat 6.25-34)
22Yesu ke gweɗec ndah masasəraka jene tata, gege: «Mawala mafay te mey masa ya gwaɗakwar, dapa manjah takwar sə, akwar ta həzla yaŋ takwar mafay ta jə ta manday, ta jə ta masay va ta map rəkwat fa vaw bay.» 23Ya gwaɗakwar ara nesey sə, afa jə ta manday, a fəna mesfen takwar aabay. Rəkwat a fəna vaw takwar aabay. 24Ara nesey, menjer fa ɗiyak hay! Ece slek aabay, aca cə daw aabay, wuda tec aabay. Amaa Zlav e vec jə ta manday! Naa akwar sə, akwa fəna ɗiyak ana hay aabay geyey? 25Ndana deveŋ akwar masa a zlafa mapana manah amta kad veŋ mesfen tata ava mawulak yaŋ tata sə, wa? 26Daha akwa zlafa meŋgə jə mekusetke ana ara nesey ava mawulak yaŋ takwar bay sə, naa akwa ɓasl yaŋ takwar da yaŋ jene hay mekele sə, mafay te mey?
27Menjer fe mefefen te wudez hay de ley! Ece fefen sə, gwagumaw? Ece ŋgə mezlər aabay, aca cə rəkwat aabay, amaa ya gwaɗakwar, kwa bay Salmaŋw eve zleley tata ana fakwanay, ka ŋgat rəkwat fa vaw masa e tehey ara mefefen hay amta nesey sə, aabay. 28Zlav a ŋgiya ara nesey, afa kəzeŋ de ley hay ece re fefen pəsna, tedew sə, ac ta kulata, ac ta pafa kwakwaw. Daha Zlav ke ŋgec jə mambəla ana kad kusaf masa kwakwaw a ta ndala avəda ara nesey, naa tata a ta pafakwar ndey ka fəna kusaf ana hay ŋgesey aabay ŋgəɗa geyey? Akwar ndah mapana Zlavay ka nda mambəla ana aabay, masəna Zlav a ta pakwar rəkwat fa vaw mafəna mefefəney ana ŋgesey. 29Akwar may, akwa ta həzla yaŋ takwar cəɗem cəɗem da yaŋ jə ta manday va jə ta masə bay. Akwar ta ŋgada hahar kad yaŋ takwar mafay ana bay, 30mahəzla yaŋ mafay te jeŋ ana hay ŋgesey sə, ndah ta vavara masa aca sən Zlav bay. Amaa akwar sə, Papaŋ takwar, a sən jə masa akwa waya. 31Sesəker mayah macaaca ana sə, Zlav de ŋgə bay da yaŋ akwar, ara nesey, akwar ta ŋgat jene hay dərziya kad yaŋ ana.
32«Ka ŋgə zidaw bay, ka bakw ta gənaw hay mekusetke ana, afa ka wafa Papaŋ takwar ta mavakwar jene hay mambəla ana dapa Wunam ta bay tata.»
Zleley maraɓa masa e te ndəv aabay
(Mat 6.19-21)
33Mahusamda jene hay takwar, mevecen səlay ana kad maslamarga hay. Maɓəcaɗ zleley takwar hay pa slam masa e te nes aabay. Zleley masa e te ndəv aabay da baymaləvaŋ, afa dərŋga sə, kwa makar hay ac ta zlafa makəriya aabay, kwa tep hay ac ta zlafa mandiya aabay. 34Masəna, slam masa zleley takwar hay ac dapa sə, leŋgesl takwar aŋga faŋga may.
Maləmad vaw ka ta ŋgə mezlər ta Zlavay
(Mat 24.43-51)
35«Mapaɗ rəkwat te mezlər takwar hay fa vaw, akwar ta məca petərla takwar hay bay. 36Manjah ara ndah te mezlərey maɓəla bay ta way teceŋ masa aŋga dapa macunam ta madəm ta vaɗ, afa ac da wunan ma ta way zef dapa masa e te vehekey, e te zel fa ma ta way. 37Meweslə ɓa kad ndah maŋga mezlərey ana ŋgesey daha bay ta way teceŋ e te husekey, e te ŋgetefec ec eve ndey. Eve metehwe ana ya gwaɗakwar, bay ta way ana, a ta pə rəkwat te mezlər fa vaw, e te zelekeceŋ, e njeheɗeceŋ fa slam ta mandə ɗaf, e vec jə ta manday. 38Kwa e vehek ta yaŋ ta vaɗ, kwa ta slamɓal, e ŋgetefec ec eve ndey sə, meweslə ɓa kad eceŋ.»
39«Akwa səniya mambəla ana, daha bay ta way a sən pas masa makar e te dek kad way tata sə, a ləmada vaw mambəla ana. A ta vana cəv kad makar zləlan way tata, aabay. 40Yaw, akwar may, maləmada vaw mambəla ana, afa pas masa Wut ta nda, e te vehek kad pa vavara sə, akwa sən pas ana bay.»
41Piyer ka nəkafa, gege: «Bay Mazlakava, ke gweɗ ava ma maɗəva ara nesey sə, kad andaw geyey, kad ndana hay fakwanay?»
42Bay Mazlakava ka vahan, gege: «Nda maŋga mezlər eve cəvey ana masa aŋga eve leŋgesl, bay ta way tata ka paɗ ka nda mazlakava da yaŋ ndah te mezlər tata hay fakwanay, e de vec jə ta mandə kad ndah maŋga mezlər hay mekele daha pas ana ka husakata sə, nda wula? 43Meweslə ɓa kad nda maŋga mezlərey ana ŋgesey daha bay ta way tata a ŋgatafa, e ŋgə mezlərey ana. 44Eve metehwe ana ya gwaɗakwar, bay ta way tata ana a ta paɗ ka nda mapana ndey fe zleley tata hay fakwanay. 45Amaa daha nda maŋga mezlərey ana ka wulakaw, gege: “Bay ta way aɗaw sə, e te vehek zef aabay”. Ka zlar mekəɗec ndah maŋga mezlərey, mawulah va ŋgwaza hay. A ndə jene, a sə wuzam, kasl pa makwada. Mafay ana, ka zlar mekəɗec ndah maŋga mezlərey, mawula hay va ŋgwaza hay. 46Ava dəɓa ana, bay ta way ta nda maŋga mezlərey ana, e te vehekey dapa pas masa ka ɓəlaw aabay va ler masa ka sənaw aabay. Bay ta way tata ana, a ta mbasana da way, a ta ŋgada hahar ara Zlav e te ŋgedec hahar kad ndah masa ac ka kəs ma tata aabay.»
47«Nda maŋga mezlər masa ka səna jə masa bay ta way tata a waya, amaa ka ləmada vaw te meŋgə jeŋ ana ara masa aŋga ta waya aabay sə, a ta ŋgat mekəlep mabay. 48Nda maŋga mezlər masa a sən jə masa bay ta way tata a waya sə, bay, amaa kwa daha ke ŋgə jə mambəla ana aabay masa mak te mekəɗey sə, a ta ŋgat mekəɗey ana kusetke war. Nda masa ac ka vana mezlər gaa pa ha tata sə, ac ta nəkafa gaa ara aŋga ana may. Nda masa ac ka vana jene mabay, ac ta nəkafa mabay mafəna ana saya.»
Yesu e dek sə, mafay te mey?
(Mat 10.34-36)
49«Ye dek sə, ye hwedek kwakwaw kad fa vavara. Ya wal sə, kwakwaw ana de gəɗ təlam na cay! 50Ya ta ŋgat beetem, ya dapa maɓəliya, ya wal sə, da ŋgata zef təlam cay.
(Mat 10.34-36)
51Akwa wulakiya sə, ye hwedek meteh kad pa vavara geyey? Away! Ara na bay. Ya gwaɗakwar, ye hwedek sə, mavən vaw. 52Ara megweɗey, e zler təlam nesey, ndah zlam da way, ac ta vəna vaw avəda, ndah mahkar ac ta camafa yaŋ ndah ecew, ndah ecew ac ta camafa yaŋ ndah mahkar. 53Yaw, bay ta way ac ta vəna vaw ava wudiya, ara aŋga ana, wat a ta vəna vaw ava papaŋ. Ŋgwaz ac ta vəna vaw ava daŋgwaya, ara aŋga ana, dem a ta vəna vaw ava mamaŋ. Mamaŋ ta wat ac ta vəna vaw ava ŋgwaz ta wudiya, ara aŋga ana, ŋgwaz ta wat a ta vəna vaw ava mamaŋ ta mawula.»
Maɗal jene hay masa ece ŋgey
(Mat 16.2-3)
54Yesu ke gweɗec saya kad miya hay, gege: «Daha akwa wala Zlav ta yam e zəɓek jaka bəlam sə, akwa gwaɗa, “Yam a ta slay”. Yam ana, a slakata tehwe. 55Daha akwa wala memeɗ e ɓəlek jaka hwahwaɓay sə, akwa gwaɗa, “Mewreɓ e te ŋgə cay”. Mewreɓey ana a ŋgata tehwe. 56Akwar ndah masa neneŋ hay dapa ma ecew ecew, akwa sən mavən jene hay masa ece ŋgə dapa vavara va da baymaləvaŋ, amaa akwa sən mavən jene hay masa ece ŋgə təlam na bay sə, mafay te mey?»
Maləmad ma ava maslagəra
(Mat 5.25-26)
57«Akwar ava yaŋ takwar ana, akwa sən mavən jə masa te meŋgə eve cəvey ana bay sə, mafay te mey? 58Daha ndana ka cafakaa lalaw fəma ta bay, akwa də ava aŋga kad pa mambaɗ ma ana, maləmada ma ana avəda dapa taɓa takwar dəga dapa cəvey. Daha aabay sə, nda ana, a ta hwadaɗakaa pa ha ta nda mavəna ma hay, nda mavəna ma ana, a ta paɗakaa pa ha ta kafaraŋ hay, kafaraŋ hay may, ac ta kazlaɗakaa pa daŋgay. 59Ya gwaɗakaa eve metehwe ana, ke te dek kad a vəda dapa daŋgay ana aabay, say ka ta pəlan duwa tata ana avəda fakwanay.»
© 2022 CABTAL