Lukas 11
11
Macə mbahw
(Mat 6.9-13; 7.7-11)
1Pas mekele, Yesu aŋga dapa cə mbahw dapa slam mambəla ana ɓa. Masa ka ndəvda cay, nda amta deveŋ ndah masasəraka jene tata, ka nəkafa, gege: «Bay Mazlakava, sasərakandan macə mbahw ara Zaŋ Baatis te sesərekecen kad ndah masasəraka jene tata may.» 2Yesu ka vahan, gege: «Daha akwa cə mbahw sə, megweɗ ara nesey:
“Zlav Papaŋ,
ŋguzda yaŋ takaa kad ndana hay fakwanay aca ra sənakaa.
Meŋgə bay takaa de dekey.
3Vandaw jə ta mandə masa anda waya fa pas fa pas.
4Pəlandan mebər taciya hay,
afa andaw ava yaŋ taciya ana
anda pəlecen mezlek ta ndah mezlekey
fa yam te ndey taciya fakwanay,
ka ta hwadaɗandaw pe mecek bay.”»
Guula magumana guula tata ta vaɗ
5Yesu ke gweɗec ndah masasəraka jene tata ava ma maɗəva da yaŋ macə mbahw ana saya, gege: «Daha nda amta deveŋ akwar aŋga ava guula tata ɓa, ke də kad vara vaw ta yaŋ ta vaɗ ka ta nəkafa jene, ara nesey: “Guula aɗaw, mbahw viyey peŋ mahkar ɗagay, 6afa mandala aɗaw amta ɓa ke dek da maŋgway jaka way aɗaw, amaa jə ta mandə masa ya da vana de vereyey sə, aabay”. 7Guula tata da hwaɗ ta way sə, ka vahan, gege: “Ke ŋgediyey hahar sabay! Ya ka ɓəzla ma ta way cay, andaw ava wat aɗaw hay manaha cay. Ya zlafa mezleftek ka ta vakaa peŋ sabay.”» 8Ya gwaɗakwar, kwa daha ke zleftek ka ta vana aabay mafay ta masa aŋga guula tata sə, amaa e te zleftek, a ta vana jeŋ fakwanay mafay ta masa a ta nəkafa a yaŋ a yaŋ, hwar a ta ŋgana ta manəkafa aabay.
Nda manəka jene sə, a ŋgatiya
(Mat 7.7-11)
9Yey, ya gwaɗakwar: «Manəkaw, ac ta vakwar. Mayahaw, akwar ta ŋgata avəda. Makaɗ ma ta way, ac ta wunakwaɗay, 10afa kwa waawa manəka jene sə, aca vana. Kwa waawa mayaha jene sə, a ŋgatiya. Kwa waawa makəɗa ma ta way sə, aca wunan ma ta way ana.»
11Daha nda amta deveŋ akwar aŋga papaŋ te wude hey, wudiya a nəkafakaa kəlef sə, a ta vana zezekw geyey? 12Yaw, daha wat ana a nəkafakaa slesley sə, a ta vana rac geyey? 13Akwar ndah maŋga suwe hay maa, akwa sən mavə jə mambəla ana kad wudeh takwar. Naa daha ara nesey sə, Papaŋ takwar da baymaləvaŋ a zlafa mevec Mesfen Mavəna kad ndah manəkafa bay sə, a ŋgana gwagumaw?
Yesu va Bulzebul
(Mat 12.22-30; Mar 3.20-27)
14Pas ɓa, Yesu aŋga dapa mambas damkwaw dapa nda ɓaɓa ana ɓa. Ava dəɓa ta mambasana damkwaw ana, nda ana ka zlar megweɗ dapa taɓa ta miya. Ndana hay fakwanay faŋga sə, ec ke rəzleceŋ. 15Amaa ndah mekele deveŋ eceŋ ec ke gweɗ fa vaw tec, gege: «Mavana gədaŋ ta mambas damkwaw ana nesey sə, Belzebul#11.15 Belzebul Belzebul a wal megweɗ, bay ta damkwaw hay, daha aabay, bay ta haalay. bay ta damkwaw hay.» 16Ndah dərziya ac ka wal macakiya, ac ka nəkafa a de ŋgə cah hay masa e de ŋguzdek gədaŋ tata sə, e dek da vara Zlavay. 17Amaa Yesu ka səna mawulak yaŋ tec sə, avəda, mafay ana, gege: «Dapa wunam amta masa ndana hay aca ŋgə vəram fa vaw teceŋ sə, wunam ana a nasata. Dapa vəram ana ŋgesey, way tec a mbəɗata fakwanay. 18Daha Saadan a ŋgə vəram fa yaŋ tata ana sə, ŋgesey wunam ta bay tata a zlacata geyey? Afa akwa gwaɗa, ya mbas damkwaw sə, ava gədaŋ te Belzebul. 19Yaw daha ya mbas damkwaw ava gədaŋ te Belzebul sə, naa mevec gədaŋ kad ndah masasəraka jene takwar te membesec damkwaw ana hay sə, wa la wa? Mafay ana, ndah masasəraka jene takwar ana, ac ta guzdakwaɗ ma takwar hay ŋgesey sə, akwar ka taɗtakwar. 20Amaa daha ava ha ta Zlavay masa ya mbas damkwaw hay sə, ŋgesey Meŋgə bay ta Zlavay sə, ka husafakwar cay.» 21Daha nda ta gədaŋ, a jaɗ zleley tata ava jene hay ta vəram sə, ŋgesey, zleley tata hay ac mabarɗa. 22Amaa daha nda mekele mafəna nda ana ŋgesey ava gədaŋ ɓa, ke dey, ka təhaza nda ana, ka pəraslan jene hay ta vəram tata hay avəda masa a jaɗ zleley tata hay ava aŋga fakwanay. Ka həlan zleley tata ana hay avəda, ke vənecen kad ndah tata.
23«Yaw, daha nda masa aŋga ava yey aabay sə, ŋgesey aŋga maslagəra aɗaw. Asaya, daha nda masa e jəniyey ta maɓac ndana hay kad pe cəvey aɗaw aabay sə, ŋgesey, aŋga nda makwakwaca ndana hay.»
Mevehek te mesfen maləza kad pa ndana
(Mat 12.43-45)
24«Daha mesfen maləza ka data a vəda dapa ndana sə, e dey, a ŋgway saw fa dərzlam de ley, a yah slam ta masasak vaw. Daha ka ŋgat slam ana aabay sə, e gweɗ, gege: “Zuwan, ya vahaɓa pə way aɗaw masa ye dek dapa”. 25Meveh tata, ka ta ŋgatafa nda ana aŋga maləmada ara way mafaɗa mambəla ana. 26Masa a wala ara nesey sə, e dey, e zelek mesfen hay maləza ara aŋga ana tasəla mafəna ava suwe. E vehek eve eceŋ, ece sehw fakwanay pa nda ana. Mamaɗ yaŋ ana sə, nda ana a ta sə marga mafəna macaaca ana.»
Mambivaw metehwe ana
27Masa Yesu e gweɗ ma ana ara nesey sə, ŋgwaz ɓa dapa pa taɓa ta miya makwasa faŋga, ka gwaɗa Yesu ava gədaŋ, gege: «Mapəsma ta Zlav ɓa da yaŋ ŋgwaz mahayakakaa, masakaa wa tata!» 28Amaa tata sə, ke gweɗ, gege: «Meweslə ɓa sesəker da yaŋ ndah macəka zləmay fa ma ta Zlavay, aca nahan yaŋ!»
Cah ta Wut ta nda
(Mat 12.38-42)
29Ndana hay makwasa macəkuma bay da cak te Yesu. Yesu ka zlar megweɗec, gege: «Ndah təlam nesey sə, ac mambəla ana hay aabay, aca nək sə, maɗal cah hay masa e dek da wudam, e de ŋguzdek Zlav te zlərekiyey. Amaa, aca ŋgat mawala aabay, say cah hay masa Zlav ta ŋgiya ava Zawnas, nda mehwedek ma zleezle. 30Ara masa Zlav te ŋgə cah hay ava Zawnas kad ndah de Niniwey, ara nesey Wut ta Nda a ta njah ka cah hay ta ndah təlam nesey. 31Pas ta matəɗ ma sə, ŋgwaz bay da yaŋ vavara ta Saba zleezle e te beŋgeɗek yaŋ ava ndah təlam nesey, e de ŋgeyec ava ma, afa e dek da ma ta kwakumakw ta vavara ka ta cak zləmay fe leŋgesl te meven jene hay ta bay Salmaŋw, nda masa aŋga eve leŋgesl. Mawuzaɗaw, dapa taɓa takwar fana, nda mafəna bay Salmaŋw sə, ɓa! 32Pas masa Zlav a ta təɗ ma a yaŋ ndana hay sə, ndah dapa berne te Niniwey ec te beŋgeɗek yaŋ ka ta ŋgəlafakwar ma, akwar ndah masa təlam nesey. Ac ta dəŋgazlakwaɗ yaŋ ana sə, afa masa ac ta cəna ma ta Zlavay masa Zawnas, nda mehwedek ma zleezle te bəzedeceney, ac ka ŋgwada rav teceŋ. Mawala, dapa taɓa takwar fana sə, nda mafəna Zawnas ana ɓa!»
Slam mawaɗa ta makəsparav
(Mat 5.15; 6.22-23)
33Ava dəɓa ana, Yesu ke gweɗec ava ma maɗəva, gege: «Daha ndana ka gəɗa kwakwaw fa petərla a da waɗ slam da hwaɗ ta way sə, a bərɗa aabay. Amaa a paɗ fa slam te ndey, afa kwa waawa masa e sehw kad way ana sə, a da wala ndey mambəla ana.»
(Mat 6.22-23)
34Petərla ta vaw sə, ndey. Daha ndey takaa aŋga werwer sə, vaw takaa fakwanay aŋga dapa slam mawaɗa. Amaa daha wut te ndey takaa aŋga gwabay sə, vaw takaa aŋga dapa ləvaŋ. 35Ara nesey, pə leŋgesl, afa slam mawaɗa da varakaa nesey, a da tər ka ləvaŋ bay. 36Amaa, daha vaw takaa fakwanay mawaɗa, ləvaŋ kwa kusetke dapa aabay sə, ŋgesey, vaw takaa fakwanay e weɗey ara petərla ta waɗ slam.
Yesu e dəŋgezlecen yaŋ ta Farisa hay
(Mat 23.1-36; Mar 12.38-40)
37Masa Yesu ka ndəvda megweɗey ana cay sə, nda Farisa ana ɓa ka zala ka ta ndə ɗaf da way tata. Yesu ke dey, ke sehw a way ta nda Farisa ana, ka njah ka ta ndə ɗaf. 38Nda Farisa ana, ka rəzlata, afa Yesu ka pana ha wagaa a ta ndə ɗaf ara ma majawa ta Farisa hay te gweɗ sə, aabay. 39Bay Mazlakava ka səna mawulak yaŋ tata avəda, mafay ana, ka gwaɗa, gege: «Akwar Farisa hay, akwa pan taasawa ta masə yam va taasawa ta mandə ɗaf takwar jaka a vəda ka ta cəp ma majawa takwar hay, amaa rav takwar manəha ava mawulak yaŋ ta makar va suwe hay. 40Akwar ndah marəzla, Zlav malama dəɓa te jene hay nesey sə, malama hwaɗiya ana sə, aŋga bay ŋgəɗa geyey? 41Amaa daha akwa wal rav takwar de tər mambəla ana fa yam te ndey ta Zlavay, a lada akwa vecen jene hay masa dapa taasawa takwar kad maslamarga hay.»
42«Akwar Farisa hay, wabaw a yaŋ akwar! Akwa vən jene takwar hay fakwanay slam kuraw, gəva amta akwa van kad Zlavay. Kwa jene hay mekweskwes ana macəna lak hay va gamslak ta lak hay mekele mekele dapa zerdeŋ, akwa vəniya ara aŋga ana. Amaa, akwa sənafa meŋgə jene hay mambəla ana kad ndana hay va mawal Zlav bay. Anjəkar jeŋ ana hay ŋgesey, te meŋgə cəɗem cəɗem. Akwar ta gərda meŋgə jene hay dərziya bay may.»
43«Akwar Farisa hay, wabaw kad akwar, afa dapa Way ta macə mbahw te Zuwef hay sə, akwa wal manjah fa slam mambəla ana hay fəma ta ndana hay. Asaya, akwa wal sə, ndana hay aca ra gwaɗafakwar ava manah yaŋ dapa makwas vaw hay. 44Wabaw kad akwar, afa akwar ara jav hay masa ndana e welec aabay, amaa ndana hay ece dey jaka yaŋ ana, aca səniya bay.»
45Nda amta deveŋ ndah mesesərekecen ma majawa kad ndana hay ka gwaɗa, gege: «Awa nda masasəraka nda, ke gweɗ ara nesey sə, ke ŋgə ka lafandaw, andaw ndah mesesərekecen ma majawa kad ndana hay.» 46Yesu ka vahan, gege: «Akwar ndah mesesərekecen ma majawa kad ndana hay, wabaw kad akwar may! Ye gweɗ ara nesey sə, afa akwa ŋguzdek ma majawa masa ndana hay aca zlafa macəpiya bay. Amaa akwa gwam mejənec ka cəp ma majawa ana kwa kusetke bay. 47Wabaw, kad akwar, akwar ndah malama jav hay mambəla ana kad ndah mehwedek ma ta Zlavay, mekəɗec ndah mehwedek ma ana hay ŋgesey sə, papaŋ ta papaŋ takwar hay biba! 48Ara nesey, akwa meŋguzdecen kad ndana hay mezlər ta papaŋ ta papaŋ takwar hay ŋgesey, ka wafakwar. Eceŋ sə, ac ka kəɗa ndah mehwedek ma ta Zlav zleezle avəda, kwa akwar ke lemecen jav tec hay mambəla ana.» 49Mafay ana, Zlavay dapa leŋgesl te meven jene hay tata, ke gweɗ, gege: «Ya ta zləraɗ ndah mehwedek ma va maslaŋ aɗaw hay kad vereceŋ. Ec te ŋgedec hahar kad ndah leŋgeɗey, dərziya hay, ec te kəɗec avəda cukw cukw.» 50Mafay ana, Zlav e te ŋgedec hahar kad ndah təlam nesey mafay ta ndah mehwedek ma masa papaŋ ta papaŋ takwar hay te keɗeceŋ dapa mezler ta vavara. 51Aca kəɗ macaaca ana sə, Ebel. Asaya, ac ka kəɗ ndah mekele mekele kasl fa Zakaray, masa aca kəɗiya dapa taɓa ta slam te meŋgeŋgez təbekw kad Zlav va Way ta kwakwas. Aŋga, ya gwaɗakwar, Zlav e təɗec ma yaŋ ndah masa ta pəsna nesey mafay teceŋ.
52Wabaw kad akwar, akwar ndah mesesərekecen ma majawa kad ndana hay, afa akwar ka raɓda ma ta Zlavay fəma ta ndana hay ara ndana ta raɓda kəle ta ma ta way. Akwar ka kəs masa Zlav de ŋgə Bay da yaŋ akwar sə, aabay. Asaya, akwar ke recen ma ta ndah masa aca wal mesehwey.
53Masa Yesu ka data a vəda da way ta nda Farisa ana, ndah mesesərekecen ma majawa kad ndana hay va Farisa hay, rav ke hecec mabay da yaŋ ana. Ac ka nəkafa ma hay da yaŋ jene hay mekele mekele. 54Aca cakiya ara nesey sə, afa aca ra ŋgat ma hay masa e teh bay dapa ma tata.
© 2022 CABTAL