Luuka 8
8
Ba baakaduukala Yisu
Malako 15.40-41
1Humbisa a maana, Yisu akataangila misyenge na mala. Huuna nde akalongese na uyabisa Musamu wu Mubwe wu Ipfumu hya Nzambi. Bilumbi bya nde kuumi na byole byaba na nde. 2Hwaba ka na bakaasu ba baabeeluhi mu mavupu mamabi, na mu mabeedu ma pila mu pila, bo ka baaba na nde. Mariya muusi Magadala, wu Yisu hapalisi matengo tsambu mu nde, aba ka na bo. 3Mukima Zana mukadi a Kuza, ikanga-koome hya nzo a Eloode, mukima ka Suzaana, na bakima ba baakahwadisa Yisu na bayihi ba nde mu mbahili yi bo baaba na yo.
Kuma yi mukuni
Mataayi 13.1-9; Malako 4.1-9
4Bu konge a baatu yinene yi yamaati hu pasi musyenge, ya yadiinga Yisu, nde atiidi bo kuma moyi: 5«Hwaba na muutu mumosi wu ayeni hu ngundu a nde hu unyanza muhunu. Bu nde hakanyanza mbutu, mbutu yina yabwidi mu musoho, baadyati yo, na banyunyi baadiidi yo. 6Mbutu kima yabwidi ŋa yulu a manya. Mbutu bu yameni, mitswihala myakanyi mu toni ati a myabahi mamba ve. 7Mbutu kima yabwidi hutso matsyende, bu byakuli itwadi, matsyende maswekimisi mitswihala. 8Ka mbutu kima yabwidi hunaa ŋa toto a mbolese. Bu yameni, na yabuti mbutu kama kama.» Na Yisu asyenuli ndaha: «Muutu nga matswi ma uyuha, ayuha!»
Muhima Yisu ali mu uta makuma
Mataayi 13.10-17; Malako 4.10-12
9Bayihi ba Yisu baafuuli nde mbindulili a kuma moyina. 10Yisu aleeli huli bo: «Huli benu Nzambi amiiva bungodu bu uyaba matswehi ma Ipfumu hya nde. Ka huli baatu bakima, me ndi mu unzabisa bo mo mu makuma, mana
“Tso bo baatala, bo umono ve,
na tso bo baayuha, bo utsikaha ve#Esa 6.9.”»
Yisu abinduli kuma mukuni
11«Mbindulili a kuma moyi ni yi: muhunu ni mambu ma Nzambi. 12Mbutu yi yabwidi mu muvanga a musoho, ni baatu ba bali mu uyuha mambu ma Nzambi. Ka Mukuyi ubayamaasa mo mu mitima mya bo, mana bo bavelesa hiitu na bavelefuuha. 13Mbutu yi yabwidi ŋa yulu a manya, ni baatu babali mu uyuha mambu ma Nzambi na babaayaka mo na kinya. Ka bo a bali na manganzi ve, imiinu hya bo hili hya tangu yi keehe. Ŋa tangu lobese, bo bamiitimba byosi. 14Mbutu yi yabwidi ŋatso matsyende, ni baatu ba bubayuha mambu ma Nzambi. Mu mambu ma idiingu hya bo ma we minyongi, busina na makinya ma tsi, bibaakwamisa bo mana bo bavelebuta mbutu yi yayele. 15Titswene, mbutu yi yabwidi ŋa toto ya mbolese, ni baatu baana ba bubaayuha mambu ma Nzambi. Bo ba baakaanga mo mutso mitima mi mibwe na mya mbuli. Mu mukonono a bo, bo bali mu ubuta mbutu.»
Yisu atiidi kuma a mwinda
Malako 4.21-25
16«Muutu a hubabaangisa mwinda mu uswehe nde hutso itehili, buve mu ususa nde hu tsina a taangi ve. Ka bubaasuusa nde ŋa isuusili hya nde, mana baatu ba bu ukoto mu nzo bamono liyalala. 17Ka pasi isiha hi hyasweme, sa himonehele ŋa liyalala. Na moosi ma maaswemene, sa mayabaana. 18Ni buuna, baakebaani bu benu libaayuha misamu. Mu toni ati, sa babwese uva huli woosi wu amiibaha. Ka huli wu avele na isiha, tso bi nde hamiisa hiitu mu ubaha, sa bapatula.»
Ibandu hya Yisu hya mbuli
Mataayi 12.46-50; Malako 3.31-35
19Ngu a Yisu na baana ba ngu a nde baayidi hu uyamono nde, ka a baamoni nde ve mu toni a konge a baatu. 20Ni mu buuna, baatu baayabisi Yisu: «Ngu a we na baana ba ngu a we bali hu mbadi, na batondi umono we.» 21Ka Yisu afutili bo: «Ngu a me na baana ba ngu a me, ni baana boosi ba bubaayuha mambu ma Nzambi na ba bubaasalila mo.»
Yisu avudimisi ifula
Mataayi 8.18,23-27; Malako 4.35-41
22Ilumbu himosi, Yisu akoti mu bootehe na bayihi ba nde. Nde aleeli bo: «Tswendaani hu simu lina la dyanga.» Buuna, bo baayeni. 23Bu bo baakayene mu bootehe, Yisu abwamini tolo. Bu baaba mu dyanga, masulubete, ifula hi mifudi hyayabwa. Bootehe laluuli mu mamba na bo baaba mu pasi yi lipfu. 24Bayihi bayasusaha ŋa pedu a Yisu, na baaleeli: «Mulongisi! Mulongisi! Bisu likwi!» Yisu asuuhi, apamini ifula na mapo. Ifula na mapo byakulimini, na byasiidi «swi». 25Buuna, Yisu aleeli bayihi ba nde: «Imiinu hya benu, ka hyahyo?» Ka bo baamoni tsisu na kimwili, na bo baakalelesene: «Ki pila a muutu wu, wu ubaatuma ifula na mapo bibaayuhala nde?»
Yisu abeelusi muutu nga matengo
Mataayi 8.28-34; Malako 5.1-20
26Yisu na bayihi ba nde, bu baasabuhi dyanga la Ngalili te hu simu lina, bo baayato hu itanzi hya Ngelaseneya. 27Bu Yisu hakasutaha mu bootehe, muutu mumosi mu musyenge mowuuna wu matengo maaba maamilwata, aya bwana na nde. Umata beleve, nde a hakabwelwata bikutu ve. Nde a hakabwetsahala hutso a nzo ve, ka ndulu hu mapembe.
28-29Ka mataangu ma malahi, tengo moli laakakaanga nde. Ni mu buuna, mu uliha nde mu ubaayene, baaba bakuta nde mapanga na uhada nde bitali mu miilu. Ka nde akabaakese byo. Tengo lakabaabita nde hu kumu a nzala. Bu muutu mo hamoni Yisu, nde ayami, na nde ayabwa ŋa miilu mya Yisu. Yisu atumi tengo mu upala mu muutu mowunuwu. Muutu mo aleeli mu mifudi myosi: «Bisu a we ki toni, Yisu Mwana a Nzambi a Pungu? Kolo-kolo a we, a hakwamisa me ve.»
30Yisu afuuli nde: «Nduhi a we na?» Nde afutili: «Nduhi a me “konge”.» Nde hafutili buuna mu toni ati, konge matengo yaba yakoto mu nde. 31Mihisi momiina myayayini Yisu mana nde aveletuma myo mu uyene hu mbenge#8.31 mbenge: mbenge a mbaahu buve mbungulu, kondaayi mihisi. . 32Ka ŋa pedu a ŋana, hwaba na konge yinene yi bangulu yi yaba mu udya ŋa yulu isyelo. Matengo mayayini Yisu mu uva mo muswa mu ukoto mu tso bangulu mobaana, nde asiingisi mo. 33Buuna matengo maapali mu bahala mo lina, na maayakoto mu bangulu. Na konge bangulu yoosi, yayabungamana hu tsina isyelo nate hutso a dyanga, na yadyami «ndwi».
34Bakelisi ba bangulu bamono ma maavyohi, baabati, na baayayabisa musamu hutso musyenge mo na mu mala. 35Baatu bubaayidi hu yamono ma maavyohi, bo bato ŋa Yisu haba, baamoni muutu wu matengo maapali mu nde. Nde aba atsahala ŋa miilu mya Yisu, nde aba alwata bubwe, matsimi ma nde mafutihi ŋa mbuha. Bu bo baamoni nde, bo baaba na boomo. 36Ba baamoni ma maavyohi, baayabisi bo buni nga matengo hayobihi.
37Ni mu buuna, bisu Ngelesaneya boosi baabahi boomo bu bulahi. Na baayavondo Yisu mu utahuha na bo. Nde abwekoto mu bootehe na afutihi. 38Muutu mo wu ayobihi mu matengo, afuuli Yisu tso nde utwala uyene na nde. Ka Yisu afutili na aleeli nde: 39«Futaha hu nzo a we, na yayabisa moosi ma Nzambi amiisiila we.» Na muutu mo ayeni mu uyayabisa mu musyenge woosi ma Yisu hasiidi nde.
Yisu asuuli mwana a Yayiro mu lipfu
Mataayi 9.18-26; Malako 5.21-43
40Bu Yisu hayafutaha, konge yinene yayaki nde, mu toni ati boosi baakakeele nde. 41Na bahala limosi nduhi Yayiro wu aba mukuutu a nzo lisambulu yi Bayudaayo ayidi. Nde ayabwa ŋa miilu mya Yisu, na avondi nde mu uyene hu bwa nde. 42Nde haleeli buuna, mu toni ati, liviingu la mwana a nde wu mukaasu, wu aba tungi la kuumi na bilima byole, aba ŋa lipfu. Bu nde haba mu dwe huuna, konge a baatu yakavinyala nde.
43Hwaba na mukaasu nga bubeedu bu makila: makila maakapuuha nde hwavele ukanya umata bilima kuumi na byole. Na nde amani bya nde byosi huli babuhi, ka tso mumosi mu bo a habeelusi nde ve. 44Nde ayasusaha ŋa mbisa a Yisu, na abembi tsoso ikutu hya nde. Mu mawasa, makila ma nde maakanyi. 45Na Yisu aleeli: «Na mibembe me?» Bu boosi baakatuna, Peetelo aleeli nde: «Mulongisi, ni konge yi yadiinga we yili mu uvinyala we matsyelo moosi.» 46Ka Yisu afutili: «Muutu mibembe me. Me mimono ti mufudi mipala mu me.» 47Bu mukaasu mowunuwu hamoni ti nde a hakibwesweme ve, nde ayasusaha na likamba, na abwi ŋa miilu mya Yisu. Na ŋa busu bwa baatu boosi, nde ayabisi toni yi nde habembi Yisu, na buni nde habeluhi kidumana. 48Yisu aleeli nde: «Mwana a me, imiinu hya we hi mifuuhasa we, yene mu hyenze.»
49Bu nde hakatoyo, muutu mumosi amati huli mukuutu a nzo lisambulu yi Bayudaayo, ayidi na ayaleele: «Mwana a we mikwa, nyaha ubwekwamisa mulongisi.» 50Ka Yisu bu hayuhi buuna, aleeli Yayiro: «A haba na boomo ve! Sa ndulu hiitu mu Nzambi, na nde sa afuuha.»
51Bu Yisu hayato hu nzo a Yayiro, nde a hasingisi pasi muutu mu ukoto na nde ve. Ka ndulu Peetelo, Yowani na Yaki, na taata na ngu a mwana baakoti na nde. 52Baatu boosi baakalila na baaba mu lingebe mu toni a mwana. Ka, Yisu aleeli: «A lilila ve, nde a hakwa ve, ka nde tolo ali.» 53Na bo baakakwede nde, bo baaba baayaba ti nde amiikwa. 54Ka Yisu akaangi mwana mu hoho, na aleeli mu mifudi: «Mwana a me, teleme!» 55Muvumu a mwana ayafutaha: mu mawasa mwana asuuhi na atelimi. Yisu atumi mu uva nde byudya. 56Ngu na taata a mwana baakimuhi hu ulahi, na Yisu alihi bo mu uveleyabisa pasi muutu ma maavyohi.
© (Active), Wycliffe Bible Translators, Inc. All rights reserved.