Lûk 22
22
Ə pɨaʼtə̂ se zhwiə Njisə̀s
(Matyò 26.1-5; Mâk 14.1-2; Njɔyn 11.45-53)
1Ə tè se nyi kə tuʼ me ghaʼa mɛ ə ghɨ tè zhiə payn ə kwaŋ kɛ ke kyi va fèsə̀ʼ ətəyn, kə m̀ tè paʼsə pə, e tɔŋtə kəpiə nə mtuʼ mè Zaʼâ tsɛ̂m, 2ghɨkɔʼsə nə eshyə̂ yî tyə̀ynsè sə alàŋsè e kyiŋə tèndom se nyaʼtə zhwiə Njisə̀s, kûmə̀ nə ghənə tè fànə ghɨə.
(Matyò 26.14-16; mâk 14.10-11)
3Satàyn ə njiə ə Njondàs ewìyn vɛ ə ghɨə te tɔŋtə kəpiə nə Èskalɔ̀t, ə̀ nyi kepî wùə èmɔ̀ʼ əfètə̂ se chùmtè èpam sə Njisə̀sè njò sepɛ̀. 4È və ndò ə ndùə fe ghɨkɔʼsə nə eshyə̀ Ndɛ Ètsə̀məghe, ə chisə èndom vɛ ə è kaʼa è pəʼle vəyn ətəyn sê ghənə. 5Ghənə tè saŋnə ndəmə nə ə fo ekɛ sê vəyn. 6È və pomə, ə̀ zhə̀tə sè kyiŋə endom se pəʼlè vəyn sê ghənə ashìŋə̀ kə ghɨə ndò ə və ngùŋ.
Njisə̀s ə zhi fɨazhio Ezaʼa tsɛe yî ghɨtom ə vəynghe
(Matyò 26.17-25; Mâk 14.12-21; Njɔyn 13.21-30)
7Tuʼ vɛ ə ghɨə tè zhiə payn ə kwaŋke mə ke kiva fèsə̀ʼ ətəyn, mə ə̀ tè nyì kepî ə fetuʼ fe zaʼatsɛfe, 8Njisə̀s ə tomə pità yî Njɔyn ə piə nə, “Ghàyn ndu fetê efɨazhiə ezaʼa tsɛve kə ghâsènì zhi.”
9Ghənə pfɨfə sê vəyn nə, “O kyiŋə nə ghàs ndu fɛte ghayn fɨazhiə nə vɨnə?”
10È və pə̀ynsə̀ sê ghənə nə, “Ghàyn zɨte, ghàyn nə̀ piə njiə ndùə əfètə̂ tə̀ʼ ə̀təyn, ə wùə kwəyne ghaynghə ghənə mə è və kyə̀ tɔ̀yn m̀mò. Ghayn fè vəyn, ghàyn ə ndù kə ə vəyn epam, ə è ndù nji nâʼàpî ə ndɛ èkè, ghàyn ə njiə kə ətəyn, 11ə piə sê pɛ ndɛ nə vɛ nə, ‘Tyə̀ynsè pfɨf nə, Lôm ə ndɛ ə̀ ghɨə motə pə zɛ zàyn kə m zhi fɨazhiə ezaʼa tsɛe ətəyn ghasè chùmte pam sɨmse ə?’ 12Ə è tyəyn lôm ə ndɛ èghaʼâ zɛ ekwùtwəyn, naʼapi ghe e nyi ətəyn, ə ghàyn pɨaʼte fɨazhiə ətəyn fu.”
13Ghənə ndùə fe naʼapi ghè, nyi ke eghɨ kə Njisə̀s fe pi, ə pɨaʼte efɨazhi ezaʼa tsɛe fu. (Matyò 26.26-30 Mâk 14.22-26 1 kɔ 11.23-25.)
14Shiŋə kə kwəynə, Njisə̀s e sè zhiə yî ghɨətom ə vəyn ghe 15ə se piə sê ghənə nə, “M tè se chîə kə nâʼà endom se zhi fɨazhiə ezaʼa tsɛe vɨ̂yn ghâsènì tsɔfə kə m kwu. 16M piə sê ghàyn nə, m tə fɨnə zhiə va fɨazhiə nə vɨ̂yn nâʼà səkɔs se zaʼâ kə fɔ̂yn ə Fezhə̀vè kɔʼ kwəyn.”
17È və njiə wà ə fo àzɔ̀ŋnè sê Zhə̀fè ə piə nə, “Ghàyn ko lɨ̀ mɨ̂yn, ə ghàyn chyàte mɨə. 18M piə sê ghàyn nə, se zhə̀tə̀ zôyn se ndù əsi, m tə fɨnə mɨə va lɨ̀ mɨ̂yn se zaʼâ kə fɔ̂yn ə Fèzhə̀ pə̀yn.”
19È və njiə kəpiə àpayn ə kwaŋke ə fo àzɔ̀ŋnè sê Zhə̀fè ə pɨalə ə fo sê ghənə ə piə nə, “Ə̀ vɨ̂nə nyi ewiyn vɨm (kə m fo sê ghàyn. Ghàyn nə nə̂ zɨnə mə se kwaʼtə mi.” 20È və fɨnə nə kəpiə zamə è wà mlɨ̂ kə ghənə zhi mɨ̂sè e piə nə, “wà zɨ̂yn nyi wà mkàyn me fɛ̂m kə Zhə̀fè kɨl endəm mə̂m mɛ ə m sɨs sê ghàyn.)
21M piə nyî, wùə vɛ e nə pəʼlə mi e tsɨs ke nâʼà ghasè ə vəyn elùʼ e zhiə fayn. 22Va wùə ndùə kè kə Zhə̀fè ndə̀m, pîza ze nə̂ kwûəmə̀ nâʼà sə ŋaŋ se wùə vɛ ə è pəʼle vəyn!”
23Ghənə ə zhə̀tə̀, kə se pfɨf se kê nə ə nə̀ mômə̀ ndè kyì eghɛ nə zɨnə mə ə ghâsènì əfètəyn ə?
Ə̀ tsɛ̀ ndè ghɨə mɔʼɔ ghə
24Saʼne zə tè ndwìe kepî ə ghənə fètəyn nə, ə nyi ndɛ ə vɛ è ngaŋtə tsɛ ghənə ə kɨm ə? 25Njisə̀s ə se pi nə, “Fɔ̂yn tə mbi te kyi atyaʼa, saʼə zəʼtə̂ ndò ghɨə ghənə, pîza kyiŋə nə ə nə tɔŋtə̂ ghənə nə tsàmtè sə ghɨ̀sè. 26Ze va sə̂ nyi za se ghàyn. Wùə e ngaŋtə ə ghàyn əfètəyn e kyi sə nyi kə wùə vɛ e tətə kwûŋsə̀, vɛ e nyi atu e pɨl nyi sə̂ nyi sə wùə ə fɨaʼa se ghàyn. 27Wùə ə ngaŋtə nə̀ nə̂ ə se nyi vɨ̂yn və, e vɛ e tsɨs zhiə kə ndò mə, e vɛ e tsɛsə fɨazhiə və? Piə ə nyi vɛ e tsɨs, zhiə kə ndo? Se mi m nyi ə ghàyn ə fètəyn kə wùə èfɨaʼa.
28Ghàyn ə faŋ ke ndo ghâsènì ə fetə̂ tèmɔ̀m tɨmte, 29m fo èfɔ̂yn sê ghàyn kèpî kə pɨ̀a vɨ̂m fo sê mi 30kə ghàyn nə zhi ə fɨyn mɨ ə mi elùʼ e zhiə etuʼ vɛ m saʼa fɔ̂yn ə vɨm. Ghàyn tə nə̂ ə tsɨs kepî ə mkyə̀ mə tèfɔ̀ynə̀m njò sepɛ̀, saʼa tètâŋ tə Isìlây tɨ̂nə̀ njò sepɛ̀.” (Matyò 26.31-35; Mâk 14.27-31; Njɔyn 13.36-38.)
31Njisə̀s ə fɨnə tɔŋtə Shimùyn ə piə nə, “Shimùyn, Shimùyn, o kɛ nə Satàyn ə ndɔyn ndom se shə̀ʼ ə ghô kə ə nə̂ shə̀ʼə̀ m̀pfɨ̂ŋ, 32pîza mə tsə̀m se ghò nə kə̂ pomə zɛze nə pfɨ mɨ̂sè. O kɛse pəyn se mi o nəyn kə təmə ghɔnɛ ghə tɛ.”
33Pità ə piə sê vəyn nə, “Pɛ, m pɨaʼte se ndùə ə chaʼ ghasè ghò, pi se kwu ghasè ghò.”
34È və piə sê vəyn nə, “M tsâ se gho, ə Pità nə, ndomə̀mbvɨ nə piə e tɔŋə ndàyn mə ò mɛ mi shiŋə te ta.
35Njisə̀s ə fɨnə pfɨfə sê ghənə nə, Ə te nyi etuʼ vɛ ə m tom ghàyn, shəynfe kɛ fe va, pfɨsə ghol se va, ghàyn tè laʼ ndo fɨa kə?”
Ghənə pə̀ynsə̀ nə, “ghàs te paʼ laʼ fɨa.”
36È və se piə sê ghənə nə, “Zôyn nyi, ə kyi pi ndɛ kɛu kɨ̀sə ə nyi pi shəyn, è və njiə. Ə làʼà pi ndɛ fɛzè, è və pəʼlə fèpfɨ̂ fə vəyn fe ə zhɔnə. 37M piə se ghàyn nə, zɛ e kyi sə nyi kɨ kə ə nyi mə nyaʼ ə Ŋwàʼlè ə Fèzhə̀ nə zɛ kyi se kyàyn se mi ə tè nyàʼ nə, ‘ə taŋ vəyn kə wùə èmɔ̀ʼ əfètə̂ ə ghɨghe ə ghɨ kəm saʼe.’ Ze nyi nyî kûmə̀ nə naʼapi ghè vɛ ə nyi mə nyaʼ kûmə̀ mi ze kyi se kyàyn.”
38Ghənə ə piə sè vəyn nə, “fe kə Pɛ. Ə fa nyi tefɛ̂ tepɛ̀.”
È və piə kə se ghənə nə, “Ghàyn za maʼà ndu.”
Njisə̀s ə səʼ tsə̂mə̀ etuə pfɨ̀yn
(Matyò 26.36-46; Mâk 14.32-42)
39Njisə̀s ə fɨə fuə tə̀ʼ ə kɔʼɔ ə pfɨ̀nə̀ Sèolìfs, kè kə è nə̂ ndamə kɔʼɔ, chùmte pam sə vəynse kɔʼɔ kə ə vəyn epam. 40Ghənə kɔʼɔ zaʼâ fumə, è və piə sê ghənə nə, “Ghàyn tsəm kə̂ ghàyn nji emɔ̀m.”
41Njisə̀s ə wâmnə̀ za ə ndò ə ghənə ə ngwùŋ ə kɨŋtə ndùə zaʼâ kəpi kə wùə kaʼa è laŋ ngɔ̀ʼ ə è ndu tayn, ə tɨmə ə̀ndzɨs ə chi sè tsə̂mə̀, piə nə, 42“Pɨ̀a vɨ̂m, o kɔ̂ŋɔ̀ o fiə wà ngəʼ zɨ̀yn ə mìə gho. Naʼapi za, nə kə ghɛ zɛ ə ze kwuəynə sê ghò, kə̂ o nə̀yn zɨme.” 43Kə ashìŋə̀ nə kɛ, tsiə Fèzhə̀ ə ndò ekwùtwəyn ə pə̀ fo atyaʼ sê vəyn. 44È və kwàʼtə ngəʼ èghaʼâ zɛ è nə̀ nə̂ ə è və nyi ətəyn, e kwûəmə tsɛsə̀, è və fɨnə tɔ̀ʼɔ̀ tsə̂mə̀, zuʼseke ə fɨə ə ə vəyn ewìyn, kyaʼà kə mndəm, tàyntə̀ ə chi.
45È və tsə̀mə̀ mɨ̂sè ə ndwìə ə pi kɛsə ndùə ndo ə fe chùmte pam sə vəynse, se pɨənə kə ghɛ ətəynze e fo tsɛsə̀ ngəʼ se ghənə, ghənə pɔ. 46È və piə se ghənə nə, “Piə e za nyi nə ghàyn pɨənə kə ndò ə? Ghàyn ndwi ə gha tsə̂mə̀ kə̂ mômzè pəyn se ghàyn.”
Kə tè kyi Njisə̀s
(Matyò 26.47-56; Mâk 14.43-50; Njɔyn 18.3-11)
47Njisə̀s e pa wâmnə̀ kə ndò, nɔ̂nə ə ghɨ kə e pə̀, əsi e nyi Njondàs, kəpi wùə emɔ̀ʼ ə fetə̂ sechùmtè pàm sə vəynse njò sepɛ̀. È və kɨŋtə pə̀ sè kyiŋə se paŋnə Njisə̀s. 48È və pfɨfə sê vəyn nə, “Njondàs, e za piə nə gho paŋnə Va Wùə se fo se ghɨ ghə?”
49Ə tè nyi kə ghɨ ghɛ ə nyi yî ghɨə vəyn fe ghɛ zɛ e nyi se nə kyàyn, ghənə pfɨfə sè vəyn nə, “Pɛ̂pɛ, ə ghàs kaʼle e fɛtə?” 50Kə nyi, vîvè ə kaʼa tənə àtûŋne ekɔyn e twɔ ə wùə fɨaʼa ə wûə èkɔʼsə nə èshyə̀ èngaŋtə kwəynə.
51Pîza Njisə̀s ə pìə nə, “Kə ghàyn fɨyn mom!”, kè sə ashìŋə̀ kə è kòm tuŋne ətəynke, ke ə tɛ kə ndò.
52Ə nyi za mə ghɨkɔʼsə nə eshyə̀ ə ndɛ ètsə̀mə è tuə əghɨ̀ ghɛ ə ghe tè tsɨ̀ŋnə Ndɛ Ètsə̀mə è chəʼse endaʼse ə fɨə pə̂ se kyiə vəyn. Njisə̀s ə pfɨfə se ghənə nə, “Ghàyn fɨ pəyn e nyi meghɔ̀ŋə̂m e mbàŋsè kəpiə ghàyn nyiŋə əwùchɔŋə epàm kûmə̀ ghe? 53Piə ma zɨsə kə ghâsènì tuʼ mə m̀kɨ̂m ə Ndɛ Ètsə̀mə, ghàyn kyiə va mə? Naʼapi sə kàyn, ə kwəyn ashìŋə̀ kaynke, mə nyi ashìŋə̀ kɛ ə Pɛ̀ atyaʼa lɨma saʼa ətəyn.”
Pità ə mɛnê Njisə̀s
(Matyò 26.57-58, 69-75; Mâk 14.53-54, 66-72; Njɔyn 18.12-18, 25-27)
54Kə e wàmnè za, ə ko vəyn se ndùə è vəyn apɨəyn ə wûə èkɔʼsə nə èshyə̀ èngaŋtə kwəynə, Pità e chumtə̀ ndùə nâʼà sa aghaf. 55Ə ndùə kwâ ewus əfètə̂ ezhɔyn se zɨtə. Pità ə pɔŋɔ ndùə tsɨsə tsɨyntə yî ghənə. 56Wusve sè pɛ̂, vayn ezhɔyn vî mə e tè fə fumə apɨəyn ə tɨmə naynə̂ vəyn kə e tsɨs ə ngwùŋèchi ə pìə nə “Wùə vɨ̂nə a nə ndamə kwîə yî vəyn.”
57Pità ə toynə̂ ə piə nə, “Wùzhɔyn vɨ̂yn, m ke pi va vəyn.”
58Ə môtə̀ kə sə fɨndiŋə̀ nyì, wùə e ndomə ə vî ə fɨnə fè vəyn ə pìə nə, “Ò nyi kəpi wùə ànɔ̀yn ə wùə nə vɛ ke.”
Pità ə pɨ̀əmə̀ vəyn ə pìə nə, “Yey, wùə vɨ̂yn, nyaʼâ mi!”
59chwiə e mɔʼ ə pi tsɛ̂ ndò, wùə mɔ̀ʼɔ ə fɨnə kùmtə piə kə pi nə, “E nyi ke nâʼà səmɔʼ nə wùə vɨ̂nə tè nyiə kwiə yî wùə nə vɛ kûmə̀ nə ə̀ nyi ke nâʼà wùə Ngalìlî.”
60Pîza Pità ə pə̀ynsə̀ piə nə, “Wùə ə vɨ̂yn, ghò piə nə ghe nyiə?” Kə e pìə pə kə nyi, ndomə̀mbvɨ ə tɔŋə. 61Ke sa ashìŋə̀, Pɛ̂pɛ kə̀mnə̀ naynə̂ ndùə Pità ke ekyàʼ, è və kɛse kwaʼtə eghɛ zɛ è fe pi sè vəyn nə, “Ndomə̀mbvɨ nə piə e tɔŋə ndàyn mə gho mɛ mi shiŋə teta.” 62Ke ashìŋə̀, Pità ə fə ndùə əpɨəyn ə chîə nâʼà sə ŋaŋ. (Matyò 26.67-68; Mâk 14.65.)
63Ghɨ ghɛ ə ghe kyi Njisə̀s ghe sè ləʼsə̂ vəyn fɨnə pusə vəyn, 64mə ghənə kol siə ə və sè pfɨfə sê vəyn nə, “Tsàyn nə ə pus ndɛ gho?” 65Ghənə tè pi kepî ghɛ ə tsɨə əmɔʼɔ sè vəyn, ghe zafə kə nyi.
Ə və ndù è Njisə̀s eluʼ əsaʼ
(Matyò 26.59-66; Mâk 14.55-64; Njɔyn 18.19-24)
66Tuʼ və zo pə̂, chəʼse endaʼse e ghɨkɔʼsə nə eshyə̀ ndɛ Fèzhə̀ e ghaʼâghè è tyə̀ynsè sə alàŋsè ə kyiə atsɨ̀ynte, ə pə̀ e Njisə̀s fu atsɨ̀ynte, 67ghənə piə sê vəyn nə, “Ò nyi ke nâʼà Klâys, o tsà pə̂ se ghàs.”
È və pə̀ynsə̀ nə, “M tsàyn pi ndò, ghàyn vâyn pomə, 68mə m pfɨf naʼapi eghɛ se ghàyn, ghàyn vâyn pə̀ynse. 69Pîza sè zhə̀tè zôyn sè ndù əsi, Va Wùə nə tsɨsə ekɔyn etwɔ ə Fèzhə̀ ve, ə Pɛ atyaʼ akɨ̂m.”
70Ghənə ə tsɨ̀yntè pfɨfə kə ə kɨm nə, “Piə e za nyi nə ghò nyi va Fèzhə̀ ə?”
È və pə̀ynsə̀ nə, “E nyi ke za kə ghàyn pi.”
71Kûmə̀ nyì, ghənə piə nə, “Ə fɨnə kyiŋə nâʼà sè ghaghe e tsɛ saʼə, piə ghâsènì əzɨ kè nâʼà ə vəyn cho?”
©2022 CABTAL