Lûk 13
13
Ghàyn kwiyne təm ghaynghe piə
1Ə̀ tè nyi kepî ashìŋə̀ nə kɛmə, ghɨ mɔ̀ʼɔghe fumə ə fɨə pə̀ ə tsà eghɛ sê Njisə̀s kûmə̀ ə̀ghɨə Ngalìlî əmɔ̀ʼɔ kə̂ Paylɛ̀t tè zhwite ə fɨsə m̀ndəm mə̂ ghənə̂m è mə sènyàm shise ə ghənə tè se, se fo sə efo. 2Njisə̀s ə pfɨfə sê ghənə nə, “Ghàyn kwàʼtə̀ nə ngəʼ nə zɨ̂yn kote kê əghɨ Ngalìlî nə ghɨ̂yn kûmə̀ nə ghənə tè nyi əghɨe piə tsɛ̂ yiə mə? 3E va chi za nâʼà səkɔs, pîza m piə sê ghàyn nə, ə ghàyn tàʼa pə̀ynsè ə təm ghaynghe ghɛ ə pi ghaynghe, ə ghà əkɨ̂m tə njìsè kepî zâ. 4Ghàyn fɨyn kwàʼtè kèpi eghɛ zɛ ə ze tè kyàyn sê ghɨ Silùomə̀ ghɛ njòse famə. Ndɛ̂ chi zɛ ə tè pɛ, è tyàfə̀ nyi ə tə pfɨ̀ə zhwite ghənə nâʼà ə̀kɨ̂m. Ghàyn kwàʼtə̀ nə ghənə tè nə̀yn sepi se tsɛ̂ sə ghɨ ə̀kɨ̂msè ə Njèlusalɛ̀m fu mə? 5e va chi zâ nâʼà səkɔs, pîza m piə sê ghàyn nə, ə ghàyn tàʼa pə̀ynsè ə təm ghaynghe ə ghɛ ə pi ghaynghe, ə ghàyn əkɨ̂m tə njìsè kèpi zâ.”
6Njisə̀s ə mɛ̀ ngàyn zɨ̀yn sê ghənə nə, “Wùə viu tè kyi fekâʼ fə fîkfè kə è zho ə və afùʼ sè ndùə kə shîŋə̀ tekɨ̂m se fe nə twɔmve ə mu ətə ə, pîza fe va tamke ətəyn nâʼà səkɔs. 7È və piə sê wufɨ̀aʼa ə̀ vəyn nə, ‹Mə pə̀yn fa esas ə̀ fèkâʼ kè sə ndô sə ndô sə sepìŋ sèta, fe va nâʼà àfɨa etuə təyn. Kwə màʼa fəynfe! Kûmə̀ ghè ə fe pofsə lùʼ əmchi vɨnə̀ səndô ə?› 8Wufɨ̀aʼa təyn ə pə̀ynsə̀ nə, ‹Pɛ̀ apɨəyn, fɨyn za kə zâ fà pìŋ, m nə̀ tɨmə ka èsas ətəynze ə m ndəm chi mə èfɨazhîəm ətəyn. 9Twɔmve ə muə ətəyn ə pìŋ è pə, ə za, pîza ə tàʼa mu, ə kwə̀ màʼà.›”
Njisə̀s ə tsuʼ wùə mə è ngɨmnə̂ kwiəndò etuʼ endaʼ ə̀ ghɨə Njûsə̀
10Ə̀ tè nyi etuʼ endaʼ vîve, Njisə̀s ə njiə ə ndɛ̂ atsɨ̀ynte zhîzè sè zaʼlə̂ ə̀ghɨ. 11Wùzhɔyn vîvè e nyi fumə mə zuʼ se pise ə fo ngəʼ sê vəyn sə sepìŋ njòse famə, è və ngɨmə̂ faŋa, nyi mə è vâyn kàʼa è ndwìə kwiə ekwùtwəyn, chichi. 12-13Njisə̀s ə fe pə̀ vəyn nyi ə tɔŋɔ vəyn, è və fɨə pə̀. Njisə̀s ə nɛ̀sə̀ àgho ə kûmə̀ vəyn ə piə nə, “Wùzhɔyn, ò tɛ mbɛ̀.” Kè sə ashìŋə̀, è və ndwìə tyəmə ə kwiə ndùə kə chichi sè tsîtə̀ ndûə Fèzhə̀.
14Pîza tuə ndɛ̂ atsɨ̀ynte ə ghənə nə kɛ e sè nyɔ̂ʼsə̀ etɔŋ kûmə̀ nə Njisə̀s ə tsuʼ wùə etuʼ endaʼ ə ghənəu ə se pi sê ghɨə nə, “Tuʼ mə̂ èfɨàʼam nyi mtufə ə ngâm, ghàyn kyi se pə̀yn nə ə tsuʼ ghàyn ə mtuʼ nə mɨ̂yn, ə va chi etuʼ endaʼ.”
15Pɛ̂pɛ ə pə̀ynsə̀ nə, “Yey, ghɨə kaŋkaŋa nə̂ ghɨ̂yn! Nâʼà wùə vɛ ə è nyiə ghàyn əfètəyn ə è ndwìə kɔʼɔ etuʼ endaʼ, è və za nyàm ə vəyn se zhə̀yn ə mbàyn se ndùə è zə̂yn elùʼ nə è mɨ môm ə? 16Wùzhɔyn vɨnə tè nyi wùə èsas ə ndɛə Aplàghâm mə Satàyn ə kol ghaŋ tə vəynte sə sepìŋ njòse famə, ə faŋ zayn se sɔ̀sè ə vəyn etuʼ endaʼ ə?” 17Kə è wàmnè nyi ə ghomsə̂ sèpàyn sə vəynse. Tsɨ̀tsɨ̂ə ghɨ̀ fu tè nyiə saŋnə kûmə̀ əghɛ ə kayntə ghɛ ə̀kɨ̂m ə è tè nə̀yn.
Əsengàyn Kûmə̀ èfɔ̂yn ə Fezhə̀e
(Matyò 13.31-32; Mâk 4.30-32)
18Njisə̀s ə se pfɨf sê ghənə nə, “Fɔ̂yn ə Fezhə̀vè nyi kə ghe? M nyi kàʼa ə m səyne vəynve nâʼà è ghè? 19Ve nyi kepî nyi kə feshîlə̀ fə ngwàʼ ə̀ fèkàʼ fife ə tɔŋtə nə mostà nyiə kə wùə tè zho ə və afûʼ, fe ə ndəmə kɔʼɔ, nɨ̂ŋmè sè pə̀ pɛ sendɛ səghənəsè ə fəynfe ə sengɔyn.”
(Matyò 13.33)
20Njisə̀s ə pfɨfə kwəynsə nə, “M fɨnə fɨ̂aʼnə̀ èfɔ̂yn ə Fezhə̀vè è ghè? 21Ve nyi kepî nyi kə fèsə̀ʼ kə wùzhɔyn nə̂ è ve njiə ə fɨəsə ə m̀kàlà, m tsɨ̀ə kə nyi, fe ə kwiə kə mkàlà mɛ m̀kɨ̂m.”
Ə̀ tə njiə ndè elùʼ efɔ̀yn ə Fezhə̀vè ə?
(Matyò 7.13-14, 21-23)
22Njisə̀s ə tsɛ̀ sè kwîə ndùə ə Njèlusalɛ̀m, tɔynə̂ ə setɔ̂ŋ è tə̀ʼse, zaʼlə̂ ə̀ghɨ. 23Wùə vîve ə pfɨfə sê vəyn nə, “Pɛ̂pɛ, ghɨ ghɛ ə ghe tə zhiə fɨə tə nə̂ ə kwuʼ nyi ke nyiə mə?” È və piə kə sê ghɨghe əkɨ̂m nə, 24“Ghàyn mɔmse nâʼà è tyaʼa se tɔynə echo ndɛ vɛ ə ve fɛse nyi se nji elùʼ efɔ̀yn ə Fezhə̀e. Ghàyn ke nə ghɨ e tsɨə tə nə̂ ə kyiŋə se nji ətəyn pîza ə ze tɛ ghaʼ ghənə. 25Shîŋə̀kè tə kwənə, ə pɛ̀ ndɛ ndwi ə è fa cho ə ndɛve, ə ghàyn tyəm faŋ əpɨəyn ə ngɔʼtə̂, piə nə, ‘Pɛ̂pɛ, chɔʼ cho ndɛu sê ghàs,’ ə è pəynse ke sê ghàyn nə, ‘M ke va nə ghàyn ndò ghayn zə.’ 26Ə ghàyn se zhə̀tə̀ sə̂ piə nə, ‘Ghâsènì ə tə zhi əmɔʼ ə fɨnə mɨə əmɔʼ, o fɨnə zaʼlə̂ ə ghàs ə setɔ̂ŋ.’ 27Pîza ə è fɨyn pi ke nə, ‘M piə sê ghàyn səmɔʼ nə, m ke va nə ghàyn ndò ghayn zə. Ghàyn ndo ə mi cho ndɛ, ghàyn ghɨə ghɛe pi ghɨyn!’ 28Ghàyn tə fe Aplàghâm è Azɨ̀k è Njàkɔ̂p è fɨ̀aʼtè seghaʼâsè sekɨ̂m elùʼ efɔ̀yn ə Fezhə̀e ə ghàyn ə nuŋnə̂ chîə, mə ə fà za ghàyn əpɨəyn. 29Ghɨ tə fɨə pə̂, mə ghe ndo kè tâŋ tə mbi tekɨ̂m ə tsɨsə elùʼ e zhiəu elùʼ efɔ̀yn ə Fezhə̀e. 30M piə nə, ghɨ ghɛ ə ghənə nyi epàm zôyn, tə nə̂ ə nyi əshi, ə ghɛ ə ghe nyi əshi, tə nəyn ə nyi epàm.”
Njisə̀s ə kose səyn sê ghɨə Njèlusalɛ̀mə̀
(Matyò 23.37-39)
31Kè ashìŋə̀ nə kɛ, ghɨ Falàsîə əmɔ̀ʼɔghe ə pə̀ fe Njisə̀s ə piə sê vəyn nə, “Ò kyi se ndò fayn kûmə̀ nə fɔ̀yn Ɛlɔ̀t kyiŋə se zhwiə ghò.”
32È və piə sê ghənə nə, “Ghàyn ndù tsàyn sê sɔ̀ŋɔ̀ nə̂ fɛ nə, ‹M chûmə̀ fɨsə̂ tèpamə̂ tə satàyntè ndâyn ə m fɨyn tsuʼ ə̀ ghɨ se zaʼâ eyisəʼə. Ə nyi sə mtuʼ mta, ə m se mɨ̀sè efɨa zɨme.›” 33Njisə̀s ə fɨnə piə sê ghɨə nə, “Naʼapi kə ze nyi nyi, m kyi sə̂ ndùə kə ekwî zɨmze əshi ndàyn è kɨ̂sè eyisəʼə, se zaʼâ kə m ndù tayn ə Njèlusalɛ̀m kûmə̀ nə fɨ̀aʼtè èghaʼâ kyi se kwuə kə ə Njèlusalɛ̀m.
34Wêy, ghàyn ghɨ Njèlusalɛ̀m ghɨyn ə ghàyn zhwiə fɨ̀aʼtè seghaʼâsè nyi, tɨmnə̂ zhwitə əghɨ ghɛ ə tom sê ghàyn! Mə mɔ̀msè kè səndô səndô se zùŋtè ə ghàyn kə̂ nyiə mbvɨ nə̂ è zùŋtə̀ əghɔ vəynghe etîə tèghɛ̀, pîza ghàyn ghɛ ə tə kendô! 35Zô nyi, Zhə̀fè ə kyinê tə̀ʼ zâyn. M piə sê ghàyn nə ghàyn tə fɨnə fe va mi ə tsɛ̂ kəva nə ə̀ tə pə̀ etuʼ vɛ kə ghàyn ə pìə ətəyn nə, ‹Pɔsêzè nyì se vɛ ə è pə̀yn ə Pɛ̂pɛ ezə.›”
©2022 CABTAL