John 7
7
Jesus‑em Anglegutangita Ugpeqenghilkangat
1Kingunganeng taam Jesus igleghakaq Galilee‑mi. Igleghayugumangilnguq Judea‑mi, qayughllak Jews‑et igleghutistengit tamaanlenguut tuqusugukangat. 2Jews‑et neqenghaghqelleghqaat aatqelghii tabernacles‑meng kaasaghtungestalghii. 3Jesus‑em anglegutangita pikaat, “Aghulaqi maaken, aglaa Judea‑mun maligsaaghteten esghapagesqelluki allaaghlluwhaghtilleghpeneng. 4Kitum alngunak apeghseghuuyulghiim aksaqigataa salleni. Enkaam tawaten pinaqngukuvek tamaghhaghmi yugem esghapagliten!” 5(Talwa anglegutangita Jesus ugpeqenghilkangat.)
6Jesus‑em anglegutni pikii, “Judea‑telleghqaqa salin kaasigatuq, iwernga elpesi alngunak aghneghni piyaghqaagusi. 7Nunam yugan ugumiknaanghitiisi, whanga ugumikaatnga qayughllak aapghaqegkegka seghleq atuqaqegkangat. 8Enkaam elpesi neqenghaghqelghiinun pitek; whanga pinaqenghitunga qayughllak aghneqa salin kaasigatuq.” 9Jesus‑em tawaten piluki ellnga Galilee‑metkaq.
Jesus Neqenghaghqemmun Pilghii
10Jesus‑em anglegutangi neqenghaghqemmun pikat. Taagken kingungitneng yugnun esghaghtesukaghpenani ellngallu pikaq. 11Neqenghaghqemmi Jews‑et igleghutistengita ivaqaat Jesus, pimaghmeng, “Naagu taana yuuk?” 12Uglapiglleghhiit yuget tawanlenguut sigutquutkegkaat Jesus. Ilangita pikaat, “Jesus piniipigtuq yuuk.” Ilangita pikaat, “Nakaa, puughtaqii yuget.” 13Iwernga kitum alngunak qaayngakun akuzitkumangilkanga Jesus, alingluni Jews‑et igleghutistengitneng.
Jesus Apeghtughilghii Neqenghaghqelghiini
14Neqenghaghqellgha santillghem qukaghitaquqlu, Jesus Temple‑mun aglaghluni apeghtughikaq. 15Jews‑et igleghutistengita saghiighayagulluku pikat, “Naten una yuuk liiteghllagta igaghyaamangilnguq?” 16Jesus‑em kiimsiqii, “Apeghtuusanka whangamneng pingunghitut, Kayagtistemneng pinguut. 17Kitum alngunak Kiyaghneghem piyukellgha atuqsugukumigu liisimaksaghqaqaa, apeghtughilqa Kiyaghneghmeng pingutanga, nalighmeng whangamneng katam pingutanga. 18Kina alngunak apeghtughilghii ellmi katam sumeghtaghalleghmineng quulvallengnaqutkengnguuq. Iwernga kina alngunak quulvallengestinaqutkelghii kayagtikamun, akuzinguuq ipapigmeng, iqlengiqigatuq. 19Qamagllusi liisimakaghsi Moses‑em Liilightuusalitkaqiisi, iwernga nalighhiinaghpesi qaatkigatasi. Sangamangam tuqunnaqutkestengnga?” 20Yuget kiimsiqaat, “Tughneghaam iitghumaaten. Kitum tuqunnaqutkaten?” 21Jesus‑em pikii, “Ataasimeng allaaghlluwhaghtiyama Sabbath‑mi qamagllusi saghiighayugtusi. 22Moses‑em qelqaqiisi circumcise‑esqelluki ighnesi (qaywa sivunesi circumcise‑ekaaghngaata Moses‑em circumcise‑esqellghan sivungani). Naqam elpesi circumcise‑eyaghqaanghata ighnesi Sabbath‑mi piiqasi. 23Naafqengngunghilkufsigu Moses‑em Liilightuusaa circumcise‑eghilleghpesigun Sabbath‑mi, sangama ugumiyagutestengnga yuuk naallghutngwaallemneng Sabbath‑mi? 24Nanqigtigpenasi yuget saaqutangi liigikngwaaghpenaki, nanqigtiiqitek elqughullusi.”
Jesus, Christ‑angwaa, Kiyaghneghem Kayagtekaa?
25Taagken ilangi Jerusalem‑eghmiit pikat, “Taanata yuuk tuqusukangat. 26Naqam esgha apeghtughilghii yugnun, naqamllu igleghutistemta sanaqigataat. Qaa whaa liigikaat Christ‑angutanga, Kiyaghneghem kayagtekaa? 27Iwernga whangkuta liisimakaghput taana yuuk naken pingutanga. Christ‑apik tagikan, kitum alngunak nalluksaghqaqaa naken pingutanga.”
28Jesus paninang apeghtughinguluni Temple‑mi, iglagtuluni pikaq, “Qaywa liisimakngwaaghestegguu kinangutka, nakenllu pingutka? Whangamneng tagimangitunga. Kayagtisteka ipapiguuq, iwernga elpesi nallukaghsi. 29Whanga liisimakaqa qayughllak ellnganeng tagikaagunga, ellngan kayagtekaqaanga.” 30Jesus tawaten piyan ilangita yuget tugunaqutkegkaat. Iwernga kitum alngunak agtuqaamangilkanga qayughllak aghnegha salin kaasigalnguq. 31Iwernga uglapiglleghhiit yuget ugpeqegkangat Jesus. Enkaam pikat, “Liisimakaghput una yuuk Christ‑anguuq, qayughllak uglaapiglluku allaaghlluwhaghtiiq Christ‑am piyaghqaaneng.”
Jews‑et Liigikenghilkangit Jesus‑em Akuzitangi
32Ilangita Pharisees‑et nagaquqiit yuget tawaten akuzimleghaallghiit Jesus‑meng, enkaam ellngitallu, chief priest‑etlu kayagtekiit kelengakistet tugusqelluku. 33Taagken Jesus pikaq, “Natengiighhaq elpesinillunga aglaghllequnga Kayagtistemnun. 34Ivaghlleqaghpesinga iwernga naalkennaanghitaghpesinga. Takukamnun aglaghpagningitusi.” 35Jews‑et igleghutistengita ilateng pikiit, “Navek una yuuk pinaqa naalkesaghqaafqaami? Greek‑et akulangitnilnguut yuput takulaghnaqakii? Qaa apeghtughillequq Greek‑enun? 36Samengtuq Jesus pii whaten piiqngami, ‘Ivaghlleqaghpesinga iwernga naalkennaanghitaghpesinga; takukamnun aglaghnaanghitusi’?”
Jesus‑em Akuzitkegkek Agleghnalghiik Taghneghak
37Kinguliq aghnegha neqenghaghqellghem megnunalleghpigaalghii. Tawani aghneghmi, Jesus nekevluni iglagtuluni pikii, “Kina alngunak meqsukumi tagiluni whangamnun meghli. 38Kitum alngunak ugpeqegkuminga, ilunganeng qamaken kiiwet maaqsaghqaagut unguvallengestikayuget meghet.” Akuzitet Igaqegkat tawaten pikaagut. 39Jesus‑em akuzitkengngukek Agleghnalghiik Taghneghak. Kiyaghneghem Taghneghagni salin tuunigataak qayughllak salin kevgigalkanga Jesus quulvalleliteghllagnaluku. Iwernga taakwaningani tamaakut ugpeqilghiit Jesus‑meng, allgeghusaghqaagut Taghneghagneng.
Aaghtiiraaghutkegkangat Jesus
40Nagasamegteggu Jesus tawaten akuzilghii ilangi yuget pikat, “Una yuuk ipapestaaq uuknaliqistenguuq neghyukegkaghput.” 41Ilangita pikaat, “Christ‑anguuq.” Iwernga ilangita pikaat, “Christ‑a tagiyaghqaawaa Galilee‑meng? 42Akuzitet Igaqegkat pikaagut Christ‑a tagilleqniluku David‑em nengllugutanganeng, allgeghlleqnilukullu Bethlehem‑emi, David‑em kiyaghfiganeng.” 43Ilangita yuget ipapighqutkumangilkangat Jesus, 44enkaam tuguyukaat iwernga kitum alngunak agtuqaamangilkanga.
Jews‑et Igleghutistengit Ugpeqinghilnguut
45Kelengakistet kayagtekaayalghiit tugusqelluku Jesus, kaasata chief priest‑etlu, Pharisees‑etlu aaptekiit, “Sangan taginnanighesteggu Jesus?” 46Kiimsiqiit, “Kina alngunak taatun yugtun akuzingigatuq.” 47Pharisees‑et aaptekiit, “Elpesillu Jesus‑em puughtisii? 48Whangkuta igleghutistenillu, Pharisees‑enillu liisimakaput Moses‑em Liilightuusii. Nalimtaa‑a ugpeqatgu Jesus? Nakaa! 49Tamaakut yulghutet nallukiit Moses‑em Liilightuusii, enkaam Kiyaghneghem naafqelleqii.” 50(Ataasiq Jews‑et igleghutistengat Nicodemus‑nguftuq, sivunghani Jesus‑mun pikaq.) Nicodemus‑em pikii, 51“Liilightuusamnni nanqigsaghqaqenghitaghput yuuk, wetqukun nagalluku liigikegkumteggu samatanga.” 52Pikaat, “Elpeklu Galilee‑meng pinguzin? Liinnaqiki Akuzitet Igaqegkat. Liilleqan uuknaliqistengituq tagikameng Galilee‑meng.” 53Qamaglluni tamaana aghulaquutkaq, nemeggnun aglaghtuutkaq.
© 2018, Wycliffe Bible Translators, Inc. All rights reserved.