John 6
6
Jesus‑em Neghestillgha 5,000‑neng Siipngalghiineng Yugneng
1Kingunganeng taam, Jesus‑em aghviqaa Naayvaq Galilee, aatqelghiillu Tiberias‑meng. 2Uglapiglleghhiim maliglleghaatkaat qayughllak naallghuquulghii qinuyugneng allaaghlluwhaghtilleghqun. 3Kaalluteng Jesus‑enkut maligsaaghtekullghiit mayughluteng naayghamun aqumuutkat. 4Jews‑et Passover‑mun Neqenghaghqellghat kaasaghtulghii. 5Jesus‑em sivuglluni esghaqii yulghuteghllaget tagilaghaallghiit ellminun. Aaptekaa Philip, “Naken tukfighinayaghesta neqmeng yulghuteghllagnun neghyaghqameng?” 6Tawaten aaptekaa Philip naten pilleghqaa esghaghnaluku, liisimakeghngaaghmigu ellmi salleghqani. 7Philip‑em kiimsiqaa, “200 denarius‑elgughngaamta naamayaghqameng neqengnaanghitukut, talwa sasqughhaghmeng tunqughngaamteki.”
8Ilangallu maligsaaghta tawanlenguq, Simon Peter‑em anglegutanga Andrew. Andrew‑m pikaa Jesus, 9“Esgha una mekelghiighhaq tallimaneng neqekrangllallgaq, maalghuklu iqallugek, iwernga naamanaanghitut.” 10Jesus‑em maligsaaghteni pikii, “Yuget aqumuutesqiteki.” (Tamaana vegaaghllagulghii.) Enkaam entaqun 5,000‑nguut yuget aqumuutkat, kesutkegpenaki aghnatlu, taghnughhaatlu. 11Taagken Jesus‑em tuguluki neqekrangllat, iqamsiqayugluni Kiyaghneghmun, tunqughtestekii aqumuutkaghllagnun tamaavek. Tawateghpigaq iqallugek pikakek, qamaglluteng neghuutkat kepsulleghmeggnun. 12Qamaglluteng kepsuusata Jesus‑em maligsaaghteni pikii, “Qerngughteggu tamaana neghumangilkangat, sakusiiqegpenaki.” 13Enkaam qerngughlluki imiqiit qula maalghuk siipneqluku pasketet siipneghitneng tallimat neqekrangllat.
14Taana allaaghlluwhaghtilleq yuget esghapagluku pikat, “Ipapestaaq una uuknaliqistenguuq tagiyaghqaanikaat nunamun.” 15Jesus‑em liisimakegkanga yuget aqfaluku umiilengllaghnaqutkennaqngukangat, enkaam naayghamun aglaqaq ellnginaghhaanaluni.
Jesus Piyulghii Meghqun
16Tawani ighivgaghmi, Jesus‑em maligsaaghtengi ukikat Naayvamun Galilee‑mun. 17Mamlegtekanga, Jesus‑llu paninang aviilnguq, enkaam maligsaaghtengi angyamun uughquulluteng aglaqat Capernaum‑emun inglunganilngughmun naayvam. 18Taagken naayvaq imaghllugughtekaq qayughllak anuqlighllakanga. 19Iiwenllu angwaaghmeng naayvam qukaanun lliighaqut, esghaqaat Jesus meghqun piyugmeng tagilghii angyamun enkaam alingruughutkat. 20Iwernga Jesus‑em pikii, “Alingegpenasi, Whanganguunga.” 21Enkaam uugtesukaat angyamun. Taagken tawaninginaq quutmun kaatkat takukameggnun.
Yuget Ivaqangat Jesus
22Yulghuteghllaget unegtekat inglungani naayvam, unaamingani piyalghiimeng Jesus aviituq. Liisimakegkangat ataasiinaalghii angyaq esnami. Jesus maligusimangilnguq maligsaaghteminun angyakun, ellnginaghmeng pikaalghiit unilluku. 23Taagken ilangi angyat kaatquutkat Tiberias‑meng. Tamlakat tungangakun yulghuteghllaget neghuutfigitgun ighivgaq. Neghegkaalghiit neqekrangllameng, kingunganeng Jesus‑em iqamsiqayullghan. 24Yulghuteghllaget piyalghiimeng Jesus‑enkut maligsaaghtekullghiit aviitut, enkaam angyanun uuglleghaalluteng Capernaum‑emun ivaghyaghtuqaat Jesus.
Jesus Neqekrangllaaguq Unguvallelitikayuk
25Naalkesamegteggu Jesus aaptekaat, “Apeghtughista, qavngaq maavek kaasin?” 26Jesus‑em kiimsiqii, “Ipa ungipaatamsi, ivaghaghpesinga qayughllak neghelghiisi neqekrangllameng kepsughaaghlusi. Ivanghitaghpesinga allaaghlluwhaghtillghenka apalluqluki. 27Qepghaategpenaan neqa mulungigalnguq. Yeghlegi qepghaataqiteggu neqa naavyaghqaanghilnguq, kenlengunaan unguvallengestikayuk. Tawatelnguq neqa Ighneghan Yugem tuunyaghqaqa elpesinun, qayughllak Kiyaghneghem Atam itagnaqegkaqaa ellnga.”
28Yuget aaptekaat Jesus, “Sangaawat qepghaqat Kiyaghneghem pisqesukii whangkunnun?” 29Jesus‑em kiimsiqii, “Elpesinun qepghaqaq Kiyaghneghem pisqesukaa esgha una: ugpeqesqelluku taana ataasiq Kiyaghneghem kayagtekaa.” 30Enkaam yuget aaptekaat, “Sangwaa allaaghlluwhaghtilleq pinayaghsigu? Esghapagyaqumteggu elngaatall ugpeqnayaghamken. Sanayaghsin? 31Sivuneput neghegkaagut manna‑meng kilgaani. Akuzitni Igaqegkani igaqegkaaguq whaten, ‘Qilagmeng pamaken tuunegkaqii neqekrangllameng neghesqelluki.’” 32Jesus‑em pikii, “Ipa ungipaatamsi, qilagmeng pamaken Moses‑ngunghituq tuunikaq neqekrangllameng. Qilagmeng pamaken Atakaqa tuunikayuk neqekrangllapigmeng elpesinun. 33Kiyaghneghem neqekrangllaa esgha taana ataasiq ukikaq qilagmeng, tuunilghii unguvalleghmeng nunam yuganun.” 34Yuget pikaat, “Yuguniiq, iiwleng tuunikut tawatelngughmeng neqekrangllameng.”
35Jesus‑em pikii, “Whanganguuq neqekrangllaq unguvallelitikayuk. Kina taana tagilghii whangamnun allamengllu iyataghnaanghituq. Kitum taam ugpeqegkuminga allamengllu meqsugnaanghituq. 36Iwernga sivunghani ungipaatellemtun piimsi, esghaqaqaghpesinga iwernga salin ugpeqigataghpesinga. 37Kina alngunak Atam tagivaqaa tagiyaghqaaguq whangamnun. Ighsaksaghqaqenghitaqa kina alngunak tagilghii whangamnun, 38qayughllak ukikaagunga qilagmeng atuqnaluku piyukellgha Kayagtistema. Whanga piyukelqa piyaghtuunghitaqa. 39Kayagtistema ifliisunghitaanga taakuneng tagivaqamineng, talwa ataasighhaq. Itupill whangamnun unguvaghtesqesuwii kingulighmi aghneghmi. 40Una Atama piyukelqaa: kitum alngunak esghaghluku Ighneq ugpeqegkumigu kenlengilngughmeng unguvallengellequq. Enkaam unguvaghlleqaqa kingulighmi aghneghmi.”
41Jews‑et ungyupghutkaat Jesus‑em whaten pillgha, “Whanga neqekrangllaguunga ukikaq qilagmeng.” 42Pikat, “Jesus‑nguuq, Joseph‑em ighneqaa, liisimakagput atangallu naangallu. Sangami whaten pii, ‘Ukikaagunga qilagmeng?’” 43Iwernga Jesus‑em pikii, “Ungyupeghtegpenasi. 44Atanguuq kayagtikaq whangamneng. Kina alngunak taginaanghituq whangamnun wetkuqun Atam tagistekumigu whangamnun. Enkaam unguvaghlleqaqa kingulighmi aghneghmi. 45Uuknaliqistet igaqegkaqaat una, ‘Kiyaghneghem apeghtughyaghqaqii qamaglluki yuget.’ Tamaghhaghmi nagallghii, liillghii Atameng tagikayuguuq whangamnun. 46Sumeghtaghaghpenasi kitumun alngunak esghaamaniluku Ata. Kiyaghneghmeng tagikam ellnginaghhaghmi esghaqaqaa Ata.
47“Ipa ungipaatamsi, ellnga taana ugpeqilghii kenlengilngughmeng unguvallelguuq. 48Whanga neqekrangllaagunga tuunikayuk kenlengilngughmeng unguvalleghmeng. 49Sivunesi neghegkaagut manna‑meng kilgaani, iwernga paninang tuqulaghaatkaagut. 50Iwernga una neqekrangllaq ukikaq qilagmeng, kitum alngunak neghegkumigu tuqunaanghitngwaaghtuq. 51Whanga unguvallelitikayuguunga, neqekrangllaq ukikaq qilagmeng. Kitum alngunak neghegkumigu taana neqekrangllaq, kiyaghsaghqaaguq quunperugllak. Taana neqekrangllaq kemekrakaqa, tuunaqegkegka nunam yugi unguvallengesqelluki.”
52Taagken Jews‑et aaghtiiraaghusagutkat ellmeggneng. Pikat, “Naten uum yugem kemekrani tuunaqagu neghesqelluku?” 53Jesus‑em pikii, “Ipa ungipaatamsi, Ighneghan Yugem kemekraga neghyaghqaqaghsi, aawallu meghyaghqaqaghsi. Tawaten pinghilkufsi, unguvallepigitusi ilugpesini. 54Kitum alngunak neghegkumigu kemekraka, meghegkumigu aakwa, kenlengilngughmeng unguvallelguuq, unguvaghlleqaqallu kingulighmi aghneghmi. 55Kemekraka neqeghpigaaguq, aakwallu meghyaghqapiiguuq. 56Kitum alngunak neghegkumigu kemekraka, meghegkumigu aakwa, kiyaghtengnguuq whangamni, whanga kiyaghtengnguunga ellngan ilungani. 57Atam unguvastikayugem kayagtekaqaanga, whangallu unguvastaqaanga. Enkaam kitum alngunak neghegkuminga unguvallequq whanga apalluqlunga. 58Sivunemta neghegkiistun neqekrangllastun ayuqenghitunga. Neghegkaagut neqekrangllameng iwernga paninang tuqulaghaatkaagut. Neqekrangllaagunga ukikaq qilagmeng. Kina alngunak neghegkumi taagken neqekrangllameng kiyaghsaghqaaguq quunperugllak.” 59Jesus‑em tamaana qamaglluku aapqaa apeghtughinguluni synagogue‑ngani Capernaum‑em.
Apeghtuusaa Kenlengilnguum Unguvallghem
60Jesus‑em maligsaaghtengita nagalluku allulluteng pikat, “Una apeghtuusaq piyaqnapigtuq, kitumngam tuguklighlleqagu?” 61Ungipaatestengngunani Jesus‑em liisimakegkangi maligsaaghteni ungyupghullghiit tawaten, enkaam pikii, “Taam apeghtullghem iilqayugtestisii? 62Samengꞌngam pinayaghetsi esghaghyaqufsigu Ighnegha Yugem mayulghii neksaqeminun sivunghani? 63Taghneghak unguvallelitikayuguuk, iwernga yuuk unguvallelitinaanghituq. Akuzitenka elpesinun taghneghaagutlu unguvallghuutlu. 64Iwernga ilagpesi ugpeqigatiit akuzitenka.” (Jesus‑em liisimakegkangi kinkut ugpeqinghilnguut. Liisimakegkangi ima piinlighyuwhaalleghmeng. Talwa liisimakegkanga kinangutanga uveghpagutiyaghqaq ellmineng.) 65Jesus‑em pikii, “Ilagpesi ugpeqinghitellgha apalluqluku whaten pikaagunga, ‘Atam tagisneghilkumigu yuuk whangamnun, taginaanghitngwaaghtuq.’”
66Kingunganeng Jesus‑em tawaten pillghan uglapiglleghhiim maligsaaghtengan unitkaa maligsaaghnaniqaat. 67Jesus‑em aaptekii qula maalghuk siipneqluku maligsaaghtet, “Elpesillu aghulaqsugetsii?” 68Simon Peter‑em kiimsiqaa, “Ataneq, kitumunꞌngam pilleqesta? Elpek akuzitegpek aapghaqaa naten allgeghutelleghqaq kenlengilngughmeng unguvalleghmeng. 69Whangkuta ugpeqamken, liitkaqamken elpek Agleghnalghiikaaten Kiyaghneghem.”
70Taagken Jesus‑em pikii, “Nakmikegkaqaqa qula maalghuk siipneqluku maligsaaghtekaghqaq, elpesinguut. Iwernga nalighsi ataasiq tughneghaaguq.” 71Jesus‑em akuzitkengngukanga Judas, ighnegha Simon Iscariot‑em qayughllak taakwaningani uveghpagusaghqaqegkanga. Judas ilakegkangat taakut qula maalghuk siipngalghiit maligsaaghtet.
© 2018, Wycliffe Bible Translators, Inc. All rights reserved.