ငဝ်ႈၵမ်ႇၽႃႇ 4

1လိုၼ်းၼၼ်ႉဢႃႇတၢမ်ႇသိူၵ်ႈသမ်ႇၵၼ်တင်းမေးမၼ်းဢေးဝႃႉလႄႈ ဢေးဝႃႉၼၼ်ႉပႃးပတိၵ်ႉသၼ်ႇထေႇလႄႈၵိူတ်ႇလဵင်ႉၵႃႇဢီႉၼႃႉမႃးသေယဝ်ႉ၊ မၼ်းဝႃႈ၊ ၵဝ်လႆႈၵူၼ်းၵႃႈတီႈထႃႇဝရႃႉၽြႃးယဝ်ႉ၊ ဝႃႈၼင်ႇၼႆဢေႃႈ။- 2ၵမ်းၼၼ်ႉသမ်ႉ ၵိူတ်ႇလဵင်ႉၼွင်ႉၸၢႆးမၼ်းဢႃႇပေႇလႃႉမႃးဢေႃႈ။ ဢႃႇပေႇလႃႉၸမ်ႉ၊ ပဵၼ်ၵူၼ်းလဵင်ႉသူဝ်းဢေႃႈ။ ၵႃႇဢီႉၼႃႉၸမ်ႉ၊ ပဵၼ်ၵေႃႉဢၼ်ႁဵတ်းႁႆႊႁဵတ်းၼႃးဢေႃႈ။- 3မိူဝ်ႈဢၼ်ၶိင်ႇမၼ်းထူၼ်ႈၸိုင်၊ ၵႃႇဢီႉၼႃႉၼၼ်ႉ ဢဝ်မၢၵ်ႇၼိူဝ်လိၼ်မႃး ပုၼ်ႈဢၼ်တၵ်းပုၵ်ႈၸေႃႇတီႈထႃႇဝရႃႉၽြႃးဢေႃႈ။- 4ဢႃႇပေႇလႃႉၵေႃႈ၊ ၼႂ်းၽုင်သူဝ်းမၼ်းၼၼ်ႉ ဢဝ်တူဝ်ဢၼ်ၵိူတ်ႇလဵင်ႉဢွၼ်တၢင်းပိူၼ်ႈၵမ်ႈၽွင်ႈဢိၵ်ႇတင်းၵွၼ်ႈၶႆၵွၼ်ႈမၼ်းသူဝ်းမႃးဢေႃႈ။ ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ်ဢႃႇပေႇလႃႉဢိၵ်ႇတင်း တၢင်းပုၵ်ႈၸေႃႇမၼ်းဢေႃႈ။- 5ၵႃႇဢီႉၼႃႉဢိၵ်ႇတင်းတၢင်းပုၵ်ႈၸေႃႇမၼ်းၸိုင်၊ မၼ်းၸဝ်ႈဢမ်ႇထုၵ်ႇၸႂ်ၵျိူၵ်ႈၸႂ်။ ပိူဝ်ႈၼႆလႄႈ ၵႃႇဢီႉၼႃႉၼၼ်ႉ ၸႂ်မႆႈၶႆႈၸႃႉၼႃႇလူင်လၢင်လႄႈၼႃႈလူႉဢေႃႈ။- 6ထႃႇဝရႃႉၽြႃးၵေႃႈလၢတ်ႈတီႈၵႃႇဢီႉၼႃႉလႄႈဝႃႈ၊ ၵွပ်ႈပိူဝ်ႈလွင်ႈၼင်ႇႁိုဝ်လႄႈ မႂ်းၸႂ်မႆႈ။ ၵွပ်ႈပိူဝ်ႈလွင်ႈၼင်ႇႁိုဝ်လႄႈ မႂ်းၼႃႈလူႉ။- 7ပေႃးမႂ်းႁဵတ်းလီၸိုင်၊ မႂ်းဢမ်ႇလႆႈဢၶႂၢင်ႉႁိုဝ်။ ပေႃးဢမ်ႇႁဵတ်းလီၸိုင် ဢပႅတ်ႈၶုပ်ႉမူပ်ႇမီးယူႇႁိမ်းၽၵ်းတူဢေႃႈ။ မၼ်းတၵ်းၸွမ်းဢလူဝ်ႇမႂ်းလႄႈ မႂ်းတၵ်းလႆႈဢုပ်ႉပိူင်ႇမၼ်းဢေႃႈ၊ ဝႃႈၼင်ႇၼႆဢေႃႈ။

8 ၵႃႇဢီႉၼႃႉလၢတ်ႈၵႂၢမ်းတေႃႇၵၼ်တင်းၼွင်ႉၸၢႆးမၼ်းဢႃႇပေႇလႃႉလႄႈ၊ မိူဝ်ႈဢၼ်သွင်ၶႃႁွတ်ႈထိုင်ၵႃႈတီႈတူင်ႈၼႃးၸိုင်၊ ၵႃႇဢီႉၼႃႉႁဵတ်းတၢင်းၽိတ်းသႂ်ႇၼွင်ႉၸၢႆးမၼ်းဢႃႇပေႇလႃႉလႄႈ ဢဝ်တၢႆသေဢေႃႈ။- 9ထႃႇဝရႃႉၽြႃးၵေႃႈ ထၢမ်တီႈၵႃႇဢီႉၼႃႉလႄႈဝႃႈ၊ ၼွင်ႉၸၢႆးမႂ်း ဢႃႇပေႇလႃႉၸိုင် မီးၵႃႈလႂ်၊ ဝႃႈၼင်ႇၼႆသေယဝ်ႉ၊ မၼ်းၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈဢမ်ႇႁူႉတီႈၶႃႈ၊ ၶႃႈၸဝ်ႈပဵၼ်ၵေႃႉဢၼ်လူဢၼ်တူၺ်းၼွင်ႉၸၢႆးၶႃႈၸဝ်ႈတီႈၶႃႈႁိုဝ်။ ဝႃႈၼင်ႇၼႆဢေႃႈ။- 10မၼ်းၸဝ်ႈၵေႃႈဝႃႈ၊ မႂ်းႁဵတ်းၸိူဝ်ႉၼင်ႇႁိုဝ်ယဝ်ႉ။ သဵင်လိူတ်ႈၼွင်ႉၸၢႆးမႂ်းႁွင်ႉသႅၼ်ႇႁႃၵဝ်ယူႇ ၵႃႈတီႈၼႂ်းလိၼ်ၼၼ်ႉလူင်ပႄႇ။- 11ၸႃႉၸဵမ်တေႃႈလဵဝ်ၼႆႉလႄႈ မႂ်းတၵ်းလႆႈၶၢမ်ႇတၢင်းၵိၼ်ႇတၢင်းဝႃႈ လိၼ်ဢၼ်ၽုၺ်ႇသူပ်းမၼ်း ႁႂ်ႈလႆႈၶၢမ်ႇဢဝ်လိူတ်ႈၼွင်ႉၸၢႆးမႂ်းၼၼ်ႉဢေႃႈ။- 12မိူဝ်ႈဢၼ်မႂ်းႁဵတ်းၵႃႈတီႈလိၼ်ၸိုင်၊ လိၼ်တၵ်းဢမ်ႇပၼ်ႁႅင်းမၼ်း ၸွမ်းၼင်ႇပၵတီႉပၵ်းၵဝ်ႇပိူင်ၵဝ်ႇၼၼ်ႉတီႈမႂ်း။ ၵႃႈၼိူဝ်လိၼ်မိူင်းၼႆႉၵေႃႈ၊ မႂ်းတၵ်းလႆႈပဵၼ်ၵေႃႉဢၼ်ဢွၵ်ႇပၢႆႈပိူၼ်ႈ၊ ၵေႃႉဢၼ်လႄႇၵႂႃႇၵူႈတီႈၵူႈလႅၼ်ဢေႃႈ၊ ဝႃႈၼင်ႇၼႆဢေႃႈ။- 13ၵႃႇဢီႉၼႃႉၵေႃႈလဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ဢပႅတ်ႈၶႃႈၸဝ်ႈၼႆႉ ယႂ်ႇထၼ်ႈပေႃးဢမ်ႇၶၢမ်ႇလႆႈတီႈၶႃႈဢေႃႈ။- 14တူၺ်းသေၵမ်းတီႈၶႃႈ၊ ဝၼ်းမိူဝ်ႈၼႆႉ ၸဝ်ႈႁဝ်းႁေႃႈၶႃႈၸဝ်ႈဢွၵ်ႇသေၵႃႈၼိူဝ်ၼႃႈလိၼ်တီႈၶႃႈယဝ်ႉ။ ၶႃႈၸဝ်ႈတၵ်းလႆႈၶၢမ်ႇတၢင်းဢၼ်သိူင်ႇဢၼ်မႅပ်ႉၵႃႈတီႈၼႃႈၸဝ်ႈႁဝ်းတီႈၶႃႈဢေႃႈ။ ၵႃႈၼိူဝ်လိၼ်မိူင်းၼႆႉၵေႃႈ တၵ်းလႆႈပဵၼ်ၵေႃႉဢၼ်ဢွၵ်ႇပၢႆႈပိူၼ်ႈ၊ ၵေႃႉဢၼ်လႄႇၵႂႃႇၵူႈတီႈၵူႈလႅၼ်တီႈၶႃႈဢေႃႈ။ ၶဝ်ၵႃႈဢၼ်ထူပ်းႁၼ်ၶႃႈၸဝ်ႈၼၼ်ႉ တၵ်းဢဝ်ၶႃႈၸဝ်ႈတၢႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 15ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊ ပိူဝ်ႈၼႆလႄႈ ၽူႈလႂ်သေဢမ်ႇဝႃႈ၊ ၵေႃႉဢၼ်ဢဝ်ၵႃႇဢီႉၼႃႉတၢႆၼၼ်ႉၸမ်ႉ၊ တၵ်းလႆႈၶၢမ်ႇတၢမ်ႇဢပႅတ်ႈၸဵတ်းပုၼ်ႈဢေႃႈ၊ ဝႃႈၼင်ႇၼႆသေယဝ်ႉ၊ ၼင်ႇႁိုဝ်ၶဝ်ၸိူဝ်းဢၼ်ထူပ်းႁၼ်ၵႃႇဢီႉၼႃႉၼၼ်ႉသေၵေႃႉသေၵူၼ်း တၵ်းဢမ်ႇလႆႈဢဝ်မၼ်းတၢႆၸိုင်၊ ထႃႇဝရႃႉၽြႃးပၼ်တီႈမၢတ်ႈတီႈတွင်း တီႈမၼ်းဢေႃႈ။

16 ၵႃႇဢီႉၼႃႉ ဢွၵ်ႇသေၵႃႈတီႈထႃႇဝရႃႉၽြႃးၵႂႃႇလႄႈယူႇၵႃႈၼႂ်းမိူင်း ၼေႃႇတႃႉ ၵႃႈတီႈၽၢႆႇဝၼ်းဢွၵ်ႇမိူင်းဢေႇတိၼ်ႇၼၼ်ႉဢေႃႈ။

17မိူဝ်ႈၼၼ်ႉ ၵႃႇဢီႉၼႃႉသိူၵ်ႈသမ်ႇၵၼ်တင်းမေးမၼ်းလႄႈ မၼ်းၼၼ်ႉပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉဢေးၼွၵ်ႉမႃးဢေႃႈ။ ၵႃႇဢီႉၼႃႉၵေႃႈ တႄႇဝဵင်းယူႇလႄႈၸွမ်းလူၺ်ႈၸိုဝ်ႈသဵင်လုၵ်ႈၸၢႆးမၼ်းၼၼ်ႉလႄႈ ႁွင်ႉႁဵၵ်ႈၸိုဝ်ႈဝဵင်းၼၼ်ႉဝဵင်းဢေးၼွၵ်ႉဢေႃႈ။- 18ဢေးၼွၵ်ႉသမ်ႉမီးလုၵ်ႈၸၢႆးဢီႉရတ်ႉ၊ ဢီႉရတ်ႉသမ်ႉမီးလုၵ်ႈၸၢႆးမႁူႉယေႇလႃႉ၊ မႁူႉယေႇလႃႉသမ်ႉမီးလုၵ်ႈၸၢႆးမသူႉသလႃႉ၊ မသူႉသလႃႉသမ်ႉမီးလုၵ်ႈၸၢႆးလႃႇမႅၵ်ႈဢေႃႈ။

19 လႃႇမႅၵ်ႈၼၼ်ႉဢဝ်မေးသွင်ၵေႃႉဢၼ်လႆႈၸိုဝ်ႈဢႃႇတႃႉတင်းၸီႉလႃႉဢေႃႈ။- 20ဢႃႇတႃႉၵိူတ်ႇလဵင်ႉယႃႇပလႃႉမႃးဢေႃႈ။ မၼ်းၼၼ်ႉၸမ်ႉ၊ ပဵၼ်ပေႃႈပဵၼ်သြႃႇ ၶဝ်ၸိူဝ်းဢၼ်ယူႇၼႂ်းမူဝ်းၵႃႇလႂ် ဢိၵ်ႇတင်းၶဝ်ၸိူဝ်းဢၼ်လဵင်ႉထိင်းၸႃႉၸဵမ်သူဝ်းဝူဝ်းလႂ်ဢေႃႈ။

21ၼွင်ႉၸၢႆးမၼ်းၸမ်ႉ၊ လႆႈၸိုဝ်ႈယူႉပလႃႉလႄႈပဵၼ်ပေႃႈပဵၼ်သြႃႇၶဝ်ၸိူဝ်းဢၼ်ၸၢင်ႈလဵတ်းတိင်ႇ၊ ပဝ်ႇၼႄးၶရႃႇ တင်းသဵင်ႈတင်းလူင်ၼၼ်ႉဢေႃႈ။- 22ၸီႉလႃႉၵေႃႈၵိူတ်ႇလဵင်ႉတူႉပလႃႉၵႃႇဢီႉၼႃႉမႃးဢေႃႈ။ မၼ်းၼၼ်ႉပဵၼ်သြႃႇၸၢင်ႈလဵၵ်းၸၢင်ႈၶမ်း တင်းသဵင်ႈတင်းလူင်ဢေႃႈ။ ၼွင်ႉယိင်းတူႉပလႃႉၵႃႇဢီႉၼႃႉၼၼ်ႉၸမ်ႉ၊ လႆႈၸိုဝ်ႈၼေႇမႃႉဢေႃႈ။- 23လႃႇမႅၵ်ႈၵေႃႈ လၢတ်ႈတီႈမေးမၼ်းၸိူဝ်းၼၼ်ႉလႄႈဝႃႈ၊ ဢႃႇတႃႉတင်းၸီႉလႃႉဢိူၺ်း၊ မၢတ်ႈတွင်းသဵင်ဢၼ်ၵဝ်လၢတ်ႈၼႆႉဝႆႉတႃႉ။ မေးလႃႇမႅၵ်ႈၶဝ်ဢိူၺ်း၊ ထွမ်ႇငိၼ်းၵႂၢမ်းၵဝ်တႃႉ။ ၵဝ်ဢဝ်ၵူၼ်းၵေႃႉၼိုင်ႈၵွပ်ႈပိူဝ်ႈဢၼ်မၼ်းလႆႈတိူဝ်ႉမၢတ်ႇၵဝ် ဢၼ်ဝႃႈၽူႈမၢဝ်ႇၵေႃႉၼိုင်ႈ ၵွပ်ႈပိူဝ်ႈဢၼ်မၼ်းႁဵတ်းႁႂ်ႈၵဝ်လႆႈၸဵပ်းလႆႈသႅပ်ႇၼၼ်ႉ တၢႆမႃးယဝ်ႉ။- 24ပေႃးၵႃႇဢီႉၼႃႉလႆႈတြႃးၸဵတ်းပုၼ်ႈၸိုင်၊ လႃႇမႅၵ်ႈတၵ်းလႆႈတြႃးၸဵတ်းသိပ်းၸဵတ်းပုၼ်ႈဢေႃႈ၊ ဝႃႈၼင်ႇၼႆဢေႃႈ။

25 ဢႃႇတၢမ်ႇၵေႃႈ သမ်ႉသိူၵ်ႈသမ်ႇၵၼ်တင်းမေးမၼ်းသေယဝ်ႉ၊ မၼ်းၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈ ႁွင်ႉႁဵၵ်ႈၸိုဝ်ႈသေႇထႃႉဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၽြႃးပဵၼ်ၸဝ်ႈၶၢၼ်းဝႆႉၸိူဝ်ႉၶိူဝ်းတၢင်ႇၸိူဝ်ႉတၢင်ႇၶိူဝ်း ႁႂ်ႈပဵၼ်တၢင်တူဝ်ဢႃႇပေႇလႃႉ ပုၼ်ႈၵဝ်ၶႃႈ ၵွပ်ႈပိူဝ်ႈဢၼ် ၵႃႇဢီႉၼႃႉဢဝ်မၼ်းတၢႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။- 26သေႇထႃႉၵေႃႈမီးလုၵ်ႈၸၢႆးလႄႈ ႁွင်ႉႁဵၵ်ႈၸိုဝ်ႈဢေးၼုတ်ႉဢေႃႈ။ ၼႂ်းၶိင်ႇၵႃႇလႃႉၼၼ်ႉၶဝ်ၸႃႉႁွင်ႉႁႃ ၼႃႇမႃႉၸိုဝ်ႈသဵင်ထႃႇဝရႃႉၽြႃးဢေႃႈ။