Luka 9
9
Yeshu ukutuma bandongesha likumi na babili
(Mateo 10:5-15; Mako 6:7-13)
1Yeshu wehanine bandongesha likumi na babili hamo, wabapanine nyala na ngovu za kufumisha mayimbwe nimwawo na kunyongomanisha malweli. 2Niho abatumine mu ku shimikila bya Wene wa Nyambi na kunyongomanisha bakakukola. 3#Luka 10:4-11; Mil 13:51. Wambile kukwabo ngayi, “Hinga mushimba shuma ha mukala wenu, hinge muwana hinge mpamba hinge linkende hinge mali hinge bikobelo bibili. 4Mu litala nimwalyo omu mukengina, yikalenumo kutwala mutena wakuya. 5Nimwendi ou ukabula kumitambula, oho mu kufuma ku munzi uyo, totomonenu lukungu ku mawulu wenu kwinga wupaki kukwabo.”
6Bandongesha bayile, pe bapitile mu minzi nimwayo na ku shimikila ncango zaziwahe, kami banyongomanishile bantu nimwako.
Helonda ukuluwangana
(Mateo 14:1-12; Mako 6:14-29)
7 #
Mat 16:14; Mako 8:28; Luka 9:19. Oho Helonda kalela wa mu Ngalileya ayuvwile byuma nimwabyo byatendiwilenga, waluwanganine ndaba bamo bantu bambile ngayi, “Yowano Mukakuzubilisha unashanguku ku bafu.” 8Bamina bambilenga ngayi, “Eliya unaholoko,” kami bamina ngayi, “Umo wa bamiluwe ba Nyambi ba mwaka nashanguku ku bafu.” 9Helonda wambile ngayi, “Yowano namuketwile mutwe, ngoboni yani ou nikuyuvwa byuma bya nehe?” Pe washingile ngayi amone Yeshu.
Yeshu ukulisha makulukazi mutanu a bantu
(Mateo 14:13-21; Mako 6:30-44; Yowano 6:1-14)
10Oho bantumwana babokele, bamutongwezele byuma nimwabyo ebye bakatendele. Niho ayile nabo kwaninkayabo ku munzi watumbiwile ngayi Mbeteshayinda. 11Oho likunge lya bantu balimukile, bamukonkele. Yeshu wabatambwile, pe wabatongwezele bya Wene wa Nyambi, kami wanyongomanishile bakakukola.
12Oho mutena walelelenga, bantumwana likumi na babili bezile kukwendi na kwamba ngayi, “Tongweza likunge baye ku minzi na ku mafuba bakawaneko byakulya na kwa kulangana ndaba kuno tuli kwakubula bantu.”
13Ngoboni Yeshu wambile kukwabo ngayi, “Bapanenu byakulya.”
Bakumbwile ngayi, “Tuli tuhu na mankende mutanu na zinci zibili. Ukushinga ngayi tuye na kulanda byakulya bya nelye likunge nimwalyo ndi?” 14(Kwekalile balume bakushinga kulingana makulukazi mutanu.)
Yeshu wambile ku bandongesha bendi ngayi, “Bekalikenu hanci mu tunzunga twa bantu makumi mutanu.”
15Bandongesha batendele noho, bekalikile bantu hanci. 16Niho Yeshu atambwile mankende mutanu na zinci zibili, watilaminine kuyilu, wakambilile kuli Nyambi, pe wapabwile. Wapanine bandongesha bendi ngayi batapishile bantu. 17Nimwabo balile, kami bekutile. Bandongesha benzalishile zintumba likumi na zibili za ncankuncanku za mankende na zinci.
Pita ukutontolola Yeshu
(Mateo 16:13-19; Mako 8:27-29)
18Mutena wamina oho Yeshu alombelenga ninkayendi, bandongesha bezile kukwendi, pe wabepwile ngayi, “Kati makunge a bantu bakwamba ngayi ami yani?”
19 #
Mat 14:1-2; Mako 6:14-15; Luka 9:7-8. Bakumbwile ngayi, “Bamo bakwamba ngayi Yowano Mukakuzubilisha, bamina bakwamba ngayi obe Eliya, kami bamina bakwamba ngayi, umo wa bamiluwe ba Nyambi ba mwaka unashanguku.
20 #
Yowa 6:68-69. Yeshu wabepwile ngayi, “Haya enu mukwamba ngayi ami yani?”
Pita wakumbwile ngayi, “Obe Kilishitu wa Nyambi.”
Yeshu ukwamba bya makando na lufu lwendi
(Mateo 16:20-28; Mako 8:30; 9:1)
21Yeshu wabakanishile shikuma ngayi, hinga batongwezako muntu umo eshe shuma. 22Wambile ngayi, “Mwana Muntu uku fwanina kuyandishiwa shikuma na kukaniwa ku bakulwane ba Bayunda na bakankombela ba bakulwane na bakakulongesha ndayano, kami ukazihiwa, pe ukashanguka munyima ya matena ahatu.”
23 #
Mat 10:38; Luka 14:27. Wambile kukwabo nimwabo ngayi, “Muntu nimwendi ukushinga kunkonka, alihupwize niye mwine, ashimbe shishempakano shendi ha mutena ha mutena, pe ankonke. 24#Mat 10:39; Luka 17:33; Yowa 12:25. Ndaba nimwendi ukushinga kupulwisha wumi wendi ukawuyongesha, ngoboni nimwendi ukuyongesha wumi wendi ndaba yami ukaupulwisha. 25Kati muntu ukuwanaho bihi ndi ukuheta byuma nimwabyo bya mu kaye ngoboni ha kuliyongesha hinge kulizimba niye mwine? 26Ndaba nimwendi ukanyuvwila lisheni na mazu wami, Mwana Muntu ukamuyuvwila lisheni oho akeza mu wuwahe wendi na mu wuwahe wa Tate na wa mangeloyi akuyela. 27Ngoboni nikumitongweza kupwisha ngayi, ku bali bamo kuno kukafwa bafwako, hantu banamono Wene wa Nyambi.”
Yeshu ukufutuka kubyazima
(Mateo 17:1-8; Mako 9:2-8)
28 #
Isha 42:1; Mat 3:17; 12:18; Mako 1:11; Luka 3:22; 2Pita 1:17-18. Munyima ya matena mutanu na ahatu kufuma oho ambile byuma ebye, Yeshu wapitwile Pita na Yowano na Yakoba, pe wakankalalile nabo ku lipili na kulombela. 29Oho alombelelenga, shifwekesha sha lupala lwendi shafutukile na bivwalo byendi bya byazimine too. 30Hohobene kwamonekele balume babili bambwelenga nendi. Bengile Moshesha na Eliya, 31obo baholokele mu wuwahe wa muyilu, pe bambwelenga na Yeshu bya lufu lwendi olwo akafwanina kukafwa ku Yelushalema. 32Ngoboni Pita na baya bekalile nendi ba kunokele tulo. Oho batonene bamonene wuwahe wendi, kami unemana na balume babili. 33Oho baya balume balitapile na Yeshu, Pita wambile kukwendi ngayi, “Hekulu, shashiwahe ngayi twikale kuno tutende makunka ahatu, limo linge lyobe, lyamina lya Moshesha na lyamina linge lya Eliya.” (Pita kaliha walimukile ebye ambilenga.)
34Oho Pita ushili kwamba likumbi lyezile lya bafwikile, pe bandongesha batinine oho likumbi lya bafwikile. 35Mwafumine lizu mu likumbi lyambile ngayi, “Ou niye Mwanami wakuhakiwa, muyuvwililenu!”
36Oho lizu lyamwenene, Yeshu wekalile ninkayendi. Bandongesha bamwenene ha matena ayo, kaliha batongwezele muntu umo byuma ebye bamonene.
Yeshu ukunyongomanisha ndumbana wekalile na mayimbwe
(Mateo 17:14-18; Mako 9:14-27)
37Oho kwashile, Yeshu na bandongesha bahatu ba kunkulukilenga kufuma ha lipili, likunge lyalinene lya bantu lyalihanganine nendi. 38Mulume umo mukati ka likunge wabilikizile ngayi, “Mulongeshi! Nikulomba ngayi utilamine hali mwanami wa ndumbana, ndaba wenga mwanami umo tuhu. 39Mayimbwe oho amukwatanga, amukalokeshanga na kumushundanisha, hantu natupulu kafulututu ku kanwa, kami kaliha amushiyanga tuhu ndele anamulemeke. 40Nalombo bandongesha bobe ngayi bawafumishe, ngoboni shilolo bawatweshe.”
41Yeshu wakumbwile ngayi, “Enu mukoka wakubula kukulupila na mashewinizi! Nikekala nenu shikati sha kukuma hati? Nikalilumikila nenu shikati sha kukuma hati? Leta mwanobe kuno.”
42Oho ndumbana ezilenga, mayimbwe amuwishilile hanci amushundanishile. Yeshu wambilile mayimbwe, wanyongomanishile ndumbana, niho amutwalile kuli tatiyendi. 43Bantu nimwabo bakomokele ngovu zazinene za Nyambi.
Yeshu ukwamba kami bya ha lufu lwendi
(Mateo 17:22-23; Mako 9:30-32)
Oho bantu bashili kukomoka byuma nimwabyo atendele Yeshu, wambile ku bandongesha bendi ngayi, 44“Yuvwililenu shiwahe kunebye nikumitongweza! Mwana Muntu ukapanikiwa mu maboko a bantu.” 45Ngoboni bandongesha babulile ku yuvwishisha eshe abatongwezele ngayi shikuntontolola bishini. Shaholekiwile kukwabo mwanga babule kushiyuvwishisha, kami batinine kumwipula ha byuma ebye.
Yani wamunene shikuma?
(Mateo 18:1-5; Mako 9:33-37)
46 #
Luka 22:24. Bandongesha batatikile kulikananganisha mukati kabo ngayi yani eze akenge wamunene shikuma mukati kabo. 47Yeshu walimukile ebye bahanganikilenga mu mitima yabo, wehanine kanuke wamushe wamuyakile ku ntungi yendi. 48#Mat 10:40; Luka 10:16; Yowa 13:20. Niho ambile kukwabo ngayi, “Ou nimwendi ukatambula kanuke ou mu lizina lyami natambulu ami. Kami ou nimwendi unatambulu ami natambulu ou wantumine, ndaba ou ukwinga wamushe shikuma kukwenu nimwenu, niye ukenga wamunene.”
Nimwendi ukubula kumi lwisha niye wenu
(Mako 9:38-40)
49Yowano wakumbwile ngayi, “Hekulu, twamonene mulume wafumishanga mayimbwe mu lizina lyobe, niho twamukanishile, ndaba kaliha nengi umo wetu.”
50Yeshu wambile ngayi, “Kaliha mwafwanina kumukanisha, ndaba nimwendi ukubula kumi lwisha niye wenu.”
Munzi wa Shamaliya ukukana kutambula Yeshu
51Oho shikati sha kumine ngayi Yeshu atambuliwe muyilu, wapenzele lupala lwendi kuya ku Yelushalema. 52Watumine bantumwana kumbili yendi, baya bayile na kwingina mu munzi umo wa mu Shamaliya, mu kumubalakanyina. 53Ngoboni bantu kaliha bamutambwile, ndaba wekalile ha mukala wa kuya ku Yelushalema. 54#2Bamy 1:9-16. Oho bandongesha bendi Yakoba na Yowano bamoneneko, bambile ngayi, “Mwene, ukushinga ngayi twihane mundilo kufuma kuyilu kwiza na kubahokesha ngonehe atendele Eliya ndi?”
55Ngoboni Yeshu wafutukile niho akalihilile bandongesha bendi, 56Niho Yeshu na bandongesha bendi bayile ku munzi wamina.
Obo bakakonka Yeshu
(Mateo 8:19-22)
57Oho bayilenga mu nzila, muntu wamina wambile kuli Yeshu ngayi, “Nikakukonka, oku ukaya nimwako.”
58Yeshu wakumbwile ngayi, “Bamimbwe bali na mateke na tuyoni tuli na mahwa, ngoboni Mwana Muntu wufwaho ha kuhamina mutwe wendi.”
59Wambile kuwamina ngayi, “Nkonke.”
Ngoboni niye wambile ngayi, “Mwene, ndehe taha niye nikafunde batate.”
60Ngoboni Yeshu wambile kukwendi ngayi, “Leha bafu bafunde bafu babo, ngoboni obe yanga na ku shimikila Wene wa Nyambi.”
61 #
1Bamy 19:20. Wamina kami wambile ngayi, “Nikakukonka Mwene, ngoboni ndehe taha niye mu kulaya ku litala lyami.”
62Yeshu wambile kukwendi ngayi, “Kowa muntu unakwata ku shikekele unakulima, pe ha ku shetuka kunyima ku fwanina mu Wene wa Nyambi wufwako.”
Libuka Lya Kuyela © Bible Society of Zambia, 2020.