Genese 4
4
1Iyala wamwilukili Iŋodindi Evu, yoba aba niivumu, hakuvwala Kena, nindi, Natambuli iyala kudi Yehova. 2Wavweli cheŋi, yovwalanimana kwindi Abeli. Abeli wadiŋi kabiŋa kanyikoku, Kena wadiŋi mukwakudima. 3Chimwahitili mafuku, chashakaminuwu shakame-e, elili Kena hakutwala kudi Yehova himulambu wayuma yamenaŋa hamaseki. 4Abeli, niyena, hakutwala awedi ayimuna yindi nimanji awu. Yehova watalili kudi Abeli nikuhimulambu windi; 5ilaŋa hela kudi Kena hela kumulambu windi, hatalili kwokuku. Kena wazuwili nankashi, wadihombe linikumesu. 6Yehova hakumwila Kena, nindi, Wunazu wilidi? Wunadiho mbelidi kumesu? 7Neyi wukwila chachiwahi hiyakukwitiyaku? Ilaŋa neyi hiwukwila chachiwahuku nshidi yinafukami kuchisu; wakata muchima hadeyi, nineyi wakela mwanta windi.
8Kena wahosheli namana kwindi Abeli. Cheliluwu chadiŋuwu mumpata, Kena hakumunyamukila mana kwindi Abeli, hakumujaha. 9Yehova hakumwihula Kena, nindi, Mana kweyi Abeli wudi kudihi? Kuchinka yena nindi, Kwiji, ami kwiluka nehi. Ochu ami yami namu hembaŋa mana kwami, tahindi? 10Yehova nindi, Wuneli nahi? Izuda mashi amana kweyi dinakulobeli kudami hamaseki. 11Eyi dinu wunashiŋe wiheseki diŋa asami nakutambula mashi amana kweyi kudeyi. 12Chiwakadima iseki, hiyakakwidishila cheŋi Ŋovu jawuku; eyi wakekala mukwakubata jala, mukwakuki mbakimba hamaseki. 13Kena wamwilili Yehova, nindi, Iku kubabesha kuwuna mbabeshi kunabadiki muŊovu jami. 14Tala ntahi, wunantemuni dehi lelu hamaseki; nakabatama kumesu eyi; nakekala mukwakubatajala, mukwakuki mbakimba hamaseki, yowu wakaŋi dikila wakanjaha hohu. 15Yehova hakumwila nindi, Dichi dinu yowuwa kamujaha Kena, akamutenda Kena mapampa katanu nakayedi. Yehova wamushili Kena chinjikijilu, akenda kamutaŋa kudi antu amba kamwidikila.
16Kena wafumini kumesu aYehova, wayili nakushakama mwituŋa daNodi, kumbadi yaEdeni yamusela. 17Kena wamwilukili inodindi, yoba aba niiviunu, hakuvwala niEnoki; watupili mukala, watumbili mukala ijina damwanindi, nindi Enoki. 18Kudi Enoki kwavwalikili mwanindi Iradi, Iradi wavweli Mehuyayeli, Mehuyayeli wavweli Metusayeli, Metusayeliwavweli Lameki. 19Lameki wasumbwili aŋodi jindi ayedi; iwu ijina dindi Ada, iwu ijina dindi Zila. 20Ada wavweli Yabali, diyi nkakulula yawakwa kushakama mumatenti, wowu akweti niyimuna. 21Manakwindi ijina dindi diyi Yubali, diyi nkakulula yawantu ejima embaŋayisanji nimateti akwimba. 22Zila niyena wavweli Tubali Kena, diyimuchiŋi mukwakuchila yuma yakuketula nachu yejima niyawunepu niyachikuŋu; muhela Tubali Kena, Nama.
23Lameki wayilili aŋodi jindi, nindi, Enu Adama naZila tiyenu izu dami, enu aŋodi jaLameki, tiyenu munukuhoshami; najahi iyala wantaŋa, mukwenzi weyala wankatisha. 24Neyi Kena akamutenda mapampa katanuna kayedi, komana dinu chalala Lameki akumutenda makumi atanu namakumi ayedi nakatanu nakayedi.
25Adama welukili cheni ipodindi; wavweli ni mwana weyala, haku namutumbani ijina dindi nindi Seta; nindi Nzambi nantoriweli mwana mukwawu wakuhiŋisha mudi Abeli ajahiluwu kudi Kena. 26Kudi Seta niyena nawakwavwalikili mwana weyala; yonamutumba niijina dindi nindi Enoshi; henohu nihu hatachikiluwu antu kutambika ijina daYehova.
The Bible in Lunda: Ndembu (Lunda of Kalunda) © B. F. B. S. 1962.