Maliko 13
13
UYesu akukuvwa izya lunanjiho lwa tempeli nukusililishila kwa nsi
Mal. 13. Mat. 24. Luk. 21,5-36.
1Ayazile lwʼakufuma mwa tempeli, pe wokʼumusundikwa wakwe ahati: We Musambilizi, yenya, namavwʼiga ninyumbʼizʼuvwinza! 2UwenʼuYesu ahamula ahati: Uziwenyʼinyumbʼimpiti zinizi? Nalimʼivwe litalileshelwa pivwe lyamwavo isitakumongoha.
3Ilelo lwʼavazilʼukutendama pigamba lya Mavula lwʼakulungamana nutempeli, pe vahamuvuzilizya avaPeteli nuYakobu nuYohani nuAndeleya ve vayelelesile nawo, vahati: 4Utuvuzyajʼisiku lya kwinzila zinizi lili kwi? Nishimanyilo sha kumanyila mumwo ukuti zyinzile zyonti ukuti zisilaje, she shili vuli? 5PʼuYesu ahandʼukuvavuzya ahati: Mwandaje, mwenye numo atavapuṿwaje. 6She valiyinzʼavinji, valijendela mwe mwizina lyane, valitinji: Nene ne Wuyo; valipuṿwʼavinjʼavantu. 7Inga lumo inga mwinzilʼukwiṿwa nuvulugu ninkolo ya vulugu, pe mutahagandushe, she zye pakuti zitali she ukuloleha zinizi, izyene nyene izya kuvumalilishilo lwe zishili suti. 8She nuluho lwoka lwa vantu lulihalambihʼuluho ulwamwavo, nuvumwene vwoka nuvumwene vwamwavo; nukuyingʼinsi kuliyinga munsi munsi, ninzala yiligwanga. Zyonti zinizi nyene vwe vwando vwa kuvavwa.
9-13: Mat. 10,17-22. Luk. 21,12-17.
9Mwandaje lelʼimwe, she valivatwalʼimwe pamalonjelwi namumasinagogi mulihomwa, mulivikwa nakuvapiti nakuvamwene pe pazyʼizina lyane. Zye zya kumanyila mumwʼavene. 10NkandʼIvangeli lye pakuti isuti likumukwaje kunkolo zyonti. 11Apene nyene penga vakuvakunga nukuvalonjelela kuvalonzi, pe mutakutanaje nzila ukuti amwe tuyanje tutinji vuli, ndali, zizyo zyenga mwazile avapiye Wuyo pahavalilizyo huho, zye muyanje zizyo. She mutaliyanga mwenemwe ndali, aliyangʼuMupepʼuMufinjile. 12Vope navanamuntu valilonjelelana vuvo vatupu ukwambililana kukwo kwe vakugojelwa, wope numuntʼuyise alimwambilila kukwʼumwana wakwe, vope navana valilulihʼavapafi vavo, valivagoga. 13Vontʼavantu valivapatʼimwe, she muli nizina lyanʼine. Nkandʼuno wʼakujimbilila nakuvusililo wʼalipona.
14Inga lumo inga muvazilʼukwaga pavufinjile vapangulinye, vimisile zye zilʼumwiho mwe Zitahondeye—uno wengʼakuzyaga pakalata zinizi wʼamanyinsanyajʼahinza—pe vahashimbilile mumagamba vonti ve vali mu-Yudayi. 15Uno wengʼali panyumba pamwanya, wʼatishe, wʼatahinjile mumwo ukusenda yimo munyumba yakwe. 16Nuno wengʼali pamugunda wakwe, wʼatagalushile mwisinda ukusendʼinkanzu yakwe. 17Ye mwe vantanda pamanda gala namwe mumwamile namwe mukwonsyʼavana! 18Muputaje nyene izya kushimbilʼimwe ukuti zitavinzilaje lwe lupepo. 19Uvupotwe vwa musanya wuyo vuliva vupiti, vusitakuva nuvwamwavo mwʼatalisilʼuMulungu ukupelʼinsi ukufiha nakushinishʼuku, uvusitakwinza nuvwamwavo napisinda. 20UMulungu ingʼasitagʼukudumulʼamanda gugo, pe nkandi numʼumuntu atakupona. Nkandʼaligadumulʼamanda gugo uwene, avasavulwa vakwe vʼavasavuye ukuti vapone. 21Musanya wuyo inga mwazile wokʼakuvavuzya akuti: Yenyi, uChilisiti uyʼukwo, ali kula, pe mutahitihaje. 22She pe valiloleha avachilisiti avashifumbo navakuvwi avashifumbo, valipelʼamamfindango namayele aga kulingʼukuvatezya nave vasavulwa. 23Nkandʼimwe mwandaje. Yenyi, ntalisile nzila ukuvavuzyʼimwe zyenezyo.
24Lwe vafumilʼukuyimbʼuvupotwe vwa manda ganaga avantu, pe nizuva liliyilupa numwezi alilehʼukulama. 25Zyope ninzota zililagala kumwanya, gope namaha ge gali kumwanya galiyugumbana. 26Pe valimwenyʼuMwanamuntu mumavingo, lwʼakwinza namahʼaminji nuvupiti. 27Pʼalitumʼavahavizya vakwe ve valivunganihʼavasavulwa vakwe, valifuma navo kunkungu zye zine, vonti ukufuma kuluvazu lwoka lwa nsi ukuvalʼukupela kuluvazu lwa kwivingo.
Ukuyisenganya shima
28Simusende ishiholanyo mwituvu. Lwʼinsamba zyakwe mukwaga zifufuye, zilemṿile nukulembʼamatundʼamolo, pe mukumanyila mumwʼishisuku ukuti shipalamiye. 29Vovulo lelo namwenemwe inga muziwenyi zyonti zinizi ukwinza, pe mumanyile mumwo ukuti zyinzile zili kushilyango. 30Nalyoli nkuvavuzyʼine nkuti: Avantʼavashinishʼiva vataliyepa vonti lwe zitapezilwe zyonti zinizi. 31Niya kumwanya niya pansʼinsi zye zikwepa, nkandʼamazwi gane ge gataliyepa nalumo. 32Ilyenʼisiku lila nyene nahavalilizyo hanaha, he numo atahamanyile, nga ve vahavizya va kumwanya, nga Mwana, nkandi we Tata weka. 33Mwandaje lelo, mudamule, muputaje, she mutamanyilʼumwaha. 34She zihonzizye fwe ngati zya muntu wʼavusilʼukushula, wʼakufuma munyumba yakwe, wʼakuvihʼavanyamata vakwe, akuvapa nimbombo unʼiyakwe, unʼiyakwe; wope numusungashilyango akumulajizya nkani ukuti adamule. 35Mwe mumwo mudamulaje, she mutamumanyile mwʼakwinzilʼumuhatanyumba, ukuti ngavanga shamazuva, ingavanga pavusiku pahati, ingavanga pankanda lwe zikutema, ingavanga shanzanche; 36ukuti lwʼakwinzʼapashezi atahaje mukasite. 37Izyene zye nkuvavuzya mwenemwe, zye nkuvavuzya vonti nzila, nkuti: Mudamule!
Nyiha New Testament © British and Foreign Bible Society, 1965.