Maliko 10
10
Ukuvuzilizya izyʼitalaka
1-12: Mat. 19,1-9.
1Pʼahepa pupo pʼali, ahavalʼukufiha munsi ya mu-Yudayi namwisyila lila lya Yolidani. Pʼavantu vahavalʼukuvungana pupo pʼali. Uwenʼahavasambilizya inza shʼahahonzyaga shima. 2PʼavaFalisayi vahapalamila kukwakwe, vahamuvuzilizya vahati: Umuntʼali numulandu ingʼakutavulʼumushi wakwe? She vahamulinga. 3Uwene ahavavuzilizya ahati: UMose munkomelezyo zyʼalajizizye atili vuli? 4Avene vahati: UwenʼuMose wʼayitisile atili mumusimbilʼukalata wa talaka inga pe mumutavule. 5UwenʼuYesu ahamula ahati: Shʼamoyo ginyu gali nuvugomu, mwe mumwo mwʼavasimbiyʼululajizyo lunulu. 6Apene ukufuma pavwando lwe ṿwapezilwe ṿwonti, pʼahavapela numwanaṿuli numwantanda. 7Mwe mumwo umuntu akumuleha uyise nunyina, nukusyelemetela numushi, 8ilelo ve vavili vanava valivʼumuvili woka wene. Pe valesilʼukuva vavili, vali muvili woka wene. 9Ilelo hengʼahapatinkinyʼuMulungu, he mwiho ukuhapagulanya we muntu.
10Kuhaya havili vahamuvuzilizyʼavasundikwa vakwʼinongwa zinizi. 11Uwenʼahavavuzya ahati: Uno wengʼakumuvingʼumushi wakwe, havili ajende nukusendʼuwunji, pʼavembusile numuhamuntu. 12Wope numwantanda ingʼakulehʼumulume wakwe, ingʼakusendana nuwunji, pʼakuvembuha.
UYesu akulota avanʼavansi
13-16: Mat. 19,13-15. Luk. 18,15-17.
13Pe vahaletʼavana kukwakwe vahati avapalamansye. Avenʼavasundikwa vakwe vahavapilila ve vavaleshe. 14UwenʼuYesu nyene lwʼavawenyi pʼahaṿitwa, ahati: Simuleshʼavana vinze kukwane. Mutavahanizye. Shʼishinamwene sha Mulungu sha vuvo venga vali vovulo. 15Nalyoli nkuvavuzyʼine nkuti: Uno wengʼishinamwene sha Mulungu atakushiposhela fwe mwana, wʼataliyinjila nalumo. 16Pʼahavakukula, ahavavihʼinyove, ahavalota.
Umulumendʼudumbwe akulondolʼuvulanzi vwa shimashima
17-31: Mat. 19,16-30. Luk. 18,18-30.
17Ilelo lwʼafuma munyumba lwʼakuti njende mwidala, pe wokʼumuntu ahamushimbilila, ahamusugamilila, ahamuvuzilizya ahati: We Musambilizi, we mwinza, imbombe zyonʼine izya kuvalʼukupwanʼuvupwano vwa vulanzi vwa shimashima? 18UwenʼuYesu ahati: Ukunjanga shonʼuvwinzʼine? Atalipo numo we mwinza, nkandʼuMulungu weka. 19Inkomelezyo uzimanyile zye zikuti: Utahagoje, Utahavembuhaje, utahivaje, utamuhomeshezyaje shaha uwamwinyu, utasampajʼiṿwa wamwinyu, umushindishe uso nuvinyu. 20Pʼuwenʼahamuvuzya ahati: We Musambilizi, zye nzilandite zyonti zinizi, mfumile nazyo kwe kuvunsi. 21PʼuYesu lwʼamwenya pʼahamukunda, ahati: Halipo hoka hʼusyayʼiwe. Valaga, ukazyʼishuma shaho shonti, uvapanjʼavapina, she pʼuliva nishuma kumwanya. Inga pʼuyinze undandatʼine. 22Pʼuwenʼahavinduha kusheni lwʼayi-ṿuyʼizwi linili, ahaswimililwa, ahavala. Shʼali muhataṿwu-mʼiṿwinji.
Ipunulo lya vudumbwe
23PʼuYesu ahatalanganya, ahavavuzyʼavasundikwa vakwe ahati: Uvugomu te vugomʼavahataṿwuma ukwinjila mushinamwene sha Mulungu! 24Pʼavenʼavasundikwa vahahasamala pamazwi gakwe. PʼuYesu ahavuyizyʼukuyanga ahati: Mwe vana mwe, kugomu nkani ukwinjila mushinamwene sha Mulungu ve vakusuvila ṿwe ṿwuma. 25Ingamila ukutuha mwilyinso lya nsindano nudumbwe ukwinjila mushinamwene sha Mulungu—kupupusu ukutuhʼingamila mwilyinso lya nsindano. 26Pʼavenʼavasundikwa vahonjezyʼukutentwa, vahati: Pʼunanu angapona lelo? 27PʼuYesu ahavenyelezya, ahati: Avantu ve vashi, ve zivaposite zinizi, uwenʼuMulungu nyene nazimo zitakumupota. 28PʼuPeteli ahayanga ahati: Yenya, iswe tuṿilesile ṿwontʼiṿwitu, tukulandite wenewe. 29PʼuYesu ahati: Nalyoli, nkuvavuzyʼine nkuti: Atalipʼumuntu numo wengʼalesile inyumba, navaninʼavanaṿuli, navaninʼavantanda, nunyina, nuyise, navana, namagunda pazyane napIvangeli, 30wʼatalivazilwa amashumʼishumi pali hoka he ahalesile; akuposhelaga nakushinishi namunsi pansʼumu: Inyumba, navaninʼavanaṿuli, navaninʼavantanda, navanyina, navana, namagunda poka nuvuṿwimilwa pupo, mwope namunsʼila yikwinza uvulanzi vwa shimashima. 31Avinjʼavalanzi nyene valiva vamwisinda, avinjʼavamwisinda valiva vatanzi.
Ukukuvwa kwa vutatu ukwa vufwe vwakwe Yesu
32-34: Mat. 20,17-19. Luk. 18,31-34.
32Avene vali mwidala ukuzuvʼukuvala mu-Yelusalemu. UwenʼuYesu ahalongolela kwilongolela, pʼavene vahatentwa. Avene ve vahalandata mwisinda vahatetema. PʼuYesu ahasenda nohavilʼavʼishumi navavili, ahavavuzya zizyo zye zikwe zimwinzilaje. 33Ahavavuzya ahati: Yenyi, tukuzuva tukuvala mu-Yelusalemu, mwʼuMwanamuntu alitwalwa nakuvashiputʼavapiti nakuvamanyakalata. Ve valimulonga ilya kuti pakuti afwanje, havili valimutwala kuvakunzi, 34ve valimusamula, valimuswila namati, valimusyempa, valimugoga. Nkandi pisiku lya vutatu pʼalizyuhʼuwene.
ZyʼuYakobu nuYohani valayile
35-45: Mat. 20,20-28.
35Pe vahapalamila kukwakwe avana-Zebedayi, nuYakobu nuYohani, vahati: We Musambilizi, tukwanza ukulava hamo kukwaho aha kutupʼiwe. 36Uwenʼahavavuzya ahati: Hantu vuli he mukulava, mukuti imbavombelʼine? 37Avene vahamuvuzya vahati: Utupanjʼizya kutendama nawe lwʼuliyinza muvumwamu vwaho, woka kumuhonʼumulilo, woka kumuhonʼumumongo. 38UwenʼuYesu ahamula ahati: Mutazimanyile zye mukulava. Amwe mumanyilʼukungʼwelʼishikombe she nkwe ngʼwelajʼine, amwe ukwozelwʼulwozyo lwe nkwe nozelwajʼine? 39Vahati: Ena tumanyile. UwenʼuYesu ahavavuzya ahati: Ishikombe shane she shashi, she mulingʼwela, nulwozyo lwane lwe lwashi, lwe muliyozelwa. 40Nkandʼukwenʼukutendama kumulilo nakumumongo kukwane, yʼite mbombo yanʼine ukumupʼumuntu ndali, pe valitendama vuvo vengʼavayananizizye Wuyo.
Uvupiti vwa nalyoli
41Avene lelʼavʼishumi lwe viṿuye zinizi, pe vahavaṿitililwʼavaYakobu nuYohani. 42PʼuYesu ahavita, ahayanga navo ahati: Muvamanyile nave vakuyanjilwa ukuva vamwene va vantu, ukuti vakutilingʼulwa vumwene avantu vavo, navapiti vavo vakuvakonzya ge maha avantu. 43Imwe nyene mutahonzyaje vovulo ndali. Uno wengʼakwanzʼukuva mupiti kulʼimwe, we pakuti ayipelajʼukuva muvombezi kulʼimwe. 44Nuno wengʼakwanzʼukuva mutanzi kulʼimwe, we pakuti ayipelajʼukuva munyamata wa vonti. 45She wope nuMwanamuntu atinzilʼukuvanzʼavakumuvombela wuyo ndali, ayinzilʼukuvavombela ve vantu, ayinzilʼukulipʼuvulanzi vwakwe ukuti vuvanje vwa kuvahombola ve vinji.
Ukupozya uBalitimayi uvwantonko
46-52: Mat. 20,29-34. Luk. 18,35-43.
46Pe vahavalʼukufiha mu-Yeliho. Ilelo lwe vakufuma mu-Yeliho nawuyo navasundikwa vakwe navantʼimpugʼimpiti, pe vahagʼuwantonko umulaṿi uBalitimayi, umwana-Timayi, wʼatendime kwidala kuluvazu. 47Ilelo lwʼayiṿuye ukuti we wʼuYesu wa mu-Nazaleti wʼakupitilila, pʼahavilishila ahati: Yesu, we Mwana-Davidi, umpepelezyaje. 48Vahamupililʼavantʼavinji vahati: We pumaga! Uwene nyene pʼahonjezya nkani ukuvilishila, ahati: We Mwana-Davidi, umpepelezyaje. 49PʼuYesu ahimilila, ahati: Mumwite. Pe vahamwitʼuwantonko vahati: Jimbagʼiwe, vuhaga, shʼunʼakukwita. 50Pʼuwenʼahatagʼumwenda wakwe umutote pansi, ahavuha, ahavala kwa Yesu. 51PʼuYesu ahamuvuzilizya ahati: Watinji nti vuli nawe? Uwenʼuwantonko ahati: Labuni, inga nenyagʼaminso. 52UwenʼuYesu ahati: Vuhaga, lukuzuzuvushizizye lwe lwitiho lwaho. Pʼahenyʼapashezi. Pʼahamulandata mwidala.
Nyiha New Testament © British and Foreign Bible Society, 1965.