Matayo 8
8
Nndumi Yesu ashiisa nndu atirwa niivave
(Mar 1:40-45; Luk 5:12-16)
1Naasa elyi eefo asholookaa auka kulya ifumbu-u vandu vakallatya matorito meengyi. 2Nalyo kasha nang'u nndu alwee ivave kamoolokya ng'undeny kaamba, “Woi Nndumi kwankunda kushiidimaa isheeremuta.” 3Yesu kaorwa woko kampaana kaamba, “Shankunda, eremukany.” Nalyo yeni keeremuka ivave lyilya lyentiri. 4Naasa Yesu kammbia, “Nta kulavie nndu! Mmbo kusheenda kundekoora efo kwa nkohani, kundevika kyaanu kwa Iruva kilya Mose avavasye, kive nkyo ukureeki kwawo.”
Nndumi Yesu ashiisa nndundi wa nshilyi Mroma
(Luk 7:1-10)
5Kikasia, elyi afika kulya Kapernaumu, kasheywa ni nshilyi wa vasikari iyana, kamooshora, 6kammbia, “Woi Nndumi shitiri ishinga lyakwa lyilele kyeny lyikee yuumu malungo, lyiifo lyivavywaa kyuumu.” 7Nawe kammbia, “Nsheendaa shindenkira.” 8Nshilyi ulya wa vasikari iyana kaallwa kammbia, “Woi Nndumi yeny nshimaa kutani kwafika efo si ya kai ka mmba-kwa-fo. Ammba irero lyimwi nsi na ishinga lyakwa lyisheshiaa. 9Shamashika neeny mmbo shikee kwasi ya ushilyi lwa vengyi shivetiri na vasikari vakwa, neeny ni nniini waawo; naasa shavia eto umwi, ‘Enda’, mmbo asheenda, shavia eto ungyi, ‘Osho’ nawe mmbo aveshaa. Shavia ishinga elyo lyakwa, ‘Tana kindo kive! Lyikavekitana.’ ” 10Naasa Yesu ekiita indo kikantamba kavia valya veeiyo vevandami nawe, “Ni kya dede shamuvia, nta kunu Israeli nshindelollye kikusiryo king'ani indo-fo.” 11Na yeny shamuvia, “Kusheshaa vandu vengyi wooka taari ya ngama na ya nkwaany vashelya shoonga vasasangyi na Abrahamu na Isaki na Yakobo efo umangyi ny lwa Iruva. 12Na veni umangyi wo vandeerwa poo efo kuwoye ireema na ikwaalala na irafunnya mayoo.” 13Naasa Yesu kavia nshilyi ulya wa vasikari iyana, “Kweenngye! Kivekuviiya indo shaasa kukusirye-u!” Nalyo ishinga lilya lyakwe lyikashia kyeeri kilya kyeni.
Vandu vengyi vashiiswa
(Mar 1:29-34; Luk 4:38-41)
14Nalyo Yesu kandefika kulya kyeny kwa Petro kalollya maye-a-nka alele kitareny elwee iseng'u. 15Nawe kampaana woko, iseng'u lyilya lyikammbuka. Kakwiipoo kapooka infurukannya. 16Na elyi kwammiila vakamweenngye vandu vengyi vellyiswa ukiva mmimuyo mikasha. Nawe kaanta mimuyo ilya mikasha eshaambaa kirero kyeni. Na valya veeiyo valwee kavakira woose; 17Naambo kirero kilya kindekooya iinukya shaasa kilererwa ni nkisuku ulya Isaya kikaamba, “Mmbwe aleipoo ngyunana teru neekurika ndwari teru.”
Vasumani iva vakiloshyony va Nndumi Yesu
(Luk 9:57-62)
18Naasa Yesu ekilollya nsemu wa vandu vansha ikummbya-fo vakanndingitya nawe kavavasya vanderuuka mbai ilya ingyi. 19Nalyo mwaarya wa fitabu umwi kamweengya kammbia, “Llori shikundye ikulatya wo ando koose kusheenda.” 20Na Yesu kammbia, “Maparwe mmbo atiri mbanga ta vayo na ndeye ta nginiiu tikavetira fifuri fya vayo. Indi mwana yeto wa nndu nnatiri ando asheekeryaa nrwe wakwe-fo.” 21Na ungyi akee nnang'ani ya valya vakiloshyony kyakwe kasha kammbia, “Nndumi shiniinga mumu mbele shikweengye inderika nde wakwa.” 22Indi Yesu kammbia, “Shilatya, kureeye vafu varike vafo vawo.”
Nndumi Yesu akyeemya uraato
(Mar 4:35-41; Luk 8:22-25)
23Naasa Yesu kasaama ngalaveny valya vakiloshyony kyakwe vakasaamafo nawe. 24Naasa elyi veefo kukasha uraato uniini. Ngalava ilya ikatana yasikywa ni matundulu. Nawe eelele rony. 25Vakanserikya vakamwaanta vakammbia, “Woi Nndumi lwaauwe lwiifo lusiaa.” 26Nawe kavavia, “A nkikyi elyi mweereiye indo? Mmbo mukee va kikusiryo kyaangu nnu.” Nalyo kasalala kakyeemmya uraato lulya na yeeve ilya kukava kimammya sau. 27Naasa vandu valya vakatambiswa vakaamba, “A nndu yeu ni wa kwi, kutani uraato lwamwiirikya na yeeve yeyo!”
Nndumi Yesu ashiisa vandu vavii vatirwa mmimuyo mikasha
(Mar 5:1-20; Luk 8:26-39)
28Naasa ekifika kwakulya ya uruka lwa Vagerasi kakwaanannya-fo na vandu vavii vatirwa mmimuyo mikasha vauka fifuny vakee vanyaasi nnu, nta nndu nalaidimi iira shia ilya. 29Nawo akakawo vakoongora vakaamba, “Yewe mwana wa Iruva nkyikyi lutiri na yewe? A mmbo kulesha kunu kushelusisya kulaore kyeeri kyeru kyamfika?” 30Naasa kwaasha na yoo ando vekai kweifo ironda lya nguve lyishiiswa-fo. 31Nalyo mimuyo ilya mikasha ikantereva ikaamba, “Kwakooya kwalwaanta lurumi lundeanga irondeny lya nguve yeto.” 32Nawe kaivia, “Kweenngye!” Nato akakato tikapufuka-fo tikandekweera efo waangeu. Tikasiiya efo yeeveny tikafiiya efo mureny. 33Naasa veesi valya vakarisha vakatana vafika kulya muriny. Vakandeongoya-fo mbony tilya toose na ta vandu valya vatirwa mmimuyo mikasha. 34Nalyo akakava vandu va kulya muriny vakakuruka-fo woose vakasha ikwaananya na Yesu. Vekillolya vakantereva naambo nauke efo myuungony yaawo.
New Testament in Kimashami © Bible Society of Tanzania, 2000.