Matayo 16
16
Vandu vakunda Yesu nawoore wende
(Mar 8:11-13; Luk 12:54-56)
1Naasa Vafarisayo vakansheya na Vasadukayo vakasha imweesa. Vakantereva nawoore wende luuka iruveeu. 2Nawe kaamba, “Nkwaany mmbo mwaamba, ‘Kwiifo kwiishaa ngesa, mashika efo iruveeu kufwani nsoru.’ 3Na elyi ngama mukaamba, ‘Inu kwiikapaa mmbwa ya maruruma.’ Mmbo kufwani samu efo iruveeu kukafumba-fumba. Kikavaany fwana ya efo iruveeu, yo mwaidima iimanya indi ngyende ta meendi yaa to mulatimanyi, 4Irika yelyi yeesi lyiraiye utuusi lyisyaa wende. Nalyo nta llyisheniingwaa wende-fo, kulaore ni wende yelo lwa Yona. Naasa kavara-u kakweengyany.”
Ntarang'o wa Vafarisayo na Vasadukayo
(Mar 8:14-21)
5Naasa elyi valya vakiloshyony varuuka vakafika kulya kwakulya, vakakooya vanrekyo iipoo mikate ya kishau. 6Nalyo Yesu kavavia, “Manyiny mukwiise na kinruwo kitarang'aa ekyo kya Vafarisayo na Vasadukayo!” 7Nawo vakaumburana wo veni na veni. Vakaamba, “Ni elyi lwarekyo iipoo mikate.” 8Nalyo Yesu kamanya kaamba, “Nyira vandu va kikusiryo kyaangu a ekyo mwaumburana kya mikate ilya mwarekyo iipoo nkyokyi? 9A mmbo mulandeipuye nta kindo, nta ikummbwa mikate ilya na vasero valya fiku firaanu na mikusha ilya muleishura fipereshu mmbo yekee iinga? 10Nta mikate ilya na fiku filya fiina na mikusha muleipoo shaasa yeefye? 11A mmbo kyava-se inda elyi mwarekyo iipuye kindo sharerya nshi kya mikate ilya-fo! Naasa kevekwiiseny na kinruwo ekyo kitarang'aa ekyo kya Vafarisayo na Vasadukayo.” 12Nawo vakaitumuso, ate nshi akundye ivavia vakwiise na kinruwo ekyo kitarang'ashaa mikate-fo, mmbo akunndye ivavia vakwiise na ufundo lwa Vafarisayo na Vasadukayo.
Petro aamba Yesu ni Mwana wa Iruva
(Mar 8:27-30; Luk 9:18-21)
13Naasa elyi Yesu afika kulya Kaisaria ya Filipo Kavesa yewo vakiloshyony kyakwe, kaamba, “A vandu varera inda kya Mwana yeto wa nndu mmbo akee vi?” 14Nawo vakaamba, “Kwiifo vaamba ni Yohane Mwiibatisa. Vengyi vakaamba ni Elia. Vengyi vakaamba ni Yeremia ao ni nndu wa vakisuku umwi.” 15Kavavesa, “A yeni mmbo mwaamba yeny ni vi?” 16Simon Petro kaallwa kaamba, “Yewe ni yewe Kristo kukee Mwana wa Iruva yeto muni muu!” 17Yesu kaallwa kaamba, “Ngoma yewe Simion wa Yona! Mashika kyakurambuya ekyo nshi nndu wa vandu-fo Nde-yaakwa wa efo iruveeu.” 18Naasa neeny shakuvia-le, “Yewe ni yewe Petro, na yaa iweu elyi ntannyau mmba nnyo siri yakwa. Nalyo nta finya ta ufu ntilyiidimaa-fo. 19Mmbo nkuniinngyaa ngyufunguo ta efo umangyi ny lwa iruveeu. Na kindo kwankifinga kunu urukeny, na efo iruveeu ni kiwo-da kyaveva kifinge. Na kindo kwankiporommwa kunu urukeny, na efo iruveeu ni kiwo-da kyaveva kiporommwi.” 20Nalyo kavavasa yewo vakiloshyony nta valandevie vandu vaambe we mmbwe Kristo.
Yesu arera kya makiva na ufu lwakwe
(Mar 8:31–9:1; Luk 9:22-27)
21Naasa fyeeri filya fyeni Yesu kapooka yoora valya vakiloshyony kyakwe mmbo kikee kirummbwe, nandefika kulya Yerusalemu nandelyisyo-fo ukiva wiingyi mmasiingo a uruka na Vakohani yewo vaniini, na vaarya va fitabu. Na iwaawa navewaawa, na elyi lya nkonu wa kararu narukeny. 22Nalyo Petro kanrwaa na mbai. Kapooka inkeemmya kaamba, “Ekyo Iruva nakiite kwaasha nakamwi! Kindo sha ekyo kilakuwonise-fo!” 23Nawe kainduka kavia Petro, “Kwiipoo wuya numa yakwa Satana! Mmbo kwava nsindara-akwa! Mashika ekyo kikee nrweny kwafo nshi ekyo kya Iruva-fo, ni ekyo kya kivandu.” 24Nalyo Yesu kavia yewo vakiloshyony vakwe, “Kwakooya nndu akunda ishilatya kuti nasue mwiili wakwe muni, nakurike nsalaba wakwe, nashilatyeeny!” 25Mashika nndu yeto akundaa ikira muu wakwe mmbo asheuretaa. Na nndu asheeraa muu wakwe sakyeny kwakooya ni kimaruma kyakwa, mmbo ashuuwonisaa. 26Mashika iviiri nndu ashuutaa-u nkyokyi kwakooya asheonisaa ulana loose luve mbusha yakwe, karetya-fo muu wakwe? Ao kindo nndu avikaa kyeewouwa muu wakwe nkyokyi? 27Mashika mwana yeto wa nndu isha asheshaa aree usuri lwa Ndeye aryani na vasu vakwe va efo iruveeu, nalyo nandetaa wo nndu kiinani na mashora akwe. 28Ni kya dede shamuvia, “Vandu vasalali yaa indi kwiifo valashoshaa ufu kulaore valollya Mwana yeto wa nndu ashe akee na umangyi lwakwe.”
New Testament in Kimashami © Bible Society of Tanzania, 2000.