Luka 14
14
Yesuni ’ba alenini mbazu mbari atizuri
1 #
Luk 6:6-11; 11:37 Eri nga eca ’dini, eri ka fi ’ba ’wara ’ba Farisaini ’diyi ma azi ma joa o’du sabatonisi nyaka nyazu, yi ovu eri ruria. 2Te mi ndre, agu alu indi eri drilia ovupi azo ’ba aleni mbazuri beri. 3Yesuni e’yo omviria ’yo ’ba azita imbapi ’diyi pi ma tia ’ba Farisaini be kini, Azita a’i yi ma ati ’ba rua o’du sabatonisi ra, kani ku ya? 4Te yi ovu ciri. Eri nga eri ’du, ruani ati, nga eri ku muzu. 5#Mat 12:11; Luk 13:15Eri nga ’yo yi tia, ’Ba emi eselia a’di’i, akanya erini kani ti erini ka ’de ’bile gale yii a’diniri ma alia, eri ngani eri enze amve o’du sabatonisi coti ku ya? 6Te yi econi e’yo omvizaru e’yo ’diyisi ku.
Imbata fele omu pi dri jo e’i beri
7 #
Mat 23:6
Eri nga e’yo o’beza ’yo ’ba omvele ’diyi dri, eri ka ndre yini oguna drile ’diyi operia; eri nga ’yo yi tia, 8#O’be 25:6-7’Ba azini ka mi omve lomu oku pariari nyazu, mi ri oguna drileri ma dria ku; kani eri omve ’ba amboru mi agapi rari ’bo yani; 9’ba mi omvepi eri beri kazu emuzu ani ’yozu mi tia, Mi ku pari ’ba ’diri dri; mi nga di mvi ovu pari vile turia drinza be, ’dini ku. 10Te ’ba ka mi omve, mi mu ri pari vile turia aga dria, ’dini ’ba mi omvepiri ka emu ra, ma ’yo mi tia, Ma agyi la, mi mu drile; mi nga di ovu ani ambo ’ba mini ovuzu yi be mesa tia ’diyi ma drilia dria. 11#Mat 23:12; Luk 18:14Te ’ba dria alu alu i ’bapi ururi yi nga eri omvi ele, azini ’ba i omvipi eleri yi nga eri ’ba uru.
12Eri ’yo ’ba eri omvepiri ma tia indi kini, Mi ka omu ’ba etu agasi kani ondresi, mi ma omve mi agyi, kani adriazi mini, kani ori’ba mini, kani ’ba mi jo ejelea ovupi i’ba afa e’ipiru ’diyi’i ’dini ku; ’ba ’Inde ’diyi kazu mi omvezu ariotini nyazu ani indi ku, mi kazu mile,omvizani a’izu ku. 13#Azi 14:29Te mi ka omu ’ba, mi ma omve ’ba alioru,, ’ba rua ondriza, ’ba acoza, ’ba mileefi odraza ’diyi pie dria, 14#Yoh 5:29te mi drileni nga ovu ba, afani ovule yi dri yorisi mileni omvizu mi dri. Mileniri nga ovu omvizaru mi dri ewu ’ba kililiru ’diyini engazu ’ba draza ma eseliarisi.
E’yo o’bele omu nyaza ma e’yosiri
15 #
Luk 13:29
’Ba ripi mesa tia yi be ’diyi ma, azi alu ka e’yo ’diyi eri ra, eri ’yo eri tia, ’Ba ngapi enya nyapi suru Munguniari ovu drilebaru! 16#Mat 22:2-10Te eri ’yo eri tia, Agu alu ’ba omu amboru, eri omve ’ba kakau; 17etu nyakanirisi eri pe ati’bo ini ma ti ’yozu ’ba erini omvele ’bo ’diyi ma tia kini, Emi emu; te afa dria ovu curu’do ngonde. 18Te yi dria alu alu e’do e’yo o’ba asi alusi, yi ma ece ani beni. ’Ba okori nga ’yo eri tia, Ma je amvu ra, te di ma ma mu eri ndre; ma zi mi tia, mi fe ma ma ece. 19Aziniri nga ’yo, Ma je ti ranya akpazaru iri iri towi, ma mu yi o’bizu; ma zi mi tia, mi fe ma ma ece. 20#1 Kor 7:33’Ba azini kini, Ma eji oku ’bo, e’yo ’disi ma econi muzaru ku. 21Ati’bo emu e’yo ’diyi olu opi ini ma tia. Jo e’i ovu di adrasi, nga ’yo ati’bo ini ma tia, Mi fu mbele mbele aku amboru ma gboko pi ma alia geri nyiria ’diyi be, mi ma eji ’doa ’ba alioru, ’ba rua ondriza, ’ba mileefi odraza, ’ba acoza ’diyi pie dria. 22Ati’bo nga ’yo, Opi, e’yo mini azileri ’ye i ’bo, te ti, pari ace nga indi. 23Opi nga ’yo ati’bo nderi ma tia, Mi fu mu geria azini geri kali ma tiaria, mi omi yi okposi efizu, ’dini jo mani ma ga tre beni. 24Te ma ’yo emi tia, ’ba ndraka omvele ’dayi ma aluni ngani omu mani ma aji ’bi ku.
Candi isule Yesu ma vuti bilerisiri
25’Ba ongulumuru kakau mu eri be; eri nga i oja, ’yo yi tia kini, 26#Mat 10:37, 38’Ba azini ka emu ma vu, ka i ati pi ngu, andri pie, oku pie, anzi pie, adripi pie, amvipi pie dria ku, ada ka idri i ngulupini ngu ku indi, econi erini ovuzaru ’ba mani imbaleriru ku. 27#Mat 10:38; 16:24; Mar 8:34; Luk 9:23’Ba ka pati alaza i ma ngulupini ’du ji ku emuzu ma vutia, econi erini ovuzaru ’ba mani imbaleriru ku. 28’Ba emi eselia lepi jo izuru sipiri a’di’i ya, eri ngani ri va silingi erini ngale ezaleri lazu raka ku ya, nizu kani eri ovu afa dri fupi jo nde dezu rari be? 29Ka’dini ku, eri ka jo eti ’ba ’bo, ka eco eri dezaru ku, ’ba dria eri ndrepi ’diyi nga ’ba eri ogu ogu, 30kini, Agu ’diri eri ’ba jo sizu ra, te econi dezaru ku. 31Kani opi ngori mupi omba ’bapi opi azini beri, ngani ri va e’yo amazu okorisi raka ku ya, nizu kani i’i ovupi kiri asikari alifu mudri beri eco ’ba emupi omba ’bapi i be asikari alifu kali iri beri ma dri aruzu ra ya? 32Ka’dini ku, opi azinini nga ovuria re, eri nga ’ba ti pe e’yo asi anzuruni a’izu. 33’Dinile ’ba dria alu alu emi eselia afa dria i ma ngulupini kupi kuri, econi erini ovuzaru ’ba mani imbaleriru ku.
A’i si kokoruri
34 #
Mat 5:13; Mar 9:50 Awa’dini a’iri onyiru; te a’i nde ma si ka fu ’bo, yi nga eri ’ba aluzaru dika a’di afasi ya? 35Funi dri ’bazu amvua ku, kani murutu dria ku; yi eri ’be amve. ’Ba bile be e’yo erizuri ma eri ra.
Bible in Lugbara © United Bible Societies, 1966.