PANDARIADDI 1
1
Watti'u pandariaddi ul᷊ilin pati' uppa
1Su al᷊amonane, su tempo Ruata nanattakke mandiaddi ul᷊ilin pati'uppa, 2runia taambe lihidde, wuṛṛu ta'e uasongkakka. Tahal᷊oangnga apan ruddallua'a apan uataappa al᷊awo'a, nioopannu ararandumma, arawe taṛṛinon Duata u'al᷊ore su wowon kua'e. 3Ruata nabbisara, “Ariadite asasemakka!” Ana see piate asasemakka. 4Ruata mal᷊uassa ma'ellega olangnge udde. Ana see i Tou naṛṛaen asasemakka udde wuassu ararandumma, 5wuṛṛu asasemakka udde nissaggo “Allo” wuṛṛu ararandumma udde “Ṛabbi”. Ṛabbi nal᷊iudda, nariadite rua allo. Eteudde allo paarorone.
6-7Wua'udde Ruata nabbisara, “Ariadite sambau atuppa ual᷊e'onna ipattahia ua'e udde mariaddi darua, wuṛṛu maṛṛapingnga ua'e sulal᷊ummu darua tampa apan uaṛṛae.” Ana see olangnge udde nariadite. Ete aroddi Ruata na'ola'a atuppa ual᷊e'onna ipaṛṛaen kua'e su al᷊ungnge udde wuassu ua'e al᷊iu rosone. 8Atuppa ual᷊e'onna udde nissagote “Langitta.” Ṛabbi nal᷊iudda wuṛṛu nariaddite rua allo. Eteudde allo aruane.
9Wua'udde Ruata nabbisara, “Ṛinone ua'e wowa su al᷊ungngu langitta mangelekka su sambau tampa, tadea'u leta'a aasiloanna.” Ana see olangnge udde nariaddite. 10Ruata nanagon leta'a udde “Ammaranne”, wuṛṛu ammul᷊annu ua'e udde nissagote “Tahal᷊oangnga”. Wuṛṛu Ruata mal᷊uassa ma'ellega olangnge udde. 11Ruata nabbisara apia, “Ṛinone leta'a mapaasabangngu al᷊awo'u hatin sinuananna, eteudde sinuananna wuane apan pia batune wuṛṛu manga sinuananna apan mabbua.” Ana see olangnge udde nariadite. 12Ete aroddi leta'a napaasabangngu al᷊awo'u hatin sinuananna. Wuṛṛu Ruata mal᷊uassa ma'ellega olangnge udde. 13Ṛabbi nal᷊iudde wuṛṛu narua allote. Eteudde allo atallune.
14-15Wua'udde Ruata nabbisara, “Ṛinone pia manga saranapa masemakka su langitta ipanemakka runia, tadea'u ipaṛṛaeng kallo wuassu ṛabbi, wuṛṛu ipaniala tempone manattakke allo, tonna, wuṛṛu allo wahewan agama.” Ne olangnge udde nariaddite. 16Ete aroddi Ruata na'ola'a darua saranapa masemakka apan bahewalla, eteudde matannallo mannemakka allo, wuṛṛu wul᷊anna mannemakka ṛabbi; ana see lai Tou na'ola'a manga anumpitanna. 17Ruata nangaddo manga saranapa masemakka udde su langitta ipanemakka runia, 18ipanaṛṛino allo wuṛṛu ṛabbi wuṛṛu ipaṛṛaen asasemakka wuassu ararandumma. Wuṛṛu Ruata mal᷊uassa ma'ellega olangnge udde. 19Ṛabbi nal᷊iudde, wuṛṛu nariaddite rua allo. Eteudde allo aiappanne.
20Wua'udde Ruata nabbisara, “Ṛinone sulal᷊ummu ua'e mangngal᷊iapakka manambo hatin arariadianna wiakka, wuṛṛu su winalanganna tuttalla'a manambo hatin manu'a.” 21Ne, Ruata nandiadite manga winatangnga wawallu tahal᷊oangnga, wuṛṛu al᷊awo'u hatin arariadianna apan mabbiakka sulal᷊ummu ua'e, see lai al᷊awo'u hatin manu'u arnalanganna. Ruata mal᷊uassa ma'ellega olangnge udde. 22Ruata nangal᷊amatta sarangkanambone udde ringannu nangonggolu parenta su manga arariadianna wiakka sulal᷊ummu ua'e tadea'u mabbalaga wuṛṛu mamene tahal᷊oangnga, wuṛṛu su manga manu'u winalanganna tadea'u aatambanna anambone. 23Ṛabbi nal᷊iudda wuṛṛu marua allote. Eteudde allo al᷊imane.
24Wua'udde Ruata nabbisara, “Ṛinone runia mapaasabangngu al᷊awo'u hatin binatangngu ammaranne, apan maṛṛaro wuṛṛu matengnga, wahahewalla ara'e lai maradio'a.” Ne olangnge udde nariaddite. 25Ete aroddi Ruata na'ola'a sarangkanambone udde wuṛṛu i Tou mal᷊uassa ma'ellega olangnge udde.
26Wua'udde Ruata nabbisara, “Orassa indi i ate ma'ola'a taumata ere lihiddi Ite wuṛṛu nassul᷊ungngi Ite. I mangitou sarun uataṛṛino manga inassa, manga manu'u winalanganna, wuṛṛu al᷊awo'u winatangnga waine, mawae ete maṛṛaro aroddi lai matengnga, mapia ete wahewalla aroddi lai maradio'a.” 27Ete aroddi Ruata nandiadi taumata, wuṛṛu niolang-Nge i mangitou naal᷊ihidda watangan-Ne sassane. Mawu nandiaddi si tarua esakka wuṛṛu wawine. 28Wua'udde Ruata nangal᷊amatta si mangitou ringannu wisara “Paṛṛitete ringannu paanambo tadea'u papapulunnu mamanua su ahewallu runia wuṛṛu mamarenta sarangkanambone udde. I yamiu Ta'u iapamanara mallu'adda manga inassa, manga manu'u winalanganna, wuṛṛu manga winatangnga matengnga waine. 29Apan maola'a wiakku eteudde Ta'u ionggolla si raddue anambon hatin sinuananna apan mangonggollu hessine pia batune wuṛṛu manga wuan aaluanna. 30Arawe su al᷊awo'u manu'u winalanganna wuṛṛu winatangnga matengnga waine, Ta'u ionggolla manga nannal᷊o wuṛṛu sinuananna maddongnga maola'a wiakke.” Ne olangnge udde nariaddite. 31Ruata na'ellega al᷊awo'a apan buatte niolang-Nge udde, wuṛṛu i Tou tumaniten mal᷊uassa. Ṛabbi nal᷊iudda wuṛṛu marua allote. Eteudde allo aiannumme.
