Matius 10
10
Si Yesus timawah sé mapulu' wo zua pahtuzu'en-Na
(Mrk. 3:13-19; Luk. 6:12-16)
1Si Yesus timawahmé sé mapulu' wo zua pahtuzu'en-Na a séra wéhan-Nala ung kawasa i mahwoho sé sétang wo mahlé'os sé tou saki wo sé lailai. 2A ngaran né mapulu' wo zua pahtuzu'en-Na itii é: Si kataré é si Simon si pahkuan kangkasii im Petrus wo si Andreas katuarina, si Yakobus wo si Yohanes sé oki' ni Zebedeus, 3si Filipus wo si Bartolomeus, si Tomas wo si Matius si im puuna menanagi am pajak, si Yakobus oki' ni Alfeus, si Tadeus, 4si Simon si wia sé sana réwok tou Zelot#10:4 Sé sana réwok Zelot é sé tou Yahudi sé soo mahkiit am perénta né Romawi. wo si Yudas Iskariot si ing kamurian nimangkér si Yesus.
Si Yesus nimatu sé mapulu' wo zua pahtuzu'en-Na
(Mrk. 6:7-13; Luk. 9:1-6)
5Sé mapulu' wo zua pahtuzu'en ni Yesus itii é méiatu-Nama karia ing kimuama, “Ni kamu én tia'mo mahaangé wana am wanua né tou zéi'kan Yahudi wo wana am wanua tua'na né tou Samaria, 6taan mangémo wia sé tou Israel, sé timula'umola si Opo Empung sé tanumokan sé domba méikalulu. 7#Luk. 10:4-12 Mangémo wo maiwoka'la: Ung Kakolanoan ni Opo Empung é lelezokan. 8Lé'osela sé tou saki, itoumé sumaup sé tou nimatémo, lé'osela sé tou tinoro ang kusta wo iwohola sé sétang. Péléng ang kawasa itii é mémoitambér wia ni kamu, niitumo itambér kasiila niitu i sumawang sé tou walina. 9Ni kamu i mangé én tia' mahalima a mas kaapa am péra' kaapa an tambaga witu um pelélé'osan niou an zoit. 10#1Kor. 9:14; 1Tim. 5:18 Ni kamu kasii én tia'mo mahali tatahu'an am walun im wana am pahlampangan, tia'mo mahali karai sasawelen, selop kaapa teken. Pahpaan si tou mahpaayang ém wangun i makailek um wawaér.
11Sa kamu muntepa witu um wanua kaapa wanua tua'na, menérola si tou wangun in ento'an niou witu wo mento'mola witu um waléna makaz kamu mondolé im witu. 12Sa kamu muntepa witu um walé né tou, sumigi'la. 13Sa kamu sungkulen nérala, ni séra é makailek ung kamang witu u sigi' niou. Taan sa kamu zéi'kan sungkulen nérala, ung kamang witu u sigi' niou é mawurimé sumaup wia ni kamu. 14#Kis. 13:51 Sa wéwéhan tou soo sumungkul ni kamu kaapa soo tumalinga an ipahtuzu' niou, mondolomé wo itula'umomé um walé kaapa um wanua tua'na itii, wo itangkaré an awu wana an a'é niou. 15#Kej. 19:24-28; Mat. 11:24 Uli-ulit ikua-Kuma wia ni kamu: Im witu un endo si Opo Empung in tumotoz ulit kaapa zéi'kan am pahlé'osen né tou, un ukuman wia sé tou witipé' Sodom wo Gomora u rorak taan un ukuman wia sé tou witu um wanua tua'na itii.”
Si Yesus nimenté' an até né pahtuzu'en-Na
(Mrk. 13:9-13; Luk. 21:12-17)
16 #
Luk. 10:3
“Gena-genangen! Ni kamu é méiatu-Ku tanu si domba witu un unez né serigala. Niitumo, ni kamu é léwo'zéi' i siga' tanu si ulé' wo lé'os tanu si bombo.
17Taan mile-ilek im wia péléng sé tou. Pahpaan wéwéhan sé mayo ni kamu witi mahkama agama wo ni kamu kasii é masaluken néra witi walé peraragésan néra. 18Wo pahpaan mahkiit ni Aku, ni kamu ém pahwali néra wia sé mahkawasa wo wia sé kolano ing kumua a niilek wo an tinalinga niou tumoro ni Aku wia ni séra wo wia sé tahsasana wanua sé zéi'kan mata'u si Opo Empung. 19Sa kamu iayo nérala, tia'mo ikaarét niou tumoro kura wo apa a léwo'zéi' in ikua niou. Pahpaan in toro niitukan niana péléng én itambér wia ni kamu. 20#Mrk. 13:9-11; Luk. 12:11-12, 21:12-15 Pahpaan zéi'kan ni kamu sé manumuwu', taan si Roh ni Ama' niou si manumuwu' mengiité ni kamu.
21 #
Mrk. 13:12; Luk. 21:16 Wo in tumondong é mamuali, si tou é mayo si katuarina im wunu'en, téntu kangkasii si ama' wia sé oki'na. Sé koki' é masumaru sé tu'a néra wo munu' ni séra. 22#Mat. 24:9, 13 Péléng sé tou é mazi'zis ni kamu pahpaan mahkiit ni Aku. Taan sé tou ezen makaz ing kamurian é makailek ung katou-touan makaz ing kauré-uré. 23Sa kamu pahzézéhan néra witi wanua tua'na esa, tumingkasoma witi wanua tua'na walina. Pahpaan uli-ulit ikua-Kuma wia ni kamu: Puunala péléng am wanua tua'na witi Israel pakaangéan nioué, si Oki' ni Tou é niméyémo sumaup.
24 #
Luk. 6:40; Yoh. 13:16, 15:20 Si pahtuzu'en én zéi'kan lumousé si mésterna, kaapa si ata én zéi'kan lumousé si tuangna. 25#Mat. 9:34, 12:24; Mrk. 3:22; Luk. 11:15 Sa si pahtuzu'en masuato wo si mésterna, niitu én toromo wo sa si ata masuato wo si tuangna, niitu én toromo. Sa si makawalé ém pahkuan im Beelzebul, apapé' kasii sé tou witu um walé itii.
26 #
Mrk. 4:22; Luk. 8:17 Niitumo ni kamu én tia'mo maindé' wia ni séra, pahpaan zéi'kan siapa ang kineleuan an zéi'kan mawukaan wo zéi'kan siapa a méikawuni an zéi'kan makata'uan. 27A méikua-Ku wia ni kamu karia in ipahwuni-wuni é maipakaulitla wia sé tou. Wo a méipahkewit-Ku umanla wia ni kamu é maiwoka'la wia sé tou tanu im witu um wawo um walé wo mahwoka'. 28Ni kamu én tia' maindé' wia sé tou sé makawawa uman i munu' un awak niou, taan zéi'kan makawawa i munu' si roh niou. Taan maindé'la ni Sia si wéwéhan ung kawasa i munu' un awak wo si roh niou witi naraka. 29Zéi'kankuaa sé ringkéng zua én iwangkér karia un zoit#10:29 Witu nunuwu'en Yunani é ‘assarion’ ung kalakoana én zoit logam totoz rintek kaapa totoz zéi'kan siapa telesna. totoz rintek uman? Taan, zozo'mokan in téntu zéi'kan siapa im wia sé ringkéng itii sé ikagogo sa zéi'kan witu um paaz ni Ama' niou. 30Téntu kangkasii ni kamu, makaz am wuuk witu un ulu niou ém pinakarékéno. 31Niitumo, ni kamu én tia' maindé', pahpaan im wia si Opo Empung, ni kamupé' sé ipahpuu-puuna taan sé ringkéng lakez.”
32Ang kuan kasii ni Yesus, “Séi uman si makaulitla wia sé tou i ni sia é ma'éman wia ni Aku, ni Aku kangkasii é makaulit witu u sinaru ni Ama'-Ku witi kasendukan i ni sia én tou-Ku. 33#2Tim. 2:12 Taan, séi uman si mahkélong ni Aku witu sinaru né tou, ni Aku kangkasii éng kumélong ni sia im witu u sinaru ni Ama'-Ku witi kasendukan.”
Kura ing kumiit si Yesus
(Luk. 12:51-53, 14:26-27)
34“Tia' kamu mahgenangla ni Aku i niméyé é mahalimé u mahlé'o-lé'osan wia sé tou wia ung kaayahan. Ni Aku i niméyé én zéi'kan nimahalimé u mahlé'o-lé'osan taan nimahalimé am pahkoro'an né tou wia ung kaayahan. 35#Mi. 7:6 Pahpaan ni Aku i niméyé é mémangun si tarétumou i sumaru si ama'na, si raraha i sumaru si ina'na wo si oki' wéwéné i sumaru si mahnuangna wéwéné. 36Si totoz kakoro' ni tou é sé sana awunakan.
37Séi uman si rumaraaté si ama' wo si ina'na lumousé u raraatéanna wia ni Aku, ni sia én zéi'kan wangun ing kumiit ni Aku. Wo séi uman si rumaraaté sé oki'na, tuama kaapa wéwéné lumousé u raraatéanna wia ni Aku, ni sia kangkasii én zéi'kan wangun ing kumiit ni Aku. 38#Mat. 16:24; Mrk. 8:34; Luk. 9:23 Séi uman si zéi'kan masaan u salipna wo kumiit ni Aku, ni sia én zéi'kan wangun ing kumiit ni Aku. 39#Mat. 16:25; Mrk. 8:35; Luk. 9:24, 17:33; Yoh. 12:25 Séi uman si mahkelung ung katou-touanna, ni sia éng kaliongan ung katou-touanna. Taan séi uman si kinaliongan ung katou-touanna pahpaan ni Aku, ni sia é makailek ung katou-touan makaz ing kauré-uré.”
40 #
Mrk. 9:37; Luk. 9:48, 10:16; Yoh. 13:20 “Séi uman si simungkul ni kamu, ni sia é simungkul ni Aku. Wo séi uman si simungkul ni Aku, ni sia kangkasii é simungkul ni Sia si nimatumé ni Aku. 41Séi uman si simungkul si nabi i nabi, ni sia é makailek um wawaér ni nabi. Wo séi uman si simungkul si tou ulit in tou ulit, ni sia é makailek um wawaér ni tou ulit. 42Séi uman si méhéma un elepen, zozo' in zano zaté uman wia si esaané im wia sé tou kanaramen kenu pahpaan sia mahkii-kiit ni Aku, uli-ulit ikua-Kuma: Ni sia én zéi'kan kaliongan um wawaér wia ni sia!”
