Yokana 2
2
Nyom i Kana
1Ceng me adek nyom oudo tie i bomba atidi me Kana, i piny me Galilaya. Toto me Yesu da oudo tie kuno. 2Oudo kolwongo Yesu da karacel kede josiao mege i nyom nono. 3Kakame bwini otiek kede, toto me Yesu oko waco ne be, “Bwini do li ne gi.”
4Yesu oko waco ne be, “Dako, Itie lola pinyo? Esawa nango pwodi likame otuno.”
5Toto mere oko waco ne jotic be, “Wun timunu gi dedede kame ewaco ne wu.”
6Aso, agune kanyape kame kotimo kede engaro oudo tie cungo kuno di lubere kede itok me lonyere me Iyudayan. Agulu acelacel oudo tero galanin ot are arabo ot adek me pii. 7Yesu oko waco ne gi be, “Pongunu agune go kede pii.” Gin kiko pongo gi lubulub. 8Yesu oko waco ne gi be, “Aso twomunu mogo iterunu ne ngadwong me ebaga me nyom.” Gin kiko tero. 9Kakame do ngadwong me ebaga me nyom obilo kede pii, en eko ude elokere edoko bwini, likame en eko ngeno kakame oudo ewok kiye (bed bala jotic kame bin otwomo pii nono oudo ngeo). Ngadwong me ebaga me nyom oko lwongo eteran, 10di eko waco ne be, “Jo dedede geo ber poko bwini amit, do ka jo omato oko romo gi, kiko poko do bwini abot; do in iko kano bwini amit tuno nan.”
11Man en gianena mere me agege kame Yesu otimo i Kana kame tie Galilaya, di eko mino deyo mere ongere, di josiao mege oko yei en.
12 #
Matayo 4.13
Ingei man, Yesu oko ot Kaperanaum kede toto mere, kede imiegu kede amiegu mege, di kiko bedo kuno pi ceng mogo anonok.
Yesu Ooto i Tempulo
(Matayo 21.12-13; Marako 11.15-17; Luka 19.45-46)
13 #
Yai 12.1-27
Ebaga me Kalamo me Iyudayan oudo onoko, di Yesu oko ot paka Yerusalem. 14En eko udo jo kame cato twonin kede romini kede amam, karacel kede jo kame seso sente di kitie bedo i nyim imesai gi me cat i tempulo. 15En oko timo ebela me iyera, di eko riamo gi kede ooko dedede, karacel kede romini kede kiton doke da, di eko kikiro siringi me jo kame oudo seso sente, di erereto imesai gi. 16En eko waco ne jo kame oudo cato amam be, “Terunu gigi tenge. Kur ilokunu ot ka Papa na dok atale.” 17#Sabuli 69.9Josiao mege oko yutuno be oudo kowandiko be, “Nyeko na me amara pi odi liel i cunya bala mac.”
18Iyudayan oko waco ne be, “Gianena nyo kame iyaro timo pi nyuto ne wa be in itie kede akarunikin me timo gini?”
19 #
Matayo 26.61; 27.40; Marako 14.58; 15.29 Yesu oko dwoko ne gi be, “Retunu tempulo ni, di ango ako bino gere pi ceng adek kenekene.”
20Iyudayan oko waco be, “Gero tempulo ni otero mwakini ot ongwon kiwie kanyape, in iparo be iromo gere pi ceng adek kenekene?”
21Do Yesu oudo tie yamo kop i kom tempulo kame obedo kome. 22Pi mano, i kare kame koyaruno en kede kikom jo oto, josiao mege oko yutuno be oudo bin ewaco kop noni; kiko yei iwandik kacil kede kop kame oudo bin Yesu owaco.
Ngec ka Yesu i kom Ekite ka Dano
23I kare kame bin Yesu tie kede Yerusalem i Ebaga me Kalamo, jo atot oko yei en kakame kineno kede gianena kame en etimo. 24Do Yesu likame oko keto gen mere i kom gi, 25pien en oudo engeo gikame tie i cuny jo dedede. Omio oudo likame emitere pi dano moro mino ijura i kom ngatamoro, piento en kikome oudo engeo gikame tie i cuny jo.
Baibuli I Leb Kumam © Bible Society of Uganda, 2013.