Matana Enjil 9
9
Bag. 9.
1Kub werro torgi, essigi nog targi, tenna mediner tosum.
2Teddo tenn owolged uskurtirsan sowibul wekki, angare werdogor bungon.
Ter tinna imangi nalos sowibulgi wetirsum: „Azime, anna tod, enna zenbichi ekki komisbutirran.“ 3Mandogon abajili weri darangon, tinnewertir awesan: „In ogij ajedifen.“ 4Ama Yesu tidder dalgi iyirbusinged wesum: 5„Ir ma miligi inna achir adamreru? Edi saï shorore: ‚Enna zenbichi ekki wakebutirran’ an werar? 6wala ‚imbel talos’ ane? Ama ir iyirrunna jiradilo zolna tod gudragi ariddogor kongi, wide zenbichigon wakerarki“ — sowibulgi wetirsum: „Imbel, enna angaregi soke injed enna kagir biju!“ 7Ter imbelligi tenna kagir bijusum. 8Jemachi mangi nalosirgi, sarke wer aredirsum. Wide artigi mejidti tirsan, gudra ini galig wekki ogjigi tidirsinged.
9Yesu mandoton talosirgi nalsum nogbungon ogij wekki, tenn erigon Matay esan, makiski aarrann agarro agingon. Tekki wetirsum: „Aigi tebae!“ Mata imbelligi wide tekki tebaesum.
10Yesu kaler agingon Matana kar, teddo makisn idi digrichi weri deti jamesan, wide zenbikoni werigon. Tiri male Yesugon tenna hiranigodongon kaler tegsan. 11Ingi Farisichi uru nalos hiranigi wetidirsan: „Won inna tirti ma makisn idigodon wide zenbikonigodongon akalin?“ 12Yesu tirgi gijredirgi wetidirsum: „Zoli kogoranbuli tabibki awerisminan. Odili teran awersili. 13Jurgi kurwe in werechigi: ‚Ai rahmagi teran awerisrin, gojirdogor.’ Mine ai takomnim serechigi uweri an, ama milichigi.“
14Mani wattigi Hanana hirani tekk abidi awtandigi wide isigsan: „Won ar ma wide Farisichigon dertigi aïnjirun? Enna hirani ma injimendan?“ 15Yesu tirgi widegirtidirsum: „Erkenekolna tiwrichi amusullana, erkenekol tirgodon danna mishengi? Ugrosi bitaran, tedder erkenekol tinnaiton dukitakkoskin, mani wattigi dertigi binjikandan.“
16„Zol wekkon kade erna guda wekki kursel werro akoligirmunum. Mine in guda er kurselloton kocchekki ared binogin. Urburkon owoldogor bikosanin. 17Wala girba kursello hamur er wekki agiwundurminan. Mine girba wachoskin, hamur ardir bibogosin, wide girbagon binefakiyanosin. Ama hamur erki girbachi erir aündurran, owingarigi hafidtakkiw an.“
18Tirgodon elgon abainingon jamana imam wer targi tenn owollo ungos wide tekki wetirsum: „Anna buru eleken diossum. Er on eleken targi igi tendogor kujurkin, bayin.“ 19Yesu imbelligi tenna hiraniged tekki tabaessum.
20Tenna wattir en gew talebul wer jen diminde owirton tenn aharked tararrigi tenna kadena ewgi kumisum. 21Mine ter tennewertigodon wesum: „Ai on tenna kadena ewgi kumikrin, bigenandin.“ 22Yesu dire tebirgi tekki uru nalos wetirsum: „Falan, anna buru, enna iman ekki gengirossum.“ Tenna lehdayen en genanossum.
23Yesu imamna kar bidargi gabki ajomiligon wide torwer jame tebiligongi nalos wetidirsum: „Boloswe! 24Burfeta dikomnum. Ter nerbun.“ 25Tiri tendogor ususan. Ama malegi ososirsann aharro Yesu talin to jurgi burugi irton morogringad, ayos kute tebsum. 26In awid eshei malegi eyegirsum.
27Teddoton Yesu nogbungon dugr owi tekki tebaesan, uweka werangon: „Argi durir, wo Dawudna tod!“ 28Kar Yesu torossinn agabir dugri targi tekki elsan. Yesu tirgi wetidirsum: „Iri aamnerua ai gudragi koringi irgi misigi tidirarki?“ Tiri wesan: „Eyo, wo tirti!“ 29Ter wide tinna misichigi kumirgi wetidirsum: „Inna iman nawre irgi awtakkitidir agad!“ Tinna misichi wide kustakkisan. 30Yesu jezmetidirsum: „Zol wekkongi iyirkidimenwe!“ 31Ama tiri belsangodon man eshei malegi eyegirsan ter tirged awsinged.
32Tinna belarn aharro Yesugi owolgitirsan mumud wide newerti miliged degbul wekki. 33Newerti mili turtakkosingad, mumud bainsum. Jemachi ajibergi wesan: „Ini galig wer kidir Israello ta nogkomnum.“ 34Ama Farisichi awesan: „Newerti milichina dulged teran newertichi milichigi aturin an.“
35Yesu medinechi malegon wide nejachi malechigongi toïrsum, tinna jamachir kurkidiringon wide abeshireiringon artina mulkiged. Wide odili malegon jagadanbuli malegongi agengirirsum gebilan tur.
36Jemachigi Yesu uru nalos tenna a tirg abidi guyisum. Mine tiri egedi aïwilkiyichi galg esan. Indo mando gulij marisbusan. 37Ter tenna hiranigi wetidirsum: „Gu dulum. Jeligi aawiligon gelilim. 38Guna tirtigi beddiwe, jeligi aawiligi tenna gur ishin an.“
Published by the British and Foreign Bible Society in 1912.