Oyinyima 8
8
Ọhaara enyi ọnọọ ọ sị hụ́
1Ohomorihi ọ tị tamayị ka Inowa ọnịrị avaba úye hi ịnị ẹpa ọnọọ. Di Ohomorihi mẹ ka ahị ọ̀ tụ́, di enyi ọnọọ aa hụ́ nị. 2Dị avaba ìrìkù enyi ini ẹtẹ ọnịrị ozokete ihinẹba gù nị. Orihi ana aa zụ̀ ọ̀ sị jị. 3Di enyi nyima dị ọ tangwa aa hụ́ nị. Ọ́ mẹ̀ sị mẹ ẹkụhị ẹchịhịmba tụra ẹẹwụ, (150) eni enyi nyima, dị ọ dà hụ́ nị. 4Ịnị ana tụ́ ọ ụhwẹ ịhịmba, ịnị ẹkụhị ẹwụrịhịmba ịnị ụhwẹ ọnọọ, ịhị ọnọọ ẹpa ọnọọ na jẹẹ ịrẹsụ ataba ọnya ịnị ẹtẹ Ararati nị. 5Enyi ọnọọ ộ vavọọ yị hụ́ pooro ne tù ịhị ẹ tụ ọ ụhwẹ ẹẹwụ. Ịnị ẹkụhị ịpaapa ịnị ịhị ẹ tụ́ ọ ụhwẹ ẹẹwụ, dị ịrẹsụ ataba nịnị aa dàa tụ́ ẹhẹ nị. 6Ọ mẹ̀ sị mẹ ẹkụhị ẹbẹẹva ana ataba maanị dà tụ́ ẹhẹ aanị, di Inowa nā ozokete ẹpa ọnị ọ mẹ nị. 7Dị ọ tụ́ ọrụ jịnẹ nị, dị ọrụ ọnọọ ee hiraa zịịzị pooro di enyi wụ̄ nị.
8Di Inowa rẹ tụ́ arivadi jịnẹ nọ ẹhẹ ka ò ne re, enyi ọ̀ọ sị wụ hụụnị eteesu. 9Ịjị arivadi ọnọọ ò yi re aha kú, agụvị ka enyi hi hi ẹtẹ, dị ọ vavẹ ve tù Inowa ịnị ẹpa nị. Di Inowa tana ụvọ dị ọ sị arivadi ọnọọ ve pè ẹngụ tụ́ ịnị ẹpa nị. 10Inowa ọ rẹ jẹẹ mẹ ẹkụhị ịhịmba, dị ọ rẹ tụ́ arivadi ọnọọ jịnẹ nọ ẹhẹ nị. 11Ịnị ụmẹ oruva dị arivadi ọnọọ vavẹ ve tù ọ nị. Ọ mẹ̀ vẹ, ộ jị avị orivi ohwoohu tụ́ irenu vẹ. Di Inowa sị yẹ ka enyi aa hụ́ nị. 12Inowa ọ jị jẹẹ mẹ̀ ẹkụhị ịhịmba tụ́ ọ, dị ọ rẹ tụ́ arivadi ọnọọ nọ ẹhẹ nị. Ama ọ yị vana vavẹ ịda anị.
13Inowa mẹ sị gụ ịrayị akata tụra ikonya, ịnị ẹkụhị ịpaapa ịnị ụhwẹ ịpaapa ịrayị ọnọọ enyi ta dị ẹtẹ aa wụ́ nị. Di Inowa hụ̀ ịsị o si kú ẹpa, ọnọọ dị ọ dà eyi gee di o re ka ẹtẹ aa wụ̄ nị. 14Ịhị ẹ tụ́ ọ ẹkụhị ohurịhịmba ịnị ụhwẹ ọhụva dị ẹtẹ sị wụ̄ korowu nị. 15Di Ohomorihi va hị́ Inowa dị ọ ka: 16Jịnẹ hụụnị ẹpa ọnọọ, ọnị, ose anị, ezi anị, beri ese ezi anị. 17Ọ kà avaba ịsa ana aa tụ́ ụhwẹ ene hi ịzọọ pè e, ọ kụ́ wa jịnẹ vẹ, inomi nịnị, uye nịnị ọnịrị avaba ịsị eē tura ene ee tura ini eteesu. Ẹnịnị è nyima dị ẹ̀ẹ ma, dị ẹ̀ẹ rụrụụ hi ịnị ẹhẹ ẹtẹẹtẹrẹ nị. 18Ịzẹyịza di Inowa jịnẹ hụụnị ẹpa ọnọọ nị ọnịrị ose anị beri ezi anị ọnịrị ese ezi anị e dudu jịnẹ hụụnị ẹpa ọnọọ nị. 19Dị avaba evere uye nịnị, avaba evere uye eneē tura ini eteesu ne beri avaba evere inomi nịnị, mị ka avaba ịsị ẹẹ̄ zị ụsẹ ọrụrụ ịsị ee tura beri ịrẹsụ eteesu ẹ vavọọ jịnẹ hụụnị ẹpa ọnọọ nị.
Inowa ộ mẹ̀ ịsọvọ yị Ohomorihi
20Inowa mẹ̀ sị jịnẹ tụ́ ẹhẹ, dị ọ mẹ aha ịsọvọ yị Ẹnẹyịmavara nị. Dị ọ sị ịnị avaba uye ana rụra mẹ̀ ịsọvọ ọnịrị inomi ana rụra mẹ̀ ịsọvọ, dị ọ sị wa mẹ̀ ịsọvọ, dị ọ rị wa ịra ịrẹsụ aha ịsọvọ ọnọọ nị. 21Ịjị Ẹnẹyịmavara wụ́ àgụ̀ ozoza ịsọvọ ọnọọ, dị ọ kà a ịnị ayị anị dị ọ ka, “Ọnị ọ mā vana hụ agụvị ọza chì hi ẹtẹ. Ọ kà ọnị ọ yẹ ka ọ mẹ̀ hụrẹ vi ozweyi, ariro odivi ọ yà ịnị ayị anị. Ọ kà ọnị ọ mā rẹ vana maanị wụ̀ avaba ịsa ana aa tụ́ ụhwẹ. 22Ọ kà hụrị ụmẹ aanị na pooro dị ẹhẹ ọ̀ kara ụpa, a vaa nyị ụmẹ ene eē sii chire ịsa, di a rẹ nyị ụmẹ ana va sịị̄ mẹ̀ ịsa ịnị aarẹ. A vaa nyị ụmẹ orihi di a rẹ nyị ụmẹ ọhahị. A vaa nyị ụmẹ ahị ọnịrị ụmẹ ẹhị, avọọ a mẹ̀ rẹ vaa nyị ụmẹ ịrahụ ọnịrị ọọdụ nị.”
Ebira First Bible © Bible Society of Nigeria, 2014.