Ohuchaaka 1
1
Olukano lw'ohuloongwa
1Muhuchaaka, Nasaae yaloonga ekulu neende esyaalo. 2Esyaalo syali nisibulaho efwaani yoosi haandi syali esihaya. Esiirima syali nisyabwiiha esyaalo syoosi, nae Mwooyo wa Nasaae yali nang'alaalaanga sa hu maachi.
3 #
2 Kor 4:6. Nasaae yeemao yaboola ati, “Lehe obulafu bubeeo” mani obulafu nibubaao. 4Nasaae yabona ati obulafu bwali obulai. Nasaae yakabula obulafu ohutula hu siirima. 5Nasaae yalaanga obulafu ati “Esideete,” nae esiirima Yaasilaanga ati “Esiro”. Mani nibwiira haandi nibuhya, oludaalo lutaangira.
6 #
2 Pet 3:5. Nasaae haandi yaboola ati, “Lehe libeeo ekulu elikabulamo amaachi amahabi kabiri.” 7Mani Nasaae yahola ekulu lyaakabulamo amaachi akali aakulu neende amaachi akali aasi. Mani nibiba bityo. 8Nasaae yalaanga aakulu ati “Ekulu”. Mani nibwiira haandi nibuhya, oludaalo lwohubiri.
9Haandi Nasaae yaboola ati, “Lehe amaachi kali aasi w'ekulu kebuusire abuundu alala, haandi lehe eloba lyoomu libonehe.” Mani nibiba bityo. 10Nasaae yalaanga eloba lyoomu ati “Esyaalo”, nae amaachi akebuusira abuundu alala yakalaanga ati, “Enyaanja”. Nasaae yaabona ati esyo syali esilai syeene. 11Haandi Nasaae yaboola ati, “Lehe esyaalo simereho ebimera, emisaala ekyaamaho eemwo, neende emisaala eky'ebyaamo ekyaamaho ebyaamo ebirimo eemwo, buli kutula neende efwaani yakwo hu syaalo.” Mani nibiba sa bityo. 12Esyaalo syameraho ebimera biindi koti, emisaala kyaamaho eemwo ohweema hu ngeri yaakyo, neende emisaala kyaamaho ebyaamo birimo eemwo buli kutula neende engeri yakwo mani Nasaae yaabona byoosi nibiri ebilai. 13Mani nibwiira haandi nibuhya, oludaalo lwohudatu.
14Haandi Nasaae yaboola ati, “Lehe obulafu bw'aakulu muukulu bukabuhanie esideete neende esiro; haandi lehe bube obulolero bweekesa obwiire neende endaalo neende emyaaka, 15haandi lehe obulafu obw'aakulu muukulu buhoseenge hu syaalo.” Mani nibiba bityo. 16Nasaae yahola obulafu buhoongo obw'amahabi kabiri, obulafu obuhiramo obuhoongo ohutukaanga esideete, nae obulafu buhiramo obudiidi ohutukaanga esiro. Haandi Nasaae n'aloonga eng'ining'ini chosi. 17Nasaae n'achita aakulu muukulu ohuhosaanga obulafu hu syaalo, 18ohutukaanga esideete neende esiro, haandi ohukabulaanga obulafu ohutula hu esiirima. Nasaae naabona ati esyo syali esilai. 19Mani nibwiira haandi nibuhya, oludaalo lwoohune.
20Haandi Nasaae yaboola ati, “Lehe amaachi kabeemo obuduhunyi bw'ebiloonge bilamu, haandi lehe amayoni kabburuheenge aakulu w'esyaalo nikahalania aakulu mu kulu.” 21Haandi Nasaae yaloonga ebisolo bihoongo byomu maachi neende buli siloonge silamu esikeenda, ebyeechula mu maachi, buli situla neende engeri yasyo, haandi yaloonga buli yoni libburuha, buli litula neende engeri yaalyo. Mani Nasaae yaabona ati esyo syali esilai sa. 22Nasaae yabiberesa ehabi n'aboola ati, “Mwiibulane mani mwemeede, mwiichuse amaachi akomu nyaanja haandi lehe amayoni keengiye hu syaalo.” 23Mani nibwiira haandi nibuhya, oludaalo lwohutaanu.
24Haandi Nasaae yaboola ati, “Lehe esyaalo sibeeho ebiloonge bilamu buli situla neende engeri yasyo: Ebyaayo neende ebiindu byaambaaka neende ebisolo byohu syaalo, buli situla neende engeri yasyo.” Mani nibiba sa bityo. 25Haandi Nasaae yaloonga ebisolo byohu syaalo buli situla neende engeri yasyo, haandi yaloonga ebyaayo buli situla neende engeri yasyo, haandi buli siindu syaafula hu loba buli situla neende engeri yasyo. Mani Nasaae yaabona ati ebyo syosi byali ebilai byeene.
26 #
1 Kor 11:7. Haandi Nasaae yaboola ati, “Lehe huloonge abaandu mu fwaani yeefwe, batufwaanane; haandi lehe babe neende obunyala bw'ohutuka eng'eeni chomu nyaanja, amayoni kabburuha, neende hu buli byaayo, neende hu syaalo syoosi, neende hu buli siindu syaambaaka syoosi esiri hu syaalo.” 27#Huc 5:1,2; Mat 19:4; Mrk 10:6. Nasaae yaloonga abaandu mu fwaani yae yeene. Mu fwaani ya Nasaae, Nasaae yaloonga abaandu; omusaacha neende omuhasi, Nasaae yabaloonga. 28Nasaae yaababeresa ehabi, n'ababoolera ati, “Mwiibulane mani mwiingiye, mwiichule esyaalo, haandi musituke. Haandi mube neende obunyala bw'ohutuka eng'eeni chomunyaanja, neende amayoni kabburuha, neende hu buli siindu silamu syoosi esikeenda hu syaalo.” 29Nasaae n'aboola ati, “Bone, mbao mbabereese buli musaala okwaamaho emwo, okuli mu syaalo syoosi, neende buli musaala okuli neende emwo mu byaamo byakwo; kuchia ohubechaanga ebyohulya byeeng'we. 30Haandi buli solo yiri hu syaalo neende buli yoni libburuha, neende buli siindu syaambaaka hu syaalo, buli siindu silamu siyeera, mbibereese ebimera ohuba ebyohulya byabyo.” Mani nisiba sityo. 31Nasaae naabona buli siindu si yali naloongere mani bone, syaaba esilai muno. Mani nibwiira haandi nibuhya, oludaalo lwohusaasaba.
©Bible Society of Kenya, 2019
©Bible Society of Uganda, 2019