JON 8
8
Yocu-yabio Nyem Ak Nootunam
1Hvbmabde Jisu Olib puutub wnum. 2Loogwn ar komc ho mwv Xumk nammwb wkurnum. Nyi tulungv mwwg ogumb haanum, hoo mwv doa banv hoo bulam tomswrnum. 3Ho tomswr bov la Parisi tulungv nyem ak yocu-yabio nyin boam nootul boalayil bulug pengko ho daqmtvl 4bulv Jisun toxnum, “Tomswr bov, soq nyem aksi Yocu-yabio nyidudvb nootu pan. 5Ngulug Mojesg Pvvb lo xeqpnamv doodwn. Soq sib nyinbo nyem mam wlw hurx dvb Pvvbv doodwn. No sija sam hog hvl bekin do?” 6Soq sam bulv Jisun yolu bigw naadwb mwwl pui pookal toxnum. Hvbmabde Jisu gubxw banv alaq lvqcwngv ked aoho xeqnum. 7Hvbmabde bulv mwam tox xudul doogam gab mwv nywrab banv bulam benum, “Nulug pengko ho hiyv lokkam nyic nyia nyima bov otuqjaqb nyem akam wlw hurcoto.” 8Ho mwv lokta gubxw banv lvqcwngv ked aoho xeqnum. 9Ho nyi tulungv ham tapel nyelo tulungv keco-keco banv akin-akin gogaqb kijurl keleqnum. Kokw so Jisu la nyem akv aro vpwb doqdunum. 10Jisu nywrabl nyem akam toxnum, “Nyem, nam mengta bo nyi tulungv hogloqho” Hiyvkam nam mengdy bo dook ma i?”
11Nyem akv birwqnum, “Tomswrbo,” Hiyvkam dook ma, hoo Jisu benum, “Hvnyiloqkam ngo nam yolu beram hvbmabde no wnku, sija galoqkv nyic nyia lokta nyitin kumabv.”
Jisu Gvda Gvt Soq Hutongv
12Jisu bulam lokta benum, “Ngo gvda gvt soq hutongv. Hiyv ngoqg kokwb wba bov kan uraho gaqkar ram, hvbmabde swwg hutongam kaapa tayin.”
13Parisi tulungv mwam benum, “No sija noqg puiyam baqsdo; noqg puiyv jvqtw ma.”
14Jisu birwqnum, “Ma, ngo atwg puiyam baqs jaqkam, ngoqg puiyv jvqtwngv ham ngo cengsdvn. Hvbmabde ngo hogloqkv haai yin ho hogloqb wdeen ham nulv cengma. 15Nulv nyia ko pw-hwwnam hvbjaq hwwdo; hvbmabde ngo hiyv nvkam pw-hwwma dvn. 16Hvbmabde ngo pw-hwwnyi loqkam ngoqg pw-hwwnamv jvqtwngv, hoggab ngo vpwb soq sam nyima dvn; ngam kanambo Abv kam ngoqg lvgab dooba dvn. 17Nulug Pvvbho sam xeqpwl apnamv doodwn, hogloqho nyi vnyi go puiyam loodwn hoqhv jvqtwngv. 18Ngo atwg puiyam baqsdvn ho ngam kanambo Abv kam ngoqg puiyam ngoqgab bedar jidwn.” 19Noqg abv hogloqho hvl bulv mwam toxnum?” Jisu birwqnum, “Nulv ngamkam ho ngoqg Abam kam cengma, Nulv ngam cengnyi loqkam ngoqg Abam kam cengs paco.”
20Jisu soq mwlw sam mwv xumk nam uraho tomswr banv, twngk pvvcumko uddum cwwrw hoqgv benum. Hoo hiyvkam mwam nootul leemanum, hoggab mwwg moodv hvvc maadanum.
Nulv Ngoqg Wkwb Wnyiram
21Jisu bulam lokta benum, “Ngo wde kun; Nulv ngam meegaq sutayin hvbmabde nulv atwg nyic nyia gab sitayin. Nulv ngo hogloqb wdeen hoqb wnyiram.” 22Ho Juhudi tulungv benum, “Mwv bedo, nulv ngoqg wkwb wnyiram. Hvnyiloqkam mwv atv mengsul sitayin yin yv?” 23Jisu bulam birwqnum, “Nulv neeko hoqgv; ngo ao toloqgv. Nulv soq gvda gvt soqgv; ngo gvda gvt soqgv ma. 24Hoqgab ngo nulam bedwn, nulv atwg nyic nyia ho sitayin, hoggab nulv ngam mwvk hvl mwwjw maabnyiloqkam nulug atwg nyic nyia ho sitayin.” 25Ho bulv mwam toxnum, “No hiyv vpjaq?” Jisu bulam birwqnum, “Ham lak ngo nulam otuq hoqgv bit bilul bekin pan. 26Nulug pagoqkam bedwb ho pw-hwwdy sv vigo dooxiq dvn, ngo hognvkv mwwg galoqkv tapa pan ham gvda gvtam bekin dvn.” 27Mwv bulam Abwg puiyam bekin subakam bulv ham tacin maanum. 28Ho Jisu bulam benum, “Nulv Nyia Ko Tuupam aoho torca xiqyam ho nulv ngam hoq ak hv kunyi hvl cengtayin, hoo ngo atv hog gokam ngoqg mwwkub nyimadvn, hvbmabde Abv hog nvkamxeq nyitak hvl tomswrnum hvbkalam ngo nyidwn. 29Ngam kanambo akv ngoqg lvgab doodwn, mwv ngam vp-cwkwb doom maadwn, hoggab ngo looxiam mwwg hang mwwlwqkob nyidwn.” 30Nyiv Jisug soq benam sam tatwl vijaqgo mwam mwwjwnum.
31Ho Jisu mwam mwwjwbo Juhudi tulungam benum, “Nulv ngoqg tomswrnam mam tagab bvnyiloqkam nulv jvqtw jaqb ngoqg buub nyitayin. 32Ho nulv jvqtwngam cengtayin, hoo jvqtwngv nulam boolin tayin.” 33Bulv mwam birwqnum, “Ngulv Abraham gv ko hosiqkv hoo ngulv hiyv gvkam nyerab lokkam swwka ma. Hvnyiloqkam no hoggub bedwn, ‘nulam tolin jitayin’?” 34Jisu bulam birwqnum, “Ngo nulam jvqtwngam bekin dvn; hiyv lajaqkam nyic nyia nyinbov mwv nyic nyiag nyerangv. 35Nyerangv namho dooky ram hvbmabde ko tuupv nwrba gob dooky tayin. 36Ko Tuupv nulam tolin baloqkam, nulv jvqtw jaqb tolin loodanam nyi hvb nyitayin. 37Ngo nulam Abraham gv ko hosiqkv ham cengdwn. Hvbsujaqkam nulv ngam mengdwb lamta meekar do, hoggab ngoqg pui benamv nulug hang uraho dook kaapa ma. 38Ngo Abwg galoqkv hognvkv xeq kaatkun ham ngo bekin dvn, hvbmabde nulv nulug ab galoqkv hoggv tatwn ham nulv nyido.” 39Bulv mwam birwqnum, “Ngulug abv Abraham.” Jisu birwqnum, “Nulv jvqtw jaqb Abraham gv ko nyiloqkam mwwg nyinam hvbkalam bon nyis paco, 40hvbmabde ngo nyiloqkam Pwnbo galoqkv gon jvqtwngam tapel nulam bekinbo akv ngo, nulv ngam hvbjaqkam mengd puqdwb meekardo. Hvbmabde Abraham hoqhvb hog gokam nyimanum. 41Nulv nulug abv hognvkv nyinum, hoq hvbkalam nyido.” Bulv mwam birwqnum, “Ngulv yocu-yabio ko ma! Ngulug Abv Pwnbo akin.” 42Jisu bulam benum, “Pwnbov jvqtw jaqb nulug nyiloqkam, nulv ngam aby sudco, hoggab ngo Pwnbo hoqgv haaiyin hoo ngo sija doodwn. Ngo atv haasma, hvbmabde mwv ngam kanam pan. 43Nulv ngoqg benam mam hoggub nyitwl tacin maadwn? Hvnyiloqkam nulv ngoqg benam puiyam tvnw maab nyigam gab sulak. 44Nulv nulug ui abwg kongv, hoo nulv nulug ab tulug mwwnam mam niqtuq nyilin dvb mwwdwn. Kol otuqjaq hoqgv mwv nyi mengbov, hoo jvqtw lvgab hog akkam nyis dooma dvn, hoggab mwv jvqtw kuru-haabo ho dooma dvn. Hwdlo mwv vm mvvikam, mwwg atwg nyij-muj hoqgv goolin dvn, hoggab mwv xaalyo bov hoo xaalyo bog abv. 45Hvbmabde ngo jvqtwngam betam ko-gab, nulv ngam mwwjw maadwn. 46Hiyv nulug pengko hoqgv ngam nyic nyia nyiv hvl bedwn? Ngo jvqtwngam bednyiloqkam hoggub nulv ngam mwwjw maadwn? 47Pwnbo galoqkv kanam akv Pwnbog agam mam tadwn. Hvbmabde nulv Pwnbog nyi maab nyigam gab tama dvn.”
Abraham gv Otuqho Ngo Doonum
48Ho Juhudi tulungv Jisun birwqnum, “Ngulv nam Samariya nyiv hoo sony cenamv hvl bel maad nvi yv?” 49Jisu birwqnum, “Ngo sony cenam ma, ngo ngoqg Abam paqdwn, hvbmabde nulv ngam paqma dvn. 50Hvbsujaqkam ngo atam yuuk dvb ma; hvbmabde mwam yuum dvb la hoo pw-hwwdy bo ak doodwn. 51Ngo jvqtw jaqb bedwn, “Hiyv lajaqkam ngoqg agam mam pvvdwn, hv sigam kaapa ram.” 52Ho Juhudi tulungv mwam benum, “Sija ngulv jvqtw jaqb nam sony cenam goknyi hvl cengpaku. Abraham kam sinkun, nyiqry benbo tulungv kam sinkun; hvbsujaqkam nulv bedwn, “Hiyv lajaqkam ngoqg agam mam pvvdwn, mwv nywywngam sigam cengka ram. 53No ngulug sikbo ab Abrahamnvn koi yaadwn? Hoo nyiqry benbo tulu ngvkam sinkun! No atam atv hiyv jaq hvl bedwn?” 54Jisu birwqnum, “Ngo atv atam paqs baloqkam, ngoqg paqsnamhv xinam ma, hvbmabde ngam xidbov ngoqg Abv ngam yuum dvn, hiyam nulv begamv, ‘Mwv ngulug Pwnbov.’ 55Nulv mwam cengka ma, hvbmabde ngo mwam cengdwn. Ngo mwam cengma hvl bebanyiloqkam, ngo nulug hvb xaalyo bob nyidwn, hvbmabde ngo mwam cengdwn hoo ngo mwwg gomcwram pvvdwn. 56Nulug ab Abraham ngoqg haadynam aalam kaapa tvl hemp-hvnyirnum; mwv ham kaapa tvl hemp al mwwpanum.” 57Ho Juhudi tulungv mwam benum, “Noqg swwnamv vnyw camng kama da, hoo Abrahamnvn kaat kunwk hvdo?” 58Jisu birwqnum, “Ngo jvqtw jaqb nulam bekin dvn, Abrahamnvn ko bwwma daqyik hoqgv ngo doodwn.” 59Bulv wlw naarab banv mwam wlwngv hurtanum, hvbmabde Jisu xumk nam hoqgv wleqnum.
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.