JON 12
12
Betaniho Jisun Kuty Paqnum
(Mt 26:6-13; Mk 14:3-9)
1Nyedarko Durumv haama daab aal looxwg otuqb Jisu Betani nampam wnum. Ho Lajarvk hvl benam nyi ak sik boam Jisu turdub mwpnumhv ho doonum. 2Ho bulv mwam dvs mwjnum. Marta dvsam joolin banv jinum, hvbmabde Lajar Jisug lvgab doobanum. 3Meeri kuty xima vrram xinam sungam albo kuty yooxaq xaqg toolin banv Jisug lvpiangam paqtwl mwnwg dumpo dumv neexaqnum. Hoqho kuty nvmtiv nam nvmpwngam buuda kvladvb sunum. 4Hvbmabde Jisug buu tulug pengko hoqgv akwn Judas Iskeriot mwam nyepin pingta bo akv benum, 5“Hog nyitwl soq kuty sam twngk lwum gob puqlayil hoo jwwgwbo nyi tulungam jimanum?” 6Soq sam benam siiloqkam mwv jwwgw nyi tulungam hang biigam gab bemanum, hvbmabde mwv dvcobo nyiib nyinum. Mwv twngk cukam baqnbob nyinum hoo mwv hoq twngk hoqgv mwwg at gab meeg mvn keenum. 7Jisu benum, “Mwnwn nyimto! Hoqham ngam svma liid aal namgob mwnwn ap mvto. 8Nulug lvgab looxiam jwwgw nyiv dootayin, hvbmabde ngo nulug lvgab looxiam dooba tama.”
Lajarasnvn Mengdwb Ywrsnam
9Jisu Betani nampamho doonam mam Juhudi nyi pvtw gon tapa tvl bulv hoq wnum, bulv Jisu aron kaatab wmanum hvbmabde mwv sik boam sinbo tulug pengko hoqgv turdub mvnam Lajaras nvkam kaatab wnum. 10Kokw so nyub buda tulungv Lajaras nvkam mengdwb ywrsnum. 11Hoggab mwwg pagoq gab Juhudi nyi tulungv bulam nyig wg boam apaqpel vigo Jisun mwwjwnum.
Jisu Jerusalemb Hemp Pol Goqr Rol Haanum
(Mt 21:1-11; Mk 11:1-11; Lk 19:28-40)
12Loogwn so nyedarko durumb haanbo nyi tulungv Jisu Jerusalemb haanam mam tapanum. 13Hoqgab bulv pvng svvn haqbam twrnyia layil wrwqtab goqr rol wnum. “Paqyalinco Pwnbo! At Swg eminho haanbo akam, Pwnbov mwam lvqc cignvka! Israelwg Lvpw atam Pwnbov lvqc cignvka!” 14Jisu svdam hvvdo ak kaapa banv hoq aoho dvrwqbo potalo xeqpwl apnam hvbkalam doonum.
15“Bos maabv, Jaiyon bopam no; kaato,
svdam ko aohv dootwl,
nulug lvpw atv hoodu do!”
16Mwwg buu tulungv soq sam otuqjaqb bed ditaqho tacin maanum; hvbmabde Jisun supu yuupwl yuuxo kokw so bulv dvrwqbo potalo xeqpwl apnam mam mwwpa xiqknum, hoo bulv ham mwam nyilaqb nyipa kunyi mwwnum.
17Jisug lvgab yvba nyiba bo nyi tulungv Jisug Lajarasnvn nyubu hoqgam sik boam goqlin banv turdkub mvnam mam kaanbo tulungv Jisu hognvkv nyinum ham bekinnum. 18Hoqgab nyi pvtwngv mwam kaatab wrwqnum. Ho bulv mwam swrdorxeqb nyinam mam nyidwk hvl benam mam tapanum. 19Ho Parisi tulungv akwn akwn bemin sunv benum, “Kaaka to, nulug nyinamv hoq niqtuq nyilin ma, gvda gvtv mwwg kokwb wde ku!”
Gwrik Nyi Tulungv Jisun Meegaqnam
20Jerusalemb durum moodho xumtab wnbo tulug pengko ho Gwrik nyi tulu ngvkam doonum. 21Bulv Pilip (Mwv Betsaida hoqgv) dookub haabnv benum, “Nyelo, ngulv Jisun kvvnwdo.” 22Pilip wbnv Adriyon betamnum, hoo vnyiv wbnv Jisun bekinnum. 23Hoo Jisu bulam birwqnum, “Nyia Ko Tuupam yuunam mam yuud moodv sija godab hvvnwq maada. 24Ngo nulam jvqtw jaqb bekin dvn, am vmcirv ked ho yoqpwl sima baloqkam hv vpwb doos dvn, hvbmabde sibaloqkam aaxiv vigo jaqt yaag lengtayin. 25Hiyv xeq atwg swwgam aby dvn hv niitayin, hoo hiyv xeq gvda gvt so atwg swwgam oyum dvn ham nwrba cwtam swwgam pvvjtayin. 26Hiyv lajaqkam ngoqgab bon nyita bov, mwv hoggub nyijaqkam ngoqg kokwb wmin gvto; hoo ngo hogloqho doodwn, ngoqg nyera tulu ngvkam hoqho dootayin. Hiyv lajaqkam ngoqgab bon nyita boam, Ab mwam xitayin.
Jisu Mwwg Sitanam mam Bekinam
27Sija ngoqg hangv mwwdwq dwqdo. Hoo ngo hog hvl betayin? “Ab, soq mood so ngam ywwtwb’? Hvbmabde hoq hentwr kaas moodam henl swwtab ngo haaiyin. 28Ab, noqg eminam yuum tvka!” Ho ao toloqgv agam yal ak dul banv benum, “Ngo mwam yuum pakun, hoo hvraqb lokta yuum tayin.”
29Ho nyi daqnyiabo pvtwngv agam mam tapa tvl benum, “Doogum go dunba!” Tuugin benum, “Ao gumtw go mwam beg nvba!” 30Jisu birwqnum, “Sija soq agam yal benam si ngoqgab ma, hvbmabde nulug gab sulak. 31Sija gvda gvtam pw-hwwd moodv haapa ku; sija soq gvda gvtwg lvpw abam ruqpaq dvb nyitayin. 32Hoo ngam swcw soqgv booca baloqkam, ngo nyi mwlwngam ngoqg dookub boatayin.” 33Soq benum si, mwv hoggub nyil sitayin ham bekinnum. 34Nyi tulungv mwam birwqnum, “Ngulv dvrwqbo potalo birwl apnam mam tapa pan Kristo ngvk hvl benam akv nwrba gob dootayin hvl bedwn, hvnyiloqkam hoggub Nyia Ko Tuupam torcal paqyin apdvb nyitayin hvl bedwn? Soq Nyia Ko Tuup aksi hiyv?” 35Jisu bulam birwqnum, “Hutongv oyu yooma go nulug pengko ho dootayin. Huto deeda so nulv hutoho yvto. Nulv kanam pulub koma dvb hutongam kaapa deeda so hutoho yvto. Hiyv kan uraho wdwn hv hogloqb wdu dvn ham mwv cengma dvn. 36Nulv hutongam kaapa deeda so hutongam mwwjw gvdwl huto nyib swwto.” Sam bexo pel Jisu bulug dook hoqgv wknv kvsil yvnum.
Juhudi Tulug Mwwjw Maanam
37Mwv nyiig nyimanam mam nyil swrdorxeqb nyisbakam nyi tulungv mwam mwwjw maanum, 38nyiqry kaanbo Aijayag benamv jvqtw jaqb niqtuq nyilin dukub nyinum:
“At Sw, ngulug pui benam mam hiyv mwwjwnum,
hoo hiyam At Sw mwwg atoram kaakinum?”
39Hoqgab bulv mwwjw maanum. Hoqgab Aijaya lokta benum,
40“Pwnbov bulug vnyiqkam nyiqca mvpa ku hoo bulug hangam mutum pakun,
hvbmab nyiloqkam bulv bulug vnyiq lvgab kaapa tai, hoo bulug hang lvgab mwwlaq tai,
hoo bulam mwp kudub
ngoqg dookub hookur tai.
41Aijayag soq benam siiloqkam mwv Jisun yuudynam mam kaapa tvl benum.
42Hvbsujaqkam Juhudi tulungam nyig wgbo nyi tulungv vijaqgo Jisun mwwjwnum, Parisi tulungv bulam Sinagog hoqgv ruqlin tai mwwnv nyiig agaho ham bepor maanum; 43hoggab bulv Pwnbog galoqkv paqnam mam nyiig paqnam mam koi yaab abynum.
Jisu Gvda Gvtam Ywwtab Haanum
44Hoo Jisu gamro alwb benv benum, “Hiyv xeq ngam mwwjw dvn mwv ngam xeq mwwjw ma, hvbmabde ngam kanambo akam kam mwwjw dvn. 45Hiyv xeq ngam kaanbov ngam kanambo akam kaapa kun. 46Ngo gvda gvt uraso huto hvb nyil haaiyin, ho ngam mwwjwbo hvdv kan uraho doodwb nyiram. 47Hiyv ngoqg agam mam tapa tvl ham tama boam mwam ngo pw-hwwram. Ngo gvda gvtam yolu pw-hwwtab haama, hvbmabde ywwtab haaiyin. 48Hiyv lajaqkam ngam xuqxa tvl ngoqg puiyam tama boam pw-hwwdy bo ak doodwn. Sija ngoqg agam benam si kolam pw-hwwtwr hwwnya aalam hwwgw naadwb nyitayin. 49Ngo atwg mwlwqkob ngo atv besma, hvbmabde ngam kanambo Abv ngo hognvkv betayin hoo gootayin ham ngam gaml jilwqpan. 50Hoo ngo cengdwn mwwg gaml agamv nwrba cwtam gob swwgam jidwn. Ngoqg begdvn si ngoqg at galoqkv ma, hvbmabde Abv ngam hog hvla xeq betak hvl benam mam ngo beyadvn.”
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.