Maʼtɛ́as 6
6
Yə́sus ayɛ́ʼkɛ́nan ndə́b a noá na nkə kɛ́ waágɛɛ́ʼkɛn na ɛsɔ́gasɔ́gá
1«Waándagɛɛlɛ oʼtom wo a yoog yaaŋ ɛ kəə́liʼtiniʼ, udinjúúnə kɛɛlɛ wólɛ́ a əngis á pɔɔd lɛ́ ná págoodála, ndóo. Omaʼkɛɛlɛ náan, odɛágɛɛn kə́mmú na pɛsáábɔ́n pɛ́ndɛ́ŋ a nó Sɛ waaŋan nyɔ́ alɛɛ́ a mɔɛn. 2Waándagɛɛ́ʼkɛn yoom na ɛsɔ́gasɔ́gá, odɛʼkó isə́ə́ wɔnɔ́ ná pɔɔd pə́mmú, moɔ́ŋɛ́ná pusú móom, ándɛ móagɛɛlanɛ a puog pó pɛɔ́sɔ́gɔ́lɔ́n, na a angag á pungə́. Pɔ́lɛ́ pálɛ əguunə lɛ́ ná pábonyáadɛ. Mɛ, ndabodɛ́anɛ na pəŋi a fɔ́lɔ́b lɛ́, póob náan pándɛ na pɛsáábɔ́n pɛɔ́bɔn. 3A pəŋi, póɛn lɛ́ nkə kɛ́ ombɔg wááŋ ó nɛnom wáagɛɛ́ʼkɛn na ɛsɔ́gasɔ́gá, wááŋ ó kɛmɛs ódɛndɛ́ŋ 4agɛɛlɛ lɛ́ mɔɔd na mɔɔd adɛʼtála wɔnɔ́ ná waáŋáan. Sɛ waaŋ nyɔ́ aálɛŋ nkə kiim kɛ́ waágɛɛlɛ ɔmbɔ́ a nuníb, alɛ́ɛ́ kogosáábɔn a nuboʼ noáŋ nóon.»
Yə́sus ayɛ́ʼkɛ́nan ndə́b a noá na pɛɔ́sɔ́gɔ́lɔ́n
(Lóʼk 11.2-4)
5«Kɛnɛŋ kɛ́ waándagɛɛlɛɛ́ pɛɔ́sɔ́gɔ́lɔ́n, odɛnyɛ́ɛ́lɛ wɔnɔ́ moɔ́ŋɛ́ná pusú móom, ndóo. Pɔ́lɛ́ pálɛanɛ lɛ́, kɛnɛŋ kɛ́ pɔ́ndɔgɔɔ́sɔ́gɔlɔnɛɛ́, páadɛ́lɛman əgín pidə́níʼtən a puog pó pɛɔ́sɔ́gɔ́lɔ́n, na a angag á pungə́#6.5 Yúdɛn yɛ́ ɛyáyɛ́ʼkɛnɛn na toɛn a pɛbán pɛ́ kəə́liʼtiniʼ yiígóodoni pɛnɛŋ pɛ́ kɛɛlɛ pɛɔ́sɔ́gɔ́lɔ́n lɛ́ olɛ ɔmbɔ́ ə́lə́ə́, kɛnɛŋ kíməʼkiig, osánɛ lɛ́ odiɛlɛnɛ. A pɛnɔ wɔnɔ́ pɛ́ɛb náan a puog pó pɛɔ́sɔ́gɔ́lɔ́n na a angag á pungə́ aa páyɛ́ɛ pɛɛlanɛ pɛ́lɛ́, əguloodi tuə́ áa pɔ́lɛ́ páálaŋ kaáyɛ́ʼkɛn a kəə́liʼtiniʼ. Tála tɛn a Lóʼk 18.10-14 lɛ́ ná páboodála. Mɛ, ndabodɛ́anɛ a fɔ́lɔ́b lɛ́, póob náan pándɛ na pɛsáábɔ́n pɛɔ́bɔn. 6Náa a wɛ, wɔɔ́ndɔgɔɔ́sɔ́gɔlɔn, sɔ́d a nɛsom nɛáŋ nɛ́ yoog a kaadɛ, wə́buəg. Ɔ́sɔ́gɔ́lɔ́nɛ́ɛ́ Sɛ waaŋ nyɔ́ alɛɛ́ kɔ áay na wɛ kɛnɔ kɛ́ wɔsɛ́ɛ́. Nyɔ́lɛ́ nyɔ́ alɛɛ́ agodɛ́ʼtɛg ɔmbɔ́ nkə kɛ́ waágɛɛlɛ a yoog kusuu a kaadɛ. Adɛndɛ́ɛ́ kəə́bəli kɔŋɛʼ koáŋ. 7Wɔɔ́ndɔgɔɔ́sɔ́gɔlɔn Táán, odɛʼtáŋ kodáŋáán wɔnɔ́ inonnón yɛ́ uʼtəən, wɔnɔ́ ná pandɛŋ Táán ándɛ páagɛɛlanɛ. Pɔ́lɛ́ pálɛ afɛga lɛ́ a nɛsɔyɔʼ nɛ́ɛn náan kuíŋ áa Táán aágoob pɛɔ́sɔ́gɔ́lɔ́n pɛɔ́bɔn. 8Ndóo, pəŋi podɛnjɛ́ɛ́lánɛ wɔnɔ́ pɔ́lɛ́ lɛ́, a pəŋi kudíin pumuŋíən, Sɛ waaŋan nyɔ́lɛ́ aáʼkolɛŋ nkə kiim kɛ́ kɛmábosógɛn.»
Tuə́ áa pɛ́ʼkɛnɛɛ́ pɛɔ́sɔ́gɔ́lɔ́n na Sɛ wəəs nyɔ́ alɛɛ́ a mɔɛn
(Lóʼk 11.2-4)
9«Poɔ́ndɔgɔɔ́sɔ́gɔlɔn, púsəə poɔʼkɔ́:
“Sɛ wəəs nyɔ́ alɛɛ́ a mɔɛn,
ɛɛlɛ lɛ́ ungim álɛŋ ánɛ aa olɛɛ́,
10Nɛlaamɛʼ nɛáŋ níim,
ungim a nsí yɛ́ɛlɛ nɛnyɔ́ŋɛn nɛáŋ
wɔnɔ́ ná nɛ́lɛɛ́ agaáyɛ́ɛlɛ a mɔɛn.
11Ɛ́bɛyɛ́ʼkɛn moom mó konɛ mó moásɛʼtan na pəsi a wɔɔ́s ó naánɛ́,
12Íbilísin a nsɛ́ɛ́dɛ́ yɛ́ tɛágosɛ́ɛdanɛ wɛ,
wɔnɔ́ ná pəsi tɛlɛɛ́ əgulisin tɛn pá pálɛɛ́ agɛbɛsɛ́ɛdanɛ pəsi.
13Udiyíbiidí lɛ́ tídə́əŋ a pɛásɔ́sɛ́n,
ɛ́bɛyááŋɛn a kisindiʼ kɛ́ Sáʼtan”.#6.13 A pagálaʼtaʼ pə́mmú pá kalaʼ pá píídílə na ombɔg, kuyibənən kó pɛɔ́sɔ́gɔ́lɔ́n pɛ́ɛnɛ kólɛ lɛ́: «Nɛlaamɛʼ, toɛn, nugəm, pɛbán pɛ́ɛb piim pɛób na wɛ a pɛnɛŋ piim. Aamɛn.»
14«Kɛ́lɛ lɛ́, pəŋi puməʼkulisin pɔsɔ́g kɔbɛ́ kó pálɛɛ́ agoboyɛ́ɛlanɛ, Sɛ waaŋan nyɔ́ alɛɛ́ a mɔɛn alɛ́ɛ́ kubuúlisin tɛn pəŋi mabɛ́ má poámoyɛ́ɛlanɛ. 15Náa, pəŋi pundisinin pɔsɔ́g mɔ́ɔ́bɔn mabɛ́, Sɛ waaŋan tɛn adɛndɛ́ɛ́ kubuúlisin pəŋi mááŋan.»
Yə́sus ayɛ́ʼkɛ́nan ndə́b a noá na kugumin ə́simə́
16«Puməʼkugumin ə́simə́, podɛnjáág nnyam a udi suiííŋ, wɔnɔ́ ná moɔ́ŋɛ́ná pusú móonɛ móagɛɛlanɛ. Pɔ́lɛ́ pálɛ lɛ́, ná pə́əgumin ə́simə́, nti yɔɔbɔn ɛ́ság kɔyɛb lɛ́ ná ungim álɛŋ lɛ́ pálɛ a ə́simə́. A fɔ́lɔ́b, mɛ ndabodɛ́anɛ na pəŋi lɛ́, póob náan pɔ́ʼkɔɔŋ pɛsáábɔ́n pɛɔ́bɔn. 17Náa wɛ, uməʼkugumin ə́simə́, ásɔ́gɛ́ɛ́ udi wááŋ, ómóaŋ. Áwásɛ́ɛ́ oʼto 18agɛɛlɛ lɛ́ pádɛndɛ́ŋ lɛ́ olɛ a ə́simə́. Əgín wɔʼkɔ́ Sɛ waaŋ nyɔ́ alɛɛ́ na wɛ ɔmbɔ́ kɔ́gɔ́ɔg a nɛɔs nɛáŋ. Nyɔ́lɛ́ nyɔ́ aálɛŋ yiim yɛ́ waágɛɛlɛ ɔmbɔ́ a nuníb, alɛ́ɛ́ kooyɛ́ʼkɛn pɛsáábɔ́n pɛáŋ.»
Yə́sus ayɛ́ʼkɛ́nan ndə́b a noá na kaágɔnyan tugúm
(Lóʼk 12.33-34)
19«Podɛnjágónyánánɛ́ɛ tugúm a nsí yɛ́ɛnɛ yɛ́ ɛlɛɛ́ lɛ́, nɛnɛ́ nɛ́lɛ kɔ, nɛ́aman konɛ, kɛsamasámán kɛ́lɛ kɔ, piíbən páabáŋa mbuús əgiíbə. 20Poágonyan agá tugúm a mɔɛn. Kɛnɔ kɛ́ ɔmbɔ́ nɛnɛ́, ɔmbɔ́ kɛsamasámán kɛ́dɛ́agɛɛlɛɛ́ yoom. Kɛnɔ kɛ́ piíbən pádɛábáŋɛ́ɛ́ umbuús əgiíbə, 21lɛ́ kɛnɔ kɛ́ tugúm toáŋ tólɛɛ́, kɔ tɛn aa ɔʼtɛ́m wááŋ ólɛɛ́.»
Niis nɛ́lɛ piʼtíləʼ a nkó ɛ mɔɔd
(Lóʼk 11.34-36)
22«Niis nɛ́lɛ ɛláam a nkó ɛ mɔɔd. Náa, kɛnɛŋ kɛ́ əngis yááŋ álɛɛ́ aŋŋɛʼ, nkó yaaŋ tɛn ngim ɛlɛ a kɛmoámoáŋ. 23Náa, kɛnɛŋ kɛ́ waándabányɛ́ɛ́ a əngis, nkó yaaŋ tɛn ngim yaagɛɛn a mbin. Ná kisəə kɛ́ kɛ́lɛɛ́ na wɛ kíəgəə́súʼkin, wɛ ungim wagɛɛn a mbin mmɔɛ́d ɛ pilíb.»
Na Táán na mɔɔnɛ́, iiyid ímuʼ
(Lóʼk 16.13)
24«Mɔɔd na mɔɔd ɔdɛɔ́gɔ ugugudin pəsə́dúg pábaan. Əgín lɛ́ aabɛnɛn úmmuʼ, áanyɔ́ŋɛn nyummú, ɔmbɔ́ lɛ́ aagoóbɛn úmmuʼ, áasɛ́ɛdɛ nyummú. Podɛɔ́gɔ págɛɛlɛ lɛ́, wɛ ogo úmmuʼ wəə́gudin Táán, wəə́gudin tɛn mɔɔnɛ́.»
Podɛnjɛ́ɛ́n na ɛságág a ɔʼtɛ́m
(Lóʼk 12.22-31)
25Kólɛ́ aa ndábodɛ́anɛ nyɔʼkɔ́: Podɛndáŋ kaáságɛmɛla a noá na nkə kɛ́ poánɛ, ɔmbɔ́ lɛ́ na nkə kɛ́ puə́gəə́níig. Kɛ́lɛ lɛ́, ɔlaa ómááyɛn moom mó konɛ. Nkó yəəs ɛmááyɛn pilə́ə́. 26Pódála na pɛsag ə́! Pɛ́dɛ́agóna, pɛ́mbáŋa. Píʼkóodi pɛságɛʼ pɛ́ pɛ́agɛɛ́ngɛgan moom moɔ́bɔn kɔ. Kɔmɔɛ́d lɛ́ Sɛ waaŋan nyɔ́ alɛɛ́ a mɔɛn alɛ agoboomɛ́nɛ. Kásɛ́g anɛ́ɛ́n na pəŋi pá pomááyɛn pɛsag ə́? 27Ánɛ úmmuʼ a ondáŋ wááŋan aa alɛɛ́ ogɛɛlɛ lɛ́ mədúg mə́ə́ŋ máyáábɛg a ɔlaa lɛ́ alɛ agaáságɛma ə́?
28«A igə tɛn aa polɛɛ́ agaáságɛma a noá na pilə́ə́ pɛ́ puə́gəə́níig əə́? Táláan pafɛláwaʼ wɔnɔ́ ná pálɛɛ́ a kidun ə́. Táláan wɔnɔ́ ná pálɛɛ́ agoyam. Pə́díəgud, pádɛ́anog pilə́ə́. 29Náa ndábodɛ́anɛ lɛ́ ɔmbɔ́ əgín Salomɔ́ɔŋ na tugúm tuim tó yiígóodi#6.29 Kɛ́lɛ náan a kálaʼtaʼ ɛ 1Puʼk 10 , adɛʼkɛ́ɛ na kilə́ə́ kɛ́ kɛ́ɛ́dɛ́ɛ́ əgiig wɔnɔ́ fɛláwaʼ mmuʼ! 30Mbɛ́n yɛ́ a kidun yɛ́ ɛlɛɛ́ lɛ́ nɛ́gɔŋ ɛlɛ kɔ, na koany ná páág a yug, Táán aálɛŋ yɛ́lɛ́ náan əə, pɛnɛŋ pɛ́sɛ́g anɛ́ɛ́n na pəŋi ə́! Kəə́liʼtiniʼ koáŋan kúligi kudom ə́y! 31Podɛnjáságɛ́mɛ́láá anɛ́ɛ́n a noá ná nkə kɛ́ poánɛ, nkə kɛ́ poáŋo, ɔmbɔ́ lɛ́ nkə kɛ́ puə́gəə́níig. 32Pandɛŋ Táán áa ándɛ pɔ́ʼtɔm kuunə mólɛ́. Náa, a pəŋi, Sɛ waaŋan nyɔ́ alɛɛ́ a mɔɛn aálɛŋ lɛ́ polɛ njaan na moom móom muim. 33Kɛ́ na oʼto na oʼto, Uunə́ən Nɛlaamɛʼ nɛ́ Táán, poágɛɛlɛ nkə kɛ́ alɛɛ́ anyɔ́ŋɛn. Nyɔ́lɛ́ aabosáayɛnɛ pɛ́ʼkáanɛ pɛ́ndɛ́ŋ piim. 34Podɛnjáságɛ́mɛ́láá poɔʼkɔ́, ná koany koándagaáyɛnɛɛ́ əə, tuə́ áa kóagɛɛn əə́? Ndóo. Nkə kɛ́ kɛ́agaáyɛ́ɛlɛ a koany kaáyɛnɛ kɛ́lɛ kɛ́ wɔɔ́s wóow. Ɛ́nɛ́ wɔɔ́s na yəəŋ ntɔ́b.»
© Wycliffe Bible Translators Inc, 2015