San Mateo 3
3
Tzamgopu'ŋoyu Juan Bautista
(Mr. 1.1-8; Lc. 3.1-9,15-17; Jn. 1.19-28)
1Nu'cu'ca aŋsʌŋ, minu Juan Bautista. Minu chamgopu'ŋoyu ja'itʌnʌmʌmʌy. 2Y nʌmba inʌc: Quipswitu'tamʌ, porque jʌ'nʌ'a maŋba 'yaŋgui'moyu te' tzajpojmopʌ Dios. 3Yʌ' Juaŋde' chamupʌ te' tza'maŋwa'opyawʌ Isaiajsis, nʌmu'c:
Wejqui'mu'c nʌmu tumʌ te' pʌn ja'itʌnʌmʌmʌy:
Nimejcʌytyamʌ ndzocoy tʌ Ngomicotoya jujcha' pʌ'nista'm ñimejcʌyajpa tuŋ.
Wʌtzʌcjaytyamʌ te' wyiyuŋ-duŋ te' maŋba minumʌy.
4Y yamba inʌc Jua'ŋis te' pyama camello-pʌcpʌ, y nacapʌ checwatcuy. Y te' quiu'tcuy awute' inʌc y yumij tzinuj. 5Pijche'c te' Jerusale'ŋojmota'mbʌ, y mumu te' Judea-najsojmota'mbʌ, y te'šejtijque' mumu te' Jordaŋ-nʌ'is 'yacapoyo'mota'mbʌ tzu'cumyajpa inʌc wa'y myaŋyaju ijtumʌy Juan. 6Y yajnʌ'yʌyajpa inʌc ñe'cʌ's te' Jordaŋ-nʌ'ojmo quiowʌ'aŋjamyaju'cande' quiowa.
7Y quienu Jua'ŋis que nu'quiajpa inʌc wʌwʌ te' fariseota'm y saduceota'm wa'y ñe'cʌ's yajnʌ'yʌyaju, y ñʌjayaju: Njyoco'istotzanšejta'm mij. ¿Iwʌ'sayʌ' ñchamjaytyamu wa'mis mboyjaytyamu te' co'aŋgʌquiuy Diojsismij maŋba nyajnʌco'aŋgʌytyamupʌ? 8Yajquejtamʌ jeque mista'm ndzʌquipit que nʌmij ŋguipswitu'tamu. 9Y uy nʌcʌpo'tame wa'mij ñʌmdamu ndzoco'yojmo: Abrahaŋde' tʌs ndataj, porque ʌsmij ndzamjaytyamba que Diojsis muspa yajqueju uneta'm Abrahaŋgotoya ñempe yʌ' tza'pitta'm. 10Y te'ya ijtu mejwinbujtupʌ hacha. Jujche'ŋ cuy ja'n chʌquipʌ's oyepʌ tyʌm, tyʌŋyajpa y quiojtyajpa jucʌtʌjcojmo. 11Wiyuŋšej nʌ'ʌsmij nyajnʌ'yʌytyamu nʌ'pit wa'mij ŋguipswitu'tamu. Pero ʌs ucaŋgʌ'mʌc nʌ minu más mʌja'ŋbʌ que ja'n ʌj. Y myasa'najcupyit ja'n pyʌqui ni wa'yʌs nʌmaŋjayu wyacasnaca. Ñe'cʌ'smij maŋba nyajnʌ'yʌytyamu Espíritu Santopit wa'y pya'jayu mista'm ndzocoy. 12Quiʌ'ojmo ñʌ'ijtu te' trigo-cosu'oquiuy yajcowajpapʌpit ñe' yojsaŋ. Maŋba yajtu'mʌyu te' trigo ñe' troja'ojmo y maŋba pyoŋbʌ'jayu te' šo'c ja'n tyu'ipʌ jucʌtʌjcojmo.
Nʌ'yʌyu Jesucristo
(Mr. 1.9-11; Lc. 3.21-22)
13Pijche'ca minu te' Jesús Galilea-najsojmoc y nu'cu ijtumʌy Juan te' Jordaŋ-nʌ'ojmo wa'y yajnʌ'yʌyu te' Jua'ŋis. 14Pero Jua'ŋis jašunʌ yajnʌ'yʌ, y ñʌjayu: Ʌj misʌjte' inʌc pyʌcpa nyajnʌ'yʌyu, ¿y misʌj wa'y ŋgʌ'minu? 15Pijche'ca Jesujsis 'yaŋdzoŋu: Yajnʌ'yʌ'ʌj. Yʌ'šej pyʌcpa wa'ytyʌ ndzʌcta'nu chamušej Diojsis. Pijche'ca yajnʌ'yʌyu Jua'ŋis. 16Y nʌ'yʌyu'ctij te' Jesús, qui'mbujtu te' nʌ'ojmo, y aŋwaju te' tzap y quienu te' Diojsis 'Yespiritu nʌ wyanajcu'c jujcha' wiyuŋšejpʌ paloma, y nu'cu ñe'cʌcʌsi. 17Pijche'ca minu tzajpojmocpʌ otowe, nʌmupʌ: Yʌ'wʌ te' ʌs Une sunbapʌ'ʌs, y yajtzocopyacpapʌ'sʌj.
Nuevo Testamento en Zoque Copainalá © Sociedad Bíblica de México, A.C. 1967.