METHIU 9
9
Apangnem Thimiita Amthrat
(Mak 2:1–12; Luk 5:17–26)
1 #
Mak 2:1–12; Luk 5:17–26 Jisu in muli inkhat ah chuunga tuiiboom avanche amah khuuboomma thlengsa. 2#Met 9:22; Mak 6:50; 10:49; Jon 16:33; Noon 23:11; Luk 7:48Che anve, anmah in apangnem thi mii inkhat, tuklaia matolh a anthlen; anmah in amilotta Jisu in amuhkhan apangnem thimiita Jisu in ason, “Kisakupa, niril malumro; nang nilehkha ki ip peiche.” 3Cheva anve, ringjih lulok arouin anmahseeng seengta insonsei, “Mahmii kupa in Ringpu ta usitnoh a trongsa.” 4Chuta Jisu in anmah anrilta aromma asonei, “Jarelna nanrilsuunga thranoh namidonme? 5Alamva ‘Nang nileh ki ip peiche,’ nohle ‘Inthoua sehro’ ta sonni jaknangin aklaime? 6Chuta miivaa Asa kupa in thaleichunga aleh ip achekna tuui amtik nanromnatu — apangnem thimiita Jisu in ason, ‘Inthouro, nantolhnakha choia ni inna inlengrosa.’ ” 7Cheva amah in anthohche a inna inlengsa. 8Mahchuta miitamin anmuh inva, intrisei, mahche Ringpu ta paar amithratpei.
Methiu ta Aong
(Mak 2:13–17; Luk 5:27–32)
9 #
Mak 2:13–17; Luk 5:27–32; 15:1–2; 7:34 Jisu in mah chunnata seh a, Methiu an ong mii khat in roi thraina phrangki thlaamma inbok a am amuhpei; che Jisu in amahta ason, “Keijuihro.” Chunna amah in inthoua aknuta ajuihpei.
10 #
Luk 15:1,2 Mahchunna Jisu in Methiu inna buh asaaknatu anboklai, anve, roithrai mii eisoh che aleh am mii jikcha in thlenga Jisu aroisoh inbokjousei. 11Chunna Pharisi in mahchuta anmuhlai, amah aroikuunga anson, “Jarelna nannih lulok in roithrai mii eisoh che ale am mii jikchaeisoh buh asaakjoume?” 12Chuta Jisu in mahchuta atheih a, anmahta asonei, “Aknanoh mii turel doktar darkaarnoh, chuta akna mii turelva darkaar. 13#Met 12:7; 1 Tim 1:15Mah artha i jangasonname seh a romve, ‘Keiin rilvolta kikdit, inkat pootta dinoh ang.’ Alamva keiin akchimlamseh miita ak ong thlengnoh ang, chuta alehchel miita ak ong thlengang.”
Buhel Rella Anruina
(Mak 2:18–22; Luk 5:33–39)
14 #
Mak 2:18–22; Luk 5:33–39; 18:12 Chunna John aroi in amahkuunga thlenga anson, “Kannih leh Pharisi in buh injomma kanhel, chuta nang niroiva jarelna buh helnoh eime?” 15Chunna Jisu in ankuunga asonei, “Changrisoh inruuijoua an amsootvah changri aruul in lah ajame? Chuta anmah ankuungnata changri alohnatu akni thlengumang, mahlai buh anhel umang. 16Tunangkhat inkho amlui puunta akthar puunkirra rouphohnoh ei, alamva anphohna khata dokleva anthritnakha thloia inlonga inthrittu. 17Chunohle mii in akthar tuiibuhta amlui savunthongah suunga anlousihme; chuleva tuiibuh sihna savun thongkha koia tuiibuh inleitu, che savunthong khakho maang; chuta anmah in akthar tuiibuhvah savunthong akthar a ansih che annih a thra veitu.”
Rungaaksa Khatta Amring Mahche Kumei khatta Amthrat
(Mak 5:21–43; Luk 8:40–56)
18 #
Mak 5:21–43; Luk 8:40–56 #
Met 8:2; 15:25; 18:26; 20:20; Jon 9:38 Mahtrong ita Jisu in ankuunga sonna amsuunga, anve, rampuui inkhat in amaikuungah thlenga ason, “Kisakumei pekkhanna thisa; chuta nangin thlenga atakchunga nikut sihroba, che amah in ringtu.” 19Chunna Jisu in inthloua amahta ajuihpei, che aroi inkho amahta anjuihpei. 20#Met 14:36; Mak 3:10Cheva anve, kum somleinih thii luunga am kumei khat in amah aknua thlenga Jisu apuunpaarta apalpei; 21alamva “Keiin apuun paarruta pal angle, thrakhem tung,” ta arilsuunga amdon. 22#Mak 10:52; Luk 7:50; 17:19; Met 15:28; 9:29Jisu in inheia kumei khata amuh in akuunga ason, “Rungaak o, niril malumro; nangin namlot kharella nangta namthratpei.” Cheva kak hanga kumeikha thrakhemsa. 23Che Jisu in rampuui a inna athlengin, pasi aktumleh miitam inlomma dir dirta am amuh ei, 24amah in ason, “Amahta chaive; alamva amah kumei i thinoh chuta inning.” Chunna anmah in Jisu ta aminuihpei. 25Chuta miitam inlomta apaalla amithruhche, amah in asuunga luut a kumeisa kutta amtuh, cheva kumeisakha inthousa. 26Cheva mah aksuukha mah khanna am ramsiin apumtea seh a antongpei.
Jisu in Mitcho Innihta Amthratei
27 #
Met 20:29–34
Jisu in mah chunnata asehlai, mitcho innnih in ong onga aknujuih a antih, “Devit vaa Asa kupa, kannihta niril kanimvolro!” 28Chunna Jisu in innsuungah aluutlai, mitcho in akuungah thlengsei, che Jisu in asonei, “Keiin nannihta kimthrat uchouta namilotme?” Anmah in Jisu kuunga anson, “Oi Jisu.” 29Chunna Jisu in anmitta palla asonei, “Nannih in namilot nujuih a nankuunga tlung veiso.” 30Chunna anmit inhoongsei che Jisu in ankuunga mathrit a asonei, “Anve, tukhat kuungkho mah i tongnohve.” 31Chuta anmah in ohkhannata anthrushoh ram apumtea mahkhata sonna Jisu ta amithangpei.
Trong Suuknohta Jisu in Amsuuk
32 #
Luk 11:14–15; Met 12:22–24; Mak 3:22; Jon 7:20 Anmah in anseh laia anve, khousaar in asuur trongtheihnoh miikhatta Jisu kuung anthlen. 33Che khousaar chuta Jisu in amnom invah, trong theinoh mii in atrong suuksa; cheva miitamin salungkhou seia antihpei, “Israel suunga oinang muhnoh mangme.” 34#Met 10:25; 12:24; Mak 3:22; Luk 11:15Chuta Pharisi invah, “Khousaar akpuui kurung apaalla amah in khousaarta amnomchekning,” tih a anson.
Jisu in Mii rilvol suuk
35 #
Met 4:23; Mak 1:39; 6:6; Luk 4:44 Che Jisu in khuuboom naamte mahche khuu khuua seh a, anmah sinakok ah amtheih ei, kurung huunnavaa akthra trongta araan, che natna rii jikcha khatkho akcheknoh mii jikcha amthratei. 36#Met 14:14; 15:32; Mak 6:34Amah in miitamta amuh in, anmahta arilvol hangsei, alamva akseel amnoh sadam nanga anmah in inthek invorhtlamsei. 37#Luk 10:2; Jon 4:35Chunna aroita asonei, “Saang invaat tuphuva khalmo tam amsa, chuta akvaattu miivah steru ningsei; 38alamchunna amah asa ang luhna ah thloutlohtu mii amthlahnatu saangluh Akpu kuungah nannih in ngenve.”
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.