METHIU 7
7
Aktleita Pichaar Tloh
(Luk 6:37–38,41–42)
1 #
Luk 6:37–38; Mak 4:24; Rom 2:1; 14:10 “Nannihta pichaar nanitlohnoh natu, miita pichaar tlohnohve. 2#Mak 4:24Alamva nannih in pichaar nantloh khananga nannihkho nanitlohtu, che nannih in nan olna chaang akhanna nannihta inlengah nanioltu. 3#Luk 6:41–42Che nang nimit ah thinglip amva madonnoh chea, chuta jarelna niuhnao mit ah thinglip inniimta nianme? 4Nang nimit ah thinglip ammangche khatloh a niuhnao mitna thinglip anniimta loutang nitihme? 5Akthra veisin miieio! Matsah a nang nimitna thinglipkha loumanro, che niuhnao mitna thinglip iniimkha nilohnatu seenga nimuhtu.
6“Akseeng pootta uiiting malannohve chunohle ra–aopiita vok kuungah loonnohve ankeh a chuunna ankhoihtu che inheia invuivia nanithreltu.”
Nih, Jon, Beeng
(Luk 11:9–13)
7 #
Luk 11:9–13; Mak 11:24; Jon 15:7; 16:23–24; Jem 4:3; 1 Jon 3:22; 5:14 “Nihve, nanimlantu, jonve nanimtuuktu, che sunve nanimhoongtu. 8Alamva, aknih mii in anphah, akjon miikhan antuuk, che inkhaar akbeengmii khata amhoongtu. 9Nankaara tunangkhat in asa kupa in tol anihta lung amlan ume? 10Chunohle naoin nga anihta muruul amlan ume? 11Mahchunanga akthranoh apavei choulakho naoningvah akthra kutthol malanta romchoule ringramma am nanpa in aknimii kuunga jikcha ralthloia akthra pootchei nanimlan ume: 12#Luk 6:31Churella nannih in miita nankuunga namitlohja khananga nannih inkho mii kuungah tlohve, alamva mah i Moses trongsuur khatkho ringraan antrong khasa.”
Ansiik Laam
(Luk 13:24)
13 #
Luk 13:23–24; Jon 14:6; 10:7 “Ansiik kolon khanna luutve, alamva anrol kolol che anja lam khavah maangna vei, che mahchunna akluutmii tammei. 14Alamva ansiik kolon khatkho sehna ansiik lam khava ringna vei, che mii steta luut uningei.”
Thing Mahche Akrah
(Luk 6:43–44)
15 #
Met 24:11,24; 1 Jon 4:1; Jon 10:12 “Chimnoh ringraan eita jih a anve apaalla sadam puunreita silh a nankuunga thlengei. Chuta anrilsuungvah aktraam uiiramuiisei. 16#Luk 6:43–44; Met 12:33–35; 3:10; Jem 3:12; Luk 13:7Anmah akrah ah nanromtu, mii in kulingrui nata nganglirah che kuling thingnata thotthing akrah nanritme? 17Mahchunanga akthra thingin akrah thra inrah. Chuta akthranoh thingin akrah thranoh inrah. 18Akthra thingkhat in thranoh akrah inrahnoh, chunohle akthranoh thingin akrah thra inrahnoh. 19#Met 3:10; Luk 3:9Akrah thra inrahnoh thing anaamte phuura meikaara tanna alon. 20#Met 12:33Churella nannih in akrahnata nanromtu.”
Nannihta Naniromnoh ang
(Luk 13:25–27)
21 #
Luk 6:46
“Keininga ‘Akpu, Akpu’ keiong mii naamte in ringram kurung huunna ah luutnoh uchou, chuta ringramma am kipa in amdon aktloh miiruin luut uning. 22#Luk 13:26–27; Met 25:12Mahni chunna mii aktam in keining antihtu, ‘Akpu, Akpu, nang nikminga trong akphoong, nang nikminga khousaar amnom che nang nikminga salungkhouna thlou jikcha aktloh miinoh sungme?’ 23Mahlai chunna keiin indanglonga kison uchou, tlohphunoh aktloh eio, keimah vesa, keiin naniromnoh luungang!”
Aksing Khatkho Kmong Inntloh
(Luk 6:47–49)
24 #
Luk 6:47–49; Jem 1:22–25 “Churella tunangkhat in kisonita arungeihche aktloh khavah aksing mii nanga lungpii chungah inntloh khasa. 25Che khusuur thliraang thlenga raanna innchunga marat a tuii liinsa, chuta innvah puurnoh alamva innkha lungpii chungah amngirh. 26Pekva tungangkhat in kisonita arungeihche aktlohnoh khavah kmongmii nanga philchunga inn aktloh khasa. 27Che khusuur thliraang athlengin raanna innchunga marat a tuii liinsa, chunna innkha puursa, mahche tlikkirra inriilsa.”
Jisu vah Akchek Amneh
28 #
Mak 1:22; Luk 4:32; Met 11:1; 13:53; 19:1; 26:1 Chunna Jisu in anaamte i asonche arungai miita amtheihna trongkhanna anmah in salungkhousei. 29Alamva amah in ringjih lulokei nangnoh a akchek amneh mii khat veia anmahata amtheih ei.
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.