MARK 13
13
Tempul Siat Ding Leh Huntawp Thu
(Matt. 22.23-33; Lk. 20.27-40)
1Huan Pathian biakin a kipan a paikhiak lai in, a nungzuite lak a mi khat in a kiang ah, “Sinsakpa, en dih, suang leh inn a thupi mahmah hi” a chi hi. 2Jesu’n, a kiang ah, “Hiai inn thupitak na mu maw? Hihchip louh a, suang kichiang hiai ah a omkei ding” a chi hi.
Buaina Leh Sawinate
(Matt. 24.3-14; Lk. 21.7-19)
3Huan Olive tang a Pathian biakin zawn a a tutlai in, Peter, Jakob, Johan leh Andru te’n a kiang ah, 4“Huaite chikchiang in a hongom dia? Huai tengteng a tun ding chiang in chiamtehna bang a om dia, honhilh in” chi in a simdot uhi.
5Jesu’n a kiang uah, “Kuamah in honkhem louhna ding in, pilvang un. 6Mi tampi, Khrist ka hi, chi in, keimah min lou in a hongpai ding uh, mi tampi a khempuk ding uhi. 7Huan kidou thu leh kidou thuthang na zak hun chiang un mangbang kei un; huaite hongtung ding him ahi uh. Himahleh tawpna zaw ahi nai tadih kei ding. 8Nam tuam leh nam tuam a kidou ding ua, gam tuam leh gam tuam a kidou ding ua; mun tuamtuam ah zin a ling dia; kial a ke ding hi. Hiaite nauvei kipatna ahi.
Sawisakna Thuphuan
9“Himahleh pilvang un; vaihawmmite a hon mansak ding ua; kikhopnain ah a hon vaw ding ua; keimah ziak in gamukte leh kumpipate ma ah theihpihna pe ding in na ding ding uhi. 10Huan Tanchinhoih nam tengteng kiang a hilh masak ding ahi. 11Huan a honpi ua, a hon matsak hun chiang un, bang ka gen dia chi in, ngaihtuah khawl kei un; a huntak a theihsaka na om peuh uh, huai ngeingei genzaw un; a genpen zaw noumau hilou in Kha Siangthou ahizaw ding hi. 12Huan hihlup ding in unaupa leh unaupa a kimansak ding ua, pa in a tapa a mansak ding; tate’n leng a nu leh pate uh a dou ding uh, a thatsak ding uhi. 13Keimah min ziak in mi tengteng huat na hi ding uh; himahleh a tawppha a thuakpa, huai mi hotdam in a om ding hi.
Mangbangpa Kihhuai
(Matt. 24.15-28; Lk. 21.20-24)
14“Himahleh zawlnei Daniel in a gen bang a hihmangbangpa kihhuai a dinlouhna ding ading na muh chiang un, a sim peuh in a omdan thei hen, huai hun chiang in Judia gam a omte tang sang ah taimang uhen; 15inn tung a om kum kei hen; a insung a thil lakhe ding in lutsam kei hen. 16Huan lou a om a puansilh la ding in kiknawn kei hen. 17Huaini in gaite leh naunou pomte tung a gik ding hi. 18Huaite phalbi a a hong tunlouhna ding in thum un. 19Huai nite bang a gimthuakna thupi Pathian bawl leilung piantung a kipan tutan in a om ngei naikei a, chikmah chiang in a om ngei nawn kei ding hi. 20Huan Toupa’n huai nite hihtom kei leh mihing damin a suakta kei ding; himahleh, teltuamte ziak in nite a hih tom hi.
21“Huai hun chiang in, kuapeuh in na kiang ua, En dih uh; Khrist hiai ah a om, ahihkeileh En dih uh: huai ah hiam a chih chiang un gingta kei un; 22Khrist takloute leh zawlnei takloute hongpawt ding ahi ngal ua, huaite’n chiamtehna leh thillamdang a hih ding uh, hithei ngial leh teltuamte nangawn a khem theihna ding un. 23Nou zaw pilvang un, ngai dih uh, bangkim k’on hilh khol khinta ahi.
Mihing Tapa Hongpaina
(Matt. 24.29-31; Lk. 21.25-28)
24“Himahleh huai nite zoh in, huai gimthuakna khit in, ni hihmial in a om ding a, kha a vak nawn kei ding hi. 25Van a kipan aksite a hong ke ding ua, van a thilhihtheihna omte hihlin in a om ding uhi. 26Huai hun chiang in Mihing Tapa, thilhihtheihna leh thupina lianpi toh mei lak a hongpai a mu ding uhi. 27Huai hun chiang in angelte a sawlkhe dia, a telte lei ningli apat leitawp a kipan a vantawp pha in a pikhawm ding uhi.
Theipi Kung Gentehna
(Matt. 24.32-35; Lk. 21.29-33)
28“Huchi in theipi kung ah gentehna zil un: a hiang a hong nou a, a nah a hongsel in nipi a nai chih na thei uhi. 29Huchi mah bang in, nou leng huaite hongtung na muh chiang un, amah a hongnaita a, kongkhak bul mahmah ah a om chih, thei un. 30Chihtaktak in k’on hilh ahi, huai tengteng a tunkim masiah tulai khang a mang kei ding hi. 31Lei leh van a mang dia, ka thu ahihleh a mang kei ding hi.
A Hun Kuama’n Theilou
(Matt. 24.36-44)
32“Himahleh huai ni leh dak Pa kia lou ngal kuamah in, van a angelte’n leng Tapa in leng a theikei uhi. 33Pilvang unla, kiging gige in thum un; a hun theilou na hi ngal ua. 34Mi a in paisan a, a sikhate thu neisak a, a nasep ding uh pe chiat a, kongkhak veng leng kigin ding thu pe phot a, gamdang a vatam bang ahi. 35Huaiziak in kiging gige in om un, inn neipa hongpai ding hun, nitaklam in hia, zan in hia, ak khuan in hia, zing in hia chih na thei ngal kei ua; 36Huchilou in zaw, hongpai guih kha leh ihmu in a honmu kha ding. 37Huan na kiang ua ka gen mi tengteng kiang a ka gen ahi, Kiging gige in om un” a chi hi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.