MARK 11
11
Jesu Jerusalem a Lutna
(Matt. 21.1-11; Lk. 19.28-40; Jn. 12.12-19)
1Huchi in Jerusalem khua tung ding a a kisak ua, Olive tang a Bethphage leh Bethani khaw kiang a tun un, a nungzuite lak a mi nih a sawl a, a kiang uah, 2“Na mazawn ua, khua ah vahoh unla; na luttung un sabiltung nou kikhih, kuamah tuan ngeilouhna, na mu ding ua; phel unla, honkai un. 3Huan kuapeuh in, huai bangdia hih a honchih uleh, Toupa’n a deih ahi; hiai ah a hon koihsak nawnpah ding, na chi ding uh” a chi hi.
4Huan a hohta ua, kongzing ah kongkhak pawlam a sabiltung nou kikhih a vamu ua; huai a phelta uhi. 5Huai ading kuate hiam in, a kiang uah, “Sabiltung nou bangdia phel?” a chi uhi.
6Amau Jesu gen bangtak in a kiang uah a gen ua; huchi in a phalta uhi. 7Huan sabiltung nou Jesu kiang ah a honkai ua, a tung ah a puante uh a phah ua; a tung ah a tuangta hi. 8Mi tampi in lampi ah a puan uh a phah ua; midang in leng gam a sawlnah sat in a phah uhi. 9A malam a paite leh a nunglam a honzuite’n,
“Hosanna! Toupa min a hongpai a hampha!
10Gam hongtung ding, i Pa
David gam a hampha!
Tungnungpen ah Hosanna!” chi in a kikou uhi.
11Huan Jerusalem khua a Pathian biakin ah a valut a; bangkim a et velvel khit in nitaklam leng a hong hita a, a pawt a, sawmlehnihte toh Bethani ah a hohta uhi.
Theipi Kung Hut
(Matt. 21.18-19)
12A zing in Bethani a kipan a pawtnungin a gil a hong kialta hi. 13Theipi kung nahnei gamlapi ah a mu a, a gah ka muh khak leh, chi in a vazuan hi; a vatun in a nah kia loungal bangmah a mu kei a; theipi gah hun ahi kei him hi. 14Huchi in Jesu’n sing a houpih a, “Tuban tangtawn in nang apat kuamah in gah ne nawnta kei hen” a chi hi. A nungzuite’n huai a za uhi.
Jerusalem Tempul Hihsiangna
(Matt. 21.12-17; Lk. 19.45-48; Jn. 2.13-22)
15Huan Jerusalem khua a tung ua, Pathian biakin ah a valut a, biakin a zuakmite leh leimite a delhkhia a, dangka khengmite dohkante leh vakhu zuakmite tutphah a sawnpuk sak hi. 16Pathian biakin a mite’n van a lut paisuak pih uh a phalta kei hi. 17Huan a kiang uah, “Ka inn namchih ading in thumna inn a chi ding uh, chih gelh ahi ka hia? Nou suamhatte khuk in nabawl ua” chi in, a hilhta hi.
18Siampu liante leh laigelhmite’n huai a za ua, amah hih manthat theihna ding a zongta uhi; mipi tengteng in a thuhilh lamdang a sak ziak un amah a lau uhi. 19Huan nitaklam a hong hih in khopi a kipan a pawtkhia uhi.
Theipi Kung Apan Sinlai
(Matt. 21.20-22)
20Huan zingsang a a paikawm un huai theipi kung a zung tan pha a vuaikhin in a muta uhi. 21Huchi in Peter in theikhia in a kiang ah, “Heutupa, en dih: theipi kung hamsiat na loh a na vuaikhin vekta” a chi hi.
22Jesu’n a kiang uah, “Pathian gingta un. 23Chihtaktak in k’on hilh ahi, kuapeuh in, hiai tang kiang ah, na kisuan inla, tuipi ah na kipailut in chi a, a lungtang a ginglel lou a a gen a tung ngeingei ding chih gingta peuhmah in a gen bangbang a mu ding uhi. 24Huaiziak in k’on hilh ahi, bangkim thum a na nget peuhmah uh musa in kiging unla huchi in na mu ding uhi. 25Thum a na din peuhmah chiang un kua tung ah leng thubuai banghiam na neih uleh ngaidam un; na Pa uh van a om in leng na tatlekna uh a hon ngaihdam theihna ding in. 26Himahleh na ngaihdam kei uleh, na Pa uh van a om in na tatleknate uh a hon ngaidam sam kei ding” chi in, a dawng hi.
Jesu Thuneihna Ginlelhna
(Matt. 21.23-27; Lk. 20.1-8)
27Huan Jerusalem khua a tungnawn ua; Pathian biakin a a vaklai in siampu liante, laigelhmite leh upate a kiang ah a hongpai uhi, 28A kiang ah, “Kua thu in ahia hiai thilte na hih? Hiai thilte hih ding in kuan ahia nang thu honpia?” a chi uhi.
29Jesu’n a kiang uah, “Ken leng thu kam khat k’on dong sam ding, hon dawng le uchin, huchi in kua thu in ahia hiai thil ka hih chih k’on hilh ding” a chi hi. 30“Johan Baptisma van a kipan hia; mihing a kipan? Hon dawng un” a chi hi.
31Huan a kingaihtuah ua, “Van a kipan chi lehang, Bang a chia a thu gingtalou na hi ua, a honchi dia; 32Himahleh mihing a kipan chi leng mipi a kihta ua; mi tengteng in Johan zawlnei taktak in a bawl chiat uhi.” 33Huchi in, Jesu a dawng ua, “Theikei ung” a chi uhi. Jesu’n a kiang uah, “Ken leng kua thu in ahia hiai thilte ka hih, k’on hilh sam kei ding” a chi hi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.