Luka 23
23
Yesu alongwa masa ha Pilato.
1-25.
1Wazainuka wosheni haṅwe, wazamwiγala kwa Pilato, 2wazaandiila kumfyalima angwe: Uyu tizamwona, akitunya wantu wa mbali yetu, akiwalemeza, washemunke Kaiza kodi, akiγamba: Imi ṅwenye Kilisito ni Zumbe. 3Pilato azamwuza angwe: Iwe u zumbe ywa Wayuda? Azamwitikila angwe: Uzalonga. 4Miya Pilato azawalonga wavikizi wakulu na wantu we haja angwe: Uyu muntu siona masa yakwe. 5Miya waja wazalongesha angwe: Atunya wantu akifuza mwe shi ngima ya Wayuda; aandiile Galileya, mpaka akiiza na kunu. 6Pilato akiviiva azauza, ati ni muntu ywa Galileya.
Yesu ha Helode.
7Akitaila, kuti aanduka mwe uzumbe wa Helode, azamtuma kwa Helode, yohena mishi ija a Yelusalemu. 8Helode akimwona Yesu azatamilishiγwa; hambu mishi mingi azakunda kumwona kwa viya, aivilevyo mbuli zakwe, kangi azaalila kuona lwitangilo, lukiγosholwa ndiye. 9Azamwuza mbuli nyingi, miya yuja nkamlandule hata ṅwenga. 10Miya wavikizi wakulu na watabaluwangwa waiγoloke haho, wakihima kumfyalima. 11Helode na ntimizi zakwe wazamubela, wazamfyulila na kumzwika shuke yeṅalisha, vikibinda azamtuma vituhu kwa Pilato. 12Helode na Pilato uja mushi wazaivana na kushoγana; mishi izinkileyo ne wakiikilana nkulu.
Yesu alahiγwa ha Pilato.
13Pilato azaitanga wavikizi wakulu na wafuṅwa na wantu, waliγanile, 14azawati: Mzaniletela uyu muntu, kuti azatunya wantu, kangi mzaona, mzaiva, nikimlaha, miya viya, muvyomfyalima, imi siviene, kuti uyu muntu azavibana; 15Helode yohena nkaviene. Hambu azamwuza na kwetu, hambu nkakima viγosholwevyo ndiye vyeagiza, akikoṅwa. 16Lushe nitamluta, vikibinda nimshungule. 17Hambu ne aina msimo wa kuwashungwila muntu muṅwe mishi ya uja mviko mkulu.
Balaba.
18Miya wantu woshe wazakema na kanwa kiṅwe: Mwushe uyu, utishungwile Balaba! 19Yuja agezilwe mwe chumba kwa mbuli ya kugwisha kiva muja kaya na kukoma wantu. 20Pilato azawalonga vituhu, hambu azakunda kumshungula Yesu. 21Miya waja wazamkemela angwe: Mkontele mwe muti! Mkontele mwe muti! 22Azawalonga ka ntatu: Uyu abanilei? Siene, kuti azaγoshola vyeagiza, akikoṅwa; nenimtowe, nimshungule! 23Miya wazaisiiza kumupisha na kutula vuzo jingi wakimhembeleza, yuja akontelwe mwe muti, mikemele yawe na ya wavikizi wakulu izaisiiza.
Yesu ainkilwa.
24Ne Pilato ahoitikila viya, wavyokunda, vibontoke. 25Yuja agezilweye mwe chumba kwa mbuli ya kiva na kukoma wantu, ndiye wakimlombeza, azamshungula, miya Yesu azamwinkila, wamγoshwele, wavyokunda.
Yesu alililwa.
26Wakimwiγala, Simoni, muntu ywa Kilene, alawa nkoi, wazamwinuza muti wa kukomelwa, aumwinwile Yesu, amtongele. 27Wantu wangi muno kabisa wazatongela, hata wavyele wetowa vifuwa na kumlilila. 28Yesu azawahitukila, azawati: Wandele wa Yelusalemu, mshenililile imil Kilililei wenye na wana wenyu! 29Hambu mishi yaiza, ndiho wantu nezewalonge: We nyemi ni waγumba na waja washivyelewo wana na waja washionkezewo na matombo yawe. 30Ne ndiho waandiile kulonga milima: Tigwelei! Hata vituli newavilonge: Tiγubikei! 31Hambu muti mwishi ukiγoshwelwa ivyoho, uja mkazu utazatendwa zeze? 32Hata watuhu waili wahambanyi wazaiγalwa, wakoṅwe haṅwe naye.
Yesu akontelwa mwe muti, afa.
33-49.
33Wakibula haja hantu heitangwa He mazutwi wazamkontela haja mwe muti, hata waja wahambanyi muṅwe kulume, muṅwe kumosho kwakwe. 34Yesu azalonga: Tate, uwaushilize! Hambu nkawataila wavyoγoshola. Wazapangilana shuke zakwe na kuzitowela lusolo. 35Wantu wazaγoloka wakiolela; miya waja wafuṅwa wazamfyulila angwe: Watuhu azawahonya; neakihonye ṅwenye, ati ndiye Kilisito ywa Mulungu ashaγulweye! 36Washilikali wohe wazamvuluγila, wazamubasha, wazamwiγaila mazi ya nyongo, 37angwe: Ati u zumbe ywa Wayuda, kihonye! 38Haja ulanga hazagondwa Kigiliki na Kiloma na Kiebuleyo masa yakwe kuγamba: Uyu ni zumbe ywa Wayuda. 39Waja wahambanyi waholeziγwewo haṅwe naye muṅwe azamkanka angwe: Kumbe iwe u Kilisito? Kihonye! Hata ishwi tihonye! 40Ṅwiyae azamlandula na kumshunda angwe: Iwenawe nkumwogoha Mulungu, kangi mlaho uinkiγwewo ni wuwo? 41Kangi ishwi watitala, hambu titahokela vyeagiza viya, tiγosholevyo, miya uyu nkana abanilevyo. 42Vikibinda azamγamba: Yesu, nifukila, ndiho uingile mwe uzumbe wako! 43Angwe: Kweli nakuti: Lelo u haṅwe na imi mwe Paladiso. 44Vikibula saa mtandatu, kuzagwa lwiza mwe shi ngima mpaka saa kenda, kwa kuti zuwa jizaleka kuaka; 45hata jiya shuke kulu muno ja zuγaila haṅazi ṅwenye muja vikiloi jizatatuka gati. 46Yesu azakema na kanwa kikulu angwe: Tate, nainkila mpeho zangu mwe mikono yako. Akibinda kulonga ivyoho azadwika moyo. 47Yuja mγolokezi ywa washilikali akiona viya vibontokevyo, azamtogola Mulungu angwe: Kweli uyu muntu ne ai mtanda. 48Hata wantu woshe waungananewo haja wakiolela, wakiona viya vibontokevyo, wazatowa vifuwa, wazaγotoka. 49Woshe wamtailewo wazaγoloka hale wakiolela, hata waja wavyele wamtongelewo, akilawa Galileya.
Yesu azikwa.
50-56.
50Ne kwina mγoshi, zina jakwe ndiye Yosefu, ni mfuṅwa, kangi ni muntu mtana na mtanda. 51Uyu nkaivane na weyae mitongonyezeze na miγoshwele yawe; ni ywa muzi wa Yudeya weitangwa Alimatiya, kangi yohe azaafiza uzumbe wa Mulungu. 52Uyu azahita kwa Pilato, azamlombeza kimba cha Yesu. 53Azachisheleza, azachikanta shuke yeṅala, azachiika mwe mbila ibongiγweyo mwe kungu, mushizatimo mwikwe muntu. 54Uja mushi ni wa kuliγanya Pasa kangi mushi wa sabato uzaandiila. 55Waja wavyele waizilewo haṅwe naye, akilawa Galileya, wazatongela na kuja, wazaolela iyo mbila, kangi kimba chakwe chiikiγwevyo. 56Wakibinda wazauya, wazamaliγanya miti yehumpuntika vitana na mafutilo ya mluziluzi; miya mushi wa sabato wazatongomala kaya kwa kitigo chawe.
New Testament in Kishambala © Bible Society of Tanzania, 2005.