Yohana 2
2
Nteγuzi ya Kana.
1Mushi wa ntatu kuna nteγuzi uko Kana ya Galileya, hata nine ja Yesu a haho. 2Yesu yohena na wahina wakwe wazalalikwa kwe iyo nteγuzi. 3Mvinyo ukishoweka, Yesu azaγangwa ni nine: Nkawana mvinyo. 4Yesu azamlandula: Mlala, nina mbuli ani na iwe? Hambu hangu nkahazati habule. 5Yuja azalonga wafunguwo angwe: Ndivyo amilonge, viγosholei! 6Haja ne haina viγa mtandatu vya mawe, viikiγwe kwa vitigo vya Wayuda vya kukihaka, kila kiγa chiingila nange mbili ao ntatu. 7Yesu azawati Ivi viγa vimemezei mazi! 8Wazavimemeza mpaka ulanga. Azawati: Tekai lushe, mumwiγaile mzuγa mviγa! Wazaiγala. 9Yuja mzuγa mviγa azadomela yaja mazi yaγalamushiγweyo mvinyo, miya nkataile, ukoanduka, waja wafunguwo du watekilewo wazataila; yuja mzuγa mviγa azamwitanga ṅwenye nteγuzi, 10azamuti: Kila muntu aandiila kuinkila mvinyo mtana, wantu wakizatengela, ainkila ushitamawo vyedi; miya iwe uzaika mvinyo mtana mpaka ivi lushe. 11Ichi ni chandilo cha ntangilo, Yesu aγosholecho kuja Kana ya Galileya na kuonyesha, utana wakwe ulivyo; wahina wakwe wazamtozesha. 12Vikibinda azasheela Kapelinaumu, ṅwenye na nine na wanduγuze na wahina wakwe, wazaikala kuja, miya so mishi mingi.
Yesu aγulusha wachuluzi mwe vikilongwa.
13Pasa ya Wayuda ikibula hehi, Yesu azakwela Yelusalemu. 14Muja mwe vikilongwa azaona wetaγa ṅombe na ngoto na visuwa manga, hata weγuzanya feza na senti waiikale haho. 15Azaγuwa ngole, azaziluka mkambala, azawaγulusha woshe muja mwe vikilongwa haṅwe na ngoto na ṅombe zawe, senti za waja weγuzanya azazikupula, meza zawe azazifununkula; 16waja wetaγa visuwa manga azawati: Viushei aha! Nyumba ya Tate msheiγalushe nyumba ya uchuluzi! 17Wahina wakwe wazafukila, kuti kuigondiγwe: Maya yanija kwa mbuli ya nyumba yako. 18Wayuda wazamlandula angwe: Utionyesha lwitangilo ani, kuti waviγoshola? 19Yesu azawahitula, azawati: Chakulai iji vikilongwa! Nenijizenge mishi mitatu! 20Wayuda wazamlandula angwe: Iji vikilongwa jizengiγwe mavuli milongo mine na mtandatu, iwe ujizenge mishi mitatu? 21Miya yuja alongile mbuli ya vikilongwa ja ṅwili wakwe. 22Akibinda kufufuka kwa wafilewo, wahina wakwe wazakumbuka, kuti azalonga inu mbuli, wazatozesha ugondengwa na iyo mbuli, Yesu alongileyo. 23Akiikala Yelusalemu mishi ya mviko wa Pasa, wangi wazatozesha zina jakwe wakiona ziya ntangilo, azoγoshola. 24Miya Yesu ṅwenye nkaalile, kuti wamtozesha, kwa kuti aiwataile woshe; 25hambu nkaagiziγwe ni kulongwa uwona kwa mbuli ya muntu, hambu ṅwenye aitaile vye mwe moyo wa muntu.
New Testament in Kishambala © Bible Society of Tanzania, 2005.