KANTHOUNA 3
3
Tlaipang Thimini Malhimnara Dakur
1 #
Kre 12.9; 20.2. Heirou Um Dunpuei ramhangrei sheemthutkur chiwi rapbei hangra frulnidui roushing lhangaimak. Heirou ani napuiya heiwinung shun, “Tanghakpa Dunpune ‘naya yekulrei heengtrung kantangrei hei rapya tekkhi chamaklo toubi shunkhouko?’ ” 2Heirouri napuiya heiwini frulnung loukyun, “Yekul rillei pukbi klei heengtrung nam'rouwei hei rapri kani cha kya; 3heiya yekul heiyei tlailamhakrei pukbi klei heengtrung heiyei ngamrou Dunpune shunkhou: ‘Nane heiyei heiri chanungei yamakrou, heirou nani heiwaya palkhi yamakrou; nimanungri na hirou,’ toubi Dunpune shunpikhou.” 4#2 Co 11.3. Heirou frul heini napuiya heiwinung shun, “Tanghakni nari kouniroukhi himakrou. 5Ngamri Dunpune kmu touri nani heengtrung heiyei hei heiya hek chaloukur tlainirouri naiyei mit-mai warwurbi, heirou nakhi Dunpu'nakrim hoirouwa; heitoubi lhangai-lhangaimak toukhi mumanirouwa.” 6Heirouri napuiya heiwini heengtrung heiya thinarou hei heiri chanungei lhangai heirou mit'thrilnarakhi pilkna, heitoubi chalanungri roushingkhi leinaroume toubi muwurnarouri maduwura; heisi tounarouri ani hei heiya labini chalouheila; heitoubi ani aiyei shalwanungkhi malanpibi, yasirekpani chaloukur. 7Heirouri yakhunta'rekne hei chaloukur hillouri yaiyei mit-mai waarrura, heirouri yasi heiri phirul yaomakleime touri ningmuwurla. Heitounei ngammei yarukhnine khyudhei na thruimaryombi phirul khoini yaiyei sharungya khupkhalkur.
8Heirou rawai yendaiyei kheenrouri Um Dunpune yekulra karwaichanei houya yakhuntani loumayekkur, heirouri Adamle aiyei nuni Um Dunpuei maibong'rouwei yekul rillei heengyao hangra loutrukyulkur. 9Heiya Um Dunpune Adamya ungbini kyun, “Nangya koura leileiyo?” 10Heirou ani loumallang, “Keine yekul rilla Neiyei houya loumayeknarouri chitekwurbi loutrukyulkurme, ngamri keiri kouphirulkhi yaomakme.” 11Heirou Ane shun, “Nangri kouphirulkhi yaomakme touri huni kyun? Keine chamaklo toubi shunkhoukur heengtrungrei heiya chaloukurko?” 12Heirou napawa heini loumallang, “Keikou leimalnanungei Neiyei pikur napuiya heiwini keinungei heengtrungei heiya pinarouri, keinekhi chaloukurme.” 13#2 Co 11.3. Heirouri Um Dunpune napuiya heiwinung shun, “Nei toukur heiwaya kouwo?” Heirouri napuiya heiwini loumallang, “Frulni keiya mandalpiwurnarou keinekhi chaloukurme.” 14#Kre 12.9; 20.2. Heirouri Um Dunpune frulnung shun, “Nangni mandalpiwurnei ngamrou, neiyari manchowurla; Ui-waarap namyakhi heirou ramrei yoolim-yaalim namyakhi duini, marhilnanungei makni klah-mrimni neiyei ukni tulchabini, neiyei chaan khatrek rahui marupbini nangri ringlaka. 15Heitoubi Keine nangle napuiya nakhuntayei tlakra karhourilyerrouwa; heirou neiyei yu-cha raple, aiyei yu-cha rapbei tlakra karhourillouwa, heirou ani neiluya mnuichaallou, heitoubi nangni aiyei hokhungra chikrou.” 16Heirou Dunpune napuiyanung shun, “Keine neiyari naopuknei manshan kna duilhakyerrou; heirou chanao pukyeinungkhi lhawai klahni katduiyerrou; heirou neishalya maduni ningkardonyerrou; heitoubi ani neidoura pu khoini paallou.” 17#Heb 6.8. Heitoubi Adamnung Ane shun, “Nangni nei nuwei kyunya chanthungnei ngamrou, Keine chamaklo toubi shunkhou hei heiwaya chalouheila; ‘Heineri neiyei ngamrou thlei awaya manchowurla; ngamri neiyari thleirei sheemthutkur, heineri nangni neiyei chaan khatrek thlei awaya klah-mrimni churbi-paangbini chamailaka.’ 18Tlaipangpal thleidoura thru trungle louh trungni bil thimni pukthutrouwa; heirou nangni heengna-ramnaya thatcha-thatmaibi ringlaka. 19Nangni thleira kallengbongyen, neiyei machalla thlan dani chur-paangnei klah manya nangni chamailaka; kouweiyo toulanungri neiyari thleirei louthut, ngamri nangri rahui, heineri nangri thleira kallengthurou da.” 20Heirou Adam'ne aiyei nuyei min Eve toubi thulpikur, ngamri a heiri tlaipang khring thimi namyerwaei yenyouna pui. 21Heirou Um Dunpune Adamle aiyei nuwinungei yao-unyei shamb marshikpikur, heitoubi yakhuntanungei hupbaangpikur.
22 #
Kre 2.7; 22.2,14,19. Heitoubi Um Dunpune shun, “Thilak, napawa heikhi Kanakrimura, lhangaikhi heirou lhangaimakhi muwura; heirou asinungri, ani aihut malamthutbi, khring chaanyei heengtrung heirouwei hei lachabi klui naimakni ringlakasu.” 23Heitounei ngammei Um Dunpune aya Eden yekul'rouwei hulthutloukur, heitoubi aya loubi sheemthutna thleiya chorbini pangcha-paangmaiyerkur. 24Heirou Dunpune napawa heiya hulthutdurbi, heirou Eden yekulrei kulkung lhangra Ane Cherubimya meithlanyei shonkhyang lip-lip alni shinyerbi, hil-maibong kallekchani, khringchaan heengtrungei lamra mayungaakyerkur.
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.