Shītwa sha Batūng'wa 10
10
Malaika na Kolinelio
1Walīho ngosha ūmò mu Kaisalia witanagwa Kolinelio, ntaale wa bashilikale igana; w'ibita litanagwa lya Italia. 2Ū munhū ng'wenūyo walī ntūngīlīja, nī kaya yakwe ī yose, hangī walī ang'ogohile Mulungu; nīyo walī ng'wiza ng'holò no ū kū banhū, na wanombaga Mulungu gwa gwa gwa. 3Lwise lūmò makanza gītī ga sa kenda ya līīmi, ū munhū ng'wenūyo ūmona malaika hape hape mu koolechiwa. Akingīla ū mu ng'wakwe; ūshika ūng'witana, “Kolinelio.” 4Ū Kolinelio ūnkalalīla kūnū ogohaga; wanoga nose ūhaya, “Ni ginehe Seeba!” Ūng'wīla gīkī, “Ū kūlomba kwako nū wiza ng'holò wako shanukūlilwe#10:4 Shanukūlilwe: Nūūlū, shalinhile. kwigūlya, kūbiza shizūkījo kūlī Mulungu. 5Ali lūūlū, ī haha tūmaga banhū baje Yopa, bakang'witane alīko koi Simoni akitanagwa Petelo. 6Alendile ha ng'wa Simoni nkomi wa makūnza, numba yakwe īlī hihī na nyanza!” 7Aho wīnga ū malaika ūyo wayombaga nang'hwe, ū Kolinelio ūbitana babīlī ba batūmami ba ha ng'wakwe, na nshilikale ūmò, ūyo walī ng'wishigwa mu kūlamya, ūmò wa bashilikale abo bikalaga hamò nang'hwe gwa, kūlwa kūntūmamīla. 8A banhū benabo ūbasomboolela pyī ī mihayo yenīyo, hūna ūbatūma ī Yopa.
Petelo koolekejiwa na Moyo Ng'wela
9Ū kū ntondo yaho aho balīja, bahayūgwegeela ū nzengo, ū Petelo nang'hwe ūsangwa walinha kwigūlya ya numba mu makanza ga kūlomba, gīkī akalombe kwenūko; yalī gītī sa itandatū. 10Alīyo īkī walī watuuba, wandya kwiganika mhayo gwa shilīwa, gwike baalī bataalī būzugīja; wahayimanīla wahweelwa. 11Hūna ūbona ī ligūlū lyakundūka, na shikolo sha kūbiza gītī nguto gwa ng'wenda ntaale gūlichiwa ha sī, gūdimīlilwe kū mhembeelo jago ine. 12Ū mu gatī jalīmo shiinū ja būlī mbika, ja magūlū ane, nī ja kwigwesa ha sī, na noni ja kūlala ja būlī mbika. 13Lyūng'wizīīla n'ilaka līlīhaya gīkī, “Petelo, būūkaga ūsīnze ūlye.” 14Nang'hwe ū Petelo ūhaya, “Yaya Seeba; ū nene nataalī kūlya shikolo sha sagala nūūlū shisoso.” 15Ī lilaka lyūng'wizīīla hangī lūkangala lwa kabīlī līlīhaya, “Īsho wamalaga kūsheeja Mulungu, ūtashihayage ū bebe gīkī shilī shisoso.” 16Ū mhayo gwenūyo gūshokeelwa ng'hangala idatū, hūna haho na haho ī shiseme shenīsho shūdutwa kūlinhyiwa ng'wigūlū.
17Ū Petelo aho ataalī akwibūja būjaga a makūlū ga mhayo ūyo akagūbona gwenūyo, a banhū abo baalī batūng'wa kūfuma kū ng'wa Kolinelio kwiza kwīkooba ī numba ya ng'wa Simoni, būshika bīmīīla ha mita. 18Būbūja ūlū alīho hoi Simoni ūyo akitanagwa Petelo. 19Ū wei ū Petelo akasangwa ataalī alīgwideedeng'hanya ū mhayo gwenūyo, hūna ū Moyo ūng'wīla gīkī, “Balīho banhū badatū balīkūkooba. 20Būūkaga wike ūje hoi ūkababone, ūtizūsusanya nguno nabatūmile nene.” 21Wika ng'hana ū Petelo ūja aho baalī a banhū benabo; ūshikīla kūbabūja gīkī, “Angū mmho mulīnikooba nene, mulī na mhayo kī?” 22Nabo būng'wīla, “Kolinelio wawīlilwe na malaika ng'wela, gīkī akwitane ūje kū ng'wakwe ūkansomboolele mihayo milebe īyo ūlī nayo. Ū wei nshilikale, munhū ntūngīlīja na wa logohano kūlī Mulungu; nī lihanga lya Bayudaya līkankaanīlaga gīko.” 23Hūna ūbeegeleja bingīla mu kaya, ūlenda nabo.
Būsombooji bo ng'wa Kolinelio
A ha ntondo yaho ūbūūka ūja nabo, hamò na badūgū bangī ba kūfuma Yopa. 24Būūkashika ī Kaisalia kū ntondo yaho hangī. Ū Kolinelio olī abalindīīlile, nīyo olī olaalīka na badūgū bakwe, hamò na banwani biye. 25Ū Petelo aho alingīla, ū Kolinelio ūng'wanukūla, kūnū alīngwīla mu magūlū gīkī anamye. 26Alīyo ū Petelo ūngūngūmūla ūng'wīla, “Būūkaga; nū nene nalī munhū dūhū gītī bebe.” 27Aho wamala ū kūyomba nang'hwe, wingīla ū mu kaya ūsanga balīmo moi bingī bibilingaga. 28Ūbawīla, “A bing'we mumanile gīkī ītazunīlīgije ū munhū ū Nyudaya kwisangīja na banhū ba mahanga gangī, nūūlū kūbageniha; alīyo ū nene wanilemegije ū Mulungu natizūng'witana munhū nūūlū ūmò gīkī wa sagala nūūlū nsoso. 29H'ī nguno yene aho nawīlwa natahalalīlile, niza dūhū; nose lūūlū ī haha nalībūja, hīmba ng'wanitanīlaga mhayo kī?” 30Ū Kolinelio ūhaya gīkī, “Jabītaga shikū ine, naalī mu ng'wane ng'wenūmu nalombaga makanza gītī genaya ga sa kenda, kūhayimanīla munhū wīmīīla kū būtongi bone, azwalile myenda yape. 31Ūhaya, ‘Kolinelio, ū kūlomba kwako kwigwiwe, na a manong'ho gako gizūkīlilwe ū kūlī Mulungu. 32Ali lūūlū, tūmaga banhū baje Yopa, bakang'witane Simoni, lina līngī Petelo; alīho alendile ha kaya ya ng'wa Simoni nkomi wa makūnza, īlī haho na nyanza.’ 33Na ng'hana haho na haho nūtūma banhū kwiza ū kūlī bebe, wabeeja no ū kwiza. Nīyo lūūlū, a bise tūlīho aha, pye a bose tūlī kū būtongi bo ng'wa Mulungu, twalindaga kwigwa dūhū īyo ūlagīlilwe kūfuma kūlī Seeba.”
Būsombooji bo ng'wa Petelo
34Hūna ū Petelo wandya ū kūbasomboolela alīhaya gīkī, “Gashinaga ng'hana ū Mulungu atī na būsolanhya, 35alīyo pyī ū mu mahanga akanukūlaga būlī munhū ūlū ūbiza ntūngīlīja. 36Ū gwenūyū hū mhayo ūyo akabatūmīla Baisilaeli, ūbenhela būlomeeji bo mhayo gwa mhola mu nzīla ya ng'wa Yesu Kilisito, ūyo alī Seeba wa bose. 37A bing'we mugūmanile ū mhayo ūyo gūkilonga mu Būyudaya, gūsambaala hose pye ū mu sī yenīyo kwandīja Galilaya, aho bobīta ū būbatīīja ūbo Yohana wabūlomeelaga. 38Ū Mulungu walī ang'witīīlile Moyo Ng'wela na būdūla ū Yesu wa Nazaleti, ūyo wajaga hose hose akūbeejaga yawiza na kūbapīja pye abo balī mu būhedekwa bo ng'wa Shetani, īkī ū Mulungu walī hamò nang'hwe. 39A bise tūlī bakaanīji bayo pyī īyo wabeejaga ū mu sī ya Bayudaya nī Yelusalemu; ū munhū ng'wenūyo bakamūlaga bo kūnungeleja ha līntī. 40Alīyo ū Mulungu unhimbula ha lūshikū lwa kadatū lwaho, ūng'oolecha hape; 41gwike ītī kū banhū bose, alīyo kū bakaanīji dūhū, abo Mulungu abasolile. H'a bise abo twalyaga na kūng'wa hamò nang'hwe ū mu shikū ja gīkī wajūūkile kūfuma mu bafu. 42A bise hū bene abo akatūlagīla kūja tūlībalomeela a banhū, na kūfunya būkaanīji gīkī ū ng'wenūyū hūna ng'wene ūyo ahelilwe na Mulungu kūbiza Namuji wa bapanga na a bafu. 43Hū ng'wene ūyo bankaanīlile pye a bahangi, hama hū ng'wene ūyo būlekejiwa bo shibi shose būdūgije kwanukūlwa mu nzīla ya lina lyakwe.”
Moyo Ng'wela kū banhū ba mahanga
44Ū Petelo aho ataalī wīsomboola ī yenīyo, ū Moyo Ng'wela ūbikīīla pye abo bakagwigwa ū mhayo. 45A Bayudaya#10:45 Bayudaya: Shiyunani, Basaalilwe. Ū mu shandīkwa būlī hene aho balīhayiwa basaalilwe, nūūlū ba nhūngwa ja kūsaalwa, numho balīhayiwa Bayudaya. abo baalī biza nū Petelo būkumya, nguno na a banhū ba mahanga bakitīīlwa ū Moyo Ng'wela ūyo alī shakwinhwa. 46Būbigwa balīyomba mu ndīmi jingī, hamò na kūnkumīlīja Mulungu. Hūna ū Petelo ūhaya gīkī, 47“Nani ūyo adūgije kūlemeja minzī batizūbatīījiwa a banhū aba, alīyo nabo bang'wanukūla ū Moyo Ng'wela gīt'ūmo bise tūkang'wanukūlīla?” 48Ūlagīla babatīījiwe mu lina lya ng'wa Yesu Kilisito. Hūna būnomba ikale hamò nabo ikanza lya shikū būlebe.
Sukuma Bible © Bible Society of Tanzania, 2019.