Genesis 8
8
Ulem Entellra
1Agayutem cakaanritaa Noah, angyarpagmetellgutai-llu; anuqengevkaraa nunam qainga meq-llu entengluni. 2Camaken ulvelriit taq'ut, qilagmi-llu ikirtellret patuluteng, ellalluk-llu arulaircecimaluni. 3Meq-llu enqu'rtuq arulaiqsaunani erenret yuinaat malrunelgen qulnek cipluku (150). 4Iralut malrunelgatni, ernengqerluku akimiaq malrugnek cipluku angyarpak nunallituq Ararat-am ingriinun. 5Meq aciqsigiinartuq, iralut-llu qulngunritariit ayagnian kangrit ingrit alairluteng.
6Erenret-llu yuinaak malruk kinguagni Noah-m ikirtaa angyarpiim egalra, 7tengevkariluni-llu tulukarugmek. Tauna tengaurtuq angitaarluni nunam kinernatkaanun. 8Cali anevkariuq allamek yaqulegmek nunatangucia paqnakluku, 9tau͡gaam mer'em cali nuna patumiiku misvigkailami utertuq angyarpagmun; Noah-m-llu teguluku. 10Ernerni malrunlegni uitarraarluni tauna yaqulek utertelleq ataam anevkaraa. 11Atakuan tauna utertuq keggmiarluni olive-aam napam cuyaanek; tua-i Noah nallunrirtuq nunatangucianek. 12Cali erenret malrunelgen kinguatni ayagcetenqigtaa yaqulek. Tayima-llu utertevkenani.
13Noah allrakungluni tiissitsaam avga, yuinaat talliman ataucimek cipluku (601), iralum ciuqliim ayagnillrani, nuna meriutuq; Noah-m-llu angyarpak qilairaa tangerrluku-llu meriutellinilria. 14Iralum-llu aipaani, ernengqerluku yuinaq malrugnek cipluku (22), nuna kinraa.
15Agayutem-llu Noah qanrutaa, 16“Yuuci angyarpagmek elpet, nulian, qetunraten-llu nulirtuumarmeng. 17Tamalkuita anuski ungungssit mikellriit angelriit, yaqulget-llu, irniluteng amllerinaurtut nunam qaingani.” 18Tua-i Noah, nulirra, qetunrai, qetunrain-llu nulirrit an'ut angyarpagmek. 19Tamarmeng-llu ungungssit mikellriit angelriit, yaqulget-llu an'ut ayuqellriit quyungqaaqluteng.
Noah Elliiluni Ekuagiuq
20Tua-llu Noah ekuavigmek piliuq. Atauciuqaqluki ungungssinek yaqulegnek-llu menuilngurnek tegutuq, ekuagiluni-llu cikiutekluki Agayutmun. 21Atanrem-llu narngamiu aruviim tepii ilukegciuq umyuarteqluni-llu, “Aniqlaanqiggngaitaqa nuna yuk pitekluku. Yuk assiilngurmek umyuangqelaan ayagyuallerminek ayagluni. Unguvalriit-llu tamalkuita piunrinqiggngaitanka tuaten pillrucimtun. 22Nuna piullrani taqngaituq nauceciineq quyurcineq-llu wall'u nengla kiiq-llu, kiak uksuq-llu, erneq unuk-llu.”
Yupik Bible © 2012 American Bible Society. All rights reserved.