Genesis 2
2
1Qilak nuna-llu qaqituk, tamaanelnguut-llu tamarmeng. 2Erenret malrunelgatni Agayutem caliani qaqicimariamiki arulairtuq caliaminek. 3Agayutem-llu erneq tauna caliaminek arulaillni atawaqercetaa allakarluku-llu ernerni piunrurrluku. Tua-i-wa Agayutem tuani ernermi qaqicamiki piliaqellni. 4Waten waniwa ellarpak piliaqumallruuq.
Naucetaarvik Eden-aaq
Atanrem # 2.4: Ataneq: Hebrew-tun igani igausngalria Yahweh, mumigcimaaqluni Jehovah, ukuni kalikarni aprumalartuq Ataneq, ciuqlikacaar A-aq igat angenritgun igausngaaqluni allat kass'atun igaumalriit piciryaraat maliggluku. Agayutem piliaqellermini nuna qilak-llu, 5naulriartangqeqsaitellruuq naucetaarkat-llu naugaaqsaunateng, tua-i-wa Atanrem Agayutem ellallirceteksailaku nauceciiyurtetaunani-llu. 6Tau͡gaam meq ulvelartuq nunam acianek nuna mirluku.
7 Ataneq Agayun urr'amek tegulluni nunamek#2.7: nuna…yuk: Hebrew-tun qaneryaraq “yuk” “nuna-llu” ayuqlutek nepengqertuk. piliuq yugmek; cupluku-llu qengagken'gun unguvanarqelriamek anernermek, yuk-llu anerteqelriaruluni yuurrluni.
8 Ataneq Agayun naucetaarviliuq Eden-aami calaralirnermi; tuavet-llu elliluku angun piliallni. 9Atanrem Agayutem nauvkarai tangssunarqelriit ayuqenrilnguut napat, atsangtulit neryunarqelrianek. Cali-llu naucetaarviim qukaani napatangqertuq yugnek unguvavkariyugngalriamek akwarpak, aipangqerrluni-llu napamek nallunrirceciyugngalriamek assiilngurmek assilriamek-llu.
10Kuigem qurrlulriim Eden-aami mertelaraa naucetaarvik. Tuaken kuik avtuq cetamaurrluni. 11Ciuqliq atengqertuq Pishon-aamek qiptaarluni Havilah-m nuniin avatiinun suulutaartalegmun. 12Tamatum-llu suulutaara assilriaruuq. Teggalquqegtaarangqerrluni-llu, cali-llu nurnalrianek tepkegcautnek. 13Kuigem aipaa Gihon-aamek atengqertuq. Cush-am nuniikun tamalkuan qurrlurluni. 14Pingayuat kuiget atengqertuq Tigris-aamek, Assyria-m calaralirnerani uitaluni. Cetamiit-llu kuiget atengqerrluni Euphrates-aamek.
15 Atanrem Agayutem elkartaa angun Eden-aam naucetaarvianun naungigcarluku aulukesqelluku. 16Agayutem qanrutaa, “Piyugtacirpetun neryugngauten napat atsaitnek naucetaarviim iluani. 17Tau͡gaam napamek nallunrirnarqellriamek assilriamek assiilngurmek-llu neryaqunak. Nerkuvet tuani ernermi nerrlerpeni tuquciquten.”
18 Ataneq Agayun qanertuq, “Assinrituq angutem kiimetlerkaa; aiparkaanek piliciqua ikayurtekniaraa.” 19Tua-i Atanrem Agayutem nunamek tegutaqluni piliaqai tamalkuita ungungssit yaqulget-llu. Angutmun-llu ayaulluki paqnayugluni camek acillerkaitnek. Tuani-llu acillrinek atengluteng. 20Taum angutem acirai ungungssit yaqulget-llu tamalkuita; tau͡gaam iliitnek nalaqutenrituq angutmun ikayurkarnilriamek.
21 Atanrem-llu Agayutem angun qavarcetaa mamtulriamek, qavallrani-llu tegulluni tulimain iliitnek, mamlluku-llu uitavillra. 22Tulimaq-llu aturluku arnamek piliuq, iluvaulluku-llu angutmun. 23Angun qanertuq,
“Nutaan wiinga ayuqengua,
piliaqumalriamek enemnek kememnek-llu.
‘Arnamek’ aterpagcimaciquq, angutmek tegumiimi.”#2.23: Arnaq…Angun: Hebrew-tun aperyarak “arnaq” “Angun-llu” nepiik ayuqerrlugtuk.
24Man'a pitekluku angutem unitarkaugak angayuqaagni nepingavikluku-llu nuliani, kememegnegun atauciurrlutek.
25Tamarmek angun nuliani-llu matangqang'e'rmek kasnguyunrituk.
Yupik Bible © 2012 American Bible Society. All rights reserved.