Madiu 4
4
Mugabe busaea Yesuea nafade hamomabelela fedogola bimolöïe misi
(Maga 1.12-13, Ulugu 4.1-13)
1Amala hamosebegi, mugabe busaea Yesuea nafade hamomabelela fedogola bimolöïe, Godeïe Gesamia Yesu e sege nafade udia dolö aligisia made ami sigi fedala ifosi. 2Amala sigi fedala ifosi nea, Yesu e segeyo nabülasi biyidia, yobage gasigige, molö made naala neamu, sïdëa baagoi nelo. 3E amala sïdëa baagosa nebegi, nafade hamomalalo fedogola melëlo busa amea maalahilä sähalea, Di Godeïe malö nea galëda, igi gowema wahalo hamomalamola säi.
4Amala säsebegi, Yesuea säla obëgësalea, Ado säla dëdëla negei dibe amea sähaleada, Udia dolögali namolö ïlo amoda wahalo nase ameamu ïlo mademelë. Ado sulubadela Godeïe nafiala maasebe amolia namolöila säla dëdëla negei dialeala säi. Mala Bu Eegei 8.3
5Amala säla obëgësebegi, mugabe busaea Yesu sigi, gaamu Godea hïle nafolai Yalusaleme ami awäla, Godeïe mosöa ilibiafalï gadogo ifosilahilä, 6ema sähalea, Di Godeïe malö nea galëda, hä, di dihï nila sadia idogomo. Amoïe ado afädë säla dëdëla negei dibe amea sähaleada, Ea ïe selesaia fii amolima dïe säsegi, igia dïe emo daualoea, ilile naaboea di sogobala gauia adogomolömelëla säla dëdëla negei dialeala säi. Gë Udälo 91.11-12
7Amala säsebegi, Yesuea säla obëgësalea, Ado elö gomalä säla dëdëla negei dibe amea sähalea, Dafidilo Geloi, dïe Gode neebe amo, fedogola bimabiola dëdëla negei dialeala säi. Mala Bu Eegei 6.16
8Amala säsebegi, mugabe busaea segebi ilibia neebedaia ami Yesu sigi fedalahilä, gädili sulubadela dibe amolige, ilile nelebo hedabi difolalebe amoge olesa maadei. 9Olesa maadelahilä sähalea, Dia ne mia emo gumu sasagalahilä, nïe ëi gauia adaseda, nelebo sulubadela beasebe egowelida, digali ïaha maademolömelëla säi.
10Amala säsebegi, Yesuea säla obëgësalea, Ai. Saidani. Di moholöi mosö. Ado säla negei dibe amea sähalea, Dafidilo Geloi, dïe Gode neebe amo, dia ïe ëi gauia adamalolage, amase, ïemu hamoi hamomalolage säla dëdëla negei dialeala säi. Mala Bu Eegei 6.13
11Amala säla obëgësebegi, mugabe busaea Yesu dïgïla asi. Asibua, selesaia fii Yesu neebea maala, ilia e ugila negei.
Yesuea Galili ami hamoi mi gäwila hamosa nelo
(Maga 1.14-15, Ulugu 4.14-15)
12Yone e galabaia mosöa neala säi amo nabalahilä, Yesu e Galili segea obëgëi. 13Obëgëla awälahilä, e Nasalese gaamu dïgïla, Gabaniama gaamugi namolö asi. Gabaniama gaamuda, oeabo edefade dibe amoïe agesugi Sebulunilele Nafadalilele sege dilo.#4.13 Siiba Isilale sosogo äudä Sebulunile Nafadalileda, Galili oeabo agesugi ami filo. Gaso, Yesu e neebe amo gaalu, sege amoda Galili bolobinisi amogi dilo. 14Amo hamoi amoïe Godea ïe bea sälo Aisaeama aligila, bea säla negei amo gausiala digai.
15Sebuluni segege, Nafadali segege, ëi odoada, idi oeabo edefade dibeamadi ami aulo sege amoge, ödä Yodona agesugi dibe sege amoge, amase, Disiligi Galiligi udia dolö fii odoa yafie maala sefolalebe sege amoge, amolida Sebulunilele Nafadalilele segemu.
16Segea ami udia dolö gasimi sagaigi nefolalebe amoliada, yo digalo edefademalä melïmelë. Baagoloïe sege augi hawa nefolalebe amolimada yo digala besela galaimelëla
säla dëdëla negei dialea. Aisaea 9.1-2
17Segeyo amo gaalu, Yesuea mi gäwila säla ïahalea, Hebeni Beaha Maadela Sigi Neebe amo ga made dibe amea, dilia asigi besumalola säla ïaha nelo.
Yesuea dolö biyidia seme digisa nebegi wei
(Maga 1.16-20, Ulugu 5.1-11)
18Yesu e Galili oeabo edefade dibe amoïe agesudilä awäha nea, ea seme digilo dolö äudä elowole ëole melï. Elöda Saimono, ïe ëi elöda Fida, amase, ïe edoo Ädulule melï. Eleada ödä edefade amogi seme digisa nelo. 19Ele bealahilä, Yesuea elema sähalea, Alia seme nelo amo gadola, udia dolö nimäia na alima neala oleledelä. Ne bëgëla misiëla säi. 20Amala säsebegi, elea elele selëgë amoli dïgïla, fodolofalï e bëgëla asi. 21Amila awäha nea, ea edoole edoole elö neebe melï. Elöda Sebediïe malö Yamese, amase, elöda ïe edoo Yone. Elea elele eedobalä ödä du amodaia selëgë hamogisa neebe melï. Bealahilä, Yesuea ele wesebegi, 22fodolofalï elea ödä duge, eedoge dïgïla, Yesu bëgëla asi.
Yesuea mala säla olelela digi, oloi wahila didigisa nelo
(Ulugu 6.17-19)
23Yesuea Galili sege sulubadelagi nawesa neada, ilile gedolo mosöa säla olelesalea, Beaha Maadela Sigi Neebe amoïe Ado Mala Hedabi säla olelela digi, udia dolö amoligi olo elö elöla oloi wahila digi, amase, domalo nalafadela nawei sulubadela wahila didigisa nelo. 24Amala hamosa nelo amo, udia dolö Siliamadi nefolalo amoli sulubadelaea nabaha maadei.#4.24 Segeyo Olomoea Yuda beaha nelo amo gaaluda, Galilile Isilalelemadida holöbö bolobinisi edefade ameada, Olomo iliada bolobinisi Siliala sälo. Nabaha maadelahilä, ilia udia dolö olo elö elöla oloi amolige, së edefade sësa difolalo amolige, amase, mugabe fedai difolalo amolige, amulämei difolalo amolige, fii si sefolalo amolige, sulubadela neala gaula e neebea maasebegi, ea amoli wahisa maadei. 25Udia dolö yafie Galili amilage, Gaamu Nabülasimadilage, Yalusalemelage, Yudiamadilage, ödä Yodona näiado alömodilage, e bëgëla afiai.
© 2022 (Active), Wycliffe Bible Translators, Inc. All rights reserved.