Madiu 3
3
Ödägi gelo Yonea ado mala säla ïaha nelo
(Maga 1.1-8, Ulugu 3.1-18, Yone 1.19-28)
1Gäheo i odoa nelolahilä#3.1 Giligi adoda Segeyo amo gaalula dëdëla negei dialea gaso, hogoli agedu baagiada hogoli osodaïe gäheo i nabülasi äudäïe odoai gödölasi gadoi nelo., ödägi gelo Yone e Yudiamadi sege nafade udia dolö aligisia made ami ulufala maalahilä, mala säla ïaha nelo. 2Ea säla ïahalea, Hebeni Beaha Maadela Sigi Neebe amo ga made dibe amea, dili asigi besumalola säla ïaha nelo.#3.2 Hebeni Beaha Maadela Sigi Neebela säi amoge, amase, Godea Beaha Maadela Sigi Neebela säi amoge, ado amole säi amoda Gode eda dofä udia dolöle nelebo sulubadela dibe amolele gini namolöla säi. 3Godea bea sälo Aisaeama aligila Yoneïe dafidi bea säla negesalea sähalea,
Sege nafade udia dolö aligisia made ami nea, afädëa wesalea sähalea, Dafidilo Geloi misiäia idi daiala hamogilasimalo. Ïe idida mogola fodolasimalola säha neamelëla
säla dëdëla negei dialea. Aisaea 40.3
4Yone eda sugua gamele hilïa fagulo hamoi amo salugalahilä, sugua gafodo gadoia malibu negela nelo. Eada galiawage, äwi ödäge naha nelo.#3.4 Ado egowea fagulo gäige molö naha neloge säi ameada, Yone eda bea sälo dolö afädë Elaia gadoi galea. Agedu Gini 1.8ge, Malagai 4.5ge, Madiu 11.14ge, amase, 17.10-13ge bimalo. 5Udia dolö Yalusalemelage, Yudia sege dibe amo sulubadelagilage, sege ödä Yodona ga made dibea amilage, Yone neebea maahamu nelo. 6Ilia nafade hamoi amo säla sisiasebegi, ea ili ödä Yodonagi gesa nelo.
7Felesi dolö amolige, Sadiusi dolö amolige yafie Yonea ili ödägi gemäia maaha neebe amo bealahilä, ea ilima sähalea, Dilida baagolo nubaïe malö nebego, Godea së ïa idogomolö amogi, made naala fisäla moholömelëla dilima nowëa säla ïasio. 8Dilia asigi besui amoïe gägä ulufala negemalo. 9Dilia dihilidomu sähalea, Abalahamada nilïle mäu nelola sämolö dialeala helësëmabio.#3.9 Ilia Abalahamada nilïle mäu nelola ado amala sälo ameada, së molö dibea ami made naala, sisigala moholöla helësëlo amea, Yonea amala helësëmabiola säi. Na ado afädë säla ïahago. Nabualo. Godea igi difolalebe gowegi neala gaulahilä, Abalahamaïe yaua mäu hamolasimolöi neamelë. 10I nefolalebe mia ami gabi negesisi dialea. I gägä hedabi made negelo nefolalebe amolida, sulubadela abalahilä, nulogi gobesa maademolömelë.
11Dili asigi besui ameada na dili ödäea gelasilomelë. Hobea ne baagia afädë moholö amoda, ne holöfalïmelë neebewe gadoi made, eda ilibia edefade neamelë. Na ïe emo usililo gaumolö dofea made neawe. Eada Eleloi Gesamiage, nulo söaeage dili gelasimolömelë. 12Eada eladi gadoi ëi widiïe gägä dobilahilä, isole düle mogemäia nelebo gasala sadia adogolo nama gadoi afädë gaula nea. Mogesa maadelahilä, ea widi gägä amo negelo mosöa ami negesilahilä, ïe widi dobilo sege amo gëgelë doala digilahilä, dü fisi amoli nulo usilo made, wisamu neebea ami gobemolömelëla Yonea säi.
Yonea Godeïe malö Yesu ödägi gelasi
(Maga 1.9-11, Ulugu 3.21-22)
13Segeyo amo gaalu, Yesu e Galilila ödä Yodona dibea ami maalahilä, e Yonea ödägi gelasimäia misi. 14Maasebegi, Yonea Yesuea oböla asigi bedefala ödägi made gemolöla sämäia, ea nabahalea, Dia ne ödägi gemolöi dialea gasoda, na di ödägi gemäia, ne neebea misi golela nabi. 15Amala nabasebegi, Yesuea säla obëgësalea, Walio amala hamomäiamelë. Mala go hamosaleada, Godea hamesebe amoda hamosa maademolö dialeala säi. Amala säsebegi, Yonea ema üi.
16Yonea Yesu ödägi gei. Yesu ödägila agesua fodolo aliga adogoi amole, mu doga negelahilä, ea haea maliabu hagila digalo amo gadola, Godeïe Gesami digala edaia fisebe amo melï. 17Amo gaalu, selesaia mosöala ado afädë säia idogosalea, Egoweda nïe malö, na boba hamosa neawe. Ema edefademalä obeägïsa neawela säi.
© 2022 (Active), Wycliffe Bible Translators, Inc. All rights reserved.