SOERA MOZE I. FAZA 3.
FAZA 3.
I. Bõrõta horõ. II. Hoekoe andrõ nifatõrõ Lowalangi ba bõrõta wamaboeʼoe sangorifi. III. Niheta ba kaboe faradaiso ira.
1I. Ba no soneche goelõ, moroi ba zaliw̃aliw̃a ba danõ fefoe nifazõchi Jehowa Lowalangi; ba imane ba ndra alawe: Hadia, doehoe no iw̃aʼõ Lowalangi: Lõʼõ manõ miʼā mboea geoe ba kaboe? (Fam. 12, 9). 2Ba imane ira alawe chõ goelõ: Tola sa maʼā mboea geoe ba kaboe, 3ba ba mboea geoe andrõ si so ba daloe kaboe, ba no iw̃aʼõ Lowalangi: Lõ tola miʼā ia, ba bõi mibabaja, fa bõi mate ami! 4Ba imane oelõ ba ndra alawe: Maʼifoe sa lõ mate ami; (Kor. II. 11, 3); 5ba iʼila sibai sa Lowalangi: miʼā siʼaikõ ia, ba teboka hõrõmi, ba tobali si mane Lowalangi ami, saboto ba dõdõ si sõchi ba si lõ sõchi. 6Ba me iʼila saʼae ira alawe, wa sõchi niʼā mboea geoe andrõ, awõ wa si sõchi famaigi, awõ wa no omasiõ geoe daʼõ, ba wanõndra faʼatoeatoea chõnia, ba ihalõ mboea, iʼa, ba ibeʼe gõi õ ngambatõnia si so ba ngainia, ba iʼā gõi. (Tim. I. 2, 14). 7Ba teboka hõrõra, daroea ira, ba oroma chõra, wa lõ baloebaloera; ba lafatagoe laelae, oeʼira.
8II. Ba me larongo roeroe Jehowa Lowalangi sanõrõ kaboe, tánõ owi, me okafoe zino, ba iʼaloei waminiʼõ jaʼia chõ Jehowa Lowalangi niha, awõ ngambatõnia barõ ndraha geoe ba kaboe. 9Ba hoemede Jehowa Lowalangi ba niha, imane chõnia: Heza so ndraʼoegõ? 10Ba imane: Oerongo wehozihozi gaheoe ba kaboe, ba ataʼoedo, me lõ baloebaloegoe, ba oebiniʼõ ndraʼo. 11Ba imane: Ha niha zangoemaʼõ chõoe, wa lõ baloebaloemõ? Hadia, no oʼā mboea geoe andrõ niw̃aʼõgoe chõoe: Bõi ā daʼõ? 12Ba imane niha: Alawe andrõ, nibeʼeoe awõgoe, daʼõ zameʼe õgoe, mboea geoe andrõ, ba no oeʼā. 13Ba imane Jehowa Lowalangi ba ndra alawe: Hadia nilaoemõ andrõ? Imane ira alawe: Oelõ zamowõhõ jaʼo, fa oeʼā. 14Ba imane Jehowa Lowalangi chõ goelõ: Me no õlaoe daʼõ, ba niʼelifi ndraʼoegõ fõna goerifõ niha fefoe ba fõna goetoendroeʼoe fefoe; õʼananaʼõ taloe wofanõfanõ ba õʼā danõ, gõtõ waʼanaoe nosooe! 15Ba oefaʼoedoe ami ndra alawe ba oefaʼoedoe ira maʼoewoemõ maʼoewoenia, daʼõ zomama hõgõoe dania, ihoendragõ, ba sendrooe bõrõ sisinia ndraʼoegõ. (Heb. 2, 14. Joh. I. 3, 8). 16Ba ba ndra alawe, ba imane: Erege sibai dõdõoe ba dabidabina oebeʼe, afõchõ dania wadono chõoe, ba õʼisõ [sa atṍ] ngambatõoe ba samatõrõ jaʼoegõ ia! (Kor. I. 11, 3. Efes. 5, 22. Kol. 3, 18. Fet. I. 3, 1). 17Ba ba niha, ba imane: Me no õʼoʼõ niwaʼõ ngambatõoe ba me no õʼā mboea geoe andrõ, niw̃aʼõgoe chõoe wangoemaʼõ: Bõi ā ia, ba niʼelifi mbenoea, bõrõ ndraʼoegõ; jaʼerege dõdõoe wemanga gõoe chõnia, gõtõ waʼanaoe nosooe. 18Doi ba doeʼoe ziloea chõnia chõoe, ba si manga goelegoele ba nowi ndraʼoegõ. 19Abõbõi dania mbawaoe ba wemanga gõoe, irege mangawoeli ndraʼoegõ ba danõ tooe, ba nihalõ jaʼoegõ. Tanõ sa atṍ ndraʼoegõ ba si tobali tanõ zoei dania! (Tes. II. 3, 10). 20Ba ibeʼe tõi ngambatõnia Chawa niha, me maʼoewoenia fefoe zaoeri dania. 21Ba ifobaroe niha Lowalangi baroe oeli goetoe ndroeʼoe, awõ ngambatõnia.
22III. Ba imane Jehowa Lowalangi: Hiza, no tobali si mane jaʼita niha, me no aboto ba dõdõnia hadia zi sõchi ba hadia zi lõ sõchi. Ba me si manõ, ba fa bõi iʼoroʼõ dangania, ba wangai boea geoe fangorifi andrõ, ba wanõndra faʼaoeri si lõ aetoe! 23Ba iheta ba kaboe Edena niha Jehowa Lowalangi, enaʼõ mangahalõ ia ba danõ, ba nihalõ jaʼia. 24Ifõfanõ niha ba ifataro Keroebi fõna kaboe Edena, tánõ ba gatoemboecha loeo chõnia, Keroebi si so fõda si takile, nifaligoi, ba wanaro lala ba geoe fangorifi andrõ.
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.