KECHENG 3
3
Monit Akekroithekthe
1Non Hemphu Arnam kepinchong nampi api an angbong pen pherui abang resak muchot. La arloso aphan pulo, “Beri arlo athengpi an athe chori” putong Arnam nangkepuma?#Kepa 12.9; 20.2 2Pherui aphan arloso abang pulo, “Beri arlo athengpi-heihei athe netum cholong; 3bonta Arnam pulo, ‘Nangtum beri angbong chittim athengpi athe chori, lapen la nangtum paphori, kalite nangtum thiji.’ ” 4Bonta arloso aphan pherui thak-lo, “Nangtum thithe. 5Athema nangtum la kecho ahut nangtum amek chingpu dangpo, lapen nangtum Arnam#mate arnamso atum ason plangpo, keme lapen kehingno#Me-hingno kechini; mate kadokaveta chini-et chini-unpo pu Alangli chini.” 6Lasi arloso abang halaso athengpi kecho aphan mesenji pu thek-long-lo, lapen la emek aphan kelangmesen, lapen halaso athengpi gian kelongji ar-imeme, bangso athengpi athe bangpi ensi chodet-lo; lapen bangpi apenan aphan ajehak pilo lapen alanglita chodet-lo. 7Anke banghini ta amek chingpudang-lo, lapen latum areng-angse pu chechinilo; lapen latum thebo arong arvosi latum chedip-i-lo.
8Lapen kangsamdop arni beri arlo Hemphu Arnam akengkam arki latum arjulong-lo, lapen beri athengpi-heihei angbong Hemphu Arnam angno pen monit lapen apiso chepatujoilo. 9Bonta Hemphu Arnam monit aphan hangsi la aphan pulo, “Nang konatsi kedolo?” 10Lapen la thak-lo, “Beri arlo nang kevang arki ne arjulong-lo, lapen ne pherelo, pima nereng-angse; lapen ne chepatulo.” 11Alangli pulo, “Nangreng-angse pu komatsi nangphan nangkepulo? Ne chori pu nangphan hukum nangkepi athengpi athe nang chodetma?” 12Monit abang pulo, “Nang nelong nang-kepadodunji pu nekepi a-arloso, bangpi si thengpi athe nekepi lapen neli chodet-lo.” 13Anke Hemphu Arnam, arloso aphan pulo, “Nang la kopisi keklemlo ma?” Arloso abang thak-lo, “Pherui si nephan ne chongthuidet, lapen ne chodet-lo.”#2 Kor 11.3; 1 Tim 2.14
Arnam Kangsai
14Pherui aphan Hemphu Arnam pulo,
“Pima nang la keklem apot,
Kepangreng api-an angbong apar lapen
nampi api-an angbong apar nang ahirjuno kepho abang-lo;
nangpok pensi nang dam nangpo,
nangkai isi nang longle aduk si chonangpo.
15Nang lapen arloso angbong, nangsomar lapen bangpi
asomar angbong hotur pacheplangpo;
la nangphu pangje po,
lapen nang la akengti pangjepo.”#Kepa 12.17
16Arloso aphan Alangli pulo,
Oso mahang kepathek ahut nang keso jasemetsi pa-ongpo;
sopik pensi nang oso chopathe nangji,
seta nangpenan aphan si nangning do-eji,
lapen la nangphuthak pangripo.
17Lapen Alangli Adam aphan pulo,
“Pima nang nangpiso alam karju apot,
lapen ‘Nang la chori’ pu Ne nangphan
hukum nangkepi athengpi chodet apot,
nang pen apot longle pahirjuno lo;
nangkai isi chepaduk-khrup pensi nang cholongji;
18Ingsu lapen bapsudo-heihei nangphan doji
lapen hidi ajo athengpi arong athe-heihei si nang chonangji.#Ibr 6.8
19Nang-ing-i buprup si nang an cholongji
ha longle along nang chevoivetik,
athema nangphan la pensi nangke-en lo;
nang longle aduk lo,
lapen longle aduk along si nang chevoinangji.”
20Adam#Ibri alam pen laso amen ke monit akhei aphansi kepudam apiso aphan Iv#Laso amen ke Ibri alam Kereng-et pu pensi kechinglit, laso along ke monit aso pen pangbardamme pusi amen irlo, pima bangpi ke kereng an amar apei lo. 21Lapen Adam lapen apiso aphan Hemphu Arnam ok-reng ape-heihei selampilo lapen latum aphan pangchoilo.
Beri Pen Adam Lapen Iv Aphan Kephlung
22Anke Hemphu Arnam pulo, “Langtha monit atum Etum ason plangtang-lo, keme lapen kehingno#Keme lapen kehingno kechini agian mate kadokaveta kechini-et agian chinitang-lo; lapen non la ari pen chethe atheng pi endet-ra chodet apot-lo lapen kaike rengver po.”#Kepa 22.14 23La apotsi la aphan ke-en alongle kepatikijisi laphan Iden aberi pen toijuilo. 24Alangli laphan phlungjuilo lapen Iden aberi anihang anat Cherubim#Kereng-et api, la “Kenangsot Alamjir-heihei” along langdamnon bilo, lapen chethe athengpi atovar keraijisi ame-akar kedo anokjir epak hevikdirlo.
Karbi Holy Bible © Bible Society of India, 2010.
Used by permission. All rights reserved worldwide.