LUKAS 23
23
I Jisus pinauma' ri Pilatus
(Mat. 27:1-2, 11-14; Mrk. 15:1-5; Jua. 18:28-38)
1Ngaangai' ulun ru Majlis Ugama i miningkakat am ibito' nilo i Jisus muma' ri gabenor Pilatus. 2Uwin nilo i Jisus ra giu' i, konilo, “Narampatan mai ulun ti nampakalayau ra bansa' mai. Nanusub Io ra ulun masuang kalo mambayar ra cukai ra Kaisar, am migiangku ra Io no i Kristus, ioginio raja'.”
3Pangkuot i Pilatus ri Jisus, “Motopot kia Okou ti raja' ru ulun ru Jaudi?”
Taam i Jisus, “Kamu, Aku noyo Io.”
4Indagu i Pilatus ra tingganai imam Jaudi am ulun masuang no, “Kolondo' sala ru ulun ti naalap ku koson mangukum Riso.”
5Kaa' gumogot ilo poyo, konilo, “Intor ra pangilaan Nano manusuk Io ra mamagun ru Judia manggal ra parinta. Timinalimpuun Io ra libung Galilia am nakasuku' noyo ragiti raino.”
I Jisus pinauma' ri Irodis
6Korongog ri Pilatus baal raginio, pangkuot io, “Ulun ru Galilia kia gitio?” 7Kapandayi' no ra intor i Jisus ra libung ondo' kinuasa' ru raja' Irodis, paatari' no i Jisus riso. Napaat ragili niayuk, soroi i Irodis ra Jirusalim. 8Naansukan toojo i Irodis nakakito ri Jisus, sabap ra lair io noyo nakaining ra tunungon intor Riso am gumogot Io milong Riso. Malansan io poyo magilong Riso mambaal ra kaimuagan. 9Ginio ra masuang pangkuatan ri Irodis Riso, kaa' kalo tinaam No. 10Tingganai imam Jaudi am mangingila' ra Ukum ri Musa no mininggaar am maagat panguwan nilo ri Jisus. 11Iniis am inasaban Io ri Irodis am saujor-saujor nano. Pambayango' nilo Io ra sukub moonsoi ru raja' am paatari' no saguli' ri Pilatus. 12Intor ragili niayuk, i Irodis am i Pilatus nobonsoi boo saguli' sabap ra buoi ti nantula' ilo.
Ukum ra potoyon pinataak ri Jisus
(Mat. 27:15-26; Mrk. 15:6-15; Jua. 18:39—19:16)
13Piawo' ri Pilatus ngaangai' tingganai imam Jaudi, tingganai ru ulun ru Jaudi am ulun masuang. 14Indagu io risilo, “Pinauma' min ulun ti raki' am nambala' kau ra nampakalayau Io ra ulun masuang. Kaa' inilayan ku Io no toojo ra saang min, am kolondo' sala natuum kuno koson ra nanguwan min Riso i. 15Nogondo' niayuk ri Irodis, sabap ra inataran no i Jisus saguli' ritakau. Kolondo' rondo' pana ondo' binaal Nati saboi sama' Io ukumin ra potoyon. 16Ginio ra palapasin ku Io ayuk am palabuson ku boo.” [17Sabap ra kaindalaman no, moonong Pangiantakan ra Paska, mampalabus i Pilatus ra sangulun ondo' inaput maya' ra kasagaan ru mamagun.]#Kukula' naskhah ra bokon kolondo' ra ragu 17.
18Giminolok ulun masuang no, “Potoyo' Io am palabuso' ramon i Barabas!” (19I Barabas inaput ra lamin pangaputan sabap ra nakaaya' io minanggal ra Parinta ondo' nasauk giu' ra bandar Jirusalim am sabap ra nampatoi io poyo.)
20Masaga' i Pilatus mampalabus ri Jisus, ginio ra minindagu io igondo' poyo ra ulun masuang no. 21Kaa' golok ilo, konilo, “Salipo' Io! Salipo' Io!”
22Indagu i Pilatus risilo ra kaintalu, “Kaa' atan guat sala Nati? Kolondo' sala natuum kuno ondo' binaal ru ulun ti saboi sama' Io ukumin ra potoyon. Loposon Io ayuk am palabuson ku boo.”
23Kaa' gino ilo ayuk gogolok ra i Jisus salipon, am pupus i ilo namanang sabap ra golok nilai. 24Inukum i Jisus ri Pilatus maya' ra kasagaan ru ulun masuang no. 25Palabuso' no boo ulun kinitaak nilai, ulun ondo' inaput ra lamin pangaputan sabap ra minanggal ra parinta am nampatoi. Pinoloso no ulun masuang no mambaal ra atan ayuk kasagaan nilai ri Jisus.
I Jisus sinalip
(Mat. 27:32-44; Mrk. 15:21-32; Jua. 19:17-27)
26Saujor-saujor no nagibit ri Jisus koson ongoyon salipo'. Ingkual ilo ra bandar i am katuum nilo i Simon, ulun ru Kirini, ondo' sumubol ra bandar. Rokopo' io ru saujor-saujor no am jajali' mansaan ra salip i sumunu' ri Jisus.
27Masuang ulun siminunu' ri Jisus; intor risilo i mokoondo' kukula' ngaulun ruandu' nantangi' am nanulaboi ri Jisus. 28Pangkaili i Jisus risilo am indagu, “Aibui boo ramuyun, ruandu' ru Jirusalim, pai' min Aku tangii'; tangii' min ayuk akau galama' am anak mino. 29Sabap ra maar noyo masuku' orou ra ulun mindagu, ‘Mumpara' boo bonsoi ru ruandu' ondo' kalo igondo' kaapang, kalo igondo' paganak kapoam pampatiti'.’ 30#Gos. 10:8; Pin. 6:16Paat raginio ulun mindagu ra gunung no, ‘Pumpuni' akai!’ am ra bulur poyo, ‘Bunio' akai!’ 31Sabap ra amon ru mambaal ilo ragitio Raki' ondo' koson ra tataun biag, mulu' poyo ra maagu no baalon nilo ramuyun ondo' koson ra guol!”
32Mokoondo' poyo ruo ngaulun malaat inukum ra potoyon pinabaya' ri Jisus. 33Pakasuku' ilo ra rondo' intok ondo' piawon ra “Kuapak”, salipo' nilo i Jisus ra giu' i nababaya' ra ruo ngaulun malaat i, sangulun i tampilon ra pamiris am sangulun i poyo tampilon ra kait. 34#Mzm. 22:19Indagu i Jisus, “Ama', ampuno' ilo no, sabap ra kalo makatutun ilo ra atan baalon nilo ti.”#Kukula' naskhah ra bokon kolondo' ra ragu 34.
Pagugundi' ilo poyo koson mantayar ra bayang ri Jisus. 35#Mzm. 22:8Ulun masuang ondo' soroi ra giu' i nonontong ayuk, liliwa' tingganai ru ulun ru Jaudi nangiis Riso, konilo, “Namayag Io ra ulun bokon, kaa' amon ru motopot ra Io no Mamamayag ondo' sinusub ri Aki Kapuuno',#Mamamayag ondo' sinusub ri Aki Kapuuno'; Harfiah: Kristus. polosoon Io mibayag galama'!”
36 #
Mzm. 69:22
Saujor-saujor no pana nangiis Riso am inggaari' am anii' nilo i Jisus ra wain ondo' mataris. 37Konilo, “Amon ru raja' Kou ru ulun ru Jaudi, ibayag no galama'!”
38Ra rasawat ru salip i makatinulisan, “Gitio noyo Raja' ru Ulun ru Jaudi.”
39Sangulun intor ra ruo ngaulun sinalip i pana nagasab toojo ri Jisus, kono, “Sala' ka kia Okou no Mamamayag ondo' sinusub ri Aki Kapuuno'? Ibayag no galama' am bayago' akai ruo poyo!”
40Kaa' sawayo' io ru rangan nali ra sinalip i, kono, “Kua pai' kou kalaa' ri Aki Kapuuno'? Okou niayuk inukuman nogondo' Riso. 41Ukuman tati ragitio sama' pambabalos ru binaal tali, kaa' ulun ragitio kolondo' tupo sala!” 42Indagu io boo ri Jisus, “Jisus, karaa' aku no, paat ra Okou saukon ra raja'!”
43Indagu i Jisus riso, “Balain tokou: Sotopot no, orou raiti' niayuk mababaya' kou Raki' giu' ra Pirdaus.”#Ilai' Kamus.
Pinatayan ri Jisus
(Mat. 27:45-56; Mrk. 15:33-41; Jua. 19:28-30)
44-45 #
Kai. 26:31-33
Olo'-olo' jam koopor am ruo ra tanga' ru orou, ngaangai' ru pagun no liminondom buoi talu nganjam sabap ra mato ru orou kalo boo siminirang. Tabir makapal ondo' pinatair giu' ralalom Baloi Tuhan i narilak kapiruo. 46#Mzm. 31:6Golok i Jisus ra mosongou, “Ama', pataakin Ku painawo Kutu Rirun!” Kopongo Io minindagu raginio, patoi Io no.
47Kakito ru tingganai ru saujor atan ondo' nasauk i, pongompor io ri Aki Kapuuno', kono, “Motopot, ulun ti kolondo' sala!”
48Kakito ru ulun-ulun no ondo' minatong mongoi ilong ra giu' i, atan nasauk i, uli' ilo ngaangai' ra baloi liliwa' mampaluntug ra kubab sabap ra mangiluk kaga' guang nilai. 49#Luk. 8:2-3Ngaangai' ulun ondo' nakaulig ri Jisus, am niayuk ruandu'-ruandu' pana ondo' siminumbaya' ri Jisus intor ra Galilia i, minigor am nagilong intor ra maalur ra ngaangai' ondo' nasauk i.
Nampalabangan ri Jisus
(Mat. 27:57-61; Mrk. 15:42-47; Jua. 19:38-42)
50-51Mokoondo' sangulun ungkuyon makainggalan ri Jusup, intor ra bandar Arimatia ra Judia. Io ti sangulun motopot am kalansanan ru ulun am maginaa io ra i Aki Kapuuno' matong am mamarinta. Kabalu' pana io sangulun suang ru Majlis Ugama, kalo nangiou io ra binaal nilo ra raitii' i. 52Ongoi io uma' ri Pilatus am kitaako' no baangkai ri Jisus. 53Ginio ra patuuno' no boo baangkai ri Jisus intor ra salip am kulumputo' ra konoon linon. Ongoi no palangano' ra rondo' lobong ondo' kinali ra bulur batu, ondo' kalo igondo' labangi'. 54Orou ragili orou Tampasan, am maar noyo tumalimpuun orou Sabat.
55Ruandu'-ruandu' ondo' siminumbaya' ri Jisus intor ra Galilia, siminunu' ri Jusup. Inilayan nilo kalabangan i am ati kulaan pinalangan baangkai ri Jisus ra ralalom i. 56#Kai. 20:10; Sag. 5:14Kopongo ragili, uli' ilo am pomongo ra tatapis maamis owou koson paumawon ra baangkai ri Jisus.
Suabon i orou Sabat ru ulun ru Jaudi, am sumugut ra Ukum ri Musa timinangus ilo.
Hakcipta © Bible Society of Malaysia, 2013.