Genesis 2
2
1Amu Kayak Nug hab, wan, amuppan keeke oh ele anam heum. 2Deɗ ebqak eblaih laippu ele amu ohppa Kayak Nug nuhig uɗat oh ha mala, amu deɗ ebqak eblaih aɗitppa Nug uɗat heum ohppanu hik awom. 3Nug anam ha amu, deɗ amu Kayak Nug tituana, ititta, nuhig tituanak daakkunu meum. Aɗinu? Nug uɗat oh he ukke, malak dayeye, Nug hik awom.
Yawe Kayak Nug danab ah ele haatom
4-6Digmakppa Yawe Kayak Nug hab wan ele haate, amu dimppa aɗi beumnu kaya am iikku.
Yawe Kayak Nug hab, wan ele haatom, haen amuppa amu, wanppa keeke laa ba ii dayom. Aɗinu? Gu nekkunu amu, Yawe Kayak Nug he ii neum, amu danab laa ele wan bappaidkkunu ii dayom. Amge le wan ooppanu baaba, wan leppu medattom. 7Dimppa Yawe Kayak Nug wan gappud awa, amuppa danab heum. Ha amu, Nug danab amu noob oɗeppa ouɗi iwale, bau dayom.
8Amge tatam Yawe Kayak Nug dad laa babaitta, dimppa Nug danab ha amu, Nug nug aguppa meum. Aben amu Iden wanppa dayom. Iden wan am ulah kaɗag uɗitteppanu, appa dayom. 9Yawe Kayak dad heum, amuppa Nug he, ad iɗu iɗu, amuam ad bala anattaknu, ad meu lanaknu ele, ad amu oh beppig. Dad gamagppa amu, Nug he, ad aɗit laa ele bepiɗ; amu laa am bau dayaknu ad, laa am keeke ena, keeke nau ele doyaknu ad.
10Anam dayeye amu, le okkai Iden wanppa ba, dad Yawe Kayak babaittom le medatta ukka, dimittim atakka, le eppeg waɗele beppig. 11Le laa am onig Pison, amu le amu Hawila wan ohppa piia wana, piia doa, na gotte. Wan amuppa amu, gol daatte, 12amu gol amuam enanag. Appa ele amu, men oniks daatte. Amu leppu laa muttuɗig enanag ele amu, amu ele wan amuppa uma daatte. 13Le laa am onig Gihon, amu le amu Kus wan ohppa piia wana, piia doa, na gotte. 14Asiria wanppa, laih ulah kaɗag uɗitteppanu daatte amu, appa le laa gotte; nug onig Taigris. Amu le laa onig Yupretis.
15Yawe Kayak Nug amu oh ha malowa, dimppa Nug danab awa, dad Iden wanppa dayom, appa nug dad uɗat hekkunu, keeke oh gumadkkunu ele meum. 16Mewowa amu, nug danab inam hekkununab amegppa aum. “Na ad meulkad imu oh lakkutnu elele, 17amge na keeke ena, keeke nau ele doyaknu ad, nuhig meu amu, na aib lame. Aɗinu? Deɗ laa na lawona, na mauhkkut,” awa aum.
18Anam awowa, Yawe Kayak Nug aum. “Danab imu nug nukka daakkunu am ena iitta. Da nuhig ehanittak layag hekkul,” awa aum.
19Amu anukka Yawe Kayak Nug wanppanu doɗ iɗu iɗu oh, ai iɗu iɗu oh ele wanppanu hatte bena daaegeg, Nug Adam ahilagnu anen anen ag onilkad ataɗadkkunu nug noobppa diia uɗie, Adam nug ag onilag ataɗatte, anam daappig. 20Adam nug aabppanu doɗ, atuppan doɗ, ai oh ele onilkad ataɗattom, amge nuhig ehanittak layag laa iitta. 21Nug ehanittak layag laa iitta amunu, Yawe Kayak Nug he, danab nug niia gad meum. Niieye amu, Yawe Kayak Nug Adam qetti ebehi awowa, aben amu teppu aɗe doa tuaɗiom. 22Tuaɗie amu, Nug Adam qetti ebehippa ah hewowa, Adam toppa omala ukkom. 23Omala ukke amu, Adam nug aum.
“Imu amu, nug da ebehilppanu, nug da ganial.
Ao, imu amu nug da teppulppanu, nug genab da ganial daatte.
Yawe Kayak Nug ah danabppa heum;
diig amunu amu, da nug onig, ‘ah,’ ataɗttem,”
awa aum. 24Amu Yawe Kayak Nug ah danabppa heum, diig amunu ewau matulak haenppa danab nug anig mameg ele uuata, nug wau ele matulak daaya, aɗit amu aa ouqak laippu daaglah.
25Haen amuppa amu, danab ah ele aa beɗulah miag daadpiɗ, amge aa uɗalah ii nettom.
© 2022, Wycliffe Bible Translators, Inc. All rights reserved.