Kenese O Le Fa‘atomuaga
O Le Fa‘atomuaga
O le Kenese le igoa o le Tusi, ‘ua fa‘amatalaina ma fa‘aliliuina o le “Amataga.” E fa‘amatalaina e le Tusi lenei, o le Atua o le tupu‘aga o mea uma vaganā ai le agasala. Sa gaosia e le Atua le lagi ma le lalolagi ‘ae maise le tagata i lona foliga ma lona fa‘atusa i lona poto ma lona malosi ma lona alofa i le Amataga. ‘Ae peita‘i ‘ua fa‘amatalaina fo‘i e le tusi o le Kenese le amataga o le agasala ‘ina ‘ua fulitua le tagata i le Atua.
‘Ua vaevaeina le Tusi o Kenese i vaega tetele e lua:
(1) Matā‘upu 1-11, O le amataga o le gaosiga e le Atua o le lagi ma le lalolagi, o le gaosiga o le tagata ma le fafine. O le fa‘amatalaga ‘iā Atamu ma Eva, Kaino ma Apelu, Noa ma le lolo ma le ‘olo i Papelu. (2) Matā‘upu 12-50, O talatu‘u ma tala fa‘asolopito o itū‘āiga o Isaraelu, amata mai ‘iā Aperaamo lea sa fa‘amanuiaina e le Atua auā sa usita‘i ma fa‘atuatua i le Atua. ‘Ona soso‘o mai ai lea ma le tala ‘iā Isaako ma Iakopo. O fānau a Iakopo e to‘a sefulu ma le lua, o latou ia na tupu mai ai itū‘āiga e sefulu ma le lua i Isaraelu. O le atali‘i o Iakopo e aupito tāua tele i lenei tala o Iosefa. Auā sa fa‘atauina atu o ia i Aikupito e ona uso ‘ona o lo latou ‘ino‘ino ‘iā te ia ‘ae ‘ua ‘avea lenā auala sesē ma ala ‘ua ala mai ai le manuia i tagata uma o Isaraelu.
O tala e fa‘amatala i le tusi o Kenese e ‘autū lava i le Atua ma ana galuega mamana ma ofoofogia i le amataga. O le isi itū tāua o le tusi, o le Atua e fa‘asala e ia ma fa‘amasino ‘iā i latou e fai amioga leaga ‘ae fa‘amanuiaina latou e fa‘atuatua moni ‘iā te ia.
O le Fa‘asologa o Matā‘upu:
O le gaosiga o le lagi ma le lalolagi ‘atoa ai ma le tagata 1.1—2.25
O le amataga o le agasala ma le malaia 3.1-24
Mai ‘iā Atamu ‘iā Noa 4.1—5.32
Mai ‘iā Noa i le lolo 6.1—10.32
O le ‘olo i Papelu 11.1-9
Mai Sekema ‘iā Aperamo 11.10-32
O le ‘au Pateliaka: Aperaamo, Isaako, Iakopo 12.1—35.29
O le sologa o Esau 36.1-43
O Iosefa mo ona uso 37.1—45.28
Isaraelu i Aikupito 46.1—50.26
Revised Samoan Catholic Bible © Bible Society of the South Pacific, 2010.