Luke 2
2
1အယ်းအခှိင်ကော်လော့မောင် ရောမဧကရာဇ်ဩဂုတ္တုဟော် ရောမအင်ပါယာအုတ်စွိုးမုအွောဂ်မောင် နေထောင်ဆူတောင်းကွို သန်းခွေါင်စရန်းပေးဆွမ်းယော့မယ်လွို့ အမိင့်ထွိပှန်လေရယ်။ 2အယ်းလွိုပထမော့ဦးဆုန်း သန်းခွေါင်စရန်းစော့တန်ကွောဂ်ယူခှိင်မောင် ကုရေနိဟော် ဆီးရီးယားပှယ်ယယ့် အုတ်ချုတ်ဆူဖှဂ်လေရယ်။ 3လူတောင်းဟော်လယ်း ဆူတွို့ယယ့်ဖွိုးပွေါင်မျောနေခယ့်ရယ့်မွှို့ကွို ပှန်ပွီး သန်းခွေါင်စရန်းတန်ဖွို့ ဆိုးယွောဂ်ကျော့လေရယ်။ 4အယ်းယော်ကျွောင့် ယောသပ်ဟော်လယ်း ဘရန်ဒါဝိဒ်ရယ့် မျွိုးရွိုးခေါ့နေဆန်းသဂ်လော်ဆူ တဦးဖှဂ်လွို့ ဂါလိလဲပှယ်နာဇရက်မွှို့ခေါ့နေ ဘရန်ဒါဝိဒ်ယယ့်ဇော်တိမွှို့ဖှဂ်ရယ့် ယုဒပှယ်ဗက်လင်မွှို့ကွိုဆိုးယွောဂ်လေရယ်။ 5အယ်းလွိုဆိုးယော်မောင် ယောသပ်ဟော် ဆူနောင့်စယ့်စောဂ်ထောပွီး ကွိုယ်ဝမ်ဆိနေပီဖှဂ်ရယ့်မာရိနောင့်အတူ သန်းခွေါင်စာရန်းပေးဆွမ်းဖွို့ ဆိုးခယ့်လေရယ်။ 6ဆူတွို့ ဗက်လင်မွှို့နောင်းယွောဂ်လော်ရယ့်အခေါ် တည်းခွိုရယ့်အိင်မောင် ဧည့်ဆယ်မျော တည်းခွိုဖွို့အတွနေယော်မဆိပေါ်။ 7အယ်းယော်ကျွောင့် ဆူတွို့ဟော် နိုးတားကုတ်ထားမောင် နေထောင်ခယ့်ကျော့ရယ်။ အယ်းနွောဂ်မောင် မာရိဟော်မွီးဖွို့အခှိင်ကှော့ယွောဂ်လော်ပွီး ဆောဦးကွိုမွီးခယ့်ရယ်။ ဆူဟော် လူပယ့်ငါကွိုနိုးစော်ခွထားမောင် ဆိင့်ထောခယ့်လေရယ်။ 8အယ်းအရောဂ်မောင် သိုးကွှောင်းဆောတခှို့ဟော် ဆူတွို့ယယ့်သိုးမျောကွို ဗက်လင်မွှို့အနီးနောင်း ကှစောယော်ကွမ်းမျောမောင် အယ်းသိုးမျောကွို ညော့အခှိင်မောင်စွောင့်ကျောဂ်နေကျော့လေရယ်။ 9အယ်းနွောဂ်မောင် ဖရောဆန်ယယ့်နတ်ဒေဝါတပေါဟော် ဆူတွို့ချယ့်မောင်တလန့်ပိုလော်ပွီး ဆူတွို့ယယ့် ပတ်လည်မောင် ဖရောဆန်ယယ့်ဖုန်းတိုကျွောင့်ထွမ်းလန်းတွောဂ်ပေါ့နေရယ်။ အယ်းယော်ကျွောင့် သိုးကွှောင်းဆောတွို့ဟော်လယ်း ကော်တရော်ထိင့်လန့် ဆိုးကျော့လေရယ်။ 10ဟော်ပေမယ့် နတ်ဒေဝါခေါ့ ဆူတွို့ကွို “မကျွောဂ်ကျော့ပေါ်နောင့် ငေါ်ဟော်လူအောလုန်းတွို့အတွ ကော်တရော်ဝုန်းမွှောဂ်စရော် ဆတန်းကွောင်းကွို ယူဆွောင်လော်ခယ့်တော်ဖှဂ်ရယ်။ 11ဟော်ညော့မောင် မေရှိယဟော် ဘရန်ဒါဝိဒ်ယယ့်ဇော်တိမွှို့မောင် ဖွားမျိုခယ့်လေပီ။ 12နန်တွို့ဆိဆနောင်ရယ့် အမတ်အဆောတခုအနေနောင့် ဗက်လင်မွှို့မောင် လူပယ့်ငါကွိုအဝဂ်စော့နောင့်ပတ်ပွီး နိုးစော်ခွထားမောင်ဆိင့်ထောရယ့်ဟော်ကွို မျိုတွိယော့လောဂ်မောင်ဖှဂ်ရယ်” လွို့ ဟိုးလေရယ်။ 13တလန့်တဆန့်ဆွယ်မွှို့တိုaခေါ့ အချောနတ်ဒေဝါအမျောတွို့ဟော်လယ်း ပိုလော်ပွီး အယ်းနတ်ဒေဝါနောင့်အတူ ဖရောဆန်ကွို 14“အမှင့်မှဂ်ဆုန်း ဆွယ်မျွို့တိုမောင်ဆိတိုမူရယ့်ဖရောဆန် ဖုန်းတန်ခွိုးကျွီးမှဂ်ပေါ်စေ။ ဟော်ကဘော်မှေပိုခေါ့ ဖရောဆန်သဖိုးကှော့တိုမူရယ့် ဆူတွို့ဟော်လယ်း ညိင်းခှောင်းခှန်းဆိပေါ်စေ” လွို့ ဟိုးကျော့လေရယ်။ 15အယ်းနွောဂ်မောင် နတ်ဒေဝါရယ်ဟော် ဆွယ်မွှို့တိုကွိုပှန်လည်ကျို့ဆိုးဟော့ပွီး သိုးကွှောင်းဆောတွို့ဟော် “ငေါ်တွို့ကွို ဖရောဆန်တွိမျိုစေလွိုရယ့် အယော်ကွိုဆိုးကျေ့ဖွို့ ဗက်လင်မွှို့ကွို ဆိုးကျော့မယ်” လွို့ အခှန်းခှန်းဟိုးဆွိုကျော့လေရယ်။ 16အယ်းနွောဂ်မောင် ဆူတွို့ဟော် ဗက်လင်မွှို့ကွို အမှန်ဆိုးပွီး နိုးစော်ခွထားမောင်အိနေရယ့်လူပယ့်ငါကွို မာရိ၊ ယောသပ်နောင့်အတူ မျိုတွိကျော့ယော့လေရယ်။ 17သိုးကွှောင်းဆောတွို့ဟော်လယ်း လူပယ့်ငါကွိုမျိုတွိယော့ရယ့်အခေါ် နတ်ဒေဝါခေါ့ ဟိုးပျော့ခယ့်ရယ့် လူပယ့်ငါနောင့်ပဂ်ဆဂ်ရယ့်အကျွောင်းအယော်ရယ်ကွို လူတောင်းကွိုဟိုးပျော့ကျော့လေရယ်။ 18သိုးကွှောင်းဆောမျောဟိုးပျော့နေရယ့်အကျွောင်းအယော်မျောကွို နောထွောင်နေကျော့ရယ့် လူအောလုန်းတွို့ဟော်လယ်း ကော်တရော်အောင့်အိုးဆိုးကျော့လေရယ်။ 19ဟော်ပေမယ့် မာရိဟော် ဖှဂ်ပျဂ်ခယ့်ရယ့်အကျွောင်းအယော်အောလုန်းတွို့ကွို အွောဂ်မေ့ဆတိယော့ပွီး အယ်းအကျွောင်းအယော်ကွို စိနလုန်းထားမောင်ဆဂ်လဂ်ပွီး တွယ်းနေခယ့်လေရယ်။ 20သိုးကွှောင်းဆောတွို့ဟော်လယ်း ဆူတွို့ရယ့်သိုးမျော ကှစောယော်နေယော်နောင်းကွို ပှန်ဆိုးကျော့ပွီး ဆူတွို့မျိုခယ့်ကျောခယ့်ယော့ရယ့် အကျွောင်းအယော်ရယ်အတွ ဖရောဆန်ရယ့်ဖုန်းတခွိုးတိုကွို ရွိုရွိုဆေဆေလေးလေးစောစောခှီးမွမ်းကျော့လေရယ်။ စော်ကျွောင့်လောဟန်ကော အယ်းအကျွောင်းအယော်တွို့ဟော် နတ်ဒေဝါမျောခေါ့ ဆူတွို့ကွို ဟိုးကျောခယ့်ရယ့်အတောင်းပယ်း အမင်တကာဖှဂ်ပျဂ်ခယ့်လွို့ဖှဂ်ရယ်။ 21အယ်းနွောဂ်မောင် လူပယ့်ငါဖွားမျိုပွီးဆဂ်ရတ်မွှောဂ်ရယ့်နေ့မောင် အယေဖျောခှီးခှန်းမန်ဂလော်ကွို ပှုလုတ်ပေးကျော့ပွီး လူပယ့်ငါကွိုယေရှုလွို့ခိုလေရယ်။ ဟော်ယော်မောင် မာရိကွိုယ်ဝမ်မဆွောင်ခန်ခေါ့ခယန်း နတ်ဒေဝါခေါ့ လူပယ့်ငါကွိုဟော်လွိုနောင်မယ်ပေးဖွို့ ဟိုးကျောခယ့်ရယ့်အတောင်းဖှဂ်ရယ် 22မောရှေယယ့်ပညောဂ်တရောမောင် ဖိုပျော့ထောရယ့်အတောင်း မာရိဟော်စန်ကျာခှန်းမန်ဂလော်ကွို ပှုယော့မယ့်နေ့ရတ်မျောပွီးရယ့်အခေါ် ယောသပ်နောင့်မာရိဟော် လူပယ့်ငါယေရှုကွို ဖရောဆန်နောင်းမောင် ဆဂ်ကောဂ်ဖွို့ ဂျေရုဆလင်မွှို့ကွိုခိုဆွောင်လော်ခယ့်ကျော့ရယ်။ 23ဆူတွို့ အယ်းလွို့လော်ယွောဂ်ယော့ခှန်းမောင် ဖရောဆန်ရယ့်ပညောဂ်ကျောင်းမောင် ဖိုပျော့ထောရယ့်အတောင်း ဆောဦးယွောဂ်ကျောတောင်းကွို ဖရောဆန်နောင်းမောင် ဆဂ်ကောဂ်ယော့မောင်ဖှဂ်ရယ်။ 24အယ်းအပှင် “ခှိုးငတစုန် အယ်းလွိုမောင့်မဟွိ ခွို ငငါနေကွောင်နောင့်ပူဇော်ယော့မယ်” ဆွိုရယ့် ဖရောဆန်ရယ့်ပညောဂ်ကျောင်းအတောင်း ဆဂ်ကောဂ်ပူဇော်ဖွို့ ဖှဂ်ရယ်။ 25အယ်းအခှိင်မောင် ဂျေရုဆလင်မွှို့မောင်နေထောင်ရယ့် ရှုမောင်လွို့ခိုရယ့် လူတယွောဂ်ဆိလေရယ်။ ဆူဟော် ဖရောဆန်ကွိုကျည်ညွိုပွီးဖွောင့်မတ်ရယ့်ဆူဖှဂ်ရယ်။ ဖရောဆန်ဟော် အစ္စရယ်းလူမျွိုးရယ်ကွို ခွမ်အောပေးပွီးကာတန်ပေးမောင်ကွို စွောင့်နေရယ့်လူတယွောဂ်လယ်းဖှဂ်ရယ့်အတွ ညင်အလန်းတိုဟော် ဆူနောင့်အတူဆိနေပွီး 26ဆူ့ကွို “နန်ဟော် ဖရောဆန်ကတိတိုထောခယ့်ရယ့်မေရှိယကွို မဖူးမျိုယော့ဝါးနောင့် ဆေယော့မောင်မဟွိ” လွို့မိင့်တိုမူခယ့်ပီဖှဂ်ရယ်။ 27မာရိနောင့်ယောသပ်ဟော် ပညောဂ်တိုအယော့ ဆဂ်ကောဂ်ပူဇော်ခှန်းအမုကွိုပှုဖွို့ ဗိမာန်တိုဝမ်းထား လူပယ့်ငါယေရှုကွိုခိုဆွောင်လော်ခယ့်ရယ့်အခှိင်မောင် ညင်အလန်းတိုဟော် ရှုမောင်ကွို ဗိမာန်တိုဝမ်းအတွမ်းကွိုဦးဆွောင်ခိုဆိုးခယ့်လေရယ်။ 28အယ်းနွောဂ်မောင် ရှုမောင်ဟော် မွီးစော့လူပယ့်ငါယေရှုကွို ဆူ့လဂ်ပိုမောင်ခှီပွီး ဖရောဆန်ယယ့်ဂုဏ်တိုကွို ခှီးမွမ်း ပူဇော်ခယ့်လေရယ်။ 29“အဆန်၊ ငေါ်ဟော် နန့်ယယ့်အစေခေါင်ဖှဂ်ပေါ်ရယ်။ နန်ကတိတိုပေးခယ့်ရယ့်အတောင်း ပှယ့်စုန်ပီဖှဂ်လွို့ အခုငေါ့ကွို ညိင်းညိင်းခှောင်းခှောင်းဆေခှန်းအခွမ့်ကွိုပေးတိုမူပီ။ 30စော်ကျွောင့်လောဟန် လူမျောကွိုကာတန်ဖွို့အတွ ဖရောဆန်စေခွှဂ်တိုမူရယ့်ကာတန်ဆန်ကွို ငေါ်မျဂ်မျိုကျုန်တွိယော့ပီဖှဂ်ရယ်။ 31အယ်းအပှင် လူဆောအပွောင်းတွို့ဟော်လယ်း နန်ပှန်ဆန်စေခွှဂ်တိုမူရယ့်အဆန်ကွို မျိုတွိယော့မောင်ဖှဂ်ရယ်။ 32အယ်းလူဟော် အဆန်ဖရောကွို လူမျွိုးချောတွို့ဆိဆစေဖွို့ အလန်းယွောင်လွိုမျွိုးဖှဂ်ပွီး အဆန်ယယ့် လူမျွိုးဖှဂ်ရယ့်အစ္စရယ်းလူမျွိုးတွို့ကွို ဂုန်တဂ်စေခှန်းနောင့်အလန်းပေးတိုမူလေပီ” ဆွိုပွီးဖှဂ်ရယ်။ 33မာရိနောင့်ယောသပ်တွို့ဟော်လယ်း ရှုမောင်ဟိုးကျောရယ့်လူပယ့်ငါယေရှုအကျွောင်းကွိုကျောပွီး အောင့်အိုးနေကျော့လေရယ်။ 3434 အယ်းနွောဂ်မောင် ရှုမောင်ဟော် လူပယ့်ငါယယ့်မွေ့ဖော့မျောကွို ဆုတွောင်းပေးပွီး မာရိကွို “ဖရောဆန်ဟော် နန့်ယယ့်လူပယ့်ကွို အစ္စရယ်းလူမျွိုးမျောအကျောမောင် အပှဂ်ပေးခေါင်ယော့ဆူနောင့် ကာတန်ခှန်းခေါင်ယော့ဆူတွို့ကွိုခွားချောဖွို့ ယွီးချာထောတိုမူရယ်။ ဆူဟော် ဖရောဆန်နောင်းခေါ့နမိင့်လဂ်ခနော်တခုဖှဂ်ပေမယ့်လယ်း လူအမျောတွို့ခေါ့ ဆူ့ကွို ညမ်းပါခှန်းကွိုခေါင်ယော့မောင်ဖှဂ်ရယ်။ 35အယ်းယော်ကျွောင့် လူအမျောတွို့ယယ့်စိနလုန်းထားခေါ့ အတွယ်းအမျိုရယ်ဟော်လယ်း ထွပိုလော်ကျော့မောင်ဖှဂ်ရယ်။ အယ်းအပှင် လူတွို့ဟော် ဆူ့အပိုမောင် ဆွိုးဆွိုးဝါးဝါးပှုမူကျော့ရယ့်အတွကျွောင့် ခွှမ်ထရယ့်ဆငါတခွှောင်းခေါ့ နန့်နလုန်းဆောကွို ထွိုးစောဂ်ဝမ်သလွိုမျွိုး ပှန်းပှန်းထောင်ထောင်ကော်တရော်ဝုန်းနယ်းယော့လောဂ်မယ်” လွို့ ဟိုးလေရယ်။ 36ဗိမာန်တိုမောင် အာရှာမျွိုးနွာဝမ်ဖနွေလယယ့် ဆမီးဖှဂ်ဆူပရောဖက်အန္နဟော်လယ်း ဆိနေခယ့်ရယ်။ ဆူဟော် အိင်ထွောင်ကှော့ပွီးခနဂ်နဂ်အကျော်မောင် ဆူ့ယယ့်ယွောဂ်ကျောဟော်ဆေဆိုးလေရယ်။ 37အခုဆူဟော် မွိဆွိုးမော့တဦးဖှဂ်ပွီး အဆဂ်အရွာဟော်လယ်းဆဂ်ဆာ့လေးနဂ်ဆိလွို့ အွိုမန်းနေပီဖှဂ်ရယ်။ ဆူဟော် ဗိမာန်တိုခေါ့နေမထွဆိုးဝါးနောင့်၊ နေ့ညော့မပျဂ် ဖရောဝဂ်ပှုချယ့်ခွိုးခှန်းနောင့် မကျော်မကျော်အစော်ဆွောင်ဥပုသ်စွောင့်ခှန်းတွို့ကွို လုတ်ဆွောင်ရယ့်လူဖှဂ်ရယ်။ 38ရှိမောင်ဟော် မာရိနောင့်ယောသပ်တွို့နောင့်စကောဟိုးနေခှိင်မောင် အန္နဟော်လော်ပွီး ဖရောသခန်ယယ့်ကျယ်းဇူးတိုကွို ခှီးမွမ်းပွီး ဂျေရုဆလင်မွှို့မောင် ယွီးကွောဂ်ကာတန်ခှန်းကွို စွောင့်မျိုနေရယ့်လူအပွေါင်းတွို့ကွို ဟော်လူဆငါယယ့်အကျွောင်းကွို မိင့်လေရယ်။ 39အယ်းအခေါ်မောင် ယောသပ်နောင့်မာရိတွို့ဟော် ဖရောဆန်ယယ့်ပညောဂ်တရောတိုနောင့်အညီ ပှုလုတ်ယော့မယ့်အယော်အောလုန်းကွို လုတ်ဆွောင်ပွီးရယ့်အခေါ် လူပယ့်ငါကွိုခိုပွီး ဆူတွို့ယယ့် နေရောဂ်မွှို့ဖှဂ်ရယ့် ဂါလိလဲပှယ်မောင်ဆိရယ့်နာဇရက်မွှို့ကွို ပှန်ခယ့်ကျော့ရယ်။ 40လူပယ့်ငါလယ်း ကျွီးလော်ရယ့်အခေါ် ဆန်မော်လော်ပွီးညင်ပညော်နောင့်ပှယ့်စုန်လွို့ ဖရောဆန်ယယ့်သဖိုးကှော့ခှန်းကွို ခေါင်စောယော့လေရယ်။ 41နဂ်စန်နဂ်တောင်းမာရိနောင့်ယောသပ်တွို့ဟော် ပသခါပွားတိုbဆန်နွားဖွို့အတွ ဂျေရုဆလင်မွှို့ကွို ဆိုးလေ့ဆိကျော့ရယ်။ 42ကွိုယ်တော်ယေရှုအဆဂ်ဆာ့နေနဂ်အရွာမောင် ဆူနောင့်ဆူ့မွေ့ဖော့တွို့ဟော် ဆိုးနေကျော့အတောင်း ပွါးတိုအခန်းအနောအတွ ဂျေရုဆလင်မွှို့ကွိုဆိုးခယ့်ကျော့လေရယ်။ 43ပသခါပွားတိုပွီးဆုန်းခှိင်မောင် ဆူတွို့ဟော် နာဇရက်မွှို့နောင်းပှန်ကျော့ရယ်။ ဟော်ပေမယ့် လူဆငါယေရှုဟော် ဂျေရုဆလင်မွှို့မောင်ပယ်းနေလေရယ်။ မာရိနောင့်ယောသပ်တွို့ဟော် ဆူတွို့နောင့်အတူ ယေရှုမပေါ်ကျွောင်းကွို မဆိဆကျော့ပယ်း ပှန်လော်ခယ့်ကျော့လေရယ်။ 44မာရိ၊ ယောသပ်တွို့ ဟော် အိင်ပှန်လော်ယော်ခရီးဆိုးလူအုတ်ထားမောင် လူပယ့်ဆငါယေရှုလောဂ်ပေါ်လော်ခယ့်ရယ်လွို့ တွယ်းထန်ခယ့်ကျော့ပွီး တရတ်ကျော်ရယ့်အထိ ခရီးဆဂ်ခယ့်ကျော့လေရယ်။ အယ်းနွေ့ာဂ်မောင် ဆူတွို့ဟော် လူပယ့်ဆငါယေရှုကွိုမတွိယော့ရယ့်အခေါ် ဆွယ်မျွိုးမျောနောင့်မိင့်ဆွေမျောအကျောမောင်လောဂ်ပွီး စော့တန်ချော်ဖွယ်ကျော့လေရယ်။ 45ဟော်ပေမယ့် ဆူ့ကွိုမတွိကျော့ရယ့်အခေါ် ဂျေရုဆလင်မွှို့နောင်းပှန်လော်ခယ့်ကျော့ပွီး လူပယ့်ငါယေရှုကွို ချော်ခယ့်ကျော့လေရယ်။ 46ဆုန်းရတ်ကျော်ရယ့်အခေါ် ဆူတွို့ဟော် လူပယ့်ဆငါယေရှုကွို ဗိမာန်တိုဝမ်းမောင် ဂျူးဖော်ဆော်ရယ်းဆရော်မျောအကျောမောင်ထောင်နေတော်ကွို တွိဆိကျော့ရယ်။ ဆူဟော် ဆူတွို့ယယ့် ဆန်ကျောချဂ်မျောကွိုနောထွောင်ပွီး ဆူတွို့ကွို မေးခွမ်းမျောပှန်မေးနေလေခယ့်ရယ်။ 47လူပယ့်ဆငါယေရှုယယ့် စကောရယ်ကွိုကျောယော့ရယ့်လူတောင်းဟော် ဆူ့ယယ့်ညင်ပညော်နောင့် ဂျူးဖော်ဆော်ရယ်းဆရော်မျောယယ့် မေးခွမ်းမျောကွို ကွောင်းကွောင်းမွမ်မွမ်ပှန်လယ်ဖှေကျောနောင်ပုန်ကွို ကော်တရော်အောင့်အိုးနေကျော့လေရယ်။ 48ယောသပ်နောင့်မာရိတွို့ဟော်လယ်း လူပယ့်ဆငါယေရှုကွိုတွိရယ့်အခေါ် ဆူတွို့ဟော် အောင့်အိုးထိင့်လန့်ကျော့ပွီး ဆူ့ယယ့်မွေ့ခေါ့ “ဆော၊ စော်ကျွောင့် ငေါ်တွို့အပို အယ်းလွိုလုတ်ယော့သလော။ နန့်ဖော့နောင့်ငေါ့မောင် စိပူပွီးချော်ဖွယ်ခယ့်ယော့ရယ်” လွို့ဆွိုလေရယ်။ 49အယ်းအခေါ် လူပယ့်ဆငါယေရှုခေါ့ “စော်ကျွောင့် ငေါ့ကွိုလောဂ်ချော်နေကျော့သလော၊ ငေါ်ဟော် ဖော့ခမည်းတိုယယ့်အိင်တိုမောင်ပယ်း ဆိနေယော့မယ်ဆွိုတော်ကွို မဆိဆကျော့ဘူးလော” လွို့ပှန်ဖှေလေရယ်။ 50အယ်းအခေါ်မောင် ဆူတွို့ဟော် လူပယ့်ဆငါယေရှုဟိုးရယ့်စကောယယ့် အဓိပါကွိုနောမလယ်ကျော့ပေါ်။ 51အယ်းနွောဂ်မောင် လူပယ့်ဆငါယေရှုဟော် ယောသပ်၊ မာရိတွို့နောင့်အတူတူ နာဇရက်မွှို့ကွိုပှန်ကျော့ပွီး မွေ့ဖော့စကောကွိုဆဂ်လဂ်နော်ခေါင်နေလေရယ်။ မာရိဟော် ဟော်အယော်အောလုန်းဖှဂ်ပျဂ်သမျော့ကွို ထောဂ်ခေါ်ထောဂ်ခေါ်တွယ်းနေခယ့်ရယ်။ 52အယ်းနွောဂ်မောင် ကွိုယ်တော်ယေရှုဟော် ကျွီးပှန်းလော်ရယ့်အခေါ်မောင် ကွိုယ်ခန်ဓော်ကျောင့်ခေါင်ဆန်မော်လော်ပွီးညင်ပညော်နဲ့ပှယ့်စုန်ရယ်အခေါ် ဖရောဆန်နောင့် လူအပွေါင်းတွို့ယယ့်သဖိုးကှော့ခှန်းကွိုလယ်း ခေါင်ယော့လေရယ်။
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.