लुका 2
2
येसुकर जन्म
(मति १:१८-२५)
1ह्व बेला बड्खो राजा अगस्टसिन रोमि साम्राज्यभरि#२:१ साम्राज्यभरिस्याउनो-स्याउनो धेरइ राज्य मिलिके बन्ल बड्खो राज्य सेब्बाइ मान्छेल्काइ गन्ति गरइकर लागि नाउँ लेखाइ बाजिके हुकुम गर्ले। 2इत्तिके नाउँ लेखाइ पर्छइ बाजिके हुकुम गर्ल ह्य पइलो चोटि रल्ति। ह्व बेला सिरिया छेत्रकर बडा-हाकिम कुरेनियस रइल। 3बड्खो राजाकर हुकुम अन्सार सेब्बाइ नाउँ लेखाइ आफ्ने-आफ्ने गाउँ या सहरनाइ जाइला।
4ह्व बेला योसेफ पुनि गालिल छेत्रकर नासरत सहरबान राजा दाउदकर सहर यहुदिया छेत्रकर बेथलेहेम गाउँनाइ जाइले। किनारइभने योसेफ दाउद बङ्सकर रइल। 5योसेफिन नाउँ लेखाइलाइ आफिसिन ब्याहाकर कुरो छिन्लि मरियमलाइ पुनि सँगिन लिके जाइले। ह्व बेला मरियम पाइनारि रइलि। 6होलत बेथलेहेमनाइ हक्तिनखेर ने मरियमलाइ नानि पाइनार बेथा लागल्ते। 7योसेफिन पाटि-पउवानाइ कत्थु पुनि ठउँ नपाइके मरियमलाइ गोठनाइ लाकाल्ते। मरियमिन उछि ने जेड्काइ बेटाक पाइलि र थाङ्नोन सेलिकइ डुँडनाइ सुताइलि।
स्वर्गदुत र गोठ्लालत
8बेथलेहेम गाउँकर नजिकइ चोउरिनाइ गोठ्लालत आफ्ने भेडिलत रुँगिकइ राति बसिधर्लाइ रइला। 9पर्भुकर एउटो स्वर्गदुत#२:९ स्वर्गदुत परमेसोरिन सिरिस्टि गर्ल आत्मालत हो। स्वर्गनाइ परमेसोरकर सेवा र आराधना गर्नाराइ सेबकलत। गोठ्लाल्को अगाडि देखा पर्ले र पर्भु परमेसोरकर उज्यालो होल्को वरिपोरि चम्कल्ते। ह्य देखिके गोठ्लालत डरिन थरथर कामइ थाल्ला। 10तर स्वर्गदुतिन होल्काइ बल्-ल्याक, “जुनडाराओ! किनारइभने मुइ सेब्बाइ मान्छेल्को लागि बडो आनन्द दिनार खुसिकर खबर लिके तोराल्को उछि आइलाछु। 11आज राजा दाउदकर सहरनाइ मुक्तिदाताकर जन्म हक्लाछि, ह्व ने परमेसोरिन पाठाइल खिरिस्ट, पर्भु हो। 12तोराल्किन नानिलाइ थाङ्नोन सेलिकइ डुँडनाइ सुताइ धर्ल भेट्टाइनार आछो, हेइबान ने तोराल्किन होलाइ चिन्नारआछो।”
13होइ बेला एक्कासि आने धेराइ स्वर्गदुतलत उछिका देखा पर्ला अनि परमेसोरकर पर्सन्सा गर्तिन इत्तिके गित गिदाइ थाल्ला,
14“स्वर्गनाइ परमेसोरलाइ जयजयकार हक्दिक,
अनि धर्तिकराइ जुन मान्छेल्कोसिन परमेसोर खुसि आछ, होल्काइ सान्ति हकिधर्दिक।”
15स्वर्गदुतलत स्वर्गदिस फर्किलपछि गोठ्लालत एक आपसनाइ बाज्ला, “अब जिउँ, परमपर्भुन हाइलाइ बल्ल कुरो बेथलेहेमनाइ जाइके हेरुँ।”
16होलत हतार-हतार जाइला। उछिका मरियम र योसेफ अनि डुँडनाइ सुताइधर्ल नानिलाइ भेट्टाइला। 17होल्किन ह्य देख्लपछि, नानिकर बारेनाइ स्वर्गदुतिन बल्ल कुरो सेब्बाल्काइ सुनाइदिल्याक। 18ह्य कुरो सुन्नाराइ जत्ति सेब्बाइ छक्क पर्ला। 19तर मरियमिन चाइ ह्य सेब्बे कुरो आफ्ने मननाइ धर्लि र सोच्तिन बस्लि। 20भेडि गोठ्लाल्किन स्वर्गदुतिन बल्लजिन्खाए सुन्ल र देख्ल हुदान, परमेसोरकर महिमा र पर्सन्सा गर्तिन फर्किला।
नानिकर न्वारान
21इज्राएलिल्काइ मोसान लेख्ल परमेसोरकर नियम अन्सार आठउ दिननाइ खतना बिधि गर्तिन होल्किन नानिकर नाउँ येसु धर्ला। ह्य नाउँ चाइ आमेककर गर्बनाइ आइभन्दा अगाडि ने स्वर्गदुतिन धर्दिल रल्ति।#ले १२:३; लुक १:३१
मन्दिरनाइ येसुकर अर्पन
22मोसान लेख्ल परमेसोरकर नियम अन्सार जब मरियमकर चोखिनार समय पुरा हकल्ते, येसुकर आमेक-ब्वाकिन येसुलाइ यरुसलेमकर मन्दिरनाइ परमपर्भुकर अगाडि अर्पन गरइ आन्ला।#ले १२:६-८ 23किनारइभने परमेसोरकर नियमनाइ लेख्लाछि, “पर्त्येक जेड्काइ बेटाक परमपर्भुलाइ दिनारआछ।”#पर १३:२,१२,१५ 24अनि होलत बलि पुनि चाराइ आइला, किनारइभने परमेसोरकर नियम अन्सार चोखइकर लागि “एक जोर ढुकुर या दुइटाइ परेवाकर छ्वाएकलत” बलि चाराइ पर्तेल।#ले १२:८
25ह्व बेला सिमियोन नाउँ हक्ल मानुस यरुसलेमनाइ बस्तेल। ह्व परमेसोरकर आग्या अन्सार हिन्नार र धर्माति मानुस रइल। होइनिन इज्राएलिल्काइ बाचाइनार मानुसकर बाट हेरिधर्ल रइल र परमेसोरकर आत्मा होइसिन रल्ति। 26“परमपर्भुन पाठाइल मुक्तिदाता खिरिस्टलाइ नदेखुन्जेल सम्म तुइ बइमरस” बाजिके पबित्र आत्मान सिमियोनलाइ अगाडि ने बल्ल रल्ति। 27परमेसोरकर आत्मान सिमियोनलाइ मन्दिरनाइ जा बलल्ते, अनि मन्दिरनाइ जाइले। होइ बेला परमेसोरकर नियम पुरा गरइ मरियम र योसेफ पुनि येसुलाइ लिके मन्दिरनाइ आइपुग्ला। 28सिमियोनिन येसुलाइ आफ्ने कोलानाइ बोकिके परमेसोरकर पर्सन्सा गर्तिन बाज्ले,
29“हे परमपर्भु, तुइनिन आफ्ने बाचा पुरा गर्लाछस,
अब तोर सेवा गर्नारलाइ सान्तिसिन बिदा दिक।
30किनारइभने तुइनिन पाठाइल मुक्तिदातालाइ मुइनिन आफ्ने आँखिन देखइ पाइनाइ।
31तुइनिन ह्यलाइ सेब्बे जातकराइ मान्छेल्किन देख्दिखन बाजिके पाठाइलाछस।
32ह्य आने जातिल्को लागि बाट देखाइनार जोति
र तोर आफ्ने इज्राएलि जातिको लागि सम्मान हक्नारआछ।”#यस ४२:६;४९:६;५२:१०
33येसुकर बारेनाइ सिमियोनिन बल्ल कुरो सुनिके येसुकर आमेक र ब्वाक छक्क पर्ला। 34सिमियोनिन होल्काइ आसिर्बाद दिल्याक र येसुकरि आमेक मरियमलाइ बलल्ते, “सुन, ह्य नानि परमेसोरदिस देखाइनार चिन्न हकइलाइ छान्ल हो। धेराइ मान्छेल्किन हेक्र बिरोद गर्नारआछत। हेक्र कारनिन इज्राएलकराइ धेराइ मान्छेल्को नास हक्नारआछि र धेराल्को उद्दार हक्नारआछि। 35इनिखे धेराइ मान्छेल्को हिर्दयकर बिचारलत देखिनारआछि, अनि तोर हिर्दय भने तिखो तरवारिन घोच्काइल जिन्खाए दुखन भरिके छिया-छिया हक्नारआछि।”
36मन्दिरनाइ हन्ना नाउँ गर्लि एउटि अगमबादिनि रइलि। होइ आसेर कुलकर फनुएलकरि बेटेक रइलि। ब्याहा हक्ल सात बर्सपछि ने हेइ बिद्दुइ हक्लि रइलि। 37र होइ चोउरासि बर्स जत्ता हक्लि रइलि। होइनिन मन्दिर बइछाड्तेलि, उपबास बस्तेलि र परमेसोरलाइ पुकार्तिन र पर्सन्सा गर्तिन रात-दिन बिताइतेलि। 38होइनिन पुनि मरियम र योसेफकर छेउनाइ आइके परमेसोरलाइ धन्नेबाद दिल्ते र यरुसलेमकर छुट्कारा दिनारकर बाट हेर्नारकाइ येसुकर बारेनाइ बल्दिल्याक।
योसेफ र मरियम नासरत फर्किला
39जब होलत परमेसोरकर नियम अन्सार गरइ पर्नार सेब्बे काम गरिसकिकइ योसेफ र मरियम येसुलाइ लिके गालिलकर आफ्ने सहर नासरतनाइ फर्किला।#मति २:२३ 40येसु बाढ्तिन बलियो हक्ले। अनि बुद्दि र ग्यानिन भरितिन जाइले र परमेसोरकर आसिर्बाद ह्व उप्रान रल्ति।
येसु मन्दिरनाइ
41येसुकर आमेक-ब्वाक बर्सेउनि निस्तार चाड मानाइ यरुसलेमनाइ जाइनार गर्तेला।#पर १२:१-२७; बेब १६:१-८ 42येसु बार बर्सकर हक्तिन होल्किन आफ्ने चलन अन्सार चाड मानाइ यरुसलेम जाइतिन येसुलाइ पुनि सँगिन लिके जाइला।#२:४२ यहुदि चलन अन्सार बार बर्सर हक्ल पछि छोडारिनाइ गन्ति गर्तेला। 43चाड मानिसक्लपछि येसुकर आमेक-ब्वाक घर फर्कितिन रइला, अनि येसु चाइ यरुसलेमनाइ ने बस्ले। तर येसुकर आमेक-ब्वाकलाइ ह्य कुरो था बइहक्ल्याक। 44येसु आने साथेककोसिन आछ हक्ति बाजिके होलत दिनभोरि हिन्ला। बेहेरा हक्लपछि येसुलाइ होल्किन नातागोता र आफन्तको उछि हेर्ला। 45बेटाकलाइ कत्थु पुनि बइभेट्टाइतिन होलत येसुलाइ हेरइ यरुसलेमदिस फर्किला। 46तिन दिननाइ होल्किन बेटाकलाइ मन्दिरनाइ भेट्टाइला। येसु धर्म-गुरुल्कोसिन बसिके होल्को कुरो सुन्तिन र परस्न सोत्तिन रइल। 47येसुकर ग्यान, बुद्दि र उत्तर सुनिके सेब्बाइ छक्क पर्तेला। 48इत्तिके बेटाकलाइ उछि देखिके येसुकर आमेक-ब्वाक अचम्म हक्ला। आमेकिन सोदल्ते, “ए बेटाक, तुइनिन हाइलाइ किनारइ इन्खा गर्ल? हेर, तोर ब्वार र मुइ तुइलाइ हेर्तिन हइरान हक्ले।”
49येसुन होल्काइ बल्-ल्याक, “तोराल्किन मुइलाइ किनारइ हेर्लाइ? मुइ आफ्ने ब्वाकर घरनाइ हकइपर्छइ बाजिके तोराल्काइ था बइरइल्या?” 50तर ह्य कुरो मरियम र योसेफिन बुजइ बइसक्ला।
51ह्व पछि येसु आमेक-ब्वाकसिन नासरतनाइ फर्किले र होल्को आग्या मानिके बस्ले। येसुकरि आमेक मरियमिन चाइ ह्य सेब्बे कुरो आफ्ने मननाइ धर्लि। 52अनि येसु बुद्दिनाइ, सरिरनाइ र परमेसोर र मान्छेल्को मयानाइ बाढ्तिन जाइले।#१समु २:२६; हि ३:४
© 2024 (Active), Mother Tongue Translators Society and Wycliffe Bible Translators, Inc. All rights reserved.