लुका 17
17
पाप र छेमा
(मति १८:६-७,२१-२२; मर्कुस ९:४२)
1येसुन आफ्ने चेलाल्काइ बल्-ल्याक, “मान्छेल्काइ पापनाइ फसाइनार परिछ्या ता अबस्य आइछइ, तर धिक्कार ह्व मानुसलाइ जुनिन पाप गरइ लाइछइ। 2जुनिन ह्य स्याउनाइ मद्दे एउटोलाइ पाप गरइ लाइछइ होक्र घेन्टिनाइ जाँतो झुन्डाइके समुन्द्रनाइ फ्याङ्दइ होक्र लागि मजार हक्नारआछि। 3होसियार बसो।
“तोर भाएरिन पाप गर्लाछ भने होलाइ सम्जाइ र होइनिन आफ्ने पाप मानिलिके छाड्ले भने तुइनिन होलाइ छेमा दिक।#मति १८:१५ 4तोर भाएरिन दिननाइ सात फेरा तोर बिरुद्दनाइ पाप गर्छइ अनि साते फेरा तुइ हक्लनाइ आइके आफ्ने पाप सुइकार्छइ भने तुइनिन होलाइ छेमा गर्दिक।”
बिस्वास
5पेरितकिन पर्भुलाइ बल्ला, “पर्भु, हाम्रो बिस्वास बाढाइदेउ।”
6पर्भुन बल्-ल्याक, “तोराल्कोसिन पासाइकर एउटि गेडा जत्ता बिस्वास आछि भने तोराल्किन ह्य तुतकर गाछलाइ ‘तुइ उख्लिके समुन्द्रनाइ रोपि जा’ बाज्लो भने होइनिन मान्नारआछ।
बिस्वासिलो नोकर
7“तोरा कुन्नुल्किन आफ्ने नोकरलाइ जोतिकइ वा भेडि चाराइके घरनाइ आइलसात, ‘चानो आइके खाइ बस’ बल्छो र? 8बुरु इत्तिके पो बल्छो, ‘जाइके मोर लागि भात साक पाकाउ अनि पाकिसक्ल पछि मुइलाइ खाइ देउ, ह्व पछि मात्र तुइ खा।’ 9आफिन बल्लठि काम गर्लनाइ नोकरलाइ होइनिन धन्नेबाद दिछि र? 10उन्खाए तोरा पुनि आफिलाइ आराइल काम गरिसक्ल पछि इत्तिके बाजो, ‘हाइ अयोग्य नोकर मात्र हो, हाइनिन ता आफिन गरइ पर्नार काम मात्र गर्लाछे।’”
येसुन दस कुस्ठ रोगिल्काइ बिसेक पार्ल
11येसु यरुसलेम जाइतिन गर्तिन सामरिया र गालिल छेत्रकर सिमाना हक्तिन जाइले। 12अनि एउटो गाउँकर नजिक पुग्तिन दसुटाइ कुस्ठ रोगिल्कोसिन येसुकर भेट हकल्ते। बद्दुर ठडाइके होल्किन 13बड्खो सोरिन बाज्ला, “हे येसु, गुरु हाइलाइ दया गर।”
14येसुन होल्काइ हेर्तिन बल्-ल्याक, “तोरा पुजारि हक्लनाइ जाइके आफिलाइ देखाओ।” होलत जाइतिन-जाइतिन बाट्नाइ ने कुस्ठ रोगबान बिसेक हकिहाल्ला।#ले १४:१-३२
15होलत मद्दे एउटोन आफि बिसेक हक्ल था पाइले र बड्खो सोरिन परमेसोरकर पर्सन्सा गर्तिन फर्किके आइले। 16ह्व येसुकर गोडनाइ घोप्टो परिके येसुलाइ धन्नेबाद दिल्ते। ह्व एउटो सामरि रइल। 17येसुन बाज्ले, “कुस्ठ रोगबान बिसेक हक्लाइ दसुटाइ बया र? आने नउटाइ चाइ कछि आछत? 18ह्य सामरि बाएक आनेलत चाइ परमेसोरकर पर्सन्सा गरइ किनारइ बइआइला?” 19अनि येसुन होलाइ बलल्ते, “उठ र आफ्ने बाट लाग। तोर बिस्वासिन तुइ बिसेक हक्लाछस।”
परमेसोरकर राज्य
(मति २४:२३-२८,३७-४१)
20एक दिन फरिसिल्किन येसुलाइ सोद्ला, “परमेसोरकर राज्य कखन आइछि?”
येसुन होल्काइ बल्-ल्याक, “परमेसोरकर राज्य देख्नार गरिके बइआइ। 21कुन्नुल्किन पुनि ‘हेरो, परमेसोरकर राज्य इछि आछि, उछि आछि’ बाजिके बाजइ बइसकत किनारइभने हेरो, परमेसोरकर राज्य ता तोराल्के माजनाइ#१७:२१ माजनाइ अर्थात भित्र आछि।”
22अनि येसुन आफ्ने चेलाल्काइ बल्-ल्याक, “इन्खा समय पुनि आइनारआछि, जब तोराल्किन मानुसकर बेटाककर कुनइ एक दिन हेर्नार मन गर्नारआछो तर तोराल्किन देखइ बइपाओ। 23मान्छेल्किन तोराल्काइ ‘हेरो, मानुसकर बेटाक इछि आछ’ अथवा ‘हेरो, उछि आछ’ बाज्नारआछत, तर होल्को पछि जुनलागो। 24किनारइभने मानुसकर बेटाक आइतिन बिजुलि चम्कितिन आकासकर एक छेउबान अर्को छेउसम्म उज्यालो हक्ल जिन्खाए सेब्बाल्किन देख्नार गरिके आइनारआछ। 25तर इन्खा हकइ भन्दा पइला मानुसकर बेटाकिन धेरइ दुख भोगइ पर्छि अनि ह्य पुस्ताराइ मान्छेल्किन होलाइ इन्कार गर्नारआछत। 26अनि नोआकर पालोनाइ हक्ल जिन्खाए मानुसकर बेटाक आइतिन पुनि उन्खाए हक्नारआछि।#उत ६:५-८ 27नोआ जहाजनाइ पसिसक्तिन पुनि मान्छेलत भोज-भतेर खाइतिन र ब्याहाबारि गर्तिन रइला। होइ बेला ने जलपरलय हकल्ते र सेब्बाल्काइ नस्ट पार्ल्याक।#उत ७:६-२४ 28लोतकर समयनाइ पुनि इन्खाए हक्ल रल्ति। मान्छेलत खाइतिन-पितिन, किनबेच गर्तिन, बालि लाइतिन र घर बानाइतिन रइला। 29तर जुन दिन लोतिन सदोम सहरलाइ छाडिके जाइले, आकासबान आगि र गन्धक परिके सेब्बाल्काइ भस्म पार्ल्याक।#उत १८:२०;१९:२५ 30मानुसकर बेटाक आइनार दिननाइ पुनि इन्खाए हक्नारआछि।
31“ह्व बेला घरकर छतनाइ हक्नाराइ सर-सामान लेइ हेठ्ठ जुनझरो। उन्खाए खेतनाइ हक्नाराइ पुनि फर्किके घर जुनआइदिखन।#मति २४:१७-१८; मर्क १३:१५-१६ 32लोतकरि बोहेकलाइ याद गरो।#उत १९:२६ 33जुनिन आफ्ने जिबन बाचाइ चाइछइ, होइनिन ह्व गुमाइछइ अनि जुनिन आफ्ने जिबन गुमाइछइ, होइनिन ह्व बाचाइनारआछ।#मति १०:३९;१६:२५; मर्क ८:३५; लुक ९:२४; युह १२:२५ 34मुइ तोराल्काइ बल्छु, ह्व रात एउटे ओछ्याननाइ सँगिन सुतलाइ दुइटाइ मद्दे एउटोलाइ लाकाइनारआछ र अर्को चाइ छाडिनारआछ। 35सँगिन जाँतो पिन्तिन गर्लाइ दुइटि बेटिलत मद्दे एउटि लाकाइनारआछि र अर्कि चाइ छाडिनारआछि। 36[उन्खाए खेतनाइ काम गर्नाराइ दुइटाइ मद्दे एउटो लाकाइनारआछ र अर्को चाइ छाडिनारआछ।”]#१७:३६ धेरइ जसो सोरोतनाइ ह्य पद लेख्ल बइपाय।
37अनि चेलाल्किन येसुलाइ सोद्ला, “ह्य कछि हक्नार हो पर्भु?”
येसुन होल्काइ बल्-ल्याक, “जछि सिनो आछि, उछि गिद्द जम्मा हक्छत।”
© 2024 (Active), Mother Tongue Translators Society and Wycliffe Bible Translators, Inc. All rights reserved.