लुका 15
15
नाठ्ल भेडाकर उखान
(मति १८:१२-१४)
1एक दिन कर उठाइनाराइ र पापिलत सेब्बाइ येसुकर सिछ्या सुनइलाइ नजिक आइधर्लाइ रइला। 2फरिसि र धर्म-गुरुलत “ह्य मानुसिन ता पापिल्काइ स्वागत गर्छइ र होल्कोसिन बसिके खाइछइ” बाजिके गनगन गरइ लाग्ला।#लुक ५:२९-३० 3येसुन होल्काइ एउटो उखान बल्-ल्याक,
4“तोरा मद्दे कुन्टो मानुस हुदो, जुनकर सयटाइ भेडि मद्दे एउटो नाठ्तिन उनान्सयलाइ चर्ल ठउँनाइ छाडिके नाठ्ल भेडिलाइ नभेटाउन्जेल सम्म बइहेरक र? 5नाठ्ल भेडि भेट्टाइल पछि ह्व रामाइतिन भेडिलाइ आफ्ने काँधिनाइ बोकिके आन्छि। 6अनि घरनाइ आइके आफ्ने साथेककाइ र छिमेकिल्काइ बालाइके बल्छ्याक, ‘मुइसिन रामाओ, किनारइभने मुइनिन आफ्ने नाठ्ल भेडि भेट्टाइलाछु।’ 7मुइ तोराल्काइ बल्छु, इनिखे आफ्ने पाप मानिलेइ बइपर्नार उनान्सय धर्मातिल्को लागि भन्दा आफ्ने पाप मानिलिके फर्किनार एउटो पापिकर लागि स्वर्गनाइ अजइ बढ्ता खुसियालि हक्नारआछ।”
नाठ्ल सिक्काकर उखान
8फेरि येसुन होल्काइ अर्को एउटो उखान बल्-ल्याक, “एउटि बेटिन दसुटो चाँदिकर सिक्का मद्दे एउटो नाठाइलि भने होइनिन ह्व सिक्का नभेटाउन्जेल सम्म बत्ति जिगाइके घर बाढालिकइ मजसिन बइहेरक र? 9नाठ्ल सिक्का पाइल पछि होइनिन आफ्ने साथेक र छिमेकिल्काइ बालाइके बल्छ्याक, ‘मुइसिन रामाओ, किनारइभने मोर नाठ्ल सिक्का मुइनिन भेट्टाइनाइ।’ 10मुइ तोराल्काइ बल्छु, इनिखे ने आफ्ने पाप मानिलिके फर्किनार एउटो पापिकर लागि परमेसोरकर स्वर्गदुतलत पुनि खुसि हक्नारआछत।”
नाठ्ल बेटाककर उखान
11फेरि येसुन अर्को एउटो उखान पुनि बल्-ल्याक, “एउटो मानुसकर दुइभाइ बेटाकलत रइला। 12कान्छा बेटाकिन ब्वाकलाइ बलल्ते, ‘ब्वा, मोर भागनाइ पर्नार धन-सम्पतिकर अङ्स मुइलाइ देउ।’ अनि ब्वाकिन आफ्ने सम्पति धेभाल्काइ बाँड्दिल्याक। 13केइ दिन पछि कान्छाइ बेटाकिन आफ्ने सेब्बे धन-सम्पति लिके बद्दुरकर देसनाइ जाइले। होइनिन उछि सेब्बे धन-सम्पति मोज-मस्ति गरिके उडाइले। 14होइनिन सेब्बे धन-सम्पति सिद्याइल बेलानाइ ह्व देसनाइ बड्खो अनिकाल परल्ते र होइनिन किछु पुनि खाइ बइपाइले। 15होइ हुदान ह्व देसकर एउटो मानुसिन काम मागइ जाइले र ह्व मानुसिन होलाइ खेतनाइ सोरि चाराइनार काम दिल्ते। 16अनि होलाइ कुन्नुल्किन पुनि खाइनार कुरो बइदितेनिन होइ हुदान होइनिन सोरिकर चारो खाइके आफ्ने पेट भर्नार मन गर्तेल। 17जब होक्र चेत खोलल्ते र होइनिन बाज्ले, ‘मोर ब्वाककर घरनाइ धेराइ नोकरकिन पेटभोरि खाइके उब्राइछत, तर मुइ चाइ इछि भोकिन मरइ आट्लाछु। 18अब मुइ आफ्ने ब्वाकर घरनाइ फर्किके जाइछु र बाज्नारआछु, “ब्वा, मुइनिन परमेसोर र तोर बिरुद्दनाइ पाप गर्लाछु। 19अबसिन मुइ तोर बेटार बाजइ योग्यकर बइने तर मुइलाइ तोर नोकरलत मद्दे एउटो नोकर जिन्खाए सम्जिकइ धर।”’ 20अनि ह्व उठिके आफ्ने ब्वाककर घरनाइ फर्किले। ब्वाकिन होलाइ बद्दुरबान ने आइतिन गर्ल देख्ले र ब्वाककर मन दयान भरल्ते अनि कुत्तिन जाइके खुसि हक्तिन बेटाकलाइ आँगालो मारिकइ मइँ खाल्ते।
21“बेटाकिन ब्वाकलाइ बलल्ते, ‘ब्वा, मुइनिन परमेसोर र तोर बिरुद्दनाइ पाप गर्लाछु। अबसिन मुइ तोर बेटार बाजइ योग्यकर बइने।’ 22तर ब्वाकिन नोकरकाइ बालाइके बल्-ल्याक, ‘झट्टइ जाइके सबभन्दा मजार लुगा, अउँठि र जुत्ता आनिकइ ह्यलाइ लाइदिक। 23अनि पोस्याइ धर्ल पसु काँटो र हाइ खाइके खुसियालि मानाउ। 24किनारइभने ह्य मोर बेटाक मर्ल रइल, फेरि जिउँते हक्लाछ, नाठ्ल रइल, अब भेट्टाइलाछु।’ अनि होलत खुसि हक्तिन भोज खाइ थाल्ला।
25“उति बेला होक्र जेड्काइ बेटाक खेतनाइ रइल। ह्व फर्किके घरनेरि आइपुग्तिन होइनिन बाजा बाजाइकइ नाचगान गर्ल आवाज सुन्ले। 26होइनिन एउटो नोकरलाइ बालाइके ‘ह्य केति हकिधर्लाछ?’ बाजिके सोदल्ते। 27नोकरिन बाज्ले, ‘तोर भाएर सकुसल र सुरछित साथ फर्किके आइलाछ। होइ हुदान तोर ब्वारिन पोस्याइ धर्ल पसु काटिके बड्खो भोज लाइके खुसियालि मानाइल हो।’ 28ह्य सुनिके ह्व एकदम रिसाइले र घरभित्र जाइ बइमान्ले। ब्वाक बाइर आइके होलाइ फाकाइ थाल्ले। 29तर होइनिन ब्वाकलाइ बलल्ते, ‘यत्रा बर्ससम्म मुइनिन तोर सेवा गर्नाइ र तुइ बल्ल सेब्बे कुरो मान्नाइ तर पुनि तुइनिन मुइलाइ साथिकोसिन बसिके खुसियालि मानाइलाइ एउटो पाठासम्म बइदिलइ। 30तर तोर धन-सम्पति बेस्याकोसिन उडाइनार बेटार आइतिन चाइ तुइनिन पोस्याइ धर्ल पसु काटिके भोज लाइलइ।’ 31अनि ब्वाकिन होलाइ बलल्ते, ‘हेर, तुइ ता सदइ मुइसिन आछस र मुइसिन हक्ल सेब्बे सम्पति पुनि तोरे हो। 32आज हाइ खुसि हकिके आनन्द मानाइ पर्छइ किनारइभने ह्य तोर भाएर मर्ल रइल, फेरि जिउँते हक्लाछ, नाठ्ल रइल, अब भेट्टाइलाछे।’”
© 2024 (Active), Mother Tongue Translators Society and Wycliffe Bible Translators, Inc. All rights reserved.