Luke 22
22
Jesu tha thalot ma wan aa
(Matthew 26:1–5; Mark 14:1,2; John 11:45–53)
1Jehudi tang Ulit ta miing aa Wung moq phan kut aa kan alo ang moq sey angta. 2Ajong tingwa tang etho Thong tataltey tang tha miqtang ma chota, req ning aa Jesu tha shu shu eq tatik ma lam bita.
Judas aa Jesu tha sang ma wan aa
(Matthew 26:14–16; Mark 14:10,11)
3Etho Thangwa tha Judas hanphung náng nopta bara Iscariot ta thamiing aa, piq sha ujiphantey tang asi ani mong wang ashey angta. 4Etho Judas tha ka eq ajong tingwa tang etho rangnuk him bantey solwa tang jamoq chamal eq Jesu raa ning ma sangwang táng ta raaq wan ta. 5Etho ning tha sungrang ang eq Judas ma ngin kot ma batta. 6Judas aa cham ang moq ta batta etho miqtang thima tasam hunga Jesu tha lo eq ning jak o kot ma lam bita.
Jesu ulit kut aa kan phaksat ma kacha aa
(Matthew 26:14–16; Mark 14:10,11)
7Wung moq phan kut aa kan saal o Ulit rangma kelwut sa tang tatik ma thuta. 8Jesu aa, Peter nia John ma iri raaq raa bat eq takat ta: “Ka eq hiqtang rangma Ulit kut aa kan phaksat phaksat ma kacha inn.”
9Ningni aa piq ma pitta, “Nang aa iri baro kacha ma nuk u?”
10Piq aa batta, “Nimni ajong samhaq náng ka shin jo, ashey miq tachong shin nin, barey jungchik som eq kachey na. Piq ji jio piq bari him náng wang aa eshi him náng wang shin. 11Etho eshi him tangteywa shima bat shin: ‘Tatalteywa bat aa, bari himkhok ro nga nia ijiphantey tang Ulit kut aa kan phaksat ni?’ 12Piq aa nimni ma aluk na ajong asang hal himkhok takhi shin phanin, bari katáng ro uphan kacha chol angna.”
13Ningni ka eq siin atho Jesu aa chamal batta thimal khakla ethimal hun angta etho ningni aa esho Ulit kut aa kan ma kacha shing ta.
Teyhungwa phaksat
(Matthew 26:26–30; Mark 14:22–26; 1 Corinthians 11:23–25)
14Baluk o rangham sey thu atho, Jesu aa apostle tang jamoq phaksat phaksat ma tong ta. 15Piq aa ning ma batta, “Nga tsamnang kapwey mong jakho nim jamoq tong eq iri Ulit kut aa kan phaksat ma rapney nuk táng. 16Nga nim ma batphang, Shkewa Mungtan na ira tahom wey moq ling nga adak Ulit kut aa kan phaksat phaksa mong ang náng.”
17Ethi jio Jesu aa ashey kok som eq, Shkewa ma kechu ajong kot eq batta, “Iri som eq nim thaji aa phal ling inn. 18Nga nim ma ira batphang, Shkewa Mungtan thuwey moq ling nga iri sutichi raa ling mong ang náng.”
19Ethi jio piq aa ashey banlo som eq, Shkewa ma kechu ajong kota, pin eq ning thima kot eq batta, “Ira ihanngam, bara nim rangma kota. Nga tasik ma irimal som chey ro eq inn.” 20Irimal hun, phaksat jio, piq aa ning ma kok tha kot eq batta, “Iri kok wang sutichi raa itahi bara nim rangma qhan ta etho Shkewa jamoq anal raaqkhak hun aa.”
21 “Etharin siin inn! I sangtey wa ijamna tong aa! 22Miqna Sa raa Shkewa chamal tathin ta thimal hun tina, etharin usangteywa shima chamtan tsamnang angna!”
23Etho ning ni ning jaktung o tapit pita, “Hiqtang wang irimal somtey utang angna?”
Utang thaji pheywang eq ajong ta thadan aa
24Ujiphantey tang jaktungna utang thaji pheywang eq ajong ta iri raaq rima ning ni ning jaktung o rong thadan ta. 25Jesu aa ning ma batta, “Thongking tang lungwang tang aa ning miqtang jakho o ning tarong takhi aa, etho jaktáng na shingtey tang aa ning ni ning sha ‘Miqtang nokwa noknu’ ta shing aa. 26Etharin nim jaktung na irimal nak ang inn; bara thaji pheywang eq ajong angma nuk asha thaji pheywang aming ang ching, etho solwa tang sha sanga mal ang ching. 27Utang ajong aa, barey phaksat ma tong aa sha tia barey phakshat timphal kot aa sha? Barey phaksat ma tong aa sha hun ajong, etharin nga nim jaktung na phal kottey mal.
28 “Nga chamtan tsamnang tang ling sha nim ijamna ang tin; 29Etho Iwa aa nga ma jaqhal jaktáng o shing ma kotphang, req nga tho irimal hun nim ma jaktáng o shing kopha náng. 30I mungtan na nim aa ijamoq tong eq ling phaksat nin, etho nim asi ani Israel phan tang phung eq lungwang tang tongching na tong nin!”
Peter ulik angna ta Jesu aa bat aa
(Matthew 26:31–35; Mark 14:27–31; John 13:36–38)
31 “Simon! Simon! Tat u! Pik tapiktey tang aa chamal eq wong wang chamti tal bichak aa thimal, Thangwa nim raa khaphung ma chuta. 32Etharin Simon, ba aa kam ri nak cham kum aa ta nga barang ma romtam chu kotphang. Etho nang baluk o kaley eq kaphanu, ethi tok o nang aa ba pho no tang ma tho taching cham kot u.”
33Peter aa thawel batta, “Teyhungwa, nga ba jamoq chuk náng wáng ma etho ba jamoq tikma tho kacha ang!”
34Jesu aa batta, “Peter nga batphang, inap rangnap wo wal wey moq jakho taktom nang aa nga shampha mong ta bat phanu.”
Ngin khak, khak, jangtong
35Etho Jesu aa ujiphantey tang ma pitta, “Baluk o nga nim ma ngin khak, khak etho jaaqhong som hunga takat taphang tho, nim ma chamli ukum angta i?”
Ning aa thawel batta, “Ang moq.”
36Jesu aa batta, “Etharin thanga, utang jakna ngin khak etho khak shi som inn; etho utang jakna jaan ahungtey shey khat sha sang eq ri inn. 37Asang likwit na bat aa, ‘Piq sha tho miq duktey jamna wet ta’ etho iri tung araaq raa asing ang ching, chammatakoi itung araaq taka aa sha asing thu phana.”
38Ujiphantey tang aa batta, “Siin inn! Teyhungwa irina jaantong ani!”
Piq aa thawel batta, “Ira lali!”
Jesu aa Olive haqkang na romtam chu aa
(Matthew 26:36–46; Mark 14:32–42)
39Jesu aa samhaq tha shingchak ta etho piq aa som chey ta thimal Olive haqkang náng thuta; etho ujiphantey tang tho ujamoq kata. 40Eshi haq náng sey thu atho piq aa ning ma batta, “Tari náng qhat moq angma romtam chu inn.”
41Etho piq anitom jakho náng ka eq, langku o tong eq romtam chuta. 42Piq aa batta, “Iwa, nang unuk ang ujo iri tsamnang kok ri iching wang tathey chak u. Etharin itin nuk o ang moq, ba tinuk o hun cham ang aa.” 43Mungtan wang rangkamwa thu eq piq ma tharong kota. 44Utin na tsamnang ang eq piq aa jujong jong aa romtam chuta; etho piq ranglom chee tha tahi mal haq náng saal ta.#22:44 Aking likwit tang na vs 43 44 ahung
45Romtam chuk wang tunnshat eq, piq ujiphantey tang ching thináng wey wel atho ning tha tin tashit wang nángti eq ujib angta tha khita. 46Piq aa ning ma batta, “Nim chamlang ma jib inn? Tari náng nak cham qhat inn ta shat eq romtam chu inn.”
Jesu tha lo aa
(Matthew 26:47–56; Mark 14:43–50; John 18:3–11)
47Jesu aa iri raaq raa bat ko chey atho, waanshey kachey tapha etho asi ani wang ashey Judas tha ning jakho kho kachey tapha. Piq tha ka eq Jesu tha chip ta. 48Etharin Jesu aa batta, “Judas, nang aa Miqna Sa sha chip eq sang u i?”
49Ujiphantey tang bara Jesu jamna angta tang they chamlang ang chey atha kap khi eq ning aa pitta, “Teyhungwa, í aa jaantong lat i?” 50Etho ning wang ashey tha ka eq ajong tingwa tang solwa sanga wa aqha ko naq tha chonduk chak ta.
51Etharin Jesu aa batta, “Thanga lali sey!” Etho piq aa ethiwa naq tha lo eq taqhal ta.
52Etho Jesu aa ajong tingwa tang etho rangnuk him bantey tang solwa etho miqlang tang bara piq lot ma thuta tang thima batta, “Nim aa nga raa ahut ta sam eq jantong nia kantha som eq thu taphin i? 53Nga salwet Rangnuk him na nim jamna ang táng tho, nim wang utang eq tho nga lot ma tathin min ang tin. Etharin ira nim rangham hun, etho rangnak jaktáng o shing rangham.”
Peter aa Jesu ma sampha mong ta bat aa
(Matthew 26:57,58,69–75; Mark 14:53,54,66–72; John 18:12–18,25–27)
54Ning aa Jesu tha lo eq ajong tingwa tang solwa him náng solkat ta; etho Peter aa alo na piq ji tha phanta. 55Esho himthal jaktung na miqtang aa wal tak eq rongtong chey ta, etho Peter tha tho ning jamoq rok tong kata. 56Ashey sanga nu aa Peter tha wal kang na tong chey atha khi eq piq ching náng siin eq batta, “Iri miq raa tho Jesu jamna angta!”
57Etharin Peter aa batta, “Miqnu, nga piq raa sham mong!”
58Chomwey jio, ashey miqwa aa piq ma batta, “Nang tho ning jaktung wang.”
Peter aa batta, “Miqwa, nga ang mong!”
59Rangham ashey jio, ashey miqwa arong eq batta, “Chamal o tho, nga usam eq ang, iri miq raa tho piq jamna angta chammatakoi piq raa tho Galilee miq!”
60Etharin Peter aa thawel batta, “Miqwa, nang aa chamta bat u raa nga sam mong!”
Khakla piq raaq chey atho wopong tha wal ta. 61Teyhungwa ngik eq Peter ching náng siin ta, etho Peter aa Teyhungwa raaq bat tha tasik ta, “Inap rangnap wopong walwey moq jakho, nang aa nga raa sampha mong ta taktom bat phanu.” 62Peter ran náng ka eq rapney qhap ta.
Jesu tha tharakri eq wat aa
(Matthew 26:67,68; Mark 14:65)
63Bari miqwa tang rey Jesu banta ning aa Piq tha tharakri eq wat ta. 64Ning aa piq miik tho ashey khatlo eq khak eq pitta, “Tat tathin eq bat u? Nang utang eq wat ta!” 65Etho piq tha tharakri thima ning aa adak uphan phan rong pitpi ta.
Jesu tha Jehudi Rong náng thok sol aa
(Matthew 26:59–66; Mark 14:55–64; John 18:19–24)
66Rangnap sey thu atho, miqlang tang, ajong tingwa tang, etho Thong tataltey tang tha arum aa tachong eq Jesu tha Jehudi Rong náng solkat ta. 67Ning aa pitta, “Í ma bat phu, nang raa Khristo i?”
Jesu aa thawel batta, “Nga bat phang jo nim aa han phamin ang phanin; 68Etho nga nim ma raaq pit phang jo nim aa thawel bat phamin ang phanin. 69Etharin thaney jiwang Miqna Sa raa Shkewa jakqha kona tong na.”
70Ning thaji aa batta, “Nang raa Shkewa sa i?”
Piq aa ning ma thawel batta, “Nga raa ta nim aa battin.”
71Etho ning aa batta, “Hiqtang ma adak miikkhi kotching ráa moq sey! Piq aa chamta batta tha í aa tat sey ti!”
CC BY-NC-ND 4.0